Usa ba Lamang ang ‘Matuod nga Relihiyon’?

“INGON nga adunay usa lamang ka Kristo, busa adunay usa lamang ka lawas ni Kristo, usa lamang ka Pangasaw-onon ni Kristo: ‘usa lamang ka apostolikanhong Iglesya Katolika.’”—Dominus Iesus.

Kana ang pagpahayag sa usa ka Romano Katolikong kardinal, si Joseph Ratzinger, sa pagtulon-an sa iyang iglesya nga adunay usa lamang ka matuod nga iglesya. Ang maong iglesya, matod niya, mao ang “usa ka Iglesya ni Kristo, nga mao ang Iglesya Katolika.”

“Dili mga Iglesya sa Hustong Diwa”

Bisan pag si Papa Juan Paulo II miinsistir nga ang dokumentong Dominus Iesus “wala masudli sa pagbati sa pagpalabaw o dili-pagtahod sa ubang mga relihiyon,” ang mga pangulo sa Protestanteng iglesya misupak kaayo niana. Pananglitan, sa Presbyteriano nga Heneral nga Asembliya sa Belfast, Amihanang Irlandia, niadtong Hunyo 2001, usa ka ministro miingon nga ang maong dokumento gibuhat sa “usa ka gamhanang pundok diha sa Iglesya Romana Katolika . . . nga nahadlok sa espiritu sa liberal nga panghunahuna nga gipailaila sa Batikano II.”

Si Robin Eames, ang obispo sa Iglesya sa Irlandia, miingon nga siya “mahiubos kaayo” kon ang dokumento maoy “pagbalik ngadto sa panghunahuna sa panahong wala pa ang Batikano II.” Sa pagkomento bahin sa pangangkon sa Batikano nga ang mga iglesya nga dili modawat sa pipila ka doktrina sa Iglesya Katolika “maoy dili mga Iglesya sa hustong diwa,” si Eames miingon: “Alang kanato kana maoy insulto.”

Unsay nakaaghat sa pagsulat sa Dominus Iesus? Mopatim-aw nga ang Romano Katolikong Curia natugaw sa gitawag ug religious relativism (pagtuo sa mabalhinong mga sukdanan). Sumala sa The Irish Times, “ang paggimaw sa pluralist theology—nga nag-ingon nga ang mga relihiyon parehong maayo . . . nakatugaw pag-ayo sa kaisipan ni Cardinal Ratzinger.” Mopatim-aw nga ang maong pagtuo maoy nakahaling sa iyang mga komento bahin sa usa lamang ka matuod nga iglesya.

Hinungdanon ba Kon Unsang Relihiyona Ka Nagpasakop?

Siyempre, alang sa pipila, ang “religious relativism” o “pluralist theology” mas makataronganon ug madanihon kay sa bisan unsang sugyot nga adunay usa lamang ka matuod nga iglesya. Alang kanila, ang relihiyon maoy butang nga depende sa gusto sa usa ka tawo. ‘Sa kataposan,’ matod nila, ‘dili gayod hinungdanon kon unsang relihiyona ka nagpasakop.’

Tingali mopatim-aw nga kana ang mas liberal nga pagtuo—bisan pag ang usa ka epekto niana mao ang pagkasip-ak sa relihiyon ngadto sa daghan kaayong nagkalain nga mga denominasyon. ‘Ang ingon nga pagkadaiya sa relihiyon,’  daghan nag-ingon, ‘mao lamay nahiangay nga pagpadayag sa kagawasan sa matag usa.’ Sumala sa magsusulat nga si Steve Bruce, hinunoa, ang maong “relihiyosong pagkaliberal” sa pagkatinuod mao lamay “kawalay-pagtagad bahin sa relihiyon.”—A House Divided: Protestantism, Schism, and Secularization.

Nan, unsa ba ang hustong panghunahuna? Usa ba lamang ang matuod nga relihiyon? Kana ba ang Iglesya Romana Katolika? Ang ubang mga relihiyon ba sama nga madawat sa Diyos? Sanglit ang maong mga pangutana naglangkit sa atong relasyon uban sa atong Maglalalang, hinungdanon gayod nga mabatonan ang iyang mga panghunahuna bahin niana. Sa unsang paagi mabatonan nato kana? Pinaagi sa pagsusi sa dinasig nga Pulong sa Diyos, ang Bibliya. (Buhat 17:11; 2 Timoteo 3:16, 17) Tagdon nato kon unsay ikasulti niini bahin sa ulohang dunay usa lamang ka matuod nga relihiyon.

 [Picture Credit Line sa panid 2]

COVER: Mark Gibson/Index Stock Photography