Mga Pangutana Gikan sa mga Magbabasa

Unsay angay nga panglantaw sa mga Kristohanon bahin sa paggamit ug mga birthstone?

Sa pipila ka kultura, ang mga birthstone gilangkit sa bulan sa natawhan sa usa sa ka tawo. Personal nga desisyon kon ang usa ka Kristohanon mosul-ob ug singsing nga dunay mahalong bato. (Galacia 6:5) Sa paghimo niana nga desisyon, dunay hinungdanong mga butang nga angayng timbangtimbangon.

Ang Encyclopaedia Britannica nag-ingon nga ang birthstone maoy usa ka “mahalong bato nga nalangkit sa adlawng natawhan sa usa ka tawo, ug ang pagsul-ob niini sagad nga gituohang makahatag ug suwerte o maayong panglawas.” Kini nga reperensiya midugang: “Ang mga astrologo dugay nang nagtuo nga ang pipila ka mahalong mga bato dunay dili-kinaiyanhong mga gahom.”

Ilabina sa karaang mga panahon daghan ang nagtuo nga ang birthstone naghatag ug suwerte sa nagsul-ob niini. Motuo ba niini ang usa ka matuod nga Kristohanon? Dili, kay nahibalo siya nga gihukman ni Jehova ang mga tawo nga mibiya kaniya ug nagsalig “sa diyos sa Suwerte.”—Isaias 65:11.

Niadtong Edad Medya, ang mga mananag-an mipili ug usa ka mahalong bato alang sa matag bulan sa tuig. Ilang gidasig ang mga tawo sa pagsul-ob nianang mahalong bato sa bulan nga ilang natawhan, aron kono mapanalipdan ang nagsul-ob batok sa kadaot. Apan sumala sa Kasulatan, sayop alang sa mga Kristohanon ang pagsunod sa awhag sa propesyonal nga mga mananag-an sa mga hitabo tungod kay sila gihukman sa Bibliya.—Deuteronomio 18:9-12.

Dili usab angayng maghunahuna ang mga Kristohanon nga ang usa ka singsing dunay espesyal nga kahulogan tungod kay kini dunay birthstone. Ang mga Saksi ni Jehova dili mosaulog ug adlawng natawhan. Tungod kini kay ang maong mga pagsaulog naghatag ug sobrang pagtagad sa indibiduwal ug ang mga adlawng natawhan nga natala diha sa Bibliya mao lamang kadtong iya sa mga magmamando nga wala mag-alagad sa Diyos.—Genesis 40:20; Mateo 14:6-10.

Nagtuo ang ubang mga tawo nga ang pagsul-ob ug singsing nga dunay birthstone adunay maayong epekto sa pagkatawo sa nagsul-ob niini. Apan, ang matuod nga mga Kristohanon dili motuo niini, kay sila nahibalo nga ang “bag-ong pagkatawo” mabatonan ilalom sa impluwensiya sa balaang espiritu sa Diyos ug pinaagi sa pagpadapat sa Kasulatanhong mga prinsipyo.—Efeso 4:22-24.

Ang motibo mao ang hinungdanon kaayong butang. Sa dihang modesisyon kon magsul-ob ba ug singsing nga dunay birthstone, tingali pangutan-on sa usa ka Kristohanon ang iyang kaugalingon, ‘Ako ba gustong mosul-ob niining singsinga tungod kay nagustohan nako ang mahalong bato, bisan pag kini gitawag usab ug birthstone? O dili kaha medyo naimpluwensiyahan usab ako sa mga patuotuo sa mga tawo maylabot sa maong mahalong mga bato?’

Ang usa ka Kristohanon kinahanglang magsusi sa iyang kasingkasing aron sa pagtino sa iyang motibo. “Labaw sa tanan nga pagabantayan, ampingi ang imong kasingkasing,” nag-ingon ang Kasulatan, “kay niana nagagikan ang mga tuboran sa kinabuhi.” (Proverbio 4:23) Sa paghimog personal nga desisyon mahitungod sa paggamit ug mga birthstone, ang matag Kristohanon makabenepisyo kon siya maningkamot sa pagtimbangtimbang sa iyang motibo ug sa posibleng mga epekto sa iyang pagahimoon diha sa iyang kaugalingon ug sa uban.—Roma 14:13.