Sugilanon sa Kinabuhi

Gitudloan ni Jehova Sukad sa Akong Pagkabatan-on

SUMALA SA GIASOY NI RICHARD ABRAHAMSON

“Oh Diyos, gitudloan mo ako sukad pa sa akong pagkabatan-on, ug hangtod karon nagpadayon ako pagsaysay sa imong katingalahang mga buhat.” Pasaysaya ko kon nganong ang maong mga pulong sa Salmo 71:17 dunay linaing kahulogan alang nako.

NIADTONG 1924, ang akong inahan nga si Fannie Abrahamson nakontak sa mga Estudyante sa Bibliya, nga maoy pagtawag sa mga Saksi ni Jehova kaniadto. Usa ka tuig pa lang ako niadto. Sa dihang dunay itudlo kang Mama nga mga kamatuoran sa Bibliya, moadto siya sa iyang mga silingan ug suginlan sila sa mga butang nga iyang nakat-onan, ug gitudloan usab niya ako ug ang akong magulang nga lalaki ug babaye. Sa dili pa ako makamaong mobasa, gitabangan ko niya sa pagsag-ulo sa daghang teksto bahin sa mga panalangin sa Gingharian sa Diyos.

Sa hinapos nga bahin sa katuigan sa 1920, ang among grupo sa Estudyante sa Bibliya sa La Grande, sa estado sa Oregon, T.B.A., diin ako natawo ug nagdako, adunay pipila lamang ka mga babaye ug mga bata. Bisan tuod ug nahilit kami, ginaduaw kami kas-a o kaduha sa usa ka tuig sa nagapanawng mga ministro, nga nailhang mga pilgrim. Sila naghatag ug makapadasig nga mga pakigpulong, nag-uban kanamo sa pagpamalaybalay, ug nagpakitag malulotong interes sa mga bata. Lakip niadtong minahal nga mga igsoon mao sila si Shield Toutjian, Gene Orrell, ug John Booth.

Sa 1931, walay nakatambong sa among grupo didto sa kombensiyon sa Columbus, Ohio, diin gisagop sa mga Estudyante sa Bibliya ang ngalang mga Saksi ni Jehova. Apan ang mga kompaniya, nga maoy pagtawag kaniadto sa mga kongregasyon, ug ubang mga grupo nga walay hawas  sa maong kombensiyon nagtigom diha sa ilang tagsatagsa ka dapit sa pagka-Agosto aron sa pagsagop sa usa ka resolusyon nga nagdawat sa maong ngalan. Gihimo kana sa among gamayng grupo didto sa La Grande. Dayon, sa 1933 nga kampanya sa pagpanagtag sa pulyeto nga The Crisis, gisag-ulo nako ang usa ka presentasyon sa Bibliya, ug sa unang higayon, ako nag-inusarang namalaybalay.

Sa katuigan sa 1930, dihay nagkadakong pagsupak sa among buluhaton. Aron masagubang kini, ang mga kompaniya gigrupo sa gitawag ug mga dibisyon, nga nagpahigayon ug gagmayng mga asembliya ug nakigbahin sa mga misyon sa pagsangyaw, nga nailhan ingong dibisyonal nga mga kampanya, kas-a o kaduha sa usa ka tuig. Niining maong mga asembliya, gitudloan kami sa mga pamaagi sa pagsangyaw ug gipasundayag kanamo kon unsaon pagpakiglabot nga matinahoron sa mga polis nga magsamoksamok. Sanglit ang mga Saksi subsob nga paatubangon sa huwes sa kapolisan o sa usa ka regular nga korte, among ensayohon ang impormasyon gikan sa usa ka papel nga dunay instruksiyon nga gitawag ug Pamaagi sa Pagbista. Kini nagsangkap kanamo sa pagsagubang sa pagsupak.

Unang Pagtubo Diha sa Kamatuoran sa Bibliya

Mitubo ang akong pagpabili sa mga kamatuoran sa Bibliya ug sa binase-sa-Bibliya nga paglaom nga mabuhing walay kataposan sa yuta ilalom sa langitnong Gingharian sa Diyos. Niadtong panahona, wala kaayo ipasiugda ang bawtismo alang niadtong wala maglaom nga magmando sa langit uban ni Kristo. (Pinadayag 5:10; 14:1, 3) Bisan pa niana, giingnan ako nga kon determinado ang akong kasingkasing sa pagtuman sa kabubut-on ni Jehova, angay akong magpabawtismo. Busa nagpabawtismo ako niadtong Agosto 1933.

Sa dihang 12 anyos na ako, ang akong maestra nagtuo nga ako maayong mopakigpulong sa publiko, busa iyang giawhag si Mama sa paghikay ug dugang pagbansay alang nako. Nagtuo si Mama nga makatabang kini kanako nga mas makaalagad pa kang Jehova. Busa iyang gibayran ang akong mga leksiyon pinaagi sa paglaba sa mga sinina sa instruktor sulod sa usa ka tuig. Ang maong pagbansay nakatabang gayod sa akong ministeryo. Sa dihang 14 anyos na ako, gitakboyan akog rheumatic fever, nga tungod niana wala ako makaeskuyla ug kapin sa usa ka tuig.

Sa 1939, usa ka bug-os-panahong ministro nga ginganlag Warren Henschel ang miabot sa among dapit. a Sa espirituwal nga paagi, siya morag akong magulang nga lalaki, nga nag-uban kanako sulod sa daghang adlaw diha sa pag-alagad sa kanataran. Sa wala madugay gitabangan ko niyang makasugod sa pag-alagad ingong bakasyon payunir, usa ka temporaryong matang sa bug-os-panahong ministeryo. Nianang maong ting-init, ang among grupo naorganisar ingong kompaniya. Si Warren maoy gitudlong alagad sa kompaniya, ug ako gitudlong konduktor sa Pagtuon sa Bantayanang Torre. Sa dihang mibiya si Warren aron sa pag-alagad sa Bethel, ang tibuok-kalibotang hedkuwarter sa mga Saksi ni Jehova sa Brooklyn, New York, ako ang nahimong alagad sa kompaniya.

 Pagsugod Diha sa Bug-os-Panahong Ministeryo

Ang dugang kaakohan sa pag-alagad ingong alagad sa kompaniya nakapalig-on pa gayod sa akong tinguha sa pagsulod sa regular nga bug-os-panahong ministeryo, nga maoy akong gihimo sa edad nga 17 human makatapos sa ikatulong tuig sa hayskul. Si Papa dili sama namog relihiyon, apan giatiman niya ang mga panginahanglan sa among pamilya ug siya maoy tawong de-prinsipyo. Gusto niyang moeskuyla ako sa kolehiyo. Hinuon, miingon siya nga basta dili ko magsalig niya alang sa akong pagkaon ug puy-anan, makahimo ko kon unsay akong gusto. Busa misugod ko pagpayunir sa Septiyembre 1, 1940.

Sa akong pagbiya sa balay, gipabasa ko ni Mama sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Ang pagsalig kanunay kang Jehova, sa pagkatinuod, dako kaayog gikatabang kanako.

Sa wala madugay, miuban ko kang Joe ug Margaret Hart sa ministeryo sa amihanang-sentral nga Estado sa Washington. Nagkalainlain ang teritoryo—ranso sa mga baka, karnero, Indian nga mga reserbasyon, ug daghang gagmay nga mga lungsod ug mga baryo. Sa tingpamulak sa 1941, giasayn ko ingong alagad sa kompaniya sa kongregasyon sa Wenatchee, Washington.

Diha sa usa sa among mga asembliya sa Walla Walla, Washington, nag-alagad ko ingong atendant, nga nag-abiabi niadtong nanulod sa awditoryum. Namatikdan nako ang usa ka batan-ong igsoon nga lalaki nga nagkalisod sa pagpatingog sa trompa. Busa ako siyang gisugyotan nga siyay mag-atendant ug akoy mopatingog sa trompa. Sa dihang ang alagad sa rehiyon, si Albert Hoffman, nahibalik ug nakakita nga akong gibiyaan ang akong asaynment, gipatin-aw niya kanako uban ang mahigalaong pahiyom ang kahinungdanon sa pagpabilin sa akong asaynment hangtod sugoon ug lain. Gihinumdoman gayod nako ang iyang tambag sukad niadto.

Sa Agosto 1941, ang mga Saksi ni Jehova nagplano ug usa ka dakong kombensiyon sa St. Louis, Missouri. Gitaorag atop-atop sa mga Hart ang likod sa ilang gamayng trak ug gibutangan kinig mga bangko. Siyam mi ka payunir nga mibiyahe paingon sa St. Louis sakay sa maong trak. Gidangtag duolan sa usa ka semana ang usa ka biyahe. Sa kombensiyon, usa ka polis ang nagbanabana sa kinatas-ang ihap sa tumatambong nga 115,000. Bisan tuod ang gidaghanon sa nanambong lagmit mas ubos ra niana, segurado nga mas daghan kadto kay sa mga 65,000 ka Saksi sa Tinipong Bansa niadtong panahona. Ang maong kombensiyon nakapalig-on gayod sa espirituwal.

Pag-alagad sa Bethel sa Brooklyn

Sa paghiuli sa Wenatchee, nakadawat kog sulat nga naghangyo kanako sa pagreport ngadto sa Bethel sa Brooklyn. Sa akong pag-abot sa Oktubre 27, 1941, gidala ko ngadto sa opisina ni Nathan H. Knorr, ang magtatan-aw sa imprentahan. Maluloton niyang gipatin-aw kanako kon sama sa unsa ang Bethel ug gipasiugda niya nga ang pagpabiling suod kang Jehova maoy hinungdanon sa pagpalampos sa kinabuhi didto. Dayon gidala ko ngadto sa Shipping Department ug gipabugkos sa mga karton sa literatura nga ipadala.

Sa Enero 8, 1942, namatay si Joseph Rutherford, kinsa maoy nanguna sa mga Saksi ni Jehova sa tibuok kalibotan. Lima ka adlaw sa ulahi ang mga  direktor sa Sosyedad nagpili kang Brader Knorr nga maoy mopuli niya. Sa dihang si W. E. Van Amburgh, ang dugay nang sekretaryo-tesorero sa Sosyedad, nagpahibalo niini ngadto sa pamilyang Bethel, siya miingon: “Nakahinumdom ko sa dihang namatay si C. T. Russell [sa 1916] ug gipulihan ni J. F. Rutherford. Ang Ginoo nagpadayon sa pagtultol ug pagpauswag sa Iyang buluhaton. Karon, hugot ang akong pagtuo nga magpadayon ang buluhaton uban kang Nathan H. Knorr ingong presidente tungod kay buluhaton kini sa Ginoo, dili sa tawo.”

Sa Pebrero 1942, gipahibalo nga ang “Abanteng Kurso sa Teokratikanhong Ministeryo” pagasugdan. Gidisenyo kini sa pagbansay niadtong anaa sa Bethel aron sa pagpauswag sa ilang katakos sa pagpanukiduki bahin sa mga ulohan sa Bibliya, pag-organisar sa ilang materyal sa hustong paagi, ug pagpresentar niana sa epektibong paagi. Kay natabangan sa akong sayosayong pagbansay sa pagpakigpulong sa publiko, kusog ang akong pag-uswag diha sa maong programa.

Sa wala madugay, giasayn ako ngadto sa Service Department, nga maoy nagdumala sa ministeryo sa mga Saksi sa Tinipong Bansa. Sa ulahing bahin nianang tuiga, gidesisyonan nga ibalik ang programa diin ang mga ministro moduaw sa mga kompaniya sa mga Saksi. Sa ngadtongadto, kining nagapanawng mga ministro, nga gitawag ug mga alagad ngadto sa mga kaigsoonan, ginganlan nga mga magtatan-aw sa sirkito. Sa ting-init sa 1942, usa ka kurso sa Bethel ang gihikay aron bansayon ang mga igsoong lalaki niining matanga sa ministeryo, ug nakapribilehiyo ako nga mahilakip niadtong gibansay. Ako gayong nahinumdoman nga si Brader Knorr, usa sa mga instruktor, nagpasiugda niining puntoha kanamo: “Ayawg sulayi ang pagpahimuot sa mga tawo. Wala na gayod hinuon kamoy mapahimut-an. Pahimut-i si Jehova, ug inyong mapahimut-an ang tanang nahigugma kang Jehova.”

Ang nagapanawng buluhaton gipatuman niadtong Oktubre 1942. Ang pipila kanamo sa Bethel nakigbahin niana sa pipila ka hinapos sa semana, nga nagaduaw sa mga kongregasyon sulod sa gilay-ong 400 kilometros sa New York City. Among girepaso ang pagsangyaw nga kalihokan sa kongregasyon ug ang pagtambong sa tigom, nagpahigayon ug miting alang niadtong nag-atiman ug mga responsabilidad sa kongregasyon, naghatag ug usa o duha ka pakigpulong, ug nagsangyaw uban sa mga Saksi sa maong dapit.

Sa 1944, nalakip ko niadtong gikan sa Service Department nga gipadala ngadto sa nagapanawng buluhaton sulod sa unom-ka-bulan nga yugto, nga nag-alagad sa Delaware, Maryland, Pennsylvania, ug Virginia. Sa ulahi, sulod sa pipila ka bulan, giduaw nako ang mga kongregasyon sa Connecticut, Massachusetts, ug Rhode Island. Sa paghiuli ngadto sa Bethel, nagtrabaho ako nga dili-bug-os-panahon diha sa opisina uban kang Brader Knorr ug sa iyang sekretaryo nga si Milton Henschel, diin akong nasinati ang atong buluhaton sa tibuok kalibotan. Nag-alagad usab ako nga dili-bug-os-panahon diha sa Treasurer’s Office ilalom sa pagdumala ni W. E. Van Amburgh ug sa iyang katabang, si Grant Suiter. Dayon, sa 1946, nahimo akong magtatan-aw sa ubay-ubayng mga opisina sa Bethel.

Dagkong mga Kausaban sa Akong Kinabuhi

Samtang nag-alagad sa mga kongregasyon sa 1945, akong nakaila si Julia Charnauskas sa Providence, Rhode Island. Sa tungatunga sa 1947 nagplano ming magminyo. Gimahal ko pag-ayo ang Bethel, apan niadtong panahona, wala pay kahikayan nga pasudlon ang kapikas sa kaminyoon aron sa pag-alagad didto. Busa sa Enero 1948, mibiya ko sa Bethel, ug nagpakasal mi ni Julia (Julie). Nakatrabaho akog dili-bug-os-panahon diha sa usa ka supermarket sa Providence, ug misugod mi sa pagpayunir.

Sa Septiyembre 1949, gidapit ako sa pag-alagad sa sirkitong buluhaton sa amihanang-kasadpang Wisconsin. Dakong kausaban alang kanamo ni Julie nga mosangyaw sa kasagaran gagmayng mga lungsod ug mga baryo nga daghag bakahan. Ang mga tingtugnaw maoy dugay ug kamig, nga may mga temperaturang ubos sa sero sulod sa daghang semana ug bagang niyebe. Wala miy awto. Apan, subsob nga dunay magpasakay kanamo paingon sa sunod nga kongregasyon.

Wala madugay human nako masugdi ang sirkitong buluhaton, diha miy sirkitong asembliya. Nahinumdom ko nga gisusi nako pag-ayo sa pagtino nga ang tanang kalihokan naatiman gayod, nga tungod niana medyo gikulbaan ang uban. Busa ang magtatan-aw sa distrito, si Nicholas Kovalak, malulotong nagpatin-aw nga ang lokal nga mga igsoon naanad na sa pag-atiman sa mga butang sa ilang kaugalingong paagi ug nga dili na ko angay pang mabalaka bahin sa tanang detalye. Ang maong tambag nakatabang kanako sa pagdumala sa daghang asaynment sukad niadto.

 Sa 1950, nakadawat kog usa ka temporaryong asaynment—ang pagdumala sa pagtaganag kapuy-an alang sa mga delegado sa una sa among daghang dagko nga mga kombensiyon sa Yankee Stadium sa New York City. Ang maong kombensiyon maoy kulbahinam sukad sa sinugdan hangtod sa kataposan, nga may mga delegado gikan sa 67 ka nasod ug may kinatas-ang ihap sa mga tumatambong nga 123,707! Human sa kombensiyon, gipadayon namo ni Julie ang among nagapanaw nga ministeryo. Malipayon kaayo mi diha sa buluhaton sa sirkito. Apan, gibati namo nga kinahanglang padayon ming magtanyag sa among kaugalingon alang sa bisan unsang bug-os-panahong pag-alagad. Busa matag tuig, nag-aplay mi alang sa Bethel ug sa misyonaryo nga pag-alagad. Sa 1952, nalipay mi sa pagkadawat ug imbitasyon nga motungha sa ika-20ng klase sa Watchtower Bible School of Gilead, diin kami gibansay alang sa misyonaryong buluhaton.

Pag-alagad sa Laing Nasod

Sa among paggraduwar sa 1953, giasayn mi sa Britanya, diin nag-alagad ako sa distritong buluhaton sa habagatang bahin sa Inglaterra. Human sa duolag usa ka tuig sa maong kalihokan, nga gikalipayan namo pag-ayo ni Julie, nasorpresa mi sa asaynment nga among nadawat nga mobalhin ngadto sa Denmark. Dunay panginahanglan sa Denmark alang sa bag-ong magtatan-aw sa sangang buhatan. Sanglit anaa ra ako sa duol ug nabansay na sa maong buluhaton sa Brooklyn, gipadala ako aron sa pagtabang. Misakay mig barko paingon sa Netherlands, ug gikan didto misakay mig tren paingon sa Copenhagen, Denmark. Miabot mi sa Agosto 9, 1954.

Usa sa mga problema nga kinahanglang sagubangon mao nga dunay pipila diha sa responsableng mga katungdanan nga wala modawat sa pagtultol gikan sa hedkuwarter sa Brooklyn. Gawas pa, tulo sa upat ka maghuhubad sa atong mga publikasyon sa Danes nga pinulongan ang mibiya sa Bethel ug sa ngadtongadto mihunong na sa pagpakig-uban sa mga Saksi ni Jehova. Apan gitubag ni Jehova ang  among mga pag-ampo. Duha ka payunir, si Jørgen ug Anna Larsen, kinsa nakahimog dili-bug-os-panahon nga trabaho sa paghubad, nagtanyag sa ilang kaugalingon nga bug-os-panahon. Busa ang paghubad sa atong mga magasin ngadto sa Danes nga pinulongan nagpadayon nga walay usa ka gula ang nalaktawan. Anaa gihapon sa Bethel sa Denmark ang mga Larsen, ug si Jørgen mao ang koordinetor sa Komite sa Sanga.

Ang usa ka tinuod nga tuboran sa pagdasig sa maong unang mga tuig mao ang regular nga mga duaw ni Brader Knorr. Siya mogahig panahon sa pagduaw sa matag usa, nga mag-asoy ug mga eksperyensiya nga makahatag ug katin-awan kon sa unsang paagi dumalahon ang mga problema. Panahon sa usa ka pagduaw niadtong 1955, gidesisyonan nga kinahanglan ming magtukod ug bag-ong sanga nga may mga pasilidad sa pag-imprenta aron makapatik mig mga magasin alang sa Denmark. Nakabaton ug propiedad diha sa amihanang sikbit-sa-siyudad sa Copenhagen, ug sa pagkating-init sa 1957, mibalhin mi sa bag-ong gitukod nga bilding. Si Harry Johnson, kinsa uban sa iyang asawa nga si Karin di pa dugayng miabot sa Denmark human mograduwar sa ika-26 nga klase sa Gilead, mitabang sa pagpahiluna ug pagpadagan sa among imprentahanan.

Among napauswag ang among pag-organisar ug dagkong mga kombensiyon sa Denmark, ug nakatabang kaayo ang akong eksperyensiya samtang nagtrabaho sa mga kombensiyon sa Tinipong Bansa. Sa 1961, ang among dakong internasyonal nga kombensiyon sa Copenhagen nag-abiabi sa mga delegado gikan sa kapin sa 30 ka nasod. Ang kinatas-ang ihap sa mga tumatambong maoy 33,513. Sa 1969, kami maoy nag-abiabi sa kinadak-an sa tanang kombensiyon nga gihimo sa Scandinavia, nga may kinatas-ang ihap sa mga tumatambong nga 42,073!

Sa 1963, gidapit ako sa pagtambong sa ika-38 nga klase sa Gilead. Kadto maoy gibag-o nga napulo-ka-bulan nga kurso nga gidisenyo ilabina alang sa pagbansay sa mga kawani sa sanga. Makalilipay nga mahiuban pag-usab sa pamilyang Bethel sa Brooklyn ug makabenepisyo gikan sa mga eksperyensiya niadtong nagtrabaho sulod na sa daghang tuig nga nagdumala sa mga kalihokan sa hedkuwarter.

Human sa maong pagbansay nga kurso, mibalik ako sa Denmark aron ipadayon ang pag-atiman sa mga responsabilidad didto. Dugang pa, nakapribilehiyo ako sa pag-alagad ingong magtatan-aw sa sona, nga nagaduaw sa mga sangang buhatan sa kasadpan ug amihanan nga Uropa sa pagdasig sa mga kawani didto ug pagtabang kanila sa pagtuman sa ilang mga kaakohan. Sa di pa dugay, gihimo ko kining buluhatong pagkamagtatan-aw sa sona didto sa Kasadpang Aprika ug sa Caribbeano.

Sa ulahing bahin sa katuigan sa 1970, ang mga igsoon sa Denmark nagsugod sa pagpangitag lugar nga katukoran ug dakodakong pasilidad alang sa nagkadakong kalihokan sa paghubad ug pag-imprenta. Usa ka maayong lote ang nahimutang mga 60 kilometros sa kasadpang bahin sa Copenhagen. Duyog sa uban pa, mitabang ako sa pagplano ug pagdisenyo sa maong bag-ong pasilidad, ug si Julie ug ako naghinamhinam sa pagpuyo uban sa pamilyang Bethel nianang maanindot nga bag-ong puy-anan. Apan, ang mga butang wala mahitabo nga ingon niana.

Balik sa Brooklyn

Sa Nobyembre 1980, si Julie ug ako gidapit nga moalagad sa Bethel sa Brooklyn, diin kami miabot sa unang bahin sa Enero 1981. Hapit na ming mag-edad ug 60 niadto, ug human makaalagad ug duolan sa katunga sa among kinabuhi uban sa among minahal nga mga igsoong lalaki ug babaye sa Denmark, dili sayon alang kanamo ang pagbalik sa Tinipong Bansa. Bisan pa niana, wala namo gipunting ang among pagtagad kon asa namo gusto kondili naningkamot mi sa pagsentro sa among pagtagad nganha sa among presenteng mga asaynment ug sa bisan unsang mga suliran nga ipatungha niana.

Miabot mi sa Brooklyn ug mipuyo didto. Si Julie giasayn sa accounting office, nga naghimo sa mao gihapong buluhaton nga iyang gibuhat didto sa  Denmark. Ako giasayn sa Writing Department aron motabang sa pag-eskedyul sa pagproseso sa atong mga publikasyon. Ang unang bahin sa katuigan sa 1980 maoy panahon sa kausaban sa among kalihokan sa Brooklyn, kay giilisan namo ang paggamit ug mga makenilya ug ang typesetting nga paagi ginamit ang init nga tingga ngadto sa proseso sa kompiyuter ug offset nga paagi sa pag-imprenta. Wala gyod koy nakamaohan bahin sa mga kompiyuter apan duna akoy diyutayng kahibalo bahin sa organisasyonal nga mga pamaagi ug sa pagtrabaho uban sa mga tawo.

Wala madugay human niana, dunay panginahanglan sa pagpalig-on sa organisasyon sa Art Department sa dihang gigamit namo ang upat-ug-kolor nga offset nga pag-imprenta ug ang dekolor nga mga ilustrasyon ug mga hulagway. Bisan pag wala koy kasinatian ingong tigdibuho, makatabang ko sa pag-organisar. Busa nakapribilehiyo ako sa pagkahimong magtatan-aw sa maong departamento sulod sa siyam ka tuig.

Sa 1992, ako giasayn nga motabang sa Publishing Committee sa Nagamandong Lawas ug gibalhin ngadto sa Treasurer’s Office. Dinhi nagpadayon ko sa pag-alagad maylabot sa pinansiyal nga kalihokan sa mga Saksi ni Jehova.

Nag-alagad Sukad pa sa Akong Pagkabatan-on

Sukad sa batan-on pa kaayo ako ug sulod sa 70 ka tuig nga dedikadong pag-alagad, si Jehova mapailobong nagtudlo kanako pinaagi sa iyang Pulong, ang Bibliya, ug sa matinabangong mga igsoon diha sa iyang kahibulongang organisasyon. Natagamtam nako ang kapin sa 63 ka tuig diha sa bug-os-panahong ministeryo, nga kapin sa 55 nianang mga tuiga maoy uban sa akong maunongong asawa, si Julie. Gibati ko gayod nga dagayang gipanalanginan ni Jehova.

Balik sa 1940 sa dihang mibiya ako sa balay aron magpayunir, ang akong amahan nagbiaybiay sa akong desisyon ug miingon: “Anak, kon mobiya ka sa balay aron buhaton kana, ayawg hunahunaa nga makabalik ka pa nako aron mangayog tabang.” Latas sa katuigan, dili gayod kinahanglang buhaton nako kana. Si Jehova dagayang nagtagana sa akong mga panginahanglan, nga subsob pinaagi sa matinabangong mga isigka-Kristohanon. Sa ulahi, gitahod na ni Papa ang atong buluhaton, ug nakahimo pa gani siyag pipila ka pag-uswag sa pagtuon sa kamatuoran sa Bibliya antes siya namatay niadtong 1972. Si Mama, kinsa adunay langitnong paglaom, nagpadayon sa pag-alagad nga matinumanon kang Jehova hangtod sa iyang kamatayon niadtong 1985, sa edad nga 102.

Bisan tuod ug motungha ang mga problema diha sa bug-os-panahong ministeryo, si Julie ug ako wala gayod maghunahunang mobiya sa among asaynment. Si Jehova kanunayng nagpalig-on kanamo maylabot niining desisyona. Bisan pag sa dihang nagkatigulang na ang akong mga ginikanan ug nanginahanglan ug tabang, ang akong igsoong babaye nga si Victoria Marlin mitanyag nga maoy motabang ug malulotong nag-atiman kanila. Mapasalamaton mi kaayo sa iyang mahigugmaon nga tabang, nga nakaabag kanamo sa pagpadayon diha sa bug-os-panahong ministeryo.

Si Julie maunongong nagpaluyo kanako sa tanan namong mga asaynment, nga nag-isip niini ingong bahin sa iyang kaugalingong pagpahinungod ngadto kang Jehova. Ug bisan tuod 80 anyos na ako karon ug nakasinati ug pipila ka sakit, gibati nako nga dagayang gipanalanginan ni Jehova. Nadasig gayod ako sa salmista kinsa human moingon nga ang Diyos nagtudlo kaniya sukad pa sa iyang pagkabatan-on, nangaliyupo, ‘Bisan hangtod sa pagkatigulang, Oh Diyos, ayaw ako pagbiyai, hangtod nga makasaysay ako mahitungod sa imong pagkagamhanan ngadto sa tanan nga moabot.’—Salmo 71:17, 18.

[Footnote]

[Hulagway sa panid 20]

Uban kang Mama sa 1940, sa dihang nagsugod ako sa pagpayunir

[Hulagway sa panid 21]

Uban sa mga isigkapayunir nga si Joe ug Margaret Hart

[Hulagway sa panid 23]

Sa adlaw sa among kasal sa Enero 1948

[Hulagway sa panid 23]

Sa 1953, uban sa mga isigkaestudyante sa Gilead. Gikan sa wala patuo: Si Don ug Virginia Ward, Geertruida Stegenga, Julie, ug ako

[Hulagway sa panid 23]

Uban kang Frederick W. Franz ug Nathan H. Knorr sa Copenhagen, Denmark, sa 1961

[Hulagway sa panid 25]

Uban kang Julie karon