Mga Pangutana Gikan sa mga Magbabasa

Kinsay gitumong ni Jehova ingong “usa kanato” sa Genesis 3:22?

Si Jehova nga Diyos lagmit nagtumong sa iyang kaugalingon ug sa iyang bugtong Anak sa dihang siya miingon: “Ang tawo nahimong sama sa usa kanato nga nahibalo sa maayo ug sa daotan.” (Genesis 3:22) Atong tan-awon kon ngano.

Kining mga pulonga gisulti ni Jehova human hukmi ang unang magtiayon. Gisabot sa uban ang ekspresyong “usa kanato” ingong plural sa pagkahalangdon, sama sa usa ka hari nga tingali moingon “wala kami malipay” bisan tuod nagtumong ra sa iyang kaugalingon. Apan, maylabot sa Genesis 1:26 ug 3:22, ang eskolar sa Bibliya nga si Donald E. Gowan miingon: “Walay pamatuod diha sa D[aang] T[estamento] alang sa kadaghanang gihatag nga mga pagpatin-aw: ang pag-ingon sa usa ka hari nga ‘kami,’ ang pag-ingon nga ‘atong’ sa dihang kita mamalandong, ang pagkabug-os sa plural, o pagpaila nga kono dihay labaw sa usa ka persona diha sa pagka-Diyos. . . . Dili makataronganon ang maong mga pagpatin-aw sa 3:22, nga naghisgot sa ‘usa kanato.’”

Dili kaha nga si Jehova nagtumong kang Satanas nga Yawa, nga maoy unang mihukom sa “maayo ug daotan” sa iyang kaugalingon ug nag-impluwensiya sa unang mga tawo sa pagbuhat sa samang paagi? Dili kana makataronganon. Dinhi si Jehova migamit sa ekspresyong “usa kanato.” Si Satanas wala na mahiuban sa matinumanong mga manulonda ni Jehova, mao nga siya wala na mahilakip sa mga manulonda nga didto sa kiliran ni Jehova.

Gitumong ba sa Diyos ang matinumanong mga manulonda? Dili kita makatino niana. Bisan pa niana, ang samang mga ekspresyon diha sa Genesis 1:26 ug 3:22 maghatag kanatog ideya. Sa Genesis 1:26, atong mabasa nga si Jehova miingon: “Buhaton nato ang tawo sumala sa atong larawan, sumala sa atong dagway.” Kinsay iyang gisultian niadtong mga pulonga? Sa naghisgot sa espiritung linalang nga nahimong hingpit nga lalaking si Jesus, si apostol Pablo miingon: “Siya mao ang larawan sa dili-makita nga Diyos, ang panganay sa tanang kalalangan; tungod kay pinaagi kaniya gilalang ang tanang ubang butang sa langit ug sa yuta.” (Colosas 1:15, 16) Oo, daw lohikal nga sa Genesis 1:26, si Jehova nakigsulti sa iyang bugtong Anak, ang “batid nga magbubuhat,” nga didto sa iyang kiliran sa paglalang sa mga langit ug sa yuta. (Proverbio 8:22-31) Ang samang ekspresyon diha sa Genesis 3:22 nagpaila nga si Jehova nakigsulti na usab sa usa nga suod kaayo kaniya, ang iyang bugtong Anak.

Ang bugtong Anak sa Diyos lagmit dunay kahibalo bahin sa “maayo ug daotan.” Pinasukad sa iyang hataas ug suod nga pagpakig-uban kang Jehova, nakakat-on gayod siya sa bug-os bahin sa panghunahuna, mga prinsipyo ug mga sukdanan sa iyang Amahan. Kay kombinsido sa kahibalo ug pagkamaunongon sa iyang Anak bahin niana, si Jehova mahimong naghatag kaniyag kagawasan sa pagdumala sa mga butang nga dili na direktang mokonsulta Kaniya sa matag kahimtang nga mobangon. Busa sumala niini nga sukod, ang Anak makahimo ug awtorisado sa pagtino kon unsay maayo ug daotan. Apan, dili sama kang Satanas, Adan, ug Eva, wala siya magmugnag sukdanan nga nahisupak sa mga sukdanan ni Jehova.