Kon Unsaon sa Pagpalig-on ang Imong Kaminyoon

HANDURAWA ang usa ka balay nga nadaot tungod kay gipasagdan na. Ang pintal nahup-ak, ang atop daot, ug bisan ang tugkaran nabagnot na. Dayag nga nadaot na kining balaya tungod kay kini nakaagom ug dagkong mga bagyo paglabay sa mga katuigan, ug kini napasagdan na. Angay na lang ba kining gub-on? Dili. Kon ang pundasyon ug ang gambalay lig-on, ang balay mahimo pang ayohon.

Ang kahimtang ba sa maong balay makapahinumdom kanimo sa imong kaminyoon? Paglabay sa katuigan, tingalig naapektohan sa kusog nga mga bagyo, ingnon ta, ang imong relasyon sa imong kapikas. Tingalig napasagdan na sa usa kaninyo o ninyong duha ang inyong kaminyoon. Tingali ang imong pagbati sama nianang gibati ni Sandy. Human nga naminyo sa 15 ka tuig, siya miingon: “Dili kami magkasinabot. Kasado tuod kami, apan kulang kana.”

Bisan pag ingon niana ang imong kaminyoon, ayaw dayon paghinapos nga kini angay nang taposon. Tingalig maulian pa ang imong kaminyoon. Nag-agad kinig dako sa determinasyon ninyong duha. Ang maong determinasyon ug tinguha makatabang sa paghatag ug kalig-on sa kaminyoon panahon sa pagsulay. Sa unsang paagi ang Bibliya makatabang kanimo sa pagpalig-on niini nga determinasyon ug tinguha?

Nalangkit sa Determinasyon ug Tinguha ang Obligasyon

Ang determinasyon ug tinguha nagtumong sa kahimtang sa pagkahimong obligado. Usahay, kining pulonga mahimong ikapadapat sa usa ka butang nga dili personal, sama sa kasabotan sa negosyo. Pananglitan, tingali ang usa ka kontratista mobati nga obligado siya sa pagtuman sa gipangayo sa usa ka kontrata nga iyang gipirmahan sa pagtukod ug balay. Tingali dili niya kaila sa personal ang tawo nga nagpatukod niini. Bisan pa niana, obligado siya sa pagtuman sa saad nga iyang gipirmahan sa kontrata.

Bisan tuod ang kaminyoon dili usa ka transaksiyon sa negosyo, nalangkit sa determinasyon ug tinguha ang pagtuman sa obligasyon. Ikaw ug ang imong kapikas kinasingkasing nga nanaad atubangan sa Diyos ug sa tawo nga kamo dili magbulag, bisag unsa pay mahitabo. Si Jesus miingon: “Siya nga naglalang kanila sukad sa sinugdan nagbuhat kanila nga lalaki ug babaye ug  nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa.’” Si Jesus midugang: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:4-6) Busa, sa dihang motungha ang mga problema, ikaw ug ang imong kapikas kinahanglang determinado gayod sa pagtuman sa inyong gisaad. a Matod pa sa usa ka asawa: “Miarang-arang ang among kahimtang human lamang nga mihunong kami sa paghunahuna sa pagdiborsiyo.”

Apan, ang determinasyon ug tinguha nga mapatunhay ang kaminyoon maoy dili lamang tungod sa obligasyon. Unsa pay laing nalangkit?

Ang Pagtinabangay Makapalig-on sa Determinasyon ug Tinguha nga Mapatunhay ang Kaminyoon

Ang pagbaton ug determinasyon ug tinguha nga mapatunhay ang kaminyoon wala magpasabot nga kanunayng magkauyon ang magtiayon. Sa dihang mag-away, kinahanglang maningkamot sila sa pagsulbad sa problema dili lang tungod sa panaad nga obligado sila sa pagtuman kondili tungod sa gugma. Bahin sa bana ug asawa, si Jesus nag-ingon: “Dili na sila duha, kondili usa ka unod.”

Unsay buot ipasabot nga ikaw ug ang imong kapikas mahimong “usa ka unod”? Si apostol Pablo misulat nga ang “mga bana angay nga maghigugma sa ilang mga asawa sama sa ilang kaugalingong mga lawas.” (Efeso 5:28, 29) Busa, ang usa ka kahulogan sa pagkahimong “usa ka unod” mao nga nahingawa ka sa kaayohan sa imong kapikas sama sa pagkahingawa mo sa imong kaayohan. Kinahanglang usbon sa mga minyo ang ilang panghunahuna gikan sa “akoa” ngadto sa “amoa,” gikan sa “ako” ngadto sa “kami.” Usa ka magtatambag misulat: “Kinahanglang mohunong na ang magtiayon sa paghunahuna nga sila morag dili minyo, ug hunahunaon hinuon nila nga sila minyo.”

Ikaw ba ug ang imong kapikas ‘naghunahuna ug mibati nga kamo minyo’? Tingalig daghang tuig na kamo nga nagkauban apan wala kamo mahimong “usa ka unod” niana nga diwa. Oo, posible kana nga mahitabo, apan ang librong Giving Time a Chance nag-ingon: “Ang kaminyoon nagkahulogan ug panag-usa sa duha ka kinabuhi, ug kon mas daghan silag gikausahang mga butang, mas molambo pa ang ilang kaminyoon.”

Ang pipila ka dili-malipayong mga magtiayon wala magbulag tungod lang sa ilang mga anak o tungod sa pinansiyal nga kasegurohan. Ang uban nag-antos tungod kay sila supak gayod sa diborsiyo o tungod kay nahadlok sila kon unsay isulti sa uban kon sila magbulag. Bisan tuod dalayegon nga malungtaron kini nga kaminyoon, hinumdomi nga ang inyong tumong mao ang pagtagamtam ug usa ka mahigugmaong relasyon, dili lamang basta malungtaron nga kaminyoon.

 Ang Pagkadili-Maakohon Makapalambo sa Determinasyon ug Tinguha nga Mapatunhay ang Kaminyoon

Gitagna sa Bibliya nga sa “kataposang mga adlaw,” ang mga tawo “magmahigugmaon sa ilang kaugalingon.” (2 Timoteo 3:1, 2) Sama sa giingon sa maong tagna, ang ginapasiugda karon morag ang masimbahong paghigugma sa kaugalingon. Diha sa daghang kaminyoon, ang pagtugyan sa kaugalingon bisag walay garantiya nga baslan ka gilantaw nga usa ka timaan sa pagkahuyang. Apan, diha sa usa ka maayong kaminyoon, ang magtiayon magpakita ug espiritu sa pagsakripisyo sa kaugalingon. Sa unsang paagi imong ikapasundayag ang maong espiritu?

Imbes magsigeg hunahuna sa pangutanang, ‘Unsa may akong makuha niining relasyona?’ pangutan-a ang imong kaugalingon, ‘Unsay akong gihimo mismo aron mapalig-on ang akong kaminyoon?’ Ang Bibliya nag-ingon nga ang mga Kristohanon kinahanglan nga “magatan-aw, dili lamang sa personal nga interes sa mga butang labot sa [ilang] kaugalingon, kondili sa personal nga interes usab sa uban.” (Filipos 2:4) Samtang mamalandong niini nga prinsipyo sa Bibliya, susiha ang imong mga lihok sa milabayng semana. Kapila ka nagpakita ug malulotong buhat alang ra gayod sa kaayohan sa imong kapikas? Sa dihang ang imong kapikas gustong makig-estorya, ikaw ba naminaw—bisan pag wala ka kaayoy ganang maminaw? Pila ka kalihokan ang inyong gihimo nga mas nalipay ang imong kapikas kay kanimo?

Sa pagtimbangtimbang sa maong mga pangutana, ayawg kabalaka nga ang imong maayong mga binuhatan dili mamatikdan o mabaslan. “Sa kadaghanang relasyon,” matod pa sa usa ka reperensiya, “ang positibong panggawi mabaslan ra, busa himoa ang imong bug-os nga maarangan sa pagdasig sa imong kapikas sa paggawi nga positibo pinaagi sa pagkapositibo nimo mismo.” Ang imong mga buhat sa pagsakripisyo makapalig-on sa imong kaminyoon tungod kay magpakita kini nga ang imong kaminyoon imong gipabilhan ug dili nimo gustong mabungkag.

Hinungdanong Lantawon ang Kaminyoon Ingong Tibuok-Kinabuhing Pag-ubanay

Ginapabilhan ni Jehova nga Diyos ang pagkamaunongon. Sa pagkatinuod, ang Bibliya nag-ingon: “Sa maunongon ikaw [Jehova] magmaunongon.” (2 Samuel 22:26) Ang pagkamaunongon ngadto sa Diyos nagkinahanglan ug pagkamaunongon diha sa kahikayan sa kaminyoon nga iyang gitukod.—Genesis 2:24.

Kon ikaw ug ang imong kapikas maunongon sa usag usa, matagamtam ninyo ang tawhay nga pagbati nga ang inyong kaminyoon dili mabungkag. Kon imong hunahunaon ang mga bulan, tuig, ug mga dekada sa umaabot, imong makita nga kamo gihapon ang magkauban. Dili gayod nimo madawat nga magbulag kamo, ug kini nga panglantaw makahatag ug kasegurohan sa inyong relasyon. Ang usa ka asawa miingon: “Bisag suko kaayo ko sa [akong bana] ug aborido kaayo ko sa nagakahitabo kanamo, wala ko mabalaka nga matapos ang among kaminyoon. Nabalaka ako kon unsaon namo sa pagpasig-uli ang among relasyon. Wala koy duda nga magkauli kami—niadtong tungora wala lang ko mahibalo kon unsaon kana paghimo.”

Hinungdanong bahin sa determinasyon ug tinguha ang paglantaw sa kaminyoon ingong tibuok-kinabuhi  nga pag-ubanay, apan ikasubo nga kini dili makita diha sa daghang kaminyoon. Panahon sa mainit nga panag-away, tingali ang usa ka kapikas mosinggit, “Biyaan na ti ka!” o, “Mangita kog lain nga moapresyar nako!” Tinuod, kasagarang dili gayod niya tinud-on kanang mga pulonga. Apan, ang Bibliya nag-ingon nga ang dila “puno sa hilo nga makamatay.” (Santiago 3:8) Ang mga hulga ug mga pamahad sama rag pag-ingon: ‘Wala ko isipa nga permanente ang atong kaminyoon. Mahimo akong makigbulag nimo bisan unsang orasa.’ Ang pagsulti niini makadaot sa kaminyoon.

Kon gilantaw mo nga ang kaminyoon maoy usa ka tibuok-kinabuhi nga pag-ubanay, naghunahuna ka nga mounong ka sa imong kapikas sa tanang kalisdanan. Kini dunay dugang kaayohan. Ikaw ug ang imong kapikas dili maglisod sa pagdawat sa inyong mga kahuyangan ug mga kasaypanan ug kamo magpadayon sa pag-antosay ug bug-os nga magpinasayloay sa usag usa. (Colosas 3:13) “Sa usa ka maayong kaminyoon,” matod pa sa usa ka reperensiya, “posible nga kamong duha masayop, apan dako usab ang posibilidad nga motunhay ang kaminyoon bisan pa niana.”

Sa adlaw sa imong kasal, ikaw nanaad, dili ngadto sa institusyon sa kaminyoon, kondili ngadto sa usa ka buhi nga indibiduwal—ang imong kapikas. Kini angay nga dunay dakong epekto sa imong paagi karon sa paghunahuna ug paglihok ingong minyo. Dili ba mouyon ka nga ikaw angayng mounong sa imong kapikas dili lamang tungod kay ikaw bug-os nga nagtuo sa pagkabalaan sa kaminyoon kondili tungod usab kay imong gihigugma ang tawong imong gipakaslan?

[Footnote]

[Kahon/Hulagway sa panid 5]

Kon Unsay Imong Mahimo Karon

Unsa ka hugot ang imong determinasyon ug tinguha nga mapatunhay ug mapalig-on ang imong kaminyoon? Tingali imong nakita nga puwede pa kining pauswagon. Aron molig-on ang imong determinasyon ug tinguha, sulayi paghimo ang mosunod:

● Susiha ang imong kaugalingon. Pangutan-a ang imong kaugalingon: ‘Ako ba naghunahuna ug naglihok ingong minyo, o ingong ulitawo o dalaga gihapon?’ Pangutan-a kon unsay gibati sa imong kapikas bahin kanimo labot niining butanga.

● Basaha kining artikuloha uban sa imong kapikas. Dayon, sa kalmadong paagi, hisgoti ang mga pamaagi nga inyong mapalig-on ang inyong determinasyon ug tinguha alang sa inyong kaminyoon.

● Uban sa imong kapikas, pakigbahin sa mga kalihokan nga makapalig-on sa inyong determinasyon ug tinguha. Pananglitan: Tan-awa ang mga hulagway sa inyong kasal ug sa ubang halandomong mga okasyon. Buhata ang mga butang nga nakalingaw kaninyo sa trato pa kamo o sa unang mga tuig sa inyong kaminyoon. Tun-i ninyong duha ang binase-sa-Bibliya nga mga artikulo sa Ang Bantayanang Torre ug Pagmata! nga naghisgot bahin sa kaminyoon.

[Kahon/Hulagway sa panid 6]

Ang Determinasyon ug Tinguha nga Mapatunhay ang Kaminyoon Naglangkit ug . . .

● Obligasyon “Kon unsay imong gipanaad, bayri. Mas maayo pa nga dili ka manaad kay sa manaad ka ug dili mobayad.”—Ecclesiastes 5:4, 5.

● Pagtinabangay “Ang duha mas maayo kay sa usa . . . Kay kon ang usa kanila mapukan, ang usa makabangon sa iyang kauban.”—Ecclesiastes 4:9, 10.

● Pagsakripisyo sa Kaugalingon “Adunay labaw nga kalipay sa paghatag kay sa pagdawat.”—Buhat 20:35.

● Paglantaw sa Kaminyoon Ingong Tibuok-Kinabuhi nga Panag-ubanay “Ang gugma . . . molahutay sa tanang butang.”—1 Corinto 13:4, 7.

[Mga hulagway sa panid 7]

Sa dihang ang imong kapikas gustong makig-estorya, ikaw ba naminaw?