Mga Magmamantala sa Gingharian Nagtaho

“Makapalamdag Kini!”

GIUBANAN ni Dorota, usa ka bug-os-panahong ministro sa mga Saksi ni Jehova sa Polandia, ang iyang 14-anyos nga batang lalaki sa naandang pagpasusi sa klinika sa eskuylahan. Panahon sa pag-eksamin, ang doktora, si Janina, a nangutana bahin sa mga buluhaton sa iyang anak sa balay.

“Kon ako dili makahimo, ang akong anak lalaki maoy magluto sa paniudto alang kanamong unom nga sakop sa pamilya,” mitubag si Dorota. “Siyay maghinlo usab sa balay ug motabang sa mga alayohon sa balay. Gusto niyang mobasa. Siya kugihan nga estudyante.”

“Dili katuohan,” matod ni Janina. “Ako nagtrabaho dinhi sulod sa 12 ka tuig, ug wala pa ako sukad makabatig sama niini.”

Kay nakasabot sa kahigayonan nga mosangyaw, si Dorota mipatin-aw: “Daghang ginikanan karon napakyas sa pagbansay sa hustong paagi sa ilang mga anak. Kanay hinungdan nga ang ilang mga anak kasagarang may gamayng pagtahod-sa-kaugalingon.”

“Giunsa nimo pagkahibalo niining tanan?” nangutana si Janina. “Ang kadaghanang ginikanan walay alamag niining mga butanga.”

“Ang Bibliya maoy bililhong tinubdan sa maong impormasyon,” mitubag si Dorota. “Pananglitan, sumala sa Deuteronomio 6:6-9, ang pag-edukar sa atong mga anak magsugod sa pag-edukar sa atong kaugalingon. Dili ba angayng isilsil una nato sa atong kasingkasing ug hunahuna ang mga prinsipyo nga buot natong isilsil sa atong mga anak?”

“Dili katuohan,” mikomento si Janina. “Dili katuohan!” Unya iyang gisukna si Dorota kon sa unsang paagi ang Bibliya nakatabang kaniya sa pagmatuto ug pagtudlo sa iyang mga anak.

“Nagtuon kami sa Bibliya kada semana uban sa among mga anak,” mipatin-aw si Dorota. “Gigamit namo ang librong nag-ulohang Mga Pangutanang Gisukna sa mga Batan-on—Mga Tubag nga Mosaler.” b Unya iyang gibatbat ang libro ug gihisgotan ang pipila ka topiko niini.

“Makapalamdag kini!” mipatugbaw si Janina. “Mahimo bang makatan-aw nianang libroha?”

Usa ka oras sa ulahi, si Dorota mibalik nga dala ang libro.

“Unsay imong relihiyon?” nangutana si Janina, samtang iyang gisusi ang libro.

“Saksi ni Jehova ko.”

“Unsay tinagdan sa mga Saksi ni Jehova sa mga tawo nga lain ug relihiyon?”

“Sama ra sa akong pagtagad kanimo—uban ang pagtahod,” mitubag si Dorota, nga midugang: “Hinuon, nanghinaot kami nga sila makadangat sa kahibalo sa kamatuoran sa Bibliya.”

“Maayo na kaayo ang akong pagbati,” mipahayag si Janina.

Pagkatapos sa iyang pagduaw, giawhag ni Dorota si Janina nga mobasa sa Bibliya. “Mohatag kinig kahulogan sa imong kinabuhi ug motabang kanimo sa imong trabaho.”

“Nakadasig ka na kanako sa pagbuhat niana,” miangkon si Janina.

Uban ang taktika ug determinasyon, si Dorota nakahimo sa naandang pagduaw sa opisina sa doktora nga usa ka maayong higayon sa pagsangyaw.—1 Pedro 3:15.

[Mga Footnote]