Aron Madaog ang Ganti, Ipasundayag ang Pagpugong-sa-Kaugalingon!

“Ang matag tawo nga nagaapil sa usa ka sangka nagapugong sa kaugalingon sa tanang butang.”—1 CORINTO 9:25.

1. Uyon sa Efeso 4:22-24, sa unsang paagi ang milyonmilyon miingon ug oo kang Jehova?

 KON ikaw nabawtismohan ingong usa sa mga Saksi ni Jehova, imong gipahibalo sa publiko nga ikaw andam nang moapil sa usa ka sangka nga kinabuhing dayon ang ganti. Ikaw miingon ug oo sa pagtuman sa kabubut-on ni Jehova. Sa wala pa magpahinungod kang Jehova, daghan kanato ang naghimog dagkong mga kausaban aron ang atong pagpahinungod mahimong makahuloganon, dalawaton sa Diyos. Atong gisunod ang tambag ni apostol Pablo ngadto sa mga Kristohanon: “Inyong hukason ang daan nga pagkatawo nga nahiuyon sa kanhi ninyong paagi sa panggawi ug nadunot sumala sa iyang malimbongong mga tinguha . . . Magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efeso 4:22-24) Sa ato pa, sa dili pa moingon ug oo maylabot sa atong pagpahinungod sa Diyos, kita kinahanglang moingon ug dili sa dili-dalawaton nga kanhing paagi sa pagkinabuhi.

2, 3. Sa unsang paagi gipakita sa 1 Corinto 6:9-12 nga duha ka matang sa mga kausaban ang kinahanglang himoon aron mabatonan ang pag-uyon sa Diyos?

² Ang pipila ka bahin sa daang personalidad nga kinahanglang hukason sa umaabot nga mga Saksi ni Jehova maoy direktang gisaway sa Pulong sa Diyos. Gitagsatagsa paghisgot ni Pablo ang pipila niana diha sa iyang sulat ngadto sa mga taga-Corinto, nga nag-ingon: “Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos.” Dayon gipakita niya nga ang unang-siglong mga Kristohanon naghimog kinahanglanong mga kausaban sa personalidad, nga midugang: “Gani ingon niana ang pipila kaninyo kaniadto.” Matikdi, ingon sila niana kaniadto, apan karon nag-usab na.—1 Corinto 6:9-11.

³ Misugyot si Pablo nga ang dugang mga kausaban mahimong kinahanglanon usab, kay siya nagpadayon:  “Ang tanang butang subay sa balaod; apan dili ang tanang butang may kaayohan.” (1 Corinto 6:12) Busa, daghan karon nga gustong mahimo nga mga Saksi ni Jehova ang nakasabot sa panginahanglan sa pag-ingon ug dili bisan sa mga butang nga bisan tuod subay sa balaod walay kaayohan o dili kaayo dumalayon ang bili. Kini tingali makapupos sa panahon ug makapatipas kanila gikan sa pagpangagpas sa mga butang nga mas hinungdanon.

4. Sa unsa nagkauyon ang dedikadong mga Kristohanon ug si Pablo?

⁴ Ang pagpahinungod ngadto sa Diyos gihimong kinabubut-on, dili kontra-gusto, nga daw naglakip kini ug dakong sakripisyo. Ang dedikadong mga Kristohanon mouyon kang Pablo, kinsa miingon human siya mahimong sumusunod ni Kristo: “Tungod [kang Jesus] nadawat ko ang kapildihan sa tanang butang ug giisip kini nga mga basura, aron akong maangkon si Kristo.” (Filipos 3:8) Si Pablo malipayong miingon ug dili sa mga butang nga dili kaayo bililhon aron siya padayong makaingon ug oo sa Diyos.

5. Sa unsang matanga sa lumba nga si Pablo malamposong miapil, ug sa unsang paagi mahimo nato ang susama niana?

⁵ Si Pablo nagpasundayag ug pagpugong-sa-kaugalingon diha sa iyang pagdagan sa espirituwal nga lumba ug sa kataposan nakaingon: “Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo. Sukad niining panahona adunay gigahin alang kanako nga purongpurong sa pagkamatarong, nga ihatag kanako sa Ginoo, ang matarong nga maghuhukom, isip ganti nianang adlawa, ngani dili lamang kanako, kondili sa tanan usab nga nahigugma sa iyang pagpadayag.” (2 Timoteo 4:7, 8) Kita ba usab makasultig susama niana sa umaabot? Makasulti kita niana kon kita magpasundayag ug pagpugong-sa-kaugalingon samtang nagadagan sa atong Kristohanong lumba nga dili mohunong hangtod kini matapos.

Ang Pagpugong-sa-Kaugalingon Gikinahanglan Aron sa Pagbuhat ug Maayo

6. Unsa ang pagpugong-sa-kaugalingon, ug unsa ang duha ka paagi diin angay nato kining ipasundayag?

⁶ Ang Hebreohanon ug Grego nga mga pulong nga gihubad ug “pagpugong-sa-kaugalingon” diha sa Bibliya sa literal nagpasabot nga ang usa ka tawo adunay gahom o kontrol ibabaw sa iyang kaugalingon. Sagad nagkahulogan kini nga pugngan ang kaugalingon sa pagbuhat ug daotan. Apan dayag nga ang usa ka sukod sa pagpugong-sa-kaugalingon gikinahanglan usab aron magamit nato ang atong mga lawas sa paghimog maayong mga buhat. Ang kinaiyanhong hilig sa dili-hingpit nga mga tawo mao ang pagbuhat ug daotan, busa kita adunay duha ka matang sa pagpakigbisog. (Ecclesiastes 7:29; 8:11) Samtang naglikay sa pagbuhat ug daotan, kinahanglan usab nga pugson nato ang atong kaugalingon sa paghimog maayo. Gani, ang pagkontrolar sa atong lawas aron sa paghimog maayo maoy usa sa kinamaayohang mga paagi sa paglikay sa pagbuhat ug daotan.

7. (a) Alang sa unsa nga kita angayng mag-ampo, sama kang David? (b) Ang pagpamalandong bahin sa unsa ang motabang kanato sa pagpasundayag ug labaw pang pagpugong-sa-kaugalingon?

⁷ Klaro nga hinungdanon ang pagpugong-sa-kaugalingon aron atong matuman ang atong pahinungod ngadto sa Diyos. Kita kinahanglang mag-ampo sama kang David: “Buhati ako ug putli nga kasingkasing, Oh Diyos, ug ibutang sa akong kahiladman  ang usa ka bag-ong espiritu, usa nga malig-on.” (Salmo 51:10) Kita makapamalandong bahin sa mga benepisyo sa paglikay sa mga butang nga imoral o makadaot sa lawas. Hunahunaa ang posibleng kadaot sa dili paglikay sa maong mga butang: grabeng mga sakit, natugaw nga mga relasyon, bisan ahat nga kamatayon. Sa laing bahin, hunahunaa ang daghang benepisyo sa pagsunod sa paagi sa pagkinabuhi nga gisugyot ni Jehova. Apan, tungod kay realistikanhon, kinahanglang dili nato kalimtan nga ang atong kasingkasing malimbongon. (Jeremias 17:9) Kinahanglang determinado kita sa pagsukol sa mga pagsulay niini sa pagpakamenos sa pagkaseryoso sa pagbayaw sa mga sukdanan ni Jehova.

8. Unsang katinuoran ang itudlo kanato sa kasinatian? Iilustrar.

⁸ Kadaghanan kanato nahibalo gikan sa kasinatian nga ang dili-andam nga unod subsob nga maningkamot sa pagpatay sa kasibot sa usa ka andam nga espiritu. Tagda, pananglitan, ang pagwali sa Gingharian. Si Jehova malipay sa pagkaandam sa mga tawo sa pagpakigbahin niining nagahatag-kinabuhi nga buluhaton. (Salmo 110:3; Mateo 24:14) Alang sa kadaghanan kanato, ang pagkat-on sa pagwali nga dayag dili sayon. Kini nagkinahanglan—ug tingali magkinahanglan gihapon—nga atong kontrolahon ang atong lawas, ‘makmakon kini’ ug ‘himoon kini nga samag ulipon,’ imbes tugotan kini sa pagpasubay kanato sa dalan nga dili hago.—1 Corinto 9:16, 27; 1 Tesalonica 2:2.

“Sa Tanang Butang”?

9, 10. Unsay nalakip sa pagpasundayag ug ‘pagpugong-sa-kaugalingon sa tanang butang’?

⁹ Ang tambag sa Bibliya sa pagpasundayag ug ‘pagpugong-sa-kaugalingon sa tanang butang’ nagpakita nga labaw pa ang gikinahanglan kay sa pagkontrolar lamang sa atong kasuko ug sa paglikay sa imoral nga panggawi. Bation tingali nato nga atong nakab-ot ang pagpugong-sa-kaugalingon niining mga bahina, ug kon mao, kita magmapasalamaton gayod. Apan, komosta sa ubang mga bahin sa kinabuhi diin ang panginahanglan sa pagpugong-sa-kaugalingon dili tingali kaayo dayag? Sa pag-ilustrar, ibutang ta nga kita nagpuyo sa usa ka medyo adunahan nga nasod nga adunay taas nga sukdanan sa kinabuhi. Dili ba maalamon ang pagkat-on sa pag-ingon ug dili sa wala-kinahanglanang mga galastohan? Maayong tudloan sa mga ginikanan ang ilang mga anak nga dili mopalit sa bisan unsa nga ilang makita tungod lamang kay kini mabatonan, nindot, o maabot nila. Siyempre, aron mahimong epektibo ang maong instruksiyon, ang mga ginikanan angayng magpakita sa hustong panig-ingnan.—Lucas 10:38-42.

¹⁰ Ang pagkat-on sa pagkinabuhi nga wala ang usa ka butang nga gusto nato makapalig-on sa atong determinasyon. Makapauswag usab kini sa atong apresasyon sa materyal nga mga butang nga ato nang nabatonan ug makahimo kanatong mas mabination ngadto niadtong kinahanglang magkinabuhi nga wala ang pipila ka butang, dili tungod kay gusto nila, kondili tungod sa kakabos. Tinuod, ang makasaranganong estilo sa kinabuhi kasukwahi sa popular nga mga tinamdan sama sa “magmaluloton ka sa imong kaugalingon” o “takos ka sa labing maayo.” Ang kalibotan sa panganunsiyo nagpasiugda sa tinguha alang sa dihadihang katagbawan, apan naghimo kini niana aron makaganansiya ug dako. Kining situwasyona makapugong sa atong mga paningkamot sa pagpasundayag ug pagpugong-sa-kaugalingon. Ang usa ka magasin gikan sa usa ka mauswagong nasod sa Uropa di pa dugayng nag-ingon: “Kon ang pagkontrolar sa dili-maayong mga hilig nagkinahanglan ug pakigbisog sa galamhan sa bahin niadtong nagkinabuhi ilalom sa masakit nga mga sirkumstansiya sa tumang kakabos, ilabinang tinuod kini niadtong nagpuyo sa yuta sa gatas ug dugos sa adunahang katilingban karon!”

11. Nganong mapuslanon ang pagkakat-on sa pagkinabuhi nga wala ang usa ka butang nga gusto nato, apan unsay nakapalisod niini?

¹¹ Kon nalisdan kita sa pag-ila kon unsay atong gusto ug kon unsay tinuod natong gikinahanglan, mahimong makatabang ang paghimog mga lakang aron sa pagseguro nga wala kita molihok sa iresponsableng paagi. Pananglitan, kon gusto natong pugngan ang hilig sa dili-makontrolar nga paggasto, tingali mohukom kita nga dili na mamalit pinaagig utang, o kon mamalit man, tingali magdala lamang kita ug limitadong kantidad sa kuwarta. Hinumdomi nga si Pablo miingon nga “ang diyosnong pagkamahinalaron inubanan sa pagkakontento” maoy “usa ka paagi nga makaganansiyag dako.” Siya nangatarongan: “Kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini. Busa, kon kita adunay makaon ug ikabesti, kita magmakontento na niining mga butanga.” (1 Timoteo 6:6-8) Kontento ba kita? Ang pagkat-on sa pagkinabuhi nga yano, nga wala ang wala-kinahanglanang mga butang nga miresulta tungod sa pagpatuyang sa kaugalingon—sa bisan unsang dagway—nagkinahanglan ug determinasyon ug pagpugong-sa-kaugalingon. Apan, kana maoy usa ka pagtulon-an nga takos tun-an.

12, 13. (a) Sa unsang mga paagi nga ang Kristohanong mga tigom naglangkit ug pagpugong-sa-kaugalingon? (b) Unsa ang ubang mga kalihokan diin kita kinahanglang mag-ugmad ug pagpugong-sa-kaugalingon?

 ¹² Ang pagtambong sa Kristohanong mga tigom, asembliya, ug mga kombensiyon naglangkit usab ug linaing pagpasundayag sa pagpugong-sa-kaugalingon. Pananglitan, kanang hiyasa gikinahanglan aron dili maglatagaw ang atong hunahuna panahon sa programa. (Proverbio 1:5) Mahimong magkinahanglan ug pagpugong-sa-kaugalingon aron dili matugaw ang uban pinaagi sa paghagawhaw ngadto sa atong mga katapad inay kay maghatag sa atong bug-os nga pagtagad sa mamumulong. Ang pagpasibo sa atong eskedyul aron makaabot kita nga untop sa panahon mahimong magkinahanglan ug pagpugong-sa-kaugalingon. Dugang pa, ang pagpugong-sa-kaugalingon mahimong gikinahanglan sa paggahin ug panahon sa pagpangandam alang sa mga tigom ug dayon sa pagpakigbahin niana.

¹³ Ang pagpasundayag ug pagpugong-sa-kaugalingon diha sa gagmayng mga butang makapalig-on sa atong katakos sa paghimo niana diha sa dagkong mga butang. (Lucas 16:10) Busa, pagkamaayo ang pagdisiplina sa atong kaugalingon sa pagbasa nga regular sa Pulong sa Diyos ug sa mga publikasyon sa Bibliya, nga magtuon niana ug mamalandong sa atong nakat-onan! Pagkamaalamon ang pagdisiplina sa atong kaugalingon maylabot sa dili angayng mga trabaho, panaghigalaay, tinamdan, ug personal nga mga batasan o ang pagdisiplina sa atong kaugalingon sa pag-ingon ug dili sa mga kalihokan nga makahikaw kanato sa bililhong panahon alang sa pag-alagad sa Diyos! Ang pagkahimong puliki kanunay diha sa pag-alagad kang Jehova maoy usa gayod ka panalipod batok sa mga butang nga makapahilayo kanato gikan sa espirituwal nga paraiso sa tibuok-kalibotang kongregasyon ni Jehova.

Magpakahingkod Pinaagi sa Pagpugong-sa-Kaugalingon

14. (a) Sa unsang paagi ang mga bata angayng makakat-on sa pagpasundayag ug pagpugong-sa-kaugalingon? (b) Unsang mga benepisyo ang modangat sa dihang ang mga bata makakat-on sa maong mga leksiyon sa unang mga tuig sa kinabuhi?

¹⁴ Ang usa ka bag-ong natawo nga bata walay pagpugong-sa-kaugalingon. Ang usa ka pulyeto nga gisulat sa mga eksperto sa panggawi sa bata misaysay: “Ang pagpugong-sa-kaugalingon dili awtomatiko o kalit nga mahitabo. Ang mga masuso ug mga bata nga nagsugod pa lang sa paglakaw nagkinahanglan sa giya ug tabang sa mga ginikanan aron makasugod sa proseso sa pagkat-on sa pagpugong-sa-kaugalingon. . . . Pinaagi sa paggiya sa mga ginikanan sa maong proseso, ang pagpugong-sa-kaugalingon mouswag latas sa mga tuig sa pagtungha.” Ang usa ka pagtuon sa kuwatro-anyos nga mga bata nagpadayag nga kadtong nakakat-on sa pagpasundayag ug usa ka sukod sa pagpugong-sa-kaugalingon “kasagarang nagdako nga mas mapasiboon, mas popular, arisgado, may kompiyansa sa kaugalingon ug kasaligan nga mga tin-edyer.” Kadtong wala magsugod pagkat-on niining maong leksiyon “mas lagmit nga nahimong masulub-on, daling mahigawad ug gahian. Sila nahaylo ilalom sa kapit-os ug naglikay sa mga  hagit.” Dayag nga aron mahimong maayong-pagkapasibo nga hamtong, ang usa ka bata kinahanglang makakat-on sa pagpasundayag ug pagpugong-sa-kaugalingon.

15. Unsay gipaila sa kakulang sa pagpugong-sa-kaugalingon, nga kasukwahi sa unsang tumong nga gihatag diha sa Bibliya?

¹⁵ Sa susama, aron kita mahimong hingkod nga mga Kristohanon, kita kinahanglang makakat-on sa pagpakita ug pagpugong-sa-kaugalingon. Ang kakulang niini magpaila nga kita mao gihapoy espirituwal nga mga bata. Gitambagan kita sa Bibliya nga “magpakahingkod sa mga gahom sa pagsabot.” (1 Corinto 14:20) Ang atong tumong mao nga kita “makadangat sa pagkausa sa pagtuo ug sa tukmang kahibalo sa Anak sa Diyos, sa pagkahingkod nga tawo, sa gidak-on nga iya sa kabug-osan ni Kristo.” Ngano? “Aron nga kita dili na magpabiling mga bata, nga samag gituyatuya sa mga balod ug gidala ngadto-nganhi sa matag hangin sa pagtulon-an pinaagi sa paglingla sa mga tawo, pinaagi sa kamalipatlipaton sa pagmugnag sayop.” (Efeso 4:13, 14) Klaro nga ang pagkat-on sa pagpugong-sa-kaugalingon hinungdanon sa atong espirituwalidad.

Pag-ugmad ug Pagpugong-sa-Kaugalingon

16. Sa unsang paagi si Jehova nagtagana ug tabang?

¹⁶ Aron maugmad ang pagpugong-sa-kaugalingon, kita nagkinahanglan sa tabang sa Diyos, ug kini mabatonan. Ang Pulong sa Diyos, sama sa usa ka hingpit nga salamin, magpakita kanato kon asang bahina kita nagkinahanglan sa paghimog personal nga mga kausaban, ug kini nagtagana ug tambag kon sa unsang paagi buhaton kana. (Santiago 1:22-25) Ang usa ka mahigugmaong kapunongan sa mga igsoon andam usab nga motabang. Ang Kristohanong mga ansiyano nagpakitag pagkamasinaboton sa paghatag ug personal nga tabang. Si Jehova mismo dagayang nagahatag sa iyang balaang espiritu kon pangayoon nato kana diha sa pag-ampo. (Lucas 11:13; Roma 8:26) Busa, malipayong gamiton nato kining maong mga tagana. Ang mga sugyot sa panid 21 makatabang.

17. Unsang pagdasig ang gihatag kanato sa Proverbio 24:16?

¹⁷ Pagkamakapahupay ang pagkahibalo nga pabilhan ni Jehova ang atong mga panglimbasog sa dihang kita maningkamot sa pagpahimuot kaniya! Kini angayng magpalihok kanato sa pagpadayon sa pagpanglimbasog nga makabaton pa ug pagpugong-sa-kaugalingon. Bisan unsa ka subsob tingali kitang mapandol, dili gayod kita mohunong sa atong mga paningkamot. “Ang tawong matarong mahimong matumba sa makapito, ug siya mobangon gayod.” (Proverbio 24:16) Sa matag panahon nga kita molampos, kita adunay rason nga mahimuot sa atong kaugalingon. Makaseguro usab kita nga si Jehova mahimuot kanato. Usa ka Saksi nag-ingon nga sa wala pa niya ipahinungod ang iyang kinabuhi kang Jehova, matag higayon nga molampos siya sa paglikay sa pagpanigarilyo sulod sa usa ka semana, iyang gantihan ang iyang kaugalingon pinaagi sa pagpalit ug usa ka butang nga mapuslanon ginamit ang kuwarta nga iyang natigom tungod sa pagpasundayag ug pagpugong-sa-kaugalingon.

18. (a) Unsay nalangkit sa atong pagpakigbugno sa pagpugong-sa-kaugalingon? (b) Unsang pasalig ang gitagana ni Jehova?

¹⁸ Labaw sa tanan, angay natong hinumdoman nga ang pagpugong-sa-kaugalingon naglangkit sa hunahuna ug mga emosyon. Makita nato kini sa giingon ni Jesus: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:28; Santiago 1:14, 15) Siya nga nakakat-on sa pagkontrolar sa iyang hunahuna ug mga pagbati mas sayonan sa pagkontrolar sa iyang tibuok lawas. Busa palig-onon nato ang atong determinasyon sa paglikay dili lamang sa pagbuhat ug sayop kondili bisan sa paghunahuna bahin niana. Kon motungha man ugaling ang daotang mga hunahuna, isalikway dayon kana. Makakalagiw kita gikan sa tentasyon pinaagi sa mainampoong pagtutok kang Jesus. (1 Timoteo 6:11; 2 Timoteo 2:22; Hebreohanon 4:15, 16) Samtang buhaton nato ang atong kinamaayohan, kita nagasunod sa tambag sa Salmo 55:22: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”

Nahinumdom Ka Ba?

• Sa unsang duha ka paagi nga kita angayng magpasundayag ug pagpugong-sa-kaugalingon?

• Unsay kahulogan sa pagpasundayag ug ‘pagpugong-sa-kaugalingon sa tanang butang’?

• Unsang praktikal nga mga sugyot sa pag-ugmad ug pagpugong-sa-kaugalingon ang imong gitiman-an panahon sa atong pagtuon?

• Asa magsugod ang pagpugong-sa-kaugalingon?

[Mga Pangutana sa Pagtuon]

[Kahon/Mga hulagway sa panid 21]

Kon Unsaon Pagpalig-on ang Pagpugong-sa-Kaugalingon

• Ugmara kana bisan diha sa gagmayng mga butang

• Palandonga ang presente ug umaabot nga mga benepisyo niini

• Ilisi sa mga butang nga gidasig sa Diyos ang mga butang nga iyang gidili

• Isalikway dayon ang dili-angayng mga ideya

• Pun-a ang imong hunahuna sa makapalig-on-sa-espirituwal nga mga hunahuna

• Dawata ang tabang nga ikahatag sa hamtong nga mga isigka-Kristohanon

• Likayi ang makapakompromisong mga situwasyon

• Pag-ampo alang sa tabang sa Diyos sa mga panahon sa pagsulay

[Mga hulagway sa panid 18, 19]

Ang pagpugong-sa-kaugalingon magpalihok kanato sa pagbuhat ug maayo