“Ayaw Pagpayugo nga Dili Timbang”

SAMA sa imong makita sa ilustrasyon dinhi, ang kamelyo ug ang torong baka nga nag-uban sa pagdaro dili gayod komportableng tan-awon. Ang yugo nga nagsumpay kanila—nga alang sa duha ka hayop nga parehas ug gidak-on ug kusog—nagpaantos sa duha ka hayop. Kay nabalaka bahin sa kaayohan sa maong mga hayop nga luwanan, giingnan sa Diyos ang mga Israelinhon: “Dili ka magdaro nga parison ang torong baka ug ang asno.” (Deuteronomio 22:10) Ang samang prinsipyo mapadapat sa torong baka ug kamelyo.

Kasagaran, ang usa ka mag-uuma dili magpahamtang ug ingon nianang kalisdanan sa iyang mga hayop. Apan kon wala siyay duha ka torong baka, siya lagmit magsangon sa duha ka hayop nga iyang nabatonan. Dayag nga mao kanay gibuhat sa mag-uuma sa ika-19ng siglo diha sa ilustrasyon. Tungod sa kalainan sa ilang gidak-on ug kusog, ang mas huyang nga hayop kinahanglang manlimbasog aron makaagpas sa laing hayop, ug ang mas kusgang hayop mas mabug-atan.

Gigamit ni apostol Pablo ang ilustrasyon sa pagpayugo nga dili timbang aron sa pagtudlo kanato ug usa ka hinungdanong leksiyon. “Ayaw pagpayugo nga dili timbang sa mga dili-magtutuo,” siya misulat. “Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit?” (2 Corinto 6:14) Sa unsang paagi ang usa ka Kristohanon mahimong magpayugo nga dili timbang?

Ang usa ka paagi maoy sa dihang ang usa ka Kristohanon mopilig kapikas nga dili sama niyag tinuohan. Ang maong kaminyoon makahatag ug kalisdanan kanilang duha, kay ang magtiayon magkasumpaki sa paninugdang mga isyu.

Sa dihang gisugdan ni Jehova ang kaminyoon, gihatag niya sa asawa ang papel ingong “katabang,” o “katimbang.” (Genesis 2:18) Sa susama, pinaagi sa manalagnang si Malaquias, ang Diyos nagtumong sa asawa ingong usa ka “kapikas.” (Malaquias 2:14) Gusto sa atong Maglalalang nga ang mga magtiayon magkahiusa diha sa samang espirituwal nga direksiyon, nga mag-ambitay sa mga kabug-at ug magaani sa mga kaayohan sa makiangayong paagi.

Pinaagi sa pagminyo “lamang diha sa Ginoo,” ang usa ka Kristohanon nagpakitag pagtahod sa tambag sa atong langitnong Amahan. (1 Corinto 7:39) Kini nagpahilunag pundasyon alang sa usa ka nahiusang kaminyoon, nga makahatag ug kadayeganan ug kadungganan sa Diyos samtang ang magtiayon mag-alagad kaniya ingong ‘tiunay nga mga kayugo’ sa linaing diwa.—Filipos 4:3.

[Picture Credit Line sa panid 32]

Camel and ox: From the book La Tierra Santa, Volume 1, 1830