Usa ka Matuod nga Kristohanong Relihiyon​—Kini Nagalungtad

SI Jesu-Kristo nagtukod ug usa lang ka iglesya o kongregasyon. Kana nga kongregasyon maoy usa ka espirituwal nga pundok, usa ka espirituwal nga pamilya. Among gipasabot nga kadto maoy pagtigom sa mga tawo nga pinili sa balaang espiritu sa Diyos—nga silang tanan giila sa Diyos ingong iyang “mga anak.”—Roma 8:16, 17; Galacia 3:26.

Si Jesus nagtudlo nga gigamit sa Diyos ang usa lang ka paagi aron tultolan ang mga tawo ngadto sa kamatuoran ug sa kinabuhi. Sa pag-ilustrar nianang hinungdanong kamatuoran, gipanig-ingon ni Jesus ang paagi paingon sa kinabuhing walay kataposan sa usa ka dalan. Matod niya: “Sulod kamo agi sa sigpit nga ganghaan; tungod kay halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.”—Mateo 7:13, 14; Juan 14:6; Buhat 4:11, 12.

Usa ka Nahiusang Kongregasyon

Angay nga dili kita maghunahuna nga kadtong kongregasyon sa unang-siglo maoy “tibuok-kalibotan, unibersohanon, organisado nga kapunongan sama sa atong ipasabot karong mga adlawa kon hisgotan nato ang iglesya katolika,” matod sa The New Dictionary of Theology. Nganong dili man? “Tungod sa yanong katarongan,” nag-ingon kini, “nga ang maong organisado, unibersohanon nga kapunongan wala maglungtad niadto.”

Walay tawo ang tukmang makasupak sa kamatuoran nga ang unang Kristohanong kongregasyon dili sama sa institusyonal nga mga iglesya nga atong makita karon. Apan kadto organisado. Ang tinagsa ka mga kongregasyon wala maglihok nga bulag sa usag usa. Ang tanan nag-ila sa awtoridad sa usa ka nagamandong lawas sa Jerusalem. Ang maong lawas—nga gilangkoban sa mga apostoles ug sa mga ansiyano sa kongregasyon sa Jerusalem—nakatabang sa pagtipig sa panaghiusa sa kongregasyon  ingong “usa ka lawas” ni Kristo.—Efeso 4:4, 11-16; Buhat 15:22-31; 16:4, 5.

Unsay nahitabo niadtong bugtong matuod nga kongregasyon? Nahimo ba kadto nga gamhanang Iglesya Katolika? Mitubo ba kadto ug nasip-ak nga nahimong daghang Protestanteng mga denominasyon nga atong makita karon? O lahi ang nahitabo?

“Mga Trigo” ug “mga Bunglayon”

Aron makaplagan ang mga tubag, atong palandongon pag-ayo ang giingon ni Jesu-Kristo nga mao ang mahitabo. Basin matingala ka nga mahibalo nga si Jesus nagdahom nga ang iyang kongregasyon mahanaw sa talaan sa kasaysayan ug iyang itugot nga ang maong makapasubong kahimtang magpadayon sulod sa daghang siglo.

Nga gilangkit ang iyang kongregasyon uban sa “gingharian sa mga langit,” siya miingon: “Ang gingharian sa mga langit nahisama sa usa ka tawong nagpugas ug maayong binhi sa iyang uma. Samtang ang mga tawo natulog, ang iyang kaaway miabot ug gisapawan pagpugas ug mga bunglayon ang mga trigo, ug mibiya. Sa dihang ang dahon migitib na ug nagpatunghag bunga, unya ang mga bunglayon nagpakita usab. Busa ang mga ulipon sa tagbalay miadto ug miingon kaniya, ‘Agalon, dili ba maayong binhi ang imong gipugas sa imong uma? Nan, sa unsang paagi nga kini adunay mga bunglayon?’ Siya miingon kanila, ‘Usa ka kaaway, usa ka tawo, ang naghimo niini.’ Sila miingon kaniya, ‘Nan, buot ba nimo nga kami moadto ug ibton kini?’ Siya miingon, ‘Dili; aron walay purohan, nga samtang ibton ang mga bunglayon, inyong maibot ang trigo uban niini. Pasagdi kining magdungan sa pagtubo hangtod sa ting-ani; ug sa panahon sa ting-ani sultihan ko ang mga mag-aani, Ibta pag-una ang mga bunglayon ug pamugkosa kini nga mga binangan aron kini sunogon, unya tigoma ang trigo ngadto sa akong balay-tipiganan.’”—Mateo 13:24-30.

Gipatin-aw ni Jesus nga siya mao “ang tawong nagpugas.” “Ang maayong binhi” naghulagway sa iyang tinuod nga mga tinun-an. Ang iyang “kaaway” mao si Satanas nga Yawa. “Ang mga bunglayon” mao ang mini nga mga Kristohanon nga nakayuhot sa unang Kristohanong kongregasyon. Miingon siya nga pasagdan niya nga magdungan pagtubo “ang mga trigo” ug “ang mga bunglayon” hangtod sa “ting-ani,” nga modangat sa “kataposan sa sistema sa mga butang.” (Mateo 13:37-43) Unsay gipasabot niining tanan?

Nasagolan ang Kristohanong Kongregasyon

Wala madugay sa pagkamatay sa mga apostoles, ang apostatang mga magtutudlo gikan sa sulod sa kongregasyon misugod pagkontrolar niana. Sila namulong ug “tinuis nga mga butang aron ipahilayo ang mga tinun-an ngadto kanila.” (Buhat 20:29, 30) Ingong sangpotanan, daghang Kristohanon ‘nangahulog gikan sa pagtuo.’  Sila ‘miliso ngadto sa bakak nga mga sugilanon.’—1 Timoteo 4:1-3; 2 Timoteo 4:3, 4.

Pagka-ikaupat nga siglo K.P., nag-ingon ang The New Dictionary of Theology, “ang Katolikong Kristiyanidad nahimo nang opisyal . . . nga relihiyon sa Imperyo sa Roma.” Dihay “panaghugpong sa relihiyoso ug sibilyan nga katilingban”—usa ka panagtapo sa Iglesya ug Estado nga nahasupak pag-ayo sa mga gituohan sa unang mga Kristohanon. (Juan 17:16; Santiago 4:4) Ang samang reperensiya nag-ingon nga ngadtongadto, ang tibuok nga gambalay ug kinaiyahan sa iglesya, ingon man ang daghang paninugdang mga gituohan niini, nausob kaayo “tungod sa impluwensiya sa katingad-anan ug dili-maayong kombinasyon sa mga sulondan sa D[aang] T[estamento] ug sa bag-ong platonikong mga doktrina.” Sumala sa gitagna ni Jesu-Kristo, ang iyang tinuod nga mga tinun-an dili na makita samtang ang mini nga mga Kristohanon milambo.

Nahibalo ang mga mamiminaw ni Jesus nga lisod kaayo nga mailhan ang tinuod nga trigo gikan sa mga bunglayon, sama nianang makahilo nga balhiboong darnel, nga panahon sa pagtubo sama kaayog dagway sa trigo. Busa si Jesus naghulagway nga sa makadiyot, lisod nga mailhan ang matuod nga mga Kristohanon gikan sa mini nga matang. Wala kini magpasabot nga ang Kristohanong kongregasyon wala na maglungtad, kay si Jesus misaad nga padayon niyang giyahan ang iyang espirituwal nga mga igsoon “sa tanang adlaw hangtod sa kataposan sa sistema sa mga butang.” (Mateo 28:20) Miingon si Jesus nga ang trigo magpadayon sa pagtubo. Bisan pag matuod kana, latas sa mga katuigan, ang matuod nga mga Kristohanon—tinagsa o ginurupo—sa walay duhaduha naghimo sa ilang maarangan aron mosunod sa mga pagtulon-an ni Kristo. Apan dili na sila mailhan sa tin-aw ingong makita nga pundok o organisasyon. Seguradong dili sila sama sa makita nga apostatang relihiyosong sistema nga sa tibuok kasaysayan nagpakaulaw ug nagdaot sa kadungganan ni Jesu-Kristo.—2 Pedro 2:1, 2.

“Ang Tawo sa Kalapasan Mapadayag”

Si apostol Pablo mitagna ug laing butang nga magtimaan niining mini nga relihiyosong sistema. Siya misulat: “Ayaw tugoting may modaldal kaninyo sa bisan unsa mang paagi, tungod kay [ang adlaw ni Jehova] dili moabot gawas kon ang apostasya moabot una ug ang tawo sa kalapasan mapadayag.” (2 Tesalonica 2:2-4) Kini nga “tawo sa kalapasan” mao gayod ang klero nga matang nga nagbayaw sa kaugalingon ngadto sa katungdanan sa pagkamagmamando sa “Kristohanong” kongregasyon. a

Ang apostasya nagsugod sa adlaw ni apostol Pablo. Mas mikusog kadto sa dihang ang mga apostoles namatay ug ang ilang katakos sa pagpugong nahanaw. Kana mailhan, matod ni Pablo, sa “pagpalihok ni Satanas nga inubanan sa tanang gamhanang mga buhat ug bakak nga mga ilhanan ug mga tilimad-on ug inubanan sa tanang dili-matarong nga panglimbong.” (2 Tesalonica 2:6-12) Kana tukmang nagbatbat sa mga kalihokan sa daghan kaayong relihiyosong mga pangulo sa tibuok kasaysayan!

Aron suportahan ang ilang pangangkon nga ang Romano Katolisismo mao ang bugtong matuod nga iglesya, ang Katolikong mga pangulo nag-ingon nga ang ilang mga obispo “nakapanunod sa ilang pagkaapostoles gikan sa orihinal nga mga apostoles pinaagi sa linya sa pagkamanununod nga masubay balik sa sinugdanan.” Sa pagkatinuod, kining pangangkon sa apostolikanhong pagkamanununod walay pasikaranan diha sa kasaysayan o sa Kasulatan. Walay katuohan nga ebidensiya nga ang sistema sa iglesya nga mitungha pagkamatay sa mga apostoles ni Jesus gitultolan gayod sa balaang espiritu sa Diyos.—Roma 8:9; Galacia 5:19-21.

Ug unsa na man ang ubang mga iglesya nga natukod human sa giingong Repormasyon? Ila bang gisunod ang sulondan sa unang Kristohanong kongregasyon? Ila bang gipasig-uli ang kalunsay sa orihinal nga Kristohanong kongregasyon? Tinuod nga human sa Repormasyon, ang Bibliya mabatonan sa daghang ordinaryong mga tawo diha sa ilang kaugalingong pinulongan. Bisan pa niana, gipakita sa kasaysayan nga ang maong mga iglesya nagpadayon sa pagtudlog sayop nga mga doktrina. b—Mateo 15:7-9.

 Hinunoa, matikdi kini. Gitagna gayod ni Jesu-Kristo nga ang iyang bugtong matuod nga kongregasyon ipasig-uli panahon sa iyang gitawag nga kataposan sa sistema sa mga butang. (Mateo 13:30, 39) Ang pagkatuman sa mga tagna sa Bibliya nagpakita nga kita nagakinabuhi karon sa maong panahon. (Mateo 24:3-35) Tungod kay kana matuod man, ang matag usa angayng mangutana, ‘Hain ba ang maong bugtong matuod nga relihiyon?’ Angay nga kini mailhan nga mas ug mas tin-aw pa.

Tingali mobati ka nga imo nang nakaplagan ang maong iglesya o kongregasyon. Hinungdanon nga ikaw makapaneguro. Ngano? Tungod kay sama sa unang siglo, adunay usa lamang ka matuod nga relihiyon. Nakahatag ka bag panahon sa pagtino nga ang imong relihiyon nagsunod sa sulondan nga gihatag sa Kristohanong kongregasyon sa unang-siglo ug maunongon kining nagsunod sa mga pagtulon-an ni Jesu-Kristo? Nganong dili nimo susihon kana karon? Ang mga Saksi ni Jehova malipay sa pagtabang kanimo sa pagbuhat niana.—Buhat 17:11.

[Mga footnote]

[Mga hulagway sa panid 5]

Unsay ginatudlo kanato sa ilustrasyon ni Jesus sa trigo ug mga bunglayon bahin sa matuod nga kongregasyon?

[Mga hulagway sa panid 7]

Ang imong relihiyon nagpabanaag ba sa sulondan sa pagsangyaw ug sa pagtuon nga gihatag sa mga Kristohanon sa unang siglo?