Mga Pangutana Gikan sa mga Magbabasa

Nganong si Eliseo nangayog “duha ka bahin” sa espiritu ni Elias?

Sa talitapos na ang asaynment ni Elias ingong manalagna sa Israel, ang mas batan-ong manalagna nga si Eliseo mihangyo kaniya: “Palihog, nga duha ka bahin sa imong espiritu mahianhi kanako.” (2 Hari 2:9) Sa espirituwal nga pagkasulti, si Eliseo dayag nga nangayog duha ka bahin sama nianang ihatag sa panganay nga anak nga lalaki. (Deuteronomio 21:17) Ang daklit nga pagsusi sa asoy mopatin-aw niini ug motabang kanato sa pagkuhag mga leksiyon sa nahitabo.

Uyon sa pagtultol ni Jehova, gidihogan ni manalagnang Elias si Eliseo ingong iyang kapuli. (1 Hari 19:19-21) Sa mga unom ka tuig, si Eliseo nagsilbi ingong matinumanong alagad ni Elias ug determinadong mohimo niadto hangtod sa kataposan. Bisan sa kataposang adlaw ni Elias ingong manalagna sa Israel, si Eliseo wala mobiya sa iyang magtutudlo. Bisag si Elias nag-awhag kang Eliseo nga dili na mosunod kaniya, ang mas batan-ong manalagna tulo ka higayon nga miingon: “Dili ako mobiya kanimo.” (2 Hari 2:2, 4, 6; 3:11) Sa pagkatinuod, giisip ni Eliseo ang edarang manalagna ingong iyang espirituwal nga amahan.—2 Hari 2:12.

Bisan pa niana, si Eliseo dili lamang mao ang espirituwal nga anak ni Elias. Si Elias ug Eliseo nakig-uban sa usa ka grupo sa mga lalaki nga nailhang “mga anak nga lalaki sa mga manalagna.” (2 Hari 2:3) Ang asoy sa Ikaduhang Hari nagpakita nga kadtong “mga anak nga lalaki” mibati usab nga suod sa ilang espirituwal nga amahan, si Elias. (2 Hari 2:3, 5, 7, 15-17) Apan, ingong dinihogang kapuli, si Eliseo maoy primera taliwala sa espirituwal nga mga anak ni Elias—sama siya sa usa ka panganay. Sa karaang Israel, ang literal nga panganay nga anak nga lalaki makadawat ug duha ka bahin sa panulondon gikan sa iyang amahan, samtang ang laing mga anak nga lalaki makadawat ug usa ka bahin ang kada usa. Busa, si Eliseo nangayog duha ka bahin sa espirituwal nga panulondon gikan ni Elias.

Nganong si Eliseo mihangyo niadtong panahona? Kay hapit na siyang moabaga ug bug-at nga buluhaton—ang pagpuli kang Elias ingong manalagna sa Israel. Nahibalo si Eliseo nga aron matuman niya ang mga kaakohan nga nalangkit niadtong lisod nga asaynment, nagkinahanglan siyag espirituwal nga gahom nga labaw sa iyang mga katakos, gahom nga si Jehova lamang ang makatagana. Kinahanglan nga siya ingon ka maisogon ni Elias. (2 Hari 1:3, 4, 15, 16) Busa, nangayo siyag duha ka bahin sa espiritu ni Elias, usa ka espiritu sa kaisog ug pagkahimong “bug-os nangabugho alang kang Jehova”—tilinguhaong mga hiyas nga gipatungha sa espiritu sa Diyos. (1 Hari 19:10, 14) Unsay tubag ni Elias?

Si Elias nahibalo nga si Eliseo nangayog butang nga Diyos lamang ang makahatag. Busa si Elias makasaranganong mitubag: “Ikaw nangayo ug lisod nga butang. Kon ikaw makakita kanako sa dihang kuhaon ako gikan kanimo, ingon niana ang mahitabo kanimo.” (2 Hari 2:10) Ug sa pagkatinuod, gipakita ni Jehova kang Eliseo ang pagkayab ni Elias diha sa alimpulos. (2 Hari 2:11, 12) Ang gipangayo ni Eliseo gihatag. Si Jehova naghatag kaniya sa espiritu nga iyang gikinahanglan sa pagsugod sa iyang bag-ong buluhaton ug pag-atubang sa umaabot nga mga pagsulay.

Karon, ang dinihogang mga Kristohanon (usahay tawgong Eliseo nga matang) ug ang mga alagad sa Diyos sa katibuk-an madasig pag-ayo tungod niini nga asoy sa Bibliya. Usahay, kita tingali mobatig tumang kakulba ug pagkadili-takos sa dihang hatagan ug bag-ong asaynment, o mawad-an kitag kaisog sa pagpadayon sa atong pagsangyaw sa Gingharian samtang atong atubangon ang nagkadakong pagkadili-matinagdanon o pagsupak diha sa atong teritoryo. Apan, kon kita mohangyo sa tabang ni Jehova, iya kitang hatagan sa iyang balaang espiritu kon gikinahanglan nato kini sa pagsagubang sa mga suliran ug nagakausab nga mga kahimtang. (Lucas 11:13; 2 Corinto 4:7; Filipos 4:13) Oo, sama nga gipalig-on ni Jehova si Eliseo alang sa mas bug-at niyang mga kaakohan, siya motabang kanatong tanan, batan-on man ug tigulang, nga molampos sa atong ministeryo.—2 Timoteo 4:5.