Mga Pangutana Gikan sa mga Magbabasa

Diha sa daghang dapit sa kalibotan, naandan na ang paghatag ug mga regalo sa kasal. Unsang Kasulatanhong mga prinsipyo ang angay natong tagdon sa dihang maghatag o magdawat sa maong mga regalo?

Ang Bibliya nag-uyon sa paghatag ug gasa kon buhaton kini uban ang hustong motibo ug anaa sa hustong okasyon. Mahitungod sa pagpanghatag, ang Bibliya nagdasig sa matuod nga mga Kristohanon sa pagsundog sa ilang mahinatagong Tigtagana nga si Jehova. (Santiago 1:17) Si apostol Pablo nag-awhag sa mga isigka-Kristohanon: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.” Busa, gidasig ang mga Kristohanon nga magmahinatagon.—Hebreohanon 13:16; Lucas 6:38.

Komosta ang paggamit ug usa ka gift registry, nga usa ka komon nga batasan sa Tinipong Bansa? Sa Inglaterra, gitawag kini nga listahan sa kasal. Kasagaran, ang kaslonon magparehistro diha sa usa ka tindahan pinaagi sa pagsusi sa mga baligya sa maong tindahan ug paghimog listahan sa mga butang nga gusto nilang madawat ingong mga regalo. Ang mga paryente ug mga higala sa kaslonon sugyotan nga moadto sa usa ka haom nga tindahan aron paliton ang butang nga anaa sa listahan sa kaslonon. Gikan sa praktikal nga panglantaw, kon dunay gift-registry nga listahan, ang maghatag sa regalo dili na mogugol ug daghang oras sa pagpangita niana, samtang ang modawat sa regalo dili na usab mahasol sa pag-uli sa wala kinahanglanang mga regalo ngadto sa tindahan.

Kon ang kaslonon gustong mogamit ug usa ka gift registry, kana maoy usa ka personal nga desisyon. Apan, ang usa ka Kristohanon buot gayong mag-amping nga malikayan ang bisan unsang mga batasan nga tingali makalapas sa mga prinsipyo sa Bibliya. Pananglitan, komosta kon ang minyoonon maglista lamang sa mahalon kaayong mga butang? Sa maong kahimtang, kadtong limitado ang kuwarta mahimong dili makahatag ug regalo, o tingali mobati sila nga mas maayo pag balibaran na lang ang imbitasyon sa pagtambong sa kasal aron dili sila maulawan nga magdalag regalo nga baratohon. Usa ka Kristohanong babaye misulat: “Ang paghatag ug regalo nahimong hilabihan na ka bug-at. Naningkamot ko nga mahimong mahinatagon, apan di pa dugay ang tanang kalipay nga akong bation unta sa paghatag nahanaw.” Pagkamakapaguol hunahunaon kon ang usa ka kasal mahimong tinubdan sa kahigawad!

Dayag nga ang naghatag ug regalo dili angayng mobati nga aron dawaton ang ilang regalo, kini kinahanglang paliton gikan sa usa ka espesipikong tindahan o kinahanglang dili mokubos sa gisugyot nga kantidad. Kon buot hunahunaon, gipaila ni Jesu-Kristo nga ang labing bililhon sa panan-aw sa Diyos mao ang tinamdan sa kasingkasing sa naghatag, dili ang materyal nga kantidad sa regalo. (Lucas 21:1-4) Sa samang paagi, bahin sa mga gasa sa kaluoy ngadto sa mga nanginahanglan, si apostol Pablo misulat: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.”—2 Corinto 9:7.

Sumala sa Bibliya, dili sayop ang pagpaila sa kaugalingon nga maoy naghatag sa regalo, tingali pinaagi sa paglakip ug gamayng sulat uban sa regalo. Hinunoa, diha sa pipila ka dapit, maoy kostumbre ang pagpaila sa naghatag ug regalo ngadto sa tanang presente. Ang maong kostumbre mahimong motultol ngadto sa mga problema. Kadtong naghatag ug regalo tingali dili gustong magpaila aron dili sila makadani ug wala kinahanglanang atensiyon. Ang maong mga indibiduwal milihok uyon sa prinsipyo nga makita sa Mateo 6:3, diin si Jesus nag-ingon: “Apan ikaw, sa dihang magahimog mga gasa sa kaluoy, ayaw pahibaloa ang imong wala nga kamot kon unsay ginabuhat sa imong tuo.” Ang uban mobati tingali nga ang paghatag ug regalo maoy personal nga butang nga angayng mahibaloan lamang sa naghatag ug regalo ug sa midawat niana. Dugang pa, ang pagpaila sa naghatag ug regalo mahimong motultol ngadto sa pagtanditandi sa mga regalo, “nga mag-aghat ug pag-indigay.” (Galacia 5:26) Ang mga Kristohanon seguradong buot maglikay sa pagpabati ni bisan kinsa nga dili komportable o maulawan pinaagi sa pagpahibalo sa publiko sa mga ngalan sa naghatag ug regalo.—1 Pedro 3:8.

Oo, pinaagi sa paglihok nga kaharmonya sa mga prinsipyo nga makaplagan diha sa Pulong sa Diyos, ang paghatag ug regalo magpabiling tinubdan sa kalipay.—Buhat 20:35.