“Pagkagamhanan Gayod sa Pulong sa Diyos!”

“ANG pulong sa Diyos buhi ug gamhanan.” (Hebreohanon 4:12) Nga nagpamatuod sa dili-mapugngang gahom sa Pulong sa Diyos, ang 2003 Calendar of Jehovah’s Witnesses nagpasundayag ug unom ka tinuod-kinabuhing mga asoy gikan sa tibuok kalibotan. Ilalom sa ulohang “Before and After,” gipakita sa kalendaryo kon sa unsang paagi ang edukasyonal nga buluhaton sa mga Saksi ni Jehova nakatabang sa mga tawo sa pagpauswag sa ilang moral, pagbiya sa makadaot nga mga estilo-sa-kinabuhi, pagpalig-on sa ilang pamilyahanong kinabuhi, ug paghupot ug personal nga relasyon uban sa Diyos.

Ubay-ubayng mga sulat sa pagpasalamat ang nadawat maylabot sa 2003 nga kalendaryo. Ania ang pipila sa maong mga komento:

“Kining kalendaryoha maoy usa ka pamatuod para sa tinuod nga mga Kristohanon nga dunay uban pa sama kanila nga nakigbisog pag-ayo alang sa pagtuo. Karon ilang makita ang mga hulagway ingong mga pahinumdom sa mga kausaban nga nahimo sa uban.”—Steven, Tinipong Bansa.

“Gusto gyod nakong isulat kining pipila ka pulong aron pahibaloon kamo nga natandog pag-ayo ang akong kasingkasing sa 2003 nga kalendaryo. Wala pa gayoy kalendaryo nga may ingon nga epekto kanako. Kining maong kalendaryo nga dunay mga asoy sa kinabuhi iapil nako sa mga publikasyon nga akong dad-on diha sa akong bag nga pangsangyaw aron ipakita sa mga tawo ang buhi ug makapatandog nga pamatuod bahin sa impluwensiya sa Bibliya diha sa mga indibiduwal.”—Marc, Belgium.

“Natandog gayod ako sa maong kalendaryo. Makapahinuklog kaayo ang pagbasa ug pagkakita kon giunsa pagbag-o ni Jehova kining mga tawhana. Tungod niana, ako nadasig nga mopadayon sa paghimog mga kausaban sa akong kaugalingong kinabuhi. Gibati ko gayod karon nga ako bahin sa atong tibuok-kalibotang kapunongan.”—Mary, Tinipong Bansa.

“Si Jesus dulot nga natandog sa espirituwal nga kahimtang sa panon sa katawhan. Salamat sa inyong pagsunod sa panig-ingnan ni Kristo pinaagi sa pagpatik ug mga asoy sa kinabuhi nga makita diha sa atong 2003 nga kalendaryo. Sukad masukad sa akong kinabuhi, natandog gyod ko kaayo niining kalendaryoha nga nanglugmaw ang akong mga luha.”—Cassandra, Tinipong Bansa.

“Sa nag-edad kog 11, misugod ko sa pagpanabako; sa ulahi migamit kog droga. Kanunay kong maghunahuna sa paghunos sa akong kinabuhi. Sa dihang nailhan nako si Jehova, natabangan ko sa paghunong sa maong mga bisyo. Hinungdanon kaayo kining kalendaryoha alang nako. Ang mga panig-ingnan sa akong mga igsoong lalaki ug babaye sa tibuok kalibotan nakapalig-on kanako. Karon ako nang nasayran nga wala diay ko mag-inusara niining bugnoa ug nga ang labing hinungdanong butang mao ang gugma alang kang Jehova ug ang bug-os-kasingkasing nga pag-alagad kaniya.”—Margaret, Polandia.

“Oh, pagkagamhanan gayod sa Pulong sa Diyos! Sa dihang nadawat nako ang 2003 nga kalendaryo, gipugngan gyod nakong dili makahilak. Kining mga kasinatiana, uban sa mga hulagway, makapalig-on kaayo sa pagtuo.”—Darlene, Tinipong Bansa.

“Ang kanhing estilo-sa-kinabuhi sa pipila niining mga tawhana susama kaayo sa akong kanhing estilo-sa-kinabuhi. Gihatagan ko ni Jehova ug kusog sa paghunong sa morag dili-mabuntog nga mga bisyo. Daghan kaayong salamat niining tinuod-kinabuhing mga asoy.”—William, Tinipong Bansa.