Tinuod nga Tabang Alang sa mga Kabos

SA DIHANG si Jesu-Kristo, ang Anak sa Diyos, dinhi sa yuta, gipakita niya ang tiunay nga interes sa pagtabang sa mga kabos. Mahitungod sa ministeryo ni Jesus, usa ka saksing-nakakita miingon: “Ang mga buta makakita na, ug ang mga bakol makalakaw na, ang mga sanlahon ginahinloan ug ang mga bungol makadungog na, ug ang mga patay gipamangon, ug ang mga kabos ginasangyawan sa maayong balita.” (Mateo 11:5) Apan, komosta ang minilyon nga mga tawong kabos karong adlawa? Aduna bay maayong balita alang kanila? Oo, adunay usa ka mensahe sa paglaom!

Bisan pag ang mga tawong kabos kasagarang gipasagdan ug gikalimtan sa kalibotan sa katibuk-an, ang Pulong sa Diyos, ang Bibliya, nagsaad: “Ang kabos dili kanunay nga hikalimtan, ni mahanaw gayod ang paglaom sa mga maaghop.” (Salmo 9:18) Ang maong makahupay nga mga pulong mamatuman unya sa dihang pulihan na sa Gingharian sa Diyos, usa ka tinuod nga langitnong kagamhanan, ang tanang tawhanong pagmando. (Daniel 2:44) Ingong Hari sa maong langitnong kagamhanan, “maluoy [si Jesus] sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.”—Salmo 72:13, 14.

Unsa unyay kahimtang sa pagkinabuhi sa dihang magmando na si Kristo ibabaw sa yuta? Kadtong mabuhi ilalom sa pagmando ni Kristo sa tibuok yuta makatagamtam sa mga bunga sa ilang paghago. Ang Bibliya nag-ingon diha sa Miqueas 4:3, 4: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.” Ang Gingharian sa Diyos mosulbad pa gani sa mga problema sa sakit ug kamatayon. (Isaias 25:8) Pagkalahi nga kalibotan unya kana! Makatuo kita nianang mga saara sa Bibliya tungod kay inspirado kana sa Diyos mismo.

Gawas pa sa paghatag ug usa ka mensahe sa paglaom, ang Bibliya nagtabang usab kanato sa pagsagubang sa matag adlaw nga mga suliran, sama sa pagbuntog sa kakulang sa pagtahod sa kaugalingon, nga mahimong gipahinabo tungod sa kakabos. Ang usa ka kabos nga Kristohanon mahibalo gikan sa iyang pagtuon sa Bibliya nga siya bililhon usab sa mga mata sa Diyos sama sa usa ka Kristohanon nga adunahan. Ang basahon sa Job diha sa Bibliya nag-ingon nga ang Diyos “wala maghatag ug labawng pagtagad sa hamili kay sa timawa, kay silang tanan buhat man sa iyang mga kamot.” (Job 34:19) Ang Diyos parehong nahigugma kanila.—Buhat 10:34, 35.