Gipabilhan Mo ba ang Tigulang nga mga Isigkamagtutuo?

SA DIHANG ang katawhan sa karaang Israel nailalom sa pakigtugon nga relasyon uban sa Diyos, sila gisugo: “Atubangan sa buhok nga ubanon motindog ka, ug magpakita ka ug pagtamod sa tawong tigulang, ug kahadlokan mo ang imong Diyos.” (Levitico 19:32) Busa, ang pagtahod sa mga tigulang maoy sagradong katungdanan, nga nalangkit sa pagpasakop sa Diyos. Bisan pag ang mga Kristohanon karon dili na ilalom sa Moisesnong Balaod, nagpahinumdom kini kanato nga gilantaw ni Jehova ang mga tigulang nga nag-alagad kaniya ingong bililhon. (Proverbio 16:31; Hebreohanon 7:18) Susama ba ang atong panglantaw nianang iya ni Jehova? Gipabilhan ba nato ang atong tigulang nga Kristohanong mga igsoong lalaki ug babaye?

Gipabilhan Niya ang Iyang Mas Tigulang nga Higala

Ang usa ka asoy sa Bibliya nga nagpasiugda sa pagpakitag pagtahod sa mga tigulang makita diha sa basahon sa Ikaduhang Hari. Naundan kini sa usa ka paghulagway kon sa unsang paagi ang manalagnang si Elias gipulihan sa mas manghod nga manalagnang si Eliseo. Tagda kon unsay nahitabo sa kataposang adlaw ni Elias ingong manalagna sa napulo-ka-tribong gingharian sa Israel.

Nianang adlawa, ang tigulang nga manalagna gisugo ni Jehova nga mopanaw gikan sa Gilgal ngadto sa Bethel, gikan sa Bethel ngadto sa Jerico, ug gikan sa Jerico ngadto sa Suba sa Jordan. (2 Hari 2:1, 2, 4, 6) Panahon sa maong panaw nga duolag 50 kilometros, katulo giingnan ni Elias si Eliseo nga mohunong sa pagsunod kaniya. Apan, maingon nga wala gayod biyai sa batan-ong si Ruth si Noemi kasiglohan kanhi, wala usab biyai ni Eliseo ang mas tigulang nga manalagna. (Ruth 1:16, 17) Si Eliseo miingon sa tulo ka higayon: “Ingon nga si Jehova buhi ug ingon nga ang imong kalag buhi, dili ako mobiya kanimo.” (2 Hari 2:2, 4, 6) Nianang higayona, si Eliseo nakaabag na kang Elias sulod sa mga unom ka tuig. Bisan pa niana, gusto niyang moalagad kang Elias kutob sa mahimo. Gani, ang asoy midugang: “Nahitabo nga sa naglakaw sila, nga nagsultihanay samtang naglakaw, tan-awa! . . . si Elias mikayab.” (Bersikulo 11) Si Elias ug Eliseo nagsultihanay hangtod gayod sa kataposang gutlo sa ministeryo ni Elias sa Israel. Ang manghod nga manalagna dayag nga maikagon sa pagdawat ug daghang instruksiyon ug pagdasig kutob sa mahimo gikan sa mas tigulang ug mas eksperyensiyadong manalagna. Dayag nga gipabilhan niya ang iyang mas tigulang nga higala.

‘Ingong mga Amahan ug mga Inahan’

Dili lisod sabton kon nganong gihigugma ni Eliseo ang mas tigulang nga manalagna ingong usa ka higala—ingong usa pa gani ka espirituwal nga amahan. (2 Hari 2:12) Sa wala pa matapos  ang asaynment ni Elias sa Israel, siya miingon kang Eliseo: “Pangayo kon unsay akong buhaton alang kanimo sa dili pa ako kuhaon gikan kanimo.” (Bersikulo 9) Busa hangtod gayod sa kataposan, si Elias nagpakitag kahingawa alang sa espirituwal nga kaayohan sa iyang manununod ug alang sa pagpadayon sa buluhaton sa Diyos.

Karong adlawa, makapalipay ang pagkakita sa samang amahanon ug inahanon nga kahingawa diha sa atong tigulang nga Kristohanong mga igsoong lalaki ug babaye samtang madagayaon silang nagpaambit sa ilang kahibalo ug kaalam ngadto sa mga batan-on. Pananglitan, ang dugay nang mga boluntaryo nga nag-alagad sa mga sangang buhatan sa mga Saksi ni Jehova kinabubut-ong nagtabang sa bag-ong mga membro sa pamilyang Bethel nga makabaton ug kahanas nga ilang gikinahanglan sa paghimo sa ilang pag-alagad. Sa samang paagi, ang nagapanawng mga magtatan-aw ug ilang mga asawa kinsa nagaduaw sa mga kongregasyon sulod sa daghang tuig malipayong nagpaambit sa dagaya nilang kasinatian uban niadtong ginabansay sa pag-alagad ingong nagapanawng mga ministro. Dugang pa, diha sa mga kongregasyon sa mga Saksi ni Jehova sa tibuok yuta, dunay tigulang nga mga igsoong lalaki ug babaye nga matinumanong nag-alagad kang Jehova sulod sa daghang dekada ug kinsa malipayong nagpaambit sa ilang praktikal nga kaalam ug kasinatian uban sa bag-ong mga membro sa kongregasyon.—Proverbio 2:7; Filipos 3:17; Tito 2:3-5.

Ang kinasingkasing nga kahingawa nga gipakita niining minahal nga tigulang nga mga Kristohanon naghimo sa pagpakitag pagtahod ngadto sa maong mga tigulang nga usa gayod ka kalipay. Busa, gusto natong sundogon ang panig-ingnan ni Eliseo pinaagi sa dulot nga pagpabili sa tigulang nga mga isigkamagtutuo. Sama sa gipahinumdom kanato ni apostol Pablo, magpadayon kita sa pagtratar sa “usa ka tigulang nga lalaki . . . ingon sa usa ka amahan” ug sa “tigulang nga mga babaye ingong mga inahan.” (1 Timoteo 5:1, 2) Pinaagi sa paghimo niana, kita dakog ikaamot sa maayong paglihok ug pag-uswag sa Kristohanong kongregasyon sa tibuok kalibotan.

[Hulagway sa panid 30]

Si Eliseo buot moalagad uban kang Elias kutob sa mahimo

[Mga hulagway sa panid 31]

Ang mga batan-on dakog kaayohan nga makuha gikan sa tigulang nga mga Kristohanon