Usa ka Sugilanon nga Makapukaw sa Pagtuo ug Kaisog—Mga Saksi ni Jehova sa Ukraine

MAINGON nga ang mga Kristohanon niadtong unang siglo nakaagom ug paglutos, mao usab ang katawhan sa Diyos karon. (Mateo 10:22; Juan 15:20) Pipila lamang ka dapit ang nakaagom ug paglutos nga mas dugay o mas grabe kay sa Ukraine, diin ang buluhatong pagwali sa Gingharian gidili sulod sa 52 ka tuig.

Ang 2002 Tinuig nga Basahon sa mga Saksi ni Jehova nagsaysay sa mga kaagi sa katawhan sa Diyos nianang nasora. Kini maoy usa ka sugilanon sa pagtuo, kaisog, ug kalig-on atubangan sa grabe nga kalisdanan. Ang mosunod maoy pipila ka mga komento sa apresasyon nga nadawat sa sangang buhatan sa mga Saksi ni Jehova sa Ukraine:

“Nahuman nako pagbasa ang 2002 Tinuig nga Basahon. Wala nako kapugngi ang paghilak samtang nagbasa bahin sa inyong kalihokan sa Ukraine. Buot nakong mahibaloan ninyo kon unsa ka dakong pagdasig ang akong nakuha gikan sa inyong masibotong panig-ingnan ug lig-ong pagtuo. Ako mapasigarbohon nga nahisakop sa mao gihapong espirituwal nga pamilya sama kaninyo. Kinasingkasing akong nagpasalamat!”—Andrée, Pransiya.

“Walay pulong ang makahubit sa akong pagkamapasalamaton kaninyo ug kang Jehova alang sa 2002 Tinuig nga Basahon. Mitulo ang akong mga luha samtang akong gibasa ang daghang eksperyensiya sa mga igsoon kinsa migugol sa labing maayong mga tuig sa ilang kinabuhi diha sa mga bilanggoan ug kampo konsentrasyon. Nakadayeg ako sa ilang kaisog. Bisan tuod ako 27 ka tuig na nga Saksi, ako may makat-onan gihapon gikan niini nga mga igsoong babaye ug lalaki. Gipalig-on nila ang akong pagtuo sa atong langitnong Amahan, si Jehova.”—Vera, kanhing Yugoslavia.

“Gihimo ko kini nga sulat uban ang kalipay tungod sa inyong maayong panig-ingnan sa pagkamainantoson ug pagkamatinumanon panahon niadtong mga tuig sa pagsupak. Ang inyong bug-os nga pagsalig kang Jehova ug ang inyong determinasyon nga magpabiling matinumanon naghatag kaninyog kadungganan. Dugang pa, ang inyong pagkamapainubsanon atubangan sa mga pagsulay nagpalig-on sa akong pagtuo nga si Jehova dili mobiya sa iyang katawhan. Tungod sa inyong maayong panig-ingnan sa kaisog, pagkadili-matarog, ug pagkamalahutayon, dali ra namong madawat ang among ginagmayng mga problema.”—Tuteirihia, French Polynesia.

“Human mabasa ang Tinuig nga Basahon, kinahanglan akong mosulat kaninyo. Natandog ako pag-ayo sa tanang makapadasig nga mga kasinatian. Mapasigarbohon ako nga nahimong membro sa usa ka maunongon, nahiusa nga organisasyon, nga gitultolan sa usa ka mahigugmaon, mahingawaon nga Amahan, kinsa nagahatag kanatog kusog sa hustong panahon. Naguol ako nga daghan kaayong madasigong mga alagad ni Jehova ang nag-antos pag-ayo ug nawad-an pa gani sa ilang kinabuhi. Apan nalipay usab ako tungod kay ingong resulta sa ilang kaisog ug kasibot, daghan kaayong tawo ang nakakat-on sa kamatuoran ug nakaila sa atong mahigugmaong Amahan.”—Colette, Netherlands.

“Ako ug ang akong asawa kinahanglan gayong mosulat kaninyo aron ipahibalo nga natandog ang among kasingkasing samtang nagbasa sa asoy mahitungod sa Ukraine diha sa Tinuig nga Basahon. Kamo nga maunongong mga igsoon naghatag ug maayong panig-ingnan sa pagkamainantoson ilalom sa dugay ug grabeng kalisdanan.  Kaharmonya sa mga pulong sa Proverbio 27:11, malipayon gayod si Jehova sa pagkahibalo nga daghan kaayong matinumanong mga igsoon nga taga-Ukraine ang naghupot sa ilang dili-mabungkag nga integridad bisan pa sa tanang daotang mga buhat sa Yawa.”—Alan, Australia.

“Nanglugmaw ang akong mga luha sa dihang akong gibasa ang mahitungod sa mga igsoon sa Ukraine. Daghan kaayo ang ilang giantos—mga katuigan sa pagkabilanggo, pagpaantos, pagdaogdaog, ug pagkabulag sa pamilya. Gusto nakong sultihan ang tanang igsoon nga nag-alagad gihapon sa inyong mga kongregasyon nga gihigugma ug gitahod nako sila pag-ayo. Nalipay gayod ako sa ilang kaisog ug pagkadili-matarog. Nahibalo ako sa tinubdan sa ilang gahom, ang espiritu ni Jehova. Si Jehova duol kanato, ug buot niyang motabang kanato.”—Sergei, Rusya.

“Gibasa nako ang 2002 Tinuig nga Basahon, ug ako mihilak. Gihisgotan kamo sa daghang igsoong mga babaye ug lalaki sa among kongregasyon. Kamo maoy tinuod nga bahandi. Nalipay kaayo ko nga nahimong sakop niining usa ka dakong espirituwal nga pamilya.”—Yeunhee, Habagatang Korea.

“Natandog kaayo ako sa inyong rekord sa pagtuo, pagkamainantoson, ug dili-matarog nga gugma kang Jehova ug sa iyang Gingharian. Usahay kita mapakyas sa pagpabili sa kagawasan nga atong natagamtam ug sa kadagaya sa espirituwal nga pagkaon nga gitagana ni Jehova kanato. Apan, dili kini ang inyong kahimtang. Ang inyong panig-ingnan sa pagtuo nagtabang kanamo sa pagkaamgo nga kon kita adunay suod nga relasyon uban sa atong Diyos, siya magahatag kanato ug kusog sa pag-atubang sa tanang matang sa pagsulay.”—Paulo, Brazil.

“Nakahigayon ako sa pagbasa sa inyong mga eksperyensiya diha sa 2002 Tinuig nga Basahon. Natukbil kaayo ako niini, ilabina ang makapatandog nga kasinatian ni Sister Lydia Kurdas. Gibati nako ang kasuod uban niining igsoona.”—Nidia, Costa Rica.

“Karong adlawa nahuman nako pagbasa ang 2002 Tinuig nga Basahon. Samtang ako nagbasa niini, napalig-on ang akong pagtuo kang Jehova. Usa ka butang nga dili nako malimtan mao ang asoy sa dihang ang mga binhi sa pagduhaduha natisok maylabot niadtong nagapanguna. Kini nagtudlo kanako nga dili gayod magduhaduha sa mga igsoong lalaki nga nagapanguna. Daghan kaayong salamat! Kining espirituwal nga pagkaon maayo alang sa kasingkasing ug nag-andam kanamo sa panahon nga ang among pagtuo masulayan.”—Leticia, Tinipong Bansa.

“Mapasalamaton kami sa ekselenteng Tinuig nga Basahon. Daghang magmamantala ang karon pa lang nakabasa mahitungod sa kalihokan sa atong mga igsoon didto sa Ukraine. Ang mga igsoon dinhi napalig-on. Daghan, ilabina taliwala sa mga batan-on, ang nagpauswag sa ilang kalihokan sa pag-alagad. Ang uban misugod sa pag-alagad ingong mga regular o oksilyare payunir. Ang tanan nadasig sa mga sugilanon sa mga igsoong lalaki ug babaye nga nag-alagad kang Jehova panahon sa pagdili.”—Usa ka komite sa pag-alagad sa kongregasyon, Ukraine.

Ang pagkamatinumanon sa atong mga igsoon didto sa Ukraine mao gayoy tinubdan sa pagdasig sa katawhan ni Jehova sa tibuok kalibotan. Sa pagkatinuod, ang regular nga pagbasa sa makapadasig nga mga asoy nga makita diha sa Tinuig nga Basahon maoy maayong paagi sa paglig-on sa atong pagtuo ug pagkamainantoson niining hinungdanong mga panahon.—Hebreohanon 12:1.