Pabilhi ang Katuyoan sa Disiplina

UNSAY mosantop sa imong hunahuna sa dihang makabati ka sa pulong “disiplina”? Usa ka diksiyonaryo naghubit sa disiplina ingong “batasan sa pagpasunod sa mga tawo sa mga lagda o mga sukdanan sa panggawi, ug pagsilot kanila kon dili sila mosunod niana.” Bisan pag dili gayod kini mao ang bugtong dinawat nga kahubitan, daghang tawo karong adlawa ang naghatag ug susamang negatibong kahulogan sa bisan unsang matang sa disiplina.

Apan, ang Bibliya nagpadayag sa disiplina sa laing paagi. “Ang disiplina ni Jehova, Oh anak ko, ayaw isalikway,” misulat ang maalamon nga Haring Solomon. (Proverbio 3:11) Kining mga pulonga nagtumong, dili sa disiplina sa katibuk-an, kondili sa “disiplina ni Jehova,” nga mao, ang disiplina nga gipasukad sa hataas nga mga prinsipyo sa Diyos. Kanang matanga lamang sa disiplina ang makahatag ug espirituwal nga kaayohan—usa nga tilinguhaon gayod. Sa kasukwahi, ang disiplina nga gipasukad sa tawhanong panghunahuna nga nahisupak sa hataas nga mga prinsipyo ni Jehova kasagarang maabusohon ug makadaot. Mao kanay rason kon nganong daghan ang may negatibong tinamdan bahin sa disiplina.

Nganong giawhag man kita sa pagdawat sa disiplina ni Jehova? Diha sa Kasulatan, ang diyosnong disiplina gihubit ingong kapahayagan sa gugma sa Diyos alang sa iyang tawhanong mga linalang. Busa, si Solomon miingon: “Ang gihigugma ni Jehova iyang ginabadlong, ingon sa ginabuhat sa usa ka amahan sa anak nga iyang gikahimut-an.”—Proverbio 3:12.

Disiplina o Silot—Unsay Kalainan?

Ang disiplina sumala sa pagkapahayag sa Bibliya adunay daghang bahin—paggiya, pagtudlo, pagbansay, pagbadlong, pagtul-id, ug bisan pagsilot. Hinunoa, sa matag kaso, ang disiplina ni Jehova maoy tinukmod sa gugma, ug ang tumong niana maoy alang sa kaayohan sa gidisiplina. Ang nagatul-id nga disiplina ni Jehova dili gayod alang sa pagsilot lamang.

Sa laing bahin, ang mga silot sa Diyos wala kanunayng itumong sa pagtul-id o pag-edukar sa gidisiplina. Pananglitan, gikan sa mismong adlaw nga si Adan ug Eva nakasala, sila nagsugod sa pag-antos sa mga sangpotanan sa ilang pagkadili-masinugtanon. Gipapahawa sila ni Jehova gikan sa paraisong tanaman sa Eden, ug sila naulipon sa mga epekto sa pagkadili-hingpit, sakit, ug pagkatigulang. Human sa gatosan ka tuig sa masakit nga paglungtad, sila nahanaw sa dayon. Kadtong tanan mao gayoy silot sa Diyos, apan kadto dili disiplina aron sa pagtul-id. Tungod kay ang ilang pagkadili-masinugtanon maoy tinuyo ug sila dili-mahinulsolon, si Adan ug Eva dili na gayod matul-id pa.

Ang ubang mga asoy bahin sa mga silot ni Jehova naglakip sa Lunop sa adlaw ni Noe, pagkalaglag sa Sodoma ug Gomora, ug pagkapuo sa kasundalohang Ehiptohanon didto sa Pulang Dagat. Dili tuyo sa maong mga buhat ni Jehova ang paggiya, pagtudlo, o pagbansay alang sa mga gidisiplina. Mahitungod sa maong mga silot nga gipahinabo sa Diyos, si apostol Pedro nagsulat: “Siya wala magpugong sa pagsilot sa usa ka karaang kalibotan, apan nagluwas kang Noe, nga usa ka magwawali sa pagkamatarong, uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan; ug pinaagi sa paghimong abo sa mga siyudad sa Sodoma ug sa Gomora siya naghukom kanila, nga naghatag ug sumbanan alang sa mga tawong dili-diyosnon labot sa mga butang nga moabot.”—2 Pedro 2:5, 6.

Sa unsang diwa nga ang maong mga silot “naghatag ug sumbanan alang sa mga tawong dili-diyosnon labot sa mga butang nga moabot”? Diha sa sulat ni Pablo ngadto sa mga taga-Tesalonica,  siya nagpunting sa atong adlaw ingong panahon sa dihang ang Diyos, pinaagi sa iyang Anak, si Jesu-Kristo, “manimalos kanilang wala makaila sa Diyos ug kanilang wala magsunod sa maayong balita.” Si Pablo midugang: “Kini sila makaagom sa hudisyal nga silot sa walay kataposang kalaglagan.” (2 Tesalonica 1:8, 9) Dayag nga ang maong silot wala tuyoa aron matudloan o malunsay kadtong ginadisiplina. Apan, sa dihang awhagon ni Jehova ang iyang mga magsisimba sa pagdawat sa iyang disiplina, siya wala magtumong sa silot nga ipahamtang sa dili-mahinulsolong mga makasasala.

Makaiikag nga ang Bibliya wala maghubit kang Jehova sa panguna ingong usa ka tigsilot. Hinunoa, siya kasagarang gihubit ingong usa ka mahigugmaong magtutudlo ug mapailobong tigbansay. (Job 36:22; Salmo 71:17; Isaias 54:13) Oo, ang diyosnong disiplina nga gipahamtang sa tuyo nga magtul-id giduyogan kanunay sa gugma ug pailob. Pinaagi sa pagsabot sa katuyoan sa disiplina, ang mga Kristohanon anaa sa mas maayong kahimtang sa pagdawat ug pagpahamtang sa disiplina uban ang hustong tinamdan.

Ang Disiplina sa Mahigugmaong mga Ginikanan

Sulod sa pamilya ug sa Kristohanong kongregasyon, ang tanan kinahanglang makasabot sa katuyoan sa disiplina. Kini tinuod ilabina alang niadtong adunay awtoridad, sama sa mga ginikanan. Ang Proverbio 13:24 nag-ingon: “Ang nagapugong sa iyang bunal nagadumot sa iyang anak, apan ang nahigugma kaniya nagapangita kaniya uban ang disiplina.”

Sa unsang paagi ipahamtang sa mga ginikanan ang disiplina? Ang Bibliya nag-ingon: “Kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4) Kining tambaga gisubli niining mga pulonga: “Kamong mga amahan, ayaw palagota ang inyong mga anak, aron sila dili masubo.”—Colosas 3:21.

Ang Kristohanong mga ginikanan nga nakasabot sa katuyoan sa disiplina dili molihok sa maharasong paagi. Ang prinsipyo nga giingon sa 2 Timoteo 2:24 mahimong mapadapat sa paagi diin ang mga ginikanan magpahamtang ug disiplina. Si Pablo nagsulat: “Ang ulipon sa Ginoo dili kinahanglang makig-away, kondili kinahanglang magmalumo sa tanan, may katakos sa pagpanudlo.” Ang dili-kapugngan nga pagsilaob sa kasuko, pagsinggit, ug mainsultohon o matamayon nga mga pulong dili gayod matawag ug mahigugmaong disiplina ug walay luna diha sa kinabuhi sa usa ka Kristohanon.—Efeso 4:31; Colosas 3:8.

Ang pagpanul-id sa ginikanan naglangkit ug labaw pa kay sa pagpahamtang dayon ug silot. Kadaghanan sa mga bata nagkinahanglan ug sublisubli nga pahimangno sa dili pa nila  matul-id ang ilang panghunahuna. Busa, ang mga ginikanan kinahanglang mogugol ug panahon, magpakitag pailob, ug mamalandong pag-ayo sa paagi sa ilang pagpahamtang ug disiplina. Angay nilang hinumdoman nga ang mga bata kinahanglang matutuon diha sa “disiplina ug sa pagdumala-sa-kaisipan ni Jehova.” Nagkahulogan kana ug usa ka matang sa pagbansay nga molungtad ug daghang tuig.

Ang Kristohanong mga Magbalantay Nagdisiplina Uban ang Kalumo

Ang mao gihapong mga prinsipyo mapadapat ngadto sa Kristohanong mga ansiyano. Ingong mahigugmaong mga magbalantay, sila naningkamot sa pagpalig-on sa panon pinaagi sa paghatag ug instruksiyon, pagtultol, ug pagbadlong kon gikinahanglan. Sa pagbuhat niana, ilang gihinumdoman ang tinuod nga katuyoan sa disiplina. (Efeso 4:11, 12) Kon ilang isentro lamang ang ilang pagtagad nganha sa pagpahamtang ug disiplina, sila magsilot lamang sa nakasala ug wala nay dugang pang himoon. Ang diyosnong disiplina naglangkit ug labaw pa. Kay gitukmod sa gugma, ang mga ansiyano maningkamot gayod sa pagtabang sa nakasala. Tungod kay sila tinuod nga nahingawa, sila subsob nga mag-eskedyul ug ubay-ubayng sesyon alang sa pagdasig ug pagbansay.

Sumala sa pahimangno nga makita diha sa 2 Timoteo 2:25, 26, bisan sa dihang makiglabot niadtong dili dayon modawat sa disiplina, ang mga ansiyano kinahanglang “malumong” nagatudlo. Dayon gipahayag sa maong teksto ang katuyoan sa disiplina: “Basin ug itugot sa Diyos nga sila maghinulsol nga motultol ngadto sa tukmang kahibalo sa kamatuoran, ug sila maulian sa ilang hustong panimuot gikan sa lit-ag sa Yawa.”

Usahay, kinahanglang ipalagpot ang dili-mahinulsolong mga makasasala gikan sa kongregasyon. (1 Timoteo 1:18-20) Bisan ang maong bug-at nga aksiyon angayng isipon nga disiplina, dili kay usa ka silot lamang. Matag karon ug unya, ang mga ansiyano maningkamot sa pagduaw sa mga napalagpot nga dili na aktibong nagabuhat ug daotan. Panahon sa maong mga duaw, ang mga ansiyano molihok nga nahiuyon sa tinuod nga katuyoan sa disiplina pinaagi sa paglaraw sa mga lakang nga gikinahanglan aron ang usa ka tawo makabalik sa Kristohanong kongregasyon.

Si Jehova Maoy Hingpit nga Maghuhukom

Ang mga ginikanan, Kristohanong mga magbalantay, ug ang uban nga adunay Kasulatanhong awtoridad sa pagpahamtang ug disiplina angayng mag-isip sa maong responsabilidad nga seryoso. Sila dili angayng maghukom sa uban ingong dili na gayod matul-id pa. Busa, ang ilang disiplina kinahanglang dili gayod mapanimaslon o mapungtanon nga silot.

Tinuod nga ang Bibliya nagtumong kang Jehova ingong usa nga magpahamtang ug bug-at  ug kataposan nga silot. Gani, ang Kasulatan nag-ingon nga “makahahadlok nga mahulog ngadto sa mga kamot sa buhing Diyos.” (Hebreohanon 10:31) Apan walay tawo ang angayng magtandi sa iyang kaugalingon kang Jehova niining bahina o sa bisan unsang paagi. Ug walay usa ang may katarongang mobati nga makahahadlok nga mahulog sa mga kamot sa usa ka ginikanan o sa usa ka ansiyano diha sa kongregasyon.

Si Jehova adunay katakos sa pagkab-ot sa hingpit nga pagkatimbang sa dihang magpahamtang ug disiplina. Ang mga tawo wala. Ang Diyos makabasa sa kasingkasing ug makatino kon ang usa ka tawo dili na gayod matul-id pa ug sa ingon angayng pahamtangan ug bug-os ug kataposan nga silot. Sa laing bahin, ang mga tawo dili makahimo sa pagpahamtang sa maong paghukom. Tungod niana, sa dihang adunay panginahanglan sa pagpahamtang ug disiplina, kadtong adunay awtoridad angayng maghimo kanunay niana uban sa tuyo nga magtul-id.

Pagdawat sa Disiplina ni Jehova

Kitang tanan nanginahanglan sa disiplina ni Jehova. (Proverbio 8:33) Gani, angay natong pangandoyon ang disiplina nga gipasukad sa Pulong sa Diyos. Samtang atong tun-an ang Pulong sa Diyos, kita makadawat sa disiplina nga gikan mismo kang Jehova pinaagi sa Kasulatan. (2 Timoteo 3:16, 17) Apan, usahay kita makadawat ug disiplina gikan sa mga isigka-Kristohanon. Ang pagsabot sa tinuod nga katuyoan sa pagpahamtang sa maong disiplina motabang kanato sa pagdawat niana nga kinabubut-on.

Si apostol Pablo miangkon: “Tinuod, sa pagkakaron walay disiplina nga daw makapalipay, hinunoa makapaguol.” Dayon siya midugang: “Apan pagkahuman niini alang kanila nga nabansay niini kini magpatunghag madaitong bunga, nga mao, ang pagkamatarong.” (Hebreohanon 12:11) Ang disiplina ni Jehova maoy kapahayagan sa iyang dulot nga gugma alang kanato. Kita modawat man o mopahamtang ug disiplina, angay natong hinumdoman ang katuyoan sa diyosnong disiplina ug patalinghogan ang maalamong tambag sa Bibliya: “Hawiri ang disiplina; ug ayaw kini buhii. Ampingi kini, kay kini maoy imong kinabuhi.”—Proverbio 4:13.

[Mga hulagway sa panid 21]

Ang dili-mahinulsolong mga makasasala makadawat sa mahukmanong silot sa Diyos, dili sa iyang nagatul-id nga disiplina

[Mga hulagway sa panid 22]

Kay gitukmod sa gugma, ang mga ansiyano maggahin ug panahon sa pagpanukiduki ug pagtabang sa mga nakahimog sayop

[Mga hulagway sa panid 23]

Ang mga ginikanan mapailobon ug mahigugmaon nga magpahamtang “sa disiplina ug sa pagdumala-sa-kaisipan ni Jehova”