Pagwali Aron Makahimog mga Tinun-an

“Sa pagkadungog ni Priscila ug Aquila [kang Apolos], ilang giuban siya kanila ug gipatin-aw kaniya ang dalan sa Diyos sa mas husto nga paagi.”—BUHAT 18:26.

1. (a) Bisan tuod siya “mainiton sa espiritu,” unsay nakulang kang Apolos? (b) Unsay gikinahanglan ni Apolos aron makompleto ang iyang pagsabot sa espirituwal nga mga butang?

 SI Priscila ug Aquila, usa ka Kristohanong magtiayon sa unang siglo, nakapaniid kang Apolos nga nagpakigpulong diha sa usa ka sinagoga sa siyudad sa Efeso. Pinaagi sa iyang larinong sinultihan ug gahom sa pagpangombinsir, nadani ni Apolos ang pagtagad sa iyang mamiminaw. Siya “mainiton sa espiritu,” ug “nanudlo sa hustong paagi sa mga butang bahin kang Jesus.” Apan, dayag nga si Apolos “nasinati lamang sa bawtismong iya ni Juan.” Tinuod ang giwali ni Apolos bahin kang Kristo apan kini limitado ra. Ang problema mao nga kulang ang iyang kahibalo. Kinahanglang dugangan ni Apolos ang iyang kahibalo bahin sa papel ni Jesu-Kristo diha sa katumanan sa katuyoan ni Jehova.—Buhat 18:24-26.

2. Unsang malisod nga tahas ang gidawat ni Priscila ug Aquila?

 ² Sa walay pag-ukon-ukon, si Priscila ug Aquila mitanyag sa ilang kaugalingon sa pagtabang kang Apolos nga mahimong usa nga makatuman sa “tanang butang” nga gisugo ni Kristo. (Mateo 28:19, 20) Ang asoy nag-ingon nga ilang ‘giuban si Apolos ug gipatin-aw kaniya ang dalan sa Diyos sa mas husto nga paagi.’ Apan dihay mga impormasyon bahin kang Apolos nga lagmit motultol sa pipila ka Kristohanon sa pagpanuko sa pagtudlo kaniya. Unsang mga impormasyona? Ug unsay atong makat-onan gikan sa mga paningkamot ni Priscila ug Aquila sa paghisgot sa Kasulatan uban kang Apolos? Sa unsang paagi ang pagsubli niining makasaysayanhong asoy motabang kanato sa pagsugod ug mga panagtuon sa Bibliya sa balay?

Isentro ang Pagtagad Nganha sa mga Tawo

3. Nganong ang kagikan ni Apolos wala makapugong kang Priscila ug Aquila sa pagtudlo kaniya?

³ Kay Hudiyo ug kaliwat, si Apolos lagmit gimatuto diha sa siyudad sa Alejandria. Niadtong panahona ang Alejandria maoy kaulohan sa Ehipto ug sentro sa hataas nga edukasyon, nga ilado tungod sa dakong librarya niini. Ang siyudad daghag Hudiyong molupyo, lakip na sa mga eskolar. Busa, ang Gregong hubad sa Hebreohanong Kasulatan nga nailhan ingong Septuagint gihimo didto. Mao diay nga si Apolos “batid kaayo sa Kasulatan”! Si Aquila ug Priscila maoy mga tighimog tolda. Gibati ba nila nga dili sila takos nga motabang kang Apolos tungod kay larino siyang manulti? Wala. Tungod sa gugma ilang gihunahuna ang tawo, ang iyang mga panginahanglan, ug kon sa unsang paagi sila makatabang kaniya.

4. Diin ug sa unsang paagi si Apolos nakadawat sa tabang nga iyang gikinahanglan?

⁴ Bisan unsa pa ka larino ni Apolos, nagkinahanglan siya ug instruksiyon. Ang tabang nga iyang gikinahanglan dili makaplagan diha sa bisan unsang unibersidad kondili makaplagan taliwala sa mga isigkamembro sa Kristohanong kongregasyon. Makabenepisyo si Apolos sa mga punto nga moresulta sa mas tukmang pagsabot sa kahikayan sa Diyos alang sa kaluwasan. ‘Giuban siya ni Priscila ug Aquila ug gipatin-aw kaniya ang dalan sa Diyos sa mas hustong paagi.’

5. Unsay imong ikasulti bahin sa espirituwalidad ni Priscila ug Aquila?

⁵ Si Priscila ug Aquila lig-on sa espirituwal ug maayog pundasyon sa pagtuo. Lagmit, sila ‘andam kanunay sa pagdepensa atubangan sa tanan nga mangayog katarongan sa paglaom,’ kana man dato, pobre, eskolar, o usa ka ulipon. (1 Pedro 3:15) Si Aquila ug ang iyang asawa nakahimo sa ‘paggamit sa pulong sa kamatuoran sa hustong paagi.’ (2 Timoteo 2:15) Dayag nga sila maoy seryosong mga estudyante sa Kasulatan. Si Apolos natandog pag-ayo sa instruksiyon nga gipasukad sa ‘pulong sa Diyos, nga buhi ug gamhanan,’ nga nag-apektar sa kasingkasing.—Hebreohanon 4:12.

6. Sa unsang paagi nahibaloan nato nga gipabilhan ni Apolos ang tabang nga iyang nadawat?

⁶ Gipabilhan ni Apolos ang panig-ingnan sa iyang mga magtutudlo ug nahimo pa gani siyang mas hanas sa paghimog mga tinun-an. Gigamit niya ang iyang kahibalo sa epektibong paagi diha sa buluhaton nga pagmantala sa maayong balita, ilabina taliwala sa mga Hudiyo. Si Apolos mapuslanon kaayo sa pagkombinsir sa mga Hudiyo bahin kang Kristo. ‘Kay gamhanan diha sa Kasulatan,’ nakahimo siya sa pagpamatuod kanila nga ang tanang manalagna sa karaang panahon naghulat sa pag-abot sa Kristo. (Buhat 18:24, Kingdom Interlinear Translation) Ang asoy nagpadayon nga human niadto si Apolos miadto sa Acaya, diin “siya nakatabang ug dako niadtong nanagpanuo tungod sa dili-takos nga kalulot sa Diyos; kay sa kusganong paagi bug-os niyang gipamatud-an sa publiko nga sayop ang mga Hudiyo, samtang iyang gipasundayag pinaagi sa mga Kasulatan nga si Jesus mao ang Kristo.”—Buhat 18:27, 28.

Pagkat-on Gikan sa Panig-ingnan sa Ubang mga Magtutudlo

7. Sa unsang paagi si Aquila ug Priscila nahimong batid nga mga magtutudlo?

⁷ Sa unsang paagi si Aquila ug Priscila nahimong hanas nga mga magtutudlo sa Pulong sa Diyos? Gawas pa sa ilang kakugi sa personal nga pagtuon ug pagtambong sa tigom, ang ilang suod nga pagpakig-uban kang apostol Pablo lagmit nga nakatabang ug dako. Sulod sa 18 ka bulan si Pablo mipuyo sa balay ni Priscila ug Aquila sa Corinto. Nagkauban sila sa pagpanghimo ug pagpang-ayo ug mga tolda. (Buhat 18:2, 3) Handurawa ra ang ilang halalom nga Kasulatanhong  mga kabildohay. Ug ang maong pagpakig-uban kang Pablo seguradong nakapauswag sa ilang espirituwalidad! “Siya nga nagalakaw uban sa mga tawong maalamon mahimong maalamon,” nag-ingon ang Proverbio 13:20. Ang maayong panag-uban adunay maayong epekto diha sa ilang espirituwal nga mga batasan.—1 Corinto 15:33.

8. Unsay nakat-onan ni Priscila ug Aquila gikan sa pagpaniid nila kang Pablo diha sa iyang ministeryo?

⁸ Sa dihang gipanid-an ni Priscila ug Aquila si Pablo ingong magmamantala sa Gingharian, ilang nakita ang panig-ingnan sa usa ka maayong magtutudlo. Ang asoy sa Mga Buhat nag-ingon nga si Pablo “maghatag ug pakigpulong diha sa sinagoga [sa Corinto] sa matag igpapahulay ug mangdani sa mga Hudiyo ug mga Grego.” Sa ulahi, sa dihang miuban sila si Silas ug Timoteo, si Pablo “okupado kaayo sa pulong, nga nagpamatuod ngadto sa mga Hudiyo nga si Jesus mao ang Kristo.” Sa dihang pipila lamang ka membro sa sinagoga ang interesado, namatikdan ni Priscila ug Aquila nga gibalhin ni Pablo ang sentro sa iyang pagsangyaw ngadto sa mas paborableng dapit, usa ka balay nga sikbit sa sinagoga. Didto natabangan ni Pablo si Crispo, ang “nagadumalang magtatan-aw sa sinagoga,” nga mahimong tinun-an. Lagmit gayod nga namatikdan ni Priscila ug Aquila nga ang pagkahimong tinun-an ni Crispo adunay dako ug mabungahong epekto diha sa teritoryo. Ang asoy nag-ingon: “Si Crispo . . . nahimong magtutuo sa Ginoo, ug ingon man usab ang iyang tibuok panimalay. Ug daghan sa mga taga-Corinto nga nakadungog nanagpanuo ug nagpabawtismo.”—Buhat 18:4-8.

9. Unsay reaksiyon ni Priscila ug Aquila sa panig-ingnan ni Pablo?

⁹ Ang panig-ingnan ni Pablo diha sa pagministeryo sa kanataran gisundog sa ubang mga magmamantala sa Gingharian, sama ni Priscila ug Aquila. Giawhag sa apostol ang ubang mga Kristohanon: “Mahimong mga tigsundog kanako, ingon nga ako nagsundog kang Kristo.” (1 Corinto 11:1) Kaharmonya sa panig-ingnan ni Pablo, si Priscila ug Aquila mitabang kang Apolos sa pagsabot sa mas hustong paagi sa Kristohanong mga pagtulon-an. Sa baylo, si Apolos mitabang usab sa uban. Sa walay duhaduha si Priscila ug Aquila mitabang sa paghimog mga tinun-an sa Roma, Corinto, ug Efeso.—Buhat 18:1, 2, 18, 19; Roma 16:3-5.

10. Unsay imong nakat-onan gikan sa Buhat kapitulo 18 nga motabang kanimo sa buluhatong paghimog mga tinun-an?

¹⁰ Unsay atong makat-onan gikan sa atong paghisgot sa Buhat kapitulo 18? Aw, maingon nga si Aquila ug Priscila mahimong nakakat-on gikan kang Pablo, mapauswag nato ang atong katakos sa paghimog mga tinun-an pinaagi sa pagsundog sa panig-ingnan sa maayong mga magtutudlo sa Pulong sa Diyos. Makapakig-uban kita niadtong “okupado kaayo sa pulong” ug kinsa “bug-os nga nagpamatuod” sa uban. (Buhat 18:5, Kingdom Interlinear Translation) Maobserbahan nato kon sa unsang paagi ilang naabot ang kasingkasing sa mga tawo pinaagi sa paggamit ug makapakombinsir nga mga katakos sa pagpanudlo. Ang maong mga katakos makatabang kanato sa paghimog mga tinun-an. Sa dihang ang usa ka tawo nagtuon sa Bibliya uban kanato, mahimo natong isugyot  nga iyang awhagon ang ubang mga membro sa iyang pamilya o mga silingan nga moduyog sa pagtuon. O mahimo nato siyang hangyoon nga pahibaloon kita kon duna pay uban nga mahimo natong tanyagan ug pagtuon sa Bibliya.—Buhat 18:6-8.

Pagmugnag mga Kahigayonan sa Paghimog mga Tinun-an

11. Asa makaplagi ang bag-ong mga tinun-an?

¹¹ Si Pablo ug ang iyang mga isigka-Kristohanon nagtinguha sa paghimog mga tinun-an pinaagi sa pagsangyaw diha sa balaybalay, sa merkado, ug sa ilang pagpanaw—sa pagkatinuod, bisan asa. Ingong masibotong mga mamumuo sa Gingharian nga nagtinguha sa paghimog mga tinun-an, mapauswag ba nimo ang imong mga kalihokan sa pag-alagad sa kanataran? Magamit ba nimo sa epektibong paagi ang mga kahigayonan sa pagpangita sa mga takos ug sa pagsangyaw ngadto kanila? Unsa ang pipila ka paagi diin ang atong mga isigkamagmamantala sa maayong balita nakakaplag ug mga tinun-an? Susihon una nato ang natad sa pagsangyaw pinaagig telepono.

12-14. Sa pag-ilustrar sa mga benepisyo sa pagsangyaw pinaagig telepono, iasoy ang imong kaugalingong eksperyensiya o kanang makita niining mga parapoha.

¹² Samtang namalaybalay didto sa Brazil, usa ka Kristohanon nga atong tawgon ug Maria nagtunol ug tract ngadto sa usa ka batan-ong babaye nga talilakaw na gikan sa usa ka apartment. Gigamit ang ulohan sa tract ingong introduksiyon, si Maria nangutana, “Gusto ka bang makabaton ug dugang kahibalo bahin sa Bibliya?” Mitubag ang babaye: “Oo. Ang problema lang kay ako usa ka maestra, ug mahurot ang akong panahon sa pagtudlo sa mga estudyante.” Gipatin-aw ni Maria nga mahimo nilang konsiderahon ang mga topiko sa Bibliya pinaagi sa telepono. Gihatag sa babaye kang Maria ang iyang numero sa telepono, ug nianang gabhiona mismo, siya nagsugod ug pagtuon pinaagi sa telepono ginamit ang brosyur nga Unsay Gikinahanglan sa Diyos Kanato? a

¹³ Samtang nakigbahin sa pagsangyaw pinaagig telepono, usa ka bug-os-panahong ministro sa Etiopia nakurat sa dihang usa ka lalaki ang mitubag apan nakadungog siyag kaguliyang sa palibot. Gihangyo siya sa lalaki nga patawgon na lang pag-usab. Sa dihang nanawag pag-usab ang sister, ang lalaki nangayog dispensa ug miingon nga sa una niyang pagtawag, siya ug ang iyang asawa nag-away. Gigamit sa sister kining maong komento ingong kahigayonan sa pagpunting sa maalamong giya nga gihatag sa Bibliya sa pagdumala sa mga problema sa pamilya. Giingnan sa sister ang lalaki nga daghang pamilya ang natabangan sa Ang Sekreto sa Kalipay sa Pamilya, usa ka libro nga gipatik sa mga Saksi ni Jehova. Paglabay sa pipila ka adlaw human mahatod ang libro, nanawag pag-usab ang sister sa lalaki. Ang lalaki miingon: “Kining libroha nakaluwas sa akong kaminyoon!” Sa pagkatinuod, gitigom sa lalaki ang iyang pamilya aron ikapaambit niya ang maayong mga punto nga iyang nabasa diha sa libro. Nasugdan ang usa ka panagtuon sa Bibliya, ug sa wala madugay ang lalaki misugod na sa pagtambong sa Kristohanong mga tigom sa regular nga paagi.

¹⁴ Usa ka magmamantala sa Gingharian sa Denmark nga nakasugod ug panagtuon sa Bibliya pinaagi sa pagsangyaw ginamit ang telepono nag-ingon: “Ang magtatan-aw sa pag-alagad nagdasig  kanako sa pagpakigbahin sa pagsangyaw pinaagig telepono. Sa sinugdan ako nagpanuko, nga nag-ingon: ‘Dili ko ganahan ana.’ Apan, usa ka adlaw niana nakabaton kog kaisog ug nagsugod sa pagtelepono sa unang tagbalay. Si Sonja mitubag ug, human sa mubo nga kabildohay, miuyon nga modawat ug literatura nga binase sa Bibliya. Usa ka gabii niana among gihisgotan ang ulohan bahin sa paglalang, ug gusto niyang basahon ang Life—How Did It Get Here? By Evolution or by Creation. b Miingon ko nga maayo kon magkakita mi ug hisgotan ang maong ulohan. Miuyon siya. Si Sonja nag-andam na alang sa pagtuon sa dihang miabot ako, ug kami nagtuon kada semana sukad niadto.” Ang atong Kristohanong sister mihinapos: “Sulod sa daghang tuig ako nag-ampo alang sa usa ka panagtuon sa Bibliya, apan wala nako dahoma nga makabaton ug usa ka panagtuon sa Bibliya pinaagi sa pagsangyaw ginamit ang telepono.”

15, 16. Unsang mga eksperyensiya ang imong ikaasoy sa pagpakita sa benepisyo sa pagkaalisto sa lainlaing mga paagi sa pagsugod ug mga panagtuon sa Bibliya?

¹⁵ Daghan ang milampos tungod sa pagpadapat sa mga sugyot sa pagsangyaw ngadto sa mga tawo bisan asa sila makaplagi. Usa ka Kristohanong babaye sa Tinipong Bansa nagparada sa iyang sakyanan tupad sa usa ka komersiyal nga van diha sa paradahan. Sa dihang nakita siya sa babaye diha sa van, ang sister misugod sa pagpatin-aw sa atong buluhaton nga pagtudlo bahin sa Bibliya. Ang babaye namati, migawas sa van, ug misulod sa awto sa sister. Siya miingon: “Nalipay kaayo ko nga nakig-estorya ka nako. Dugay na kong wala makadawat sa inyong literatura sa Bibliya. Gawas pa, gusto nakong magtuon pag-usab sa Bibliya. Mahimo bang tun-an ko nimo?” Sa ingon ang atong sister nagmugna ug maayong situwasyon sa pagpaambit sa maayong balita.

¹⁶ Usa ka sister sa Tinipong Bansa nakaeksperyensiya niini sa dihang miduaw siya sa usa ka nursing home: Iyang giduol una ang direktor sa pipila ka kalihokan diha sa pasilidad ug giingnan niya ang direktor nga buot niyang motabang sa pagtagbaw sa espirituwal nga mga panginahanglan sa mga residente. Miingon pa ang atong sister nga malipay siya sa pagdumala ug libreng senemana nga pagtuon sa Bibliya uban sa tanan nga gustong motambong. Gitugotan siya sa direktor sa pagduaw sa mga kuwarto sa lainlaing mga residente. Sa wala madugay, nagdumala siya ug panagtuon sa Bibliya katulo sa usa ka semana uban sa 26 ka residente, diin ang usa kanila regular nang tigtambongan sa atong mga tigom.

17. Unsang paagi ang kasagarang epektibo sa pagsugod ug mga panagtuon sa Bibliya sa balay?

¹⁷ Alang sa pipila ka magmamantala sa Gingharian, ang direktang pagtanyag ug pagtuon sa Bibliya magpatungha ug maayong mga resulta. Usa ka buntag niana, ang usa ka kongregasyon nga adunay 105 ka magmamantala mihimog linaing paningkamot sa pagtanyag ug pagtuon sa Bibliya ngadto sa matag tagbalay nga ilang mahimamat. Otsentay sayis ka magmamantala ang nakigbahin sa pag-alagad sa kanataran, ug human sa paggugol ug duha ka oras diha sa buluhatong pagsangyaw, nakasugod silag labing menos 15 ka bag-ong mga panagtuon sa Bibliya.

Padayon sa Pagpangita sa mga Takos

18, 19. Unsang hinungdanong sugo ni Jesus ang angay natong hinumdoman, ug tungod niana unsay determinado natong buhaton?

¹⁸ Ingong magmamantala sa Gingharian, tingali buot nimong sulayan ang mga sugyot nga gihisgotan niining artikuloha. Siyempre, maalamong tagdon ang lokal nga mga kostumbre sa dihang maghunahuna sa mga paagi sa pagpamatuod. Labaw sa tanan, hinumdoman nato ang sugo ni Jesus sa pagpangita sa mga takos ug pagtabang sa maong  mga tawo nga mahimong mga tinun-an.—Mateo 10:11; 28:19.

¹⁹ Aron mapalampos kana, hinaot nga atong ‘gamiton ang pulong sa kamatuoran sa hustong paagi.’ Mahimo nato kana pinaagi sa paggamit sa arte sa pagpangombinsir nga lig-ong gipasukad sa Kasulatan. Motabang kini kanato sa pagtandog sa kasingkasing sa mga madinawaton ug pagpalihok kanila. Samtang mainampoon kitang mosalig kang Jehova, makapakigbahin kita sa pagtabang sa uban nga mahimong mga tinun-an ni Jesu-Kristo. Ug pagkamagantihon niining buluhatona! Busa buhaton nato ‘ang atong maarangan nga itanyag ang atong kaugalingon sa Diyos ingong inuyonan,’ nga kanunayng magpasidungog kang Jehova ingong masibotong mga magmamantala sa Gingharian, kinsa nagawali sa tuyo nga makahimog mga tinun-an.—2 Timoteo 2:15.

[Footnote]

Nahinumdom Ka Ba?

• Nganong kinahanglang ipatin-aw sa mas bug-os nga paagi kang Apolos ang dalan sa Diyos?

• Sa unsang mga paagi nga si Priscila ug Aquila nakakat-on gikan kang apostol Pablo?

• Unsay imong nakat-onan bahin sa buluhatong paghimog mga tinun-an gikan sa Buhat kapitulo 18?

• Sa unsang paagi ka makamugnag mga kahigayonan sa paghimog mga tinun-an?

[Mga Pangutana sa Pagtuon]

[Hulagway sa panid 18]

Si Priscila ug Aquila ‘nagpatin-aw sa dalan sa Diyos sa mas husto nga paagi’ ngadto kang Apolos

[Hulagway sa panid 20]

Si Apolos nahimong hanas sa paghimog mga tinun-an

[Hulagway sa panid 21]

Si Pablo nagwali bisan asa siya miadto

[Mga hulagway sa panid 23]

Pagmugnag mga kahigayonan sa pagwali