Ugmara ang Mahinatagong Espiritu
Ugmara ang Mahinatagong Espiritu
WALAY usa nga natawo uban ang mahinatagong espiritu. Ang kinaiyanhong kiling sa usa ka masuso mao ang pagtagbaw sa iyang kaugalingong gusto ug panginahanglan, nga dili magtagad sa mga kaayohan sa mga nag-atiman kaniya. Apan, sa kadugayan, ang bata makakat-on nga dili kay siya lang ang adunay mga panginahanglan. Kinahanglang konsiderahon usab niya ang uban, ug kinahanglang iyang makat-onan dili lamang ang pagdawat kondili ang paghatag ug pagpaambit usab. Ang mahinatagong espiritu kinahanglang ugmaron.
Dili tanang tawo nga nagahatag—bisag madagayaon—ang adunay mahinatagong espiritu. Ang uban tingali moamot sa usa ka institusyon aron palamboon ang ilang kaugalingong interes. Ang uban tingali mohatag aron dayegon sa mga tawo. Apan, lahi ang pagpanghatag nga gihimo sa matuod nga mga Kristohanon. Nan, unsang matanga sa pagpanghatag ang giawhag diha sa Pulong sa Diyos? Ang usa ka lakbit nga pagtagad sa pagpanghatag nga gihimo sa unang-siglong mga Kristohanon motubag nianang pangutanaha.
Mga Panig-ingnan sa Kristohanong Pagpanghatag
Ang Kristohanong pagpanghatag, ingon sa gihubit sa Bibliya, sa katibuk-an maoy “pagpakig-ambit sa mga butang sa uban” kinsa tinuod nga nanginahanglan. (Hebreohanon 13:16; Roma 15:26) Dili kini himoon nga pinugos. Si apostol Pablo misulat: “Ipabuhat sa matag usa ang sumala sa iyang gihukom diha sa iyang kasingkasing, nga dili kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Ang pagpanghatag dili usab angayng himoon aron magpagawal sa uban. Si Ananias ug si Sapira naghimo niana nga pagpakaaron-ingnon ug miani ug grabeng mga sangpotanan.—Buhat 5:1-10.
Dihay dakong panginahanglan sa pagpanghatag sa dihang daghang Hudiyo ug mga proselita gikan sa lagyong mga lugar ang nagkatigom sa Jerusalem alang sa pista sa Pentekostes sa 33 K.P. Didtong dapita nga ang mga sumusunod ni Jesus “napuno sa balaang espiritu ug misugod sa pagsulti sa lainlaing mga pinulongan.” Usa ka dakong panon ang mialirong kanila ug naminaw sa makapapukaw nga pakigpulong ni Pedro mahitungod kang Jesu-Kristo. Sa ulahi, ang katawhan nakakita kon giunsa pag-ayo ni Pedro ug Juan ang usa ka tawong bakol didto sa pultahan sa templo, ug sila nakadungog kang Pedro nga nagpakigpulong sa makausa pa mahitungod kang Jesus ug sa panginahanglan nga maghinulsol. Libolibo ang naghinulsol ug nabawtismohan ingong mga sumusunod ni Kristo.—Buhat, kapitulo 2 ug 3.
Ang bag-ong mga kinabig buot magpabilin sa Jerusalem ug modawat ug dugang instruksiyon gikan sa mga apostoles ni Jesus. Apan sa unsang paagi maatiman sa mga apostoles ang mga panginahanglan niadtong tanang bisita? Ang asoy sa Bibliya nagtug-an kanato: “Ang tanan nga mga tag-iyag mga yuta o mga balay mamaligya man niini ug magdala sa halin sa mga butang nga gibaligya ug ilang ibutang kini diha sa tiilan sa mga apostoles. Unya himoon ang pagpang-apod-apod ngadto sa matag usa, sumala sa iyang kinahanglanon.” (Buhat 4:33-35) Sa pagkatinuod, ang bag-ong natukod nga kongregasyon sa Jerusalem adunay mahinatagong espiritu!
Sa ulahi, ang ubang mga kongregasyon nagpasundayag sa samang mahinatagong espiritu. Pananglitan, ang mga Kristohanong taga-Macedonia, bisag sila mismo mga kabos, miamot ug labaw kay sa ilang maarangan alang sa ilang nanginahanglang mga igsoon sa Judea. (Roma 15:26; 2 Corinto 8:1-7) Ang kongregasyon sa Filipos maoy talagsaon sa ilang pagsuportar sa ministeryo ni Pablo. (Filipos 4:15, 16) Ang kongregasyon sa Jerusalem nag-apod-apod ug pagkaon ngadto sa nanginahanglang mga balo, ug ang mga apostoles nagtudlo ug pito ka kuwalipikadong mga lalaki sa pagtino nga walay takos nga mga balo ang nalaktawan.—Buhat 6:1-6.
Ang unang Kristohanong mga kongregasyon daling misanong bisan sa pagpanagana sa lisod nga mga panahon. Pananglitan, sa dihang gitagna ni propetang Agabo ang umaabot nga dakong kagutmanan, ang mga tinun-an sa kongregasyon sa Antioquia sa Sirya ‘naninguha nga ang matag usa kanila sumala sa iyang maarangan, makahimog pag-alagad pinaagig pagpadala ug hinabang ngadto sa mga igsoon nga nagpuyo sa Judea.’ (Buhat 11:28, 29) Pagkamaayong espiritu ang ilang gipakita sa pagtinong daan kon unsa unyay kinahanglanon sa uban ug pagtagana niana!
Unsay nagtukmod sa unang mga Kristohanon nga magmahinatagon ug magmabination kaayo? Sa pagkatinuod, sa unsang paagi mabatonan sa usa ka tawo ang mahinatagong espiritu? Daghan kitag makat-onan pinaagi sa lakbit nga pagtagad sa panig-ingnan ni Haring David.
Ang Dagayang Pagsuportar ni David sa Matuod nga Pagsimba
Sulod sa duolan sa 500 ka katuigan, ang arka sa pakigsaad—usa ka sagradong kaban nga naghawas sa presensiya ni Jehova—walay permanenteng butanganan. Kadto gitipigan diha sa usa ka tolda, o tabernakulo, nga gibalhin ngadto sa lainlaing lugar sa panahon nga ang Israel naglibotlibot sa kamingawan ug sa ulahi paingon sa Yutang Saad. Dako ang tinguha ni Haring David nga kuhaon ang arka gikan sa tolda diin kini gitipigan ug magtukod ug usa ka nahiangayng balay alang kang Jehova nga kabutangan sa sagradong arka. Nagsulti kang Natan nga manalagna, si David miingon: “Ania, ako nagpuyo sa usa ka balay nga sedro, apan ang arka sa pakigsaad ni Jehova anaa ilalom sa mga tabil sa tolda.”—1 Cronicas 17:1.
Apan, si David maoy usa ka tawo sa panggubatan. Busa gimando ni Jehova nga ang iyang anak nga si Solomon, panahon sa usa ka malinawong 1 Cronicas 22:7-10) Apan, kini wala makapugong sa mahinatagong espiritu ni David. Nag-organisar ug usa ka dakong pundok sa mga magbubuhat, siya nangandam sa pagtagana sa materyales nga gamiton sa pagtukod sa templo. Sa ulahi iyang giingnan si Solomon: “Ako nag-andam alang sa balay ni Jehova ug usa ka gatos ka libo ka talantong bulawan ug usa ka milyon ka talantong plata, ug ang tumbaga ug ang puthaw walay paaging matimbang tungod kay kini labihan ka daghan; ug ako nag-andam ug mga kahoy ug mga bato.” (1 Cronicas 22:14) Dili kontento niana, gikan sa iyang personal nga bahandi, si David miamot pa gyod ug bulawan ug plata nga ang bili karong adlawa mokabat ug $1,200,000,000. Dugang pa, ang mga prinsipe miamot usab nga madagayaon. (1 Cronicas 29:3-9) Sa pagkatinuod, gipasundayag ni David ang usa ka mahinatagon kaayong espiritu!
paghari, mao ang magtukod sa templo aron butangan sa arka sa pakigsaad. (Unsay nagpalihok kang David sa paghatag nga madagayaon gayod? Iyang nasabtan nga ang tanan niyang nabatonan ug nahimo maoy tungod sa panalangin ni Jehova. Iyang giila kini diha sa pag-ampo: “Oh Jehova nga among Diyos, kining tanan nga kadagaya nga among giandam sa pagtukod ug usa ka balay alang kanimo alang sa imong 1 Cronicas 29:16, 17) Gimahal ni David ang iyang relasyon uban kang Jehova. Iyang nakita ang panginahanglang moalagad sa Diyos “uban ang bug-os nga kasingkasing ug uban ang malipayon nga kalag,” ug siya nalipay sa pagbuhat niana. (1 Cronicas 28:9) Kining samang mga hiyas mao usab ang nagpalihok sa unang mga Kristohanon sa pagpasundayag ug mahinatagong espiritu.
balaang ngalan, gikan kini sa imong kamot, ug imoha kining tanan. Ug ako nahibalo pag-ayo, Oh akong Diyos, nga ikaw tig-usisa sa kasingkasing, ug nga sa katul-id ikaw may kahimuot. Ako, sa akong bahin, sa katul-id sa akong kasingkasing sa kinabubut-on nagtanyag niining tanang butang, ug karon ako nalipay sa pagtan-aw sa imong katawhan nga ania dinhi nga naghalad sa kinabubut-on kanimo.” (Si Jehova—Ang Labing Dakong Maghahatag
Si Jehova mao ang labing maayong panig-ingnan sa pagpanghatag. Mahigugmaon ug mahunahunaon kaayo siya nga “siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:45) Sa tanang tawo siya nagahatag ug “kinabuhi ug gininhawa ug tanang butang.” (Buhat 17:25) Sa pagkatinuod, ingon sa gihisgotan sa tinun-ang si Santiago, “ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.”—Santiago 1:17.
Ang kinadak-ang gasa ni Jehova kanato mao ang iyang pagpadala sa iyang “bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Walay usa nga makaangkon nga takos sa maong gasa, “kay ang tanan nakasala ug wala makaabot sa himaya sa Diyos.” (Roma 3:23, 24; 1 Juan 4:9, 10) Ang halad lukat ni Kristo mao ang pasukaranan ug galamiton sa “dili-mahubit nga walay bayad nga gasa” gikan sa Diyos, nga mao, ang “labawng dili-takos nga kalulot sa Diyos.” (2 Corinto 9:14, 15) Mapabilhon sa gasa sa Diyos, gihimo ni Pablo nga pangunang buluhaton sa iyang kinabuhi ang ‘bug-os nga pagpamatuod sa maayong balita bahin sa dili-takos nga kalulot sa Diyos.’ (Buhat 20:24) Nakasabot siya nga maoy kabubut-on sa Diyos nga “ang tanang matang sa tawo mangaluwas unta ug makadangat sa tukmang kahibalo sa kamatuoran.”—1 Timoteo 2:4.
Karong adlawa, gihimo kini pinaagi sa dakong pagsangyaw ug pagpanudlo nga buluhaton nga miabot na karon sa 234 ka nasod sa tibuok kalibotan. Gitagna ni Jesus kini nga pag-uswag sa dihang miingon siya: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Oo, “sa tanang kanasoran ang maayong balita kinahanglang igawali una.” (Marcos 13:10) Sa miaging tuig kapin sa unom ka milyong magmamantala sa maayong balita ang naggahin ug 1,202,381,302 ka oras alang niining buluhatona ug nagdumala ug kapin sa 5,300,000 ka pagtuon sa Bibliya. Sanglit nameligro man ang mga kinabuhi, hinungdanon kaayo kini nga pagpanudlo.—Roma 10:13-15; 1 Corinto 1:21.
Milyonmilyong publikasyon—apil ang mga Bibliya, libro ug mga brosyur—ang gipatik matag tuig aron matabangan kadtong gigutom sa kamatuoran sa Bibliya. Dugang pa, kapin sa usa ka bilyong kopya sa mga magasing Bantayanang Torre ug Pagmata! ang gipatik. Samtang ang mga tawo misanong sa maayong balita, dugang ug dugang pang mga Kingdom Hall ug mga Assembly Hall sa mga Saksi ni Jehova ang gitukod, nga nagsilbing mga sentro sa pagtudlo ug Bibliya. Ang mga sirkitong asembliya ug espesyal nga mga adlaw sa asembliya, maingon man ang distritong mga kombensiyon, gihikay matag tuig. Ang pagbansay sa mga misyonaryo, nagapanawng mga magtatan-aw, mga ansiyano, ug ministeryal nga mga alagad maoy nagapadayon usab nga buluhaton. Kita mapasalamaton kang Jehova sa paghimo niining tanang kahikayan nga mabatonan pinaagi sa “matinumanon ug maalamong ulipon.” (Mateo 24:45-47) Gusto gayod natong ipakita ang atong pagpasalamat Kaniya!
Pagpakitag Pasalamat Kang Jehova
Sama sa pagtukod sa templo ug sa pagtagbaw sa mga panginahanglan sa unang Kristohanon nga mga kongregasyon, ang paggasto niining tanang tagana bug-os nga naggikan sa kinabubut-ong mga kontribusyon. Apan, kinahanglang hinumdoman nga walay bisan usa nga makapadato kang Jehova, ang Tag-iya sa tanang butang. (1 Cronicas 29:14; Haggeo 2:8) Nan, ang mga kontribusyon maoy pamatuod sa atong gugma kang Jehova ug sa atong tinguha sa pagpauswag sa matuod nga pagsimba. Kini nga mga buhat sa pagkamahinatagon, matod ni Pablo, nakahatag ug higayon nga “mahatagan ug mga pasalamat ang Diyos.” (2 Corinto 9:8-13) Gidasig ni Jehova ang maong pagpanghatag tungod kay kini nagpakita nga duna kitay mahinatagong espiritu ug usa ka maayong kasingkasing ngadto kaniya. Kadtong kinsa manggihatagon ug nagasalig kang Jehova panalanginan niya ug sila mouswag sa espirituwal. (Deuteronomio 11:13-15; Proverbio 3:9, 10; 11:25) Gipasaligan kita ni Jesus nga moresulta kinig kalipay, nga nag-ingon: “Adunay labaw nga kalipay sa paghatag kay sa pagdawat.”—Buhat 20:35.
Ang mga Kristohanon nga adunay mahinatagong espiritu dili lang kay maghulat ug mga panahon sa panginahanglan. Hinuon, mangita sila ug mga kahigayonan nga ‘mobuhat ug maayo ngadto sa tanan, apan ilabina kanila nga [ilang] kabanay sa pagtuo.’ (Galacia 6:10) Nagdasig ug diyosnong pagkamahinatagon, si Pablo misulat: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.” (Hebreohanon 13:16) Ang paggamit sa atong mga kahinguhaan—panahon, kusog, salapi—aron tabangan ang uban ug palamboon ang putling pagsimba makapahimuot pag-ayo kang Jehova nga Diyos. Sa pagkatinuod, siya nahigugma sa usa ka mahinatagong espiritu.
[Kahon/Hulagway sa panid 28, 29]
Mga Paagi sa Paghatag nga Gipili sa Uban
MGA AMOT ALANG SA TIBUOK-KALIBOTANG BULUHATON
Daghan ang naggahin, o nagbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”
Matag bulan, ipadala sa mga kongregasyon kining maong salapi ngadto sa sangang buhatan sa mga Saksi ni Jehova nga nag-alagad sa ilang nasod. Ang kinabubut-on nga mga donasyong salapi mahimong ipadala usab nga direkta ngadto sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang buhatan nga nag-alagad sa inyong nasod. Ang mga tseke himoong payable to “Watch Tower.” Ang alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.
KONDISYONAL-DONASYON NGA KAHIKAYAN
Ang salapi mahimong idonar ubos sa linaing kahikayan diin, engkaso ang nagdonar mohangyo niana, ang donasyon mahimong ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.
PAGPLANO ALANG SA BUHAT SA KALUOY
Dugang pa sa direkta nga mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini nag-apil sa:
Insyurans: Ang Watch Tower Society mahimong himoon nga benepisyaryo sa usa ka polisa sa life insurance o sa pagretiro/pensiyon nga programa.
Mga Pondo sa Bangko: Ang mga pondo sa bangko, mga sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower Society, nga nahiuyon sa mga kinahanglanon sa lokal nga bangko.
Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong direkta nga gasa.
Balay ug Yuta: Ang ikabaligya nga balay ug yuta mahimong idonar pinaagi kaha sa deretsong paghatag isip gasa o, sa kahimtang sa residensiyal nga propiedad, pinaagi sa pagreserba sa balay o yuta samtang buhi pa ang nagdonar, kinsa mahimong magpadayon sa pagpuyo diha niana panahon sa iyang pagkinabuhi. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.
Gift Annuity: Ang gift annuity maoy usa ka kahikayan diin ibalhin sa usa ang iyang salapi o mga deposito sa Watch Tower Society. Sa baylo, ang nagdonar, o usa nga gitudlo sa nagdonar, modawat ug usa ka tino nga bayad matag tuig sa tibuok niyang kinabuhi. Ang nagdonar makadawat ug kunhod sa buhis nga gipangayo gikan sa iyang kita sa tuig nga gisugdan ang gift annuity.
Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal nga pagkabuhat nga testamento, o ang Watch Tower Society mahimong nganlan nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.
Ingon sa gipasabot sa terminong “pagplano alang sa buhat sa kaluoy,” kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga nagtinguhang makabenepisyo sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Gisulat ang brosyur ingong tubag sa daghang pangutana bahin sa mga gasa, wills, ug trusts. Naundan usab kini ug dugang mapuslanong impormasyon sa pagplano bahin sa balay ug yuta, sa pinansiyal, ug sa buhis. Gipahibalo niini ang mga indibiduwal sa nagkalainlaing mga paagi nga himoon ang mga gasa karon o pinaagi sa pagbilin ug panulondon inigkamatay. Human mabasa ang brosyur ug makonsulta ang ilang magtatambag bahin sa legal nga mga butang o sa buhis ug ang Charitable Planning Office, daghan ang nakaabag sa mga Saksi ni Jehova sa tibuok kalibotan ug, sa samang higayon, nakapadako sa mga benepisyo sa ilang buhis sa pagbuhat sa ingon. Kining brosyura mahimong mabatonan pinaagi sa paghangyo ug kopya nga direkta gikan sa Charitable Planning Office.
Alang sa dugang impormasyon, mahimong kontakon nimo ang Charitable Planning Office, pinaagi kaha sa sulat o sa telepono, diha sa adres nga gilista sa ubos o sa opisina sa mga Saksi ni Jehova nga nag-alagad sa inyong nasod.
Charitable Planning Office
Watch Tower Bible and Tract Society of the Philippines, Inc.
186 Roosevelt Avenue, San Francisco del Monte 1105 Quezon City
Telepono: (02) 411-6090
[Hulagway sa panid 26]
Unsay nagtukmod sa unang mga Kristohanon nga mahimong manggihatagon?