Mga Pangutana Gikan sa mga Magbabasa
Mga Pangutana Gikan sa mga Magbabasa
Unsay kahulogan sa may “kinabuhi sa iyang kaugalingon”?
Ang Bibliya naghisgot bahin kang Jesu-Kristo ingong may “kinabuhi sa iyang kaugalingon” ug bahin sa iyang mga sumusunod nga may ‘kinabuhi sa ilang kaugalingon.’ (Juan 5:26; 6:53) Apan, kining duha ka teksto dili managsama ug kahulogan.
“Kay ingon nga ang Amahan may kinabuhi sa iyang kaugalingon,” matod pa ni Jesus, “sa ingon usab iyang gitugot sa Anak ang pagbaton ug kinabuhi sa iyang kaugalingon.” Una pa gisulti kining talagsaong mga pulong, si Jesus miingon: “Sa pagkatinuod gayod ako magaingon kaninyo, Siya nga magapatalinghog sa akong pulong ug magatuo kaniya nga nagpadala kanako adunay kinabuhing walay kataposan . . . Ang takna nagsingabot, ug mao na karon, nga ang mga patay makadungog sa tingog sa Anak sa Diyos ug kadtong mga nagpatalinghog mabuhi.” Dinhi si Jesus naghisgot bahin sa usa ka talagsaong gahom nga gitugyan diha kaniya sa Amahan—ang katakos sa paghatag sa mga tawo ug maayong baroganan atubangan sa Diyos. Dugang pa, si Jesus makahimo sa pagbanhaw niadtong nangatulog diha sa kamatayon ug sa paghatag kanila ug kinabuhi. Kay alang kang Jesus, ang pagkabaton ug “kinabuhi sa iyang kaugalingon” nagkahulogan nga siya gihatagan niining mga gahoma. Sama sa Amahan, ang Anak usab “sa iyang kaugalingon dunay gasa sa kinabuhi.” (Juan 5:24-26) Komosta ang iyang mga sumusunod?
Paglabay ug mga usa ka tuig, gisultihan ni Jesus ang iyang mga mamiminaw, nga nag-ingon: “Sa pagkatinuod gayod ako magaingon kaninyo, Gawas kon kamo mokaon sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon. Siya nga mokaon sa akong unod ug moinom sa akong dugo adunay kinabuhing walay kataposan, ug pagabanhawon ko siya sa kataposang adlaw.” (Juan 6:53, 54) Dinhi gipakasama ni Jesus ang pagkabaton ug ‘kinabuhi sa inyong kaugalingon’ uban sa pagkabaton ug “kinabuhing walay kataposan.” Ang mga ekspresyon nga samag pagkabalay sa gramatika ingong nakabaton ug ‘kinabuhi sa inyong kaugalingon’ makita diha sa ubang bahin sa Gregong Kasulatan. Duha ka pananglitan niini mao, “Pagbaton ug asin sa inyong kaugalingon” ug “nagadawat diha sa ilang kaugalingon sa bug-os nga bayad.” (Marcos 9:50; Roma 1:27) Niining maong mga pananglitan, ang mga pulong wala magpasabot ug gahom sa paghatag ug asin diha sa uban o sa pagpahamtang ug bug-os nga bayad ngadto kang bisan kinsa. Hinunoa, kini nagpasabot ug pagkakompleto, o kabug-osan sa kinailadman sa lawas. Busa, ang ekspresyon nga “kinabuhi diha sa inyong kaugalingon” nga gigamit sa Juan 6:53 yanong nagkahulogan ug pagkabatog kabug-osan mismo sa kinabuhi.
Kon bahin sa iyang mga sumusunod nga dunay kinabuhi sa ilang kaugalingon, si Jesus naghisgot sa iyang unod ug dugo. Sa ulahi, sa dihang gisugdan ang Panihapon sa Ginoo, naghisgot na usab si Jesus bahin sa iyang unod ug dugo ug nagsugo sa iyang mga sumusunod nga pagahimoong mga membro sa bag-ong pakigsaad sa pag-ambit sa mga emblema nga walay-lebadurang tinapay ug bino. Nagpasabot ba kini nga dinihogang mga Kristohanon lang, nga ilalom sa bag-ong pakigsaad uban kang Jehova nga Diyos, ang makabaton ug kabug-osan sa kinabuhi? Dili. Kining duha ka okasyon nahitabo nga usa ka tuig ang gintang. Kadtong nakadungog sa mga pulong ni Jesus nga narekord sa Juan 6:53, 54 walay nahibaloang tinuig nga pagsaulog sa mga emblema nga naghawas sa unod ug dugo ni Kristo.
Sumala sa Juan kapitulo 6, gitandi una ni Jesus ang iyang unod sa mana, nga nag-ingon: “Ang inyong mga katigulangan nangaon sa mana didto sa kamingawan ug bisan pa niana nangamatay. Mao kini ang tinapay nga nanaog gikan sa langit, aron nga si bisan kinsa makakaon niini ug dili mamatay. Ako mao ang buhing tinapay nga nanaog gikan sa langit; kon may mokaon niini nga tinapay siya mabuhi hangtod sa kahangtoran.” Ang unod ni Jesus, uban sa iyang dugo, mas dakog kahulogan kay sa literal nga mana. Sa unsang paagi? Sa pagkaagi nga ang iyang unod gihatag alang sa “kinabuhi sa kalibotan,” nga naghimo sa kinabuhing walay kataposan nga posibleng mabatonan. a Busa, ang mga pulong bahin sa pagbaton ug ‘kinabuhi sa inyong kaugalingon’ diha sa Juan 6:53 nagtumong ngadto sa tanan nga makadawat ug kinabuhing walay kataposan—sa langit man o sa yuta.—Juan 6:48-51.
Kanus-a makadawat ug kinabuhi diha sa ilang kaugalingon, o makabaton ug kabug-osan sa kinabuhi ang mga sumusunod ni Kristo? Alang sa dinihogang mga manununod sa Gingharian, kini mahitabo dihang sila banhawon ngadto sa langitnong kinabuhi ingong dili-mamatay nga espirituhanong mga linalang. (1 Corinto 15:52, 53; 1 Juan 3:2) Ang “ubang mga karnero” ni Jesus makatagamtam ug kabug-osan sa kinabuhi pagkatapos sa iyang Usa ka Libo ka Tuig nga Pagmando. Niana unyang panahona, sila nasulayan na, nakaplagang matinumanon, ug gipahayag nga matarong alang sa kinabuhing walay kataposan sa Paraisong yuta.—Juan 10:16; Pinadayag 20:5, 7-10.
[Footnote]
a Diha sa kamingawan, ang mga Israelinhon ug ang “dakong nagkasagol nga panon sa katawhan” nagkinahanglan ug mana aron mabuhi. (Exodo 12:37, 38; 16:13-18) Sa susama, aron makabaton ug kinabuhing walay kataposan, ang tanang Kristohanon, dinihogan man o dili, kinahanglang magpahimulos sa langitnong mana pinaagi sa pagpasundayag ug pagtuo sa makalukat nga gahom sa unod ug dugo ni Jesus nga gihalad.—Tan-awa Ang Bantayanang Torre, Pebrero 1, 1988, mga panid 30-1.
[Hulagway sa panid 31]
Ang tanang matuod nga mga Kristohanon mahimong makabaton ug ‘kinabuhi sa ilang kaugalingon’