“Nakaplagan Nako ang Panaghigalaay, Gugma, ug Atensiyon”

“PINAAGI niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Sumala sa giingon ni Jesus, ang gugma nahimong ilhanan sa unang Kristohanong kapunongan sa mga igsoon. Si Tertullian, nga nagsulat kapin sa usa ka gatos ka tuig human sa kamatayon ni Kristo, nagkutlo sa mga maniniid nga nag-ingon: ‘Tan-awa kon unsa ka dako ang ilang paghigugma sa usag usa ug sa ilang pagkaandam pa gani nga magpakamatay alang sa usag usa.’

Makita pa ba gihapon kanang matanga sa gugma dinhi sa kalibotan? Oo. Tagda, pananglitan, ang usa ka sulat nga nadawat sa sangang buhatan sa mga Saksi ni Jehova sa Brazil. Ang nagsulat, nga usa ka babaye nga ginganlag Marília, nag-ingon:

“Samtang nagpuyo didto sa Villa Mercedes, Argentina, ang akong inahan, nga usa sa mga Saksi ni Jehova, nasakit ug osteoarthritis, nga nakaparalisar kaniya gikan sa hawak paubos. Sulod sa unang walo ka bulan sa iyang balatian, ang mga Saksi sa Villa Mercedes mao ang mahigugmaon ug may konsiderasyon nga nag-atiman kaniya. Sila maoy nag-atiman sa tanan, naglimpiyo sa iyang balay ug nagluto sa iyang mga pagkaon. Bisan sa didto pa siya sa ospital, si Mama kanunayng dunay kauban, adlaw ug gabii.

“Si Mama ug ako nahibalik na sa Brazil, diin siya nagpahiuli pa gihapon sa iyang balatian. Ang mga Saksi sa dapit nga among gipuy-an karon naghimo sa tanan nilang maarangan sa pagtabang aron maulian si Mama.”

Si Marília nagtapos sa iyang sulat: “Angkonon ko nga dili ako usa ka Saksi, apan nakaplagan nako ang panaghigalaay, gugma, ug atensiyon taliwala sa mga Saksi.”

Oo, aduna pay mga tawo nga molihok uban ang tinuod nga Kristohanong gugma. Sa pagbuhat niana, ilang gipasundayag ang epekto sa mga pagtulon-an ni Jesus diha sa atong kinabuhi.