“Duol sa Diyos, ug Siya Moduol Kaninyo”

Kaniadto ug Karon—Ang mga Prinsipyo sa Bibliya Nakatabang Kaniya sa Pagbag-o

INGONG batan-on, si Adrian masuk-anon ug mayugtanon. Ang iyang pagkadali rang masuko miresulta sa mga pagsilaob sa mapintas nga kasuko. Siya hinginom, hinabako, ug nagkinabuhig imoral nga kinabuhi. Nailhan si Adrian ingong usa ka punk ug may patik sa iyang panit nga nagbanaag sa iyang pagtuo sa anarkiya. Sa paghubit niadtong mga tuiga, siya miingon: “Magpatupi ko sa naandang tupi sa punk, hisoan nakog pilit kaayong glu ang akong buhok aron tuskig kining motindog, ug usahay tinaon kinig pula o laing kolor.” Gipatusokan usab ni Adrian ang iyang ilong.

Si Adrian mibalhin ngadto sa usa ka gubaon nga balay uban sa pipila ka rebelyosong mga batan-on. Didto sila mag-inom hangtod mahubog ug mogamit ug droga. “Mogamit kog ginadiling droga ug iineksiyon kana uban sa Valium ug sa bisan unsa pa nga dali ra nakong mabatonan,” nahinumdom si Adrian. “Kon walay mabatonang mga droga o glu nga simhoton, manguha kog gasolina gikan sa mga awto sa mga tawo ug mao nay akong simhoton hangtod mahubog gumikan niana.” Si Adrian nalangkit pag-ayo sa krimen diha sa kadalanan ug nahimong gikaintapan ug pintas kaayo. Ang mga tawo kasagarang molikay nga malangkit kaniya. Sa samang panahon, ang iyang reputasyon nakadani ug daotang mga kauban.

Sa ngadtongadto, naamgohan ni Adrian nga ang iyang “mga higala” nakig-uban lamang niya tungod sa hinakog nga mga tinguha. Gawas pa, nakahinapos siya nga “ang tanang kasuko ug kapintasan walay bisan unsang nalampos.” Kay mibatig kahaw-ang ug kahigawad, iyang gibiyaan ang iyang mga kauban. Sa dihang nakakaplag siyag kopya sa Ang Bantayanang Torre diha sa usa ka dapit nga may gitukod nga bilding, nadani siya sa mensahe niini nga gipasukad sa Bibliya, ug mitultol kini sa usa ka pagtuon sa Bibliya uban sa mga Saksi ni Jehova. Si Adrian maikagong midawat sa imbitasyon: ‘Duol sa Diyos, ug siya moduol kanimo.’ (Santiago 4:8) Tungod niana, nasabtan dayon ni Adrian nga kinahanglang sugdan ang pagpadapat sa mga prinsipyo nga makaplagan diha sa Balaang Kasulatan.

Ang nagauswag nga kahibalo sa Bibliya may maayong epekto diha sa tanlag ni Adrian ug nakapausab sa iyang kurso sa kinabuhi. Natabangan siya sa pagbuntog sa iyang pagkadaling masuko ug sa pag-ugmad sa pagpugong-sa-kaugalingon. Dako na kaayog kalainan ang pagkatawo ni Adrian tungod sa gahom sa Pulong sa Diyos.—Hebreohanon 4:12.

Apan, sa unsang paagi ang Bibliya may ingon ka gamhanang epekto? Ang kahibalo sa Kasulatan makatabang kanato sa ‘pagsul-ob sa bag-ong pagkatawo.’ (Efeso 4:24) Oo, ang atong personalidad mausab pinaagi sa pagpadapat sa tukmang kahibalo nga makaplagan sa Bibliya. Apan sa unsang paagi ang maong kahibalo makapausab sa mga tawo?

Una, ang Bibliya nagpaila sa dili-tilinguhaong mga taras nga kinahanglang isalikway. (Proverbio 6:16-19) Ikaduha, ang Kasulatan nag-awhag kanato sa pagpasundayag sa tilinguhaong mga hiyas nga ipatungha sa balaang espiritu sa Diyos. Kini naglakip sa “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.

Ang mas lalom nga pagsabot sa mga kinahanglanon sa Diyos nakatabang kang Adrian sa pagsusi sa iyang kaugalingon ug sa pag-ila sa mga taras nga kinahanglan  niyang ugmaron ug kadtong angay niyang wagtangon. (Santiago 1:22-25) Apan kana mao lamang ang sinugdanan. Dugang pa sa kahibalo, gikinahanglan ang panukmod—usa ka butang nga magpalihok kang Adrian aron nga gusto gayod niyang magbag-o.

Nakat-onan ni Adrian nga ang tilinguhaong bag-ong pagkatawo maumol “sumala sa larawan sa Usa nga naglalang niini.” (Colosas 3:10) Iyang naamgohan nga ang Kristohanong personalidad kinahanglang mahisama sa mismong personalidad sa Diyos. (Efeso 5:1) Pinaagi sa pagtuon sa Bibliya, nakat-onan ni Adrian ang bahin sa mga pakiglabot ni Jehova sa katawhan ug namatikdan ang maayong mga hiyas sa Diyos, sama sa iyang gugma, kalulot, pagkamaayo, kaluoy, ug pagkamatarong. Ang maong kahibalo nagpalihok kang Adrian sa paghigugma sa Diyos ug sa pagpaningkamot nga mahimong ang matang sa tawo nga pagauyonan ni Jehova.—Mateo 22:37.

Sa ngadtongadto ug uban sa tabang sa balaang espiritu sa Diyos, si Adrian nakaarang sa pagkontrolar sa iyang pagkamasuk-anon. Siya ug ang iyang asawa puliki na karon sa pagtabang sa uban sa paghinlo sa ilang kinabuhi uban sa tabang sa kahibalo sa Bibliya. “Dili sama sa kanhi nakong mga higala nga karon patay na, ako buhi ug nagtagamtam sa usa ka malipayong kinabuhing pamilyahanon,” matod pa ni Adrian. Siya maoy usa ka buhing pamatuod sa gahom sa Bibliya sa pagpauswag sa kinabuhi.

[Blurb sa panid 25]

“Ang tanang kasuko ug kapintasan walay bisan unsang nalampos”

[Kahon sa panid 25]

Epektibong mga Prinsipyo sa Bibliya

Ang mosunod mao ang pipila ka prinsipyo sa Bibliya nga nakatabang sa daghang mapungtanon ug mapintas nga mga tawo nga mahimong makigdaiton:

“Makigdinaitay sa tanang tawo. Ayaw kamo pagpanimalos, mga hinigugma, kondili hatagig dapit ang kapungot.” (Roma 12:18, 19) Tugoti ang Diyos sa pagtino kon kanus-a ug kang kinsa ipahamtang ang panimalos. Iyang mahimo kana pinaagi sa bug-os nga kahibalo sa mga kamatuoran, ug ang bisan unsang panimalos nga maggikan kaniya magbanaag sa iyang hingpit nga hustisya.

“Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efeso 4:26, 27) Ang usa ka tawo makataronganon nga masuko usahay. Kon mahitabo gayod kini, siya dili angayng magpabiling ‘masuk-anon.’ Ngano? Tungod kay magdaldal kini kaniya sa paghimog daotan, sa ingon “maghatag ug luna sa Yawa,” nga moresulta sa pagsalikway ni Jehova nga Diyos kaniya.

“Likayi ang kasuko ug biyai ang kaaligutgot; ayaw pagpanginit nga mosangko lamang sa pagbuhat ug daotan.” (Salmo 37:8) Ang dili-mapugngang mga emosyon mosangpot sa dili-makontrolar nga mga buhat. Kon ang usa ka tawo magpadala sa kasuko, siya lagmit makasulti o makabuhat ug mga butang nga makapasakit sa tanang nalangkit.