Ang Maayong Balita Namunga  sa São Tomé ug Príncipe

ANG kadaghanang tawo lagmit wala pa makadungog sukad bahin sa São Tomé ug Príncipe. Kining mga islaha dili kasagarang ianunsiyo diha sa mga brosyur ingong dapit nga bakasyonan. Sa mapa sa kalibotan, kini morag gagmayng mga tuldok nga nahimutang sa Gulpo sa Guinea duol sa kasadpang kabaybayonan sa Aprika. Ang São Tomé nahimutang duol kaayo sa ekwetor ug ang Príncipe halos anaa sa amihanang-silangan sa São Tomé. Tungod sa ulanon, umog nga klima, milambo ang bagang kalasangan, nga nagtabon sa mga bakilid sa kabukiran nga may gihabogong kapin sa 2,000 ka metros.

Kining tropikal nga mga isla, nga gilibotan sa asul nga kadagatan ug gilinyahag-palma nga kabaybayonan, gipuy-an sa mahigalaon, maabiabihon nga mga tawo, nga adunay maanindot nga panagsagol sa mga kultura tungod sa ilang Aprikanhon ug Uropanhon nga mga kagikan. Ang 170,000 ka molupyo puliki sa pangunang gieksportar nga produkto, ang kakaw, o sa pagpanguma ug pagpangisda. Sa di pa dugayng katuigan, malisod ang pagpangitag pagkaon alang sa usa ka adlaw.

Apan, sa kataposang dekada sa ika-20ng siglo, usa ka hitabo ang nakaapektar pag-ayo sa kinabuhi sa nagkadaghang tawo niining mga islaha. Sa Hunyo 1993, ang mga Saksi ni Jehova legal nga girehistro sa gobyerno sa São Tomé ug Príncipe, nga nagtapos sa dugay ug subsob malisod nga anib sa kasaysayan sa mga Saksi ni Jehova niining mga islaha.

Mga Binhi Napugas Ilalom sa Kalisdanan

Mopatim-aw nga ang unang Saksi miabot niining nasora sa unang bahin sa mga tuig sa 1950 sa dihang ang mga binilanggo nga gikan sa ubang Portuges nga mga kolonya sa Aprika gipadala aron patrabahoon diha sa mga kampo sa pinugos nga pagtrabaho diha sa mga isla. Ang maong Saksi, nga usa ka Aprikano nga payunir, o bug-os-panahong ministro, gipapahawa sa Mozambique tungod sa iyang pagsangyaw sa maayong balita sa Gingharian sa Diyos nianang nasora. Kining bugtong Saksi nagmapuliki, ug sulod sa unom ka bulan, dihay 13 pa nga nakigbahin sa pagmantala sa maayong balita. Sa ulahi, ang ubang mga Saksi nga nailalom sa samang mga kahimtang nangabot gikan sa Angola. Panahon sa ilang pagkabilanggo, gipahimuslan nila ang tanang kahigayonan sa pagpaambit sa maayong balita ngadto sa lokal nga mga molupyo.

Pagka-1966 ang tanang igsoong lalaki nga gipatrabaho diha sa mga kampo sa pinugos nga pagtrabaho sa São Tomé namalik ngadto sa dakong yuta sa Aprika. Ang gamayng grupo sa mga magmamantala sa Gingharian nga nahibilin maisogong nagpadayon. Sila gilutos, gidagmalan, ug gibilanggo tungod kay sila nagtigom aron sa pagtuon sa Bibliya, ug walay usa nga mibisita o midasig kanila. Naangkon sa nasod ang kaugalingnan gikan sa Portugal sa 1975, ug sa hinayhinay ang mga binhi sa kamatuoran sa Gingharian misugod sa pagpamunga.

Pagpadako ug Pagpanukod

Sa Hunyo 1993, dihang sila legal nga girehistro, dihay kinatas-ang ihap nga 100 ka magmamantala sa Gingharian. Niana gihapong tuiga, ang mga espesyal payunir nangabot gikan sa Portugal. Tungod sa ilang mga paningkamot nga makakat-on sa pinulongang Creole nga Portuges, nasuod sila sa lokal nga mga tawo. Dayon nahimong prioridad ang pagpangitag lote nga katukoran ug Kingdom Hall. Sa pagkahibalo niining maong panginahanglan, usa ka sister nga ginganlag Maria nagdonar sa katunga sa lote nga gitarokan sa iyang gamayng balay. Ang maong lote igo na alang sa usa ka dakong Kingdom Hall. Wala mahibaloi ni Maria nga tungod kay namatay na ang iyang mga paryente, kining maong lote gikaikagan diay sa ambisyosong mga debeloper. Usa ka adlaw niana, miadto ang usa ka iladong negosyante aron makig-estorya kang Maria.

“Duna koy nabatian bahin nimo nga dili makahatag nimo ug kaayohan!” gipasidan-an niya si Maria. “Nakabati ko nga imong gidonar ang imong lote. Wala ka ba mahibalo nga dako kinig kantidad tungod kay ania kini mismo sa siyudad?”

“Kon akong ibaligya ang yuta nimo, pila may imong ibayad nako?” nangutana si Maria. Sa dihang wala motubag ang maong tawo, si Maria  mipadayon: “Bisan pag ihatag nimo nako ang tanang kuwarta sa kalibotan, dili gayod kana paigo tungod kay ang kuwarta dili makapalit ug kinabuhi.”

“Wala kay mga anak, dili ba?” nangutana ang maong tawo.

Aron matapos ang panag-estorya, si Maria miingon: “Ang lote iya ni Jehova. Gipahulam niya kini kanako sulod sa daghang tuig, ug karon ako kining giuli kaniya. Naglaom akong mabuhi sa walay kataposan.” Dayon gipangutana niya ang tawo: “Aduna ka bay ikahatag nga kinabuhing walay kataposan?” Mitalikod ang maong tawo ug milakaw nga wala nay lain pang gisulti.

Ang resulta mao nga usa ka nindot nga dos-andanas nga bilding ang natukod uban sa tabang sa may-katakos nga mga igsoon nga taga-Portugal. Adunay silong ilalom sa tibuok bilding, usa ka dakong Kingdom Hall, ug mga puy-anan. Aduna usab kiniy mga lawak nga klasehanan alang sa mga ansiyano, ministeryal nga mga alagad, ug mga payunir. Dunay duha ka kongregasyon nga nagtigom dinhi karon, nga naghimo niini nga maayong sentro sa edukasyon alang sa putli nga pagsimba diha sa kaulohan.

Sa Mé-Zochi, dihay usa ka kongregasyon sa 60 ka masibotong mga magmamantala. Tungod kay ang mga tigom gihimo man diha sa minaomao nga Kingdom Hall nga nahimutang sa kasagingan, dayag nga gikinahanglan ang usa ka haom nga Kingdom Hall. Gipahibalo kini ngadto sa city hall, ug ang mabinationg mga opisyal nagtanyag ug usa ka maayong lote diha sa dakong dalan. Usa ka nindot nga Kingdom Hall ang natukod sulod sa duha ka bulan uban sa tabang sa mga igsoon nga taga-Portugal, nga naggamit sa paspas nga paagi sa pagtukod. Halos dili makatuo ang lokal nga mga tawo sa ilang nakita. Ang usa ka Swekong inhenyero nga nalangkit sa usa ka proyekto sa pagpanukod diha sa siyudad nahingangha sa pagkakita sa mga igsoong lalaki ug babaye nga nagtrabaho. “Dili kini katuohan!” matod niya. “Ang mga Saksi ni Jehova dinhi sa Mé-Zochi naggamit ug paspas nga paagi sa pagtukod! Ingon niining paagiha unta nato organisahon ang atong proyekto.” Ang Kingdom Hall gidedikar sa Hunyo 12, 1999, nga may 232 nga mitambong. Ang maong tigomanan nahimong pangunang atraksiyon sa mga bisita sa siyudad sa Mé-Zochi.

Usa ka Makasaysayanhong Kombensiyon

Ang usa ka makasaysayanhong hitabo alang sa mga Saksi ni Jehova sa São Tomé ug Príncipe mao ang tulo-ka-adlawng “Balaang Pagpanudlo”  nga Distritong Kombensiyon sa Enero 1994—ang unang kombensiyon niining mga islaha. Gipahigayon kini didto sa kinanindotang awditoryum sa nasod nga may air condition. Mahanduraw ba nimo ang kalipay sa 116 ka magmamantala sa Gingharian sa pagkakita sa 405 ka tumatambong ug sa unang higayon nakatan-aw sa mga drama sa Bibliya ug nakadawat sa mga basahong giluwatan sa kombensiyon? Sa usa ka tropikal nga baybayon gibawtismohan ang 20 ka dedikadong mga tawo.

Ang bag-ong butang nga nakadani sa pagtagad sa publiko mao ang talagsaong mga lapel badge nga gitaod sa mga delegado. Ang presensiya sa 25 ka bisita nga gikan sa Portugal ug Angola nakapahimo sa maong kombensiyon nga morag internasyonal. Usa ka bugkos sa mainit nga Kristohanong gugma ang naugmad dihadiha, ug daghan ang nanghilak panahon sa kataposang sesyon sa dihang sila nanamilit na sa usag usa.—Juan 13:35.

Nangabot ang mga tigbalita gikan sa National Radio ug giinterbiyo ang magtatan-aw sa kombensiyon. Gisibya usab nila ang mga kinutlo gikan sa ubay-ubayng mga pakigpulong. Usa gayod kadto ka makasaysayanhong okasyon, ug alang niining dugayng nahimulag nga matinumanong mga Saksi, nakatabang kadto sa paghimo sa makitang organisasyon ni Jehova nga morag mas duol na.

Namunga Alang sa Kadayeganan ni Jehova

Sa dihang mamunga ang mensahe sa Gingharian, magpatungha kinig maayong panggawi nga makahatag ug kadayeganan ug kadungganan kang Jehova. (Tito 2:10) Usa ka tin-edyer nga babaye nalingaw sa iyang nakat-onan gikan sa iyang senemanang pagtuon sa Bibliya. Apan, ang iyang amahan nagdili kaniya sa pagtambong sa mga tigom sa kongregasyon. Sa dihang matinahoron niyang gipatin-aw kaniya ang kahinungdanon sa Kristohanong mga tigom ug ang iyang tinguha sa pagtambong, gipalayas dayon siya sa iyang amahan gikan sa iyang panimalay. Tingali, naghunahuna ang iyang amahan nga buhaton niya ang gibuhat sa daghang uban pang mga batan-on—moipon dayon sa usa ka lalaki nga makabuhi kaniya. Sa dihang nahibaloan sa amahan nga siya nagkinabuhi ug usa ka sulondan, hinlo nga kinabuhi ingong Kristohanon, natukmod siya sa pagkuha kaniyag balik ug paghatag kaniyag bug-os nga kagawasan sa pag-alagad kang Jehova.

Ang laing pananglitan mao kanang sa usa ka lider sa banda. Nahigawad na siya sa iyang imoral nga paagi sa pagkinabuhi. Samtang nangita ug katuyoan sa kinabuhi, nakontak siya sa mga Saksi. Sa dihang gisugdan niya ang pagkinabuhi sumala sa moral nga mga sukdanan sa Bibliya, siya nahimong sumsoman sa tabi. Sa wala madugay nasabtan niya nga kinahanglang taposon ang tanang dili-maayong mga pakig-uban. (1 Corinto 15:33) Dayon gihimo niya ang hinungdanong lakang sa pagpabawtismo ingong simbolo sa iyang pagpahinungod kang Jehova.

Dunay usa ka gamayng grupo sa mga batan-on nga nangita sa matuod nga relihiyon. Ang ilang pagpangita misangpot sa mga panaghisgot uban sa mga pastor sa ubay-ubayng ebanghelikal nga mga grupo, apan miresulta lang kini sa dugang kalibog ug kahigawad. Tungod niana, sila nahimong pintas nga mga bugoy ug tigyagayaga sa bisan unsang butang nga relihiyoso.

Usa ka adlaw niana, usa sa mga Saksi ni Jehova, usa ka misyonaryo, nagpaingon sa iyang gitun-an sa Bibliya ug nahiabot sa dapit diin didto ang maong mga batan-on. Gusto sa maong grupo nga tubagon sa misyonaryo ang pipila ka pangutana ug gidala siya ngadto sa luyo sa balay, diin gipalingkod siya sa usa ka bangkito. Human niana nagpusotpusot ang ilang mga pangutana bahin sa mga ulohang sama sa kalag, impiyernong kalayo, kinabuhi sa langit, ug kataposan sa kalibotan. Gitubag sa Saksi ang tanan nilang mga pangutana pinasukad sa Bibliya nga gipagamit kaniya sa lider sa gang. Usa ka oras sa ulahi, ang lider, nga ginganlag Law, miingon ngadto sa misyonaryo: “Sa dihang gihangyo ka namong mohapit ug motubag sa mga pangutana, ang among tuyo mao ang pagtamay kanimo, sama sa among ginahimo sa ubang mga tawo sa ubang mga relihiyon. Nagtuo mi nga walay makatubag sa maong mga pangutana. Apan, natubag nimo kini ginamit lamang ang Bibliya! Tug-ani ko, unsaon nako pagkakat-on pa ug dugang bahin sa Bibliya?” Usa ka pagtuon sa Bibliya ang nasugdan uban kang Law, ug sa wala madugay siya misugod na sa pagtambong sa mga tigom. Wala madugay human niana, iyang gibiyaan ang maong grupo ug gihunong ang iyang mapintas nga paagi sa pagkinabuhi. Sulod sa usa ka tuig, iyang gipahinungod ang iyang kinabuhi kang Jehova ug nabawtismohan. Siya karon nag-alagad na ingong usa ka ministeryal nga alagad.

 Ang usa ka lokal nga kostumbre nga nakagamot na pag-ayo mao ang pagpuyopuyo nga dili kasal. Daghan ang nagpuyopuyo sulod na sa daghang tuig, ug duna na silay mga anak. Nalisdan sila sa pagdawat sa panglantaw sa Diyos nianang butanga. Makapadasig ang pagkakita kon sa unsang paagi ang Pulong sa Diyos nakatabang sa usa ka tawo sa pagbuntog sa maong kababagan.—2 Corinto 10:4-6; Hebreohanon 4:12.

Nasabtan ni Antonio nga angay niyang ipalegal ang iyang kaminyoon ug nagplano siya nga himoon kana human sa pag-ani sa mga mais aron duna siyay ikagasto sa kombira sa kasal. Usa ka gabii sa wala pa ang pag-ani, gikawat ang iyang mga mais. Nakahukom siya sa pagpaabot sa ani sa sunod tuig, ug gikawat na usab ang iyang mga mais. Sa dihang napakyas gihapon ang lain pa niyang paningkamot sa pagbaton ug pondong salapi alang sa iyang kasal, naamgohan ni Antonio kon kinsa gayod ang iyang kaaway. “Dili na ko matonto pa ni Satanas,” matod niya. “Sa usa ka bulan ug tunga, magpakasal na mi, may kombira o wala!” Busa nagpakasal sila, ug sa ilang katingala ang ilang mga higala nanghatag ug mga manok, itik, ug usa ka kanding alang sa kombira sa kasal. Human marehistro ang ilang kaminyoon, si Antonio ug ang iyang asawa—uban sa unom nila ka mga anak—nabawtismohan agig simbolo sa ilang pagpahinungod kang Jehova.

Sa Isla sa Príncipe

Sa di pa dugayng mga tuig, ang 6,000 ka molupyo sa Príncipe matag karon ug unya ginaduaw sa magtatan-aw sa sirkito ug sa mga payunir nga taga-São Tomé. Ang mga taga-isla maabiabihon kaayo ug andam mamati sa isulti sa mga Saksi. Human mabasa ang usa ka tract nga gihatag ngadto sa usa ka lalaki, gipangita sa maong lalaki ang mga payunir pagkasunod adlaw ug mitanyag nga motabang kanila sa pagpanagtag ug dugang mga tract. Giingnan sa mga payunir ang maong tawo nga makahimo ra man sila bisag dili niya tabangan, apan miinsister ang maong tawo nga angay siyang mouban sa pagpamalaybalay aron iyang ikapailaila ang mga payunir ngadto sa mga tagbalay uban ang rekomendasyon nga maminaw pag-ayo. Gidayeg sa maong tawo ang mga payunir sa hinungdanong buluhaton nga ilang gihimo, ug dayon mibiya.

Sa 1998, duha ka payunir nga taga-São Tomé ang mibalhin ngadto sa Príncipe, ug sa wala madugay nagdumala na silag 17 ka pagtuon sa Bibliya sa balay. Ang buluhaton nagpadayon sa pag-uswag, ug sa wala madugay ang Pagtuon sa Libro sa Kongregasyon dunay aberids nga 16 ka tigtambongan, ug kapin sa 30 ang tigtambongan sa pakigpulong publiko. Ang panginahanglan alang sa usa ka tigomanan gipresentar ngadto sa city hall, ug makalilipay, usa ka lote ang gihatag aron tukoran ug Kingdom Hall. Ang mga igsoon nga taga-São Tomé miboluntaryo sa pagtukod ug gamayng Kingdom Hall nga may puy-anan usab alang sa duha ka espesyal payunir.

Sa walay duhaduha namunga ug miuswag pag-ayo ang maayong balita niining hilit nga mga isla. (Colosas 1:5, 6) Sa Enero 1990, dihay 46 ka magmamantala sa São Tomé ug Príncipe. Sulod sa 2002 nga tuig sa pag-alagad, nakab-ot ang kinatas-ang ihap nga 388 ka magmamantala sa Gingharian! Kapin sa 20 porsiyento sa mga magmamantala ang anaa sa bug-os-panahong pag-alagad, ug mga 1,400 ka pagtuon sa Bibliya sa balay ang ginadumala. Ang nanambong sa Memoryal sa 2001 miabot sa kinatas-ang ihap nga 1,907. Oo, dinhi niining tropikal nga mga isla, ang pulong ni Jehova tulin nga nagapadayon ug ginahimaya.—2 Tesalonica 3:1.

[Kahon/Hulagway sa panid 12]

Popular nga mga Sibya sa Radyo

Ang publikasyon nga gipabilhan pag-ayo niining mga islaha mao ang Mga Pangutanang Gisukna sa mga Batan-on—Mga Tubag nga Mosaler. a Matag duha ka semana, usa ka 15-minutos nga programa uban sa maong ulohan ang isibya sa National Radio. Pagkanindot paminawon sa dihang ang tigsibya mangutana, “Mga batan-on, unsaon ninyo pagkahibalo kon kini tinuod ba nga gugma o kaibog lamang?” ug sundan kana sa pagbasa sa usa ka bahin sa maong libro! (Tan-awa ang kapitulo 31.) Ang usa ka susamang sibya nagpresentar sa piniling mga bahin sa librong Ang Sekreto sa Kalipay sa Pamilya. b

[Mga footnote]

[Hulagway sa panid 9]

Unang Kingdom Hall sa São Tomé sa 1994

[Mga hulagway sa panid 10]

1. Paspas nga pagkatukod nga Kingdom Hall sa Mé-Zochi

2. Ang makasaysayanhong distritong kombensiyon nahitabo niining maong awditoryum

3. Malipayong mga kandidato sa bawtismo diha sa kombensiyon

[Picture Credit Line sa panid 8]

Globe: Mountain High Maps® Copyright © 1997 Digital Wisdom, Inc.