Sa Dihang ang mga Saad Maoy Usa ka Garantiya

ANG kasaysayan napunog wala-matuman nga mga saad. Ang mga nasod napakyas gayod sa pagtuman sa ilang seryosong mga kasabotan nga dili moatake sa usag usa, nga tungod niini ilang gipaagom ang ilang katawhan sa makalilisang nga mga gubat. Si Napoleon miingon kanhi: “Tumanon lamang sa mga gobyerno ang ilang mga saad kon pugson sila sa pagtuman niini, o kon kini alang sa ilang bentaha.”

Komosta man ang mga saad nga gihimo sa mga tawo? Makapahigawad gayod kon dili tumanon sa usa ka tawo ang iyang saad! Tinuod kini ilabina niadtong kaila nimo ug gisaligan. Aw, tingali ang mga tawo dili makaarang o dili buot motuman sa ilang mga saad.

Pagkadako sa kalainan tali sa mga saad sa tawo ug sa mga saad sa Diyos! Ang mga saad sa Diyos bug-os gayod nga kasaligan. Ang bisan unsa nga gipanaad ni Jehova maoy usa ka garantiya. Seguradong matuman kini. Maylabot sa dili-mapakyas nga pulong sa Diyos, ang Isaias 55:11 nag-ingon: “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”

Busa, unsaon nato paglantaw ang mga saad sa Diyos nga gisulat diha sa Bibliya? Makasalig gayod kita niana. Pananglitan, si apostol Juan misulat: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:3, 4) Matagamtam nimo ang maong mga panalangin kon ikaw molihok uyon sa mga pulong ni Jesus: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.