Kon Nganong Mosimba Man Sila

“HALOS upat ka pilo ang gidaghanon sa mga Presbiteryano sa Republika sa Korea kay sa Amerika.” Basin matingala ang daghang magbabasa sa maong pahayag sa magasing Newsweek, sanglit ang kadaghanang tawo nagtuo nga ang Korea maoy nasod diin naglabi ang Confucianista ug Budhista nga mga relihiyon. Karon, ang usa ka dumuduaw makakitag daghang “Kristohanon” nga mga simbahan didto, nga kasagarang mailhan tungod sa mga krus nga gilibotag pula nga mga bombilya. Sa ma-Dominggo, kasagaran na ang pagkakitag tinagurha ug tinagutlong mga tawo, nga nagbitbit ug mga Bibliya, paingon sa simbahan. Sumala sa usa ka surbi sa 1998, halos 30 porsiyento sa Koreanong katawhan mosimba sa Katoliko o sa Protestanteng simbahan, nga mas daghan pa kay sa mga tawo nga nag-angkong mga Budhista.

Karong mga adlawa, sa bisan diin talagsaon ang pagkakita ug daghang tawo nga makanunayong mosimba. Kini nagakahitabo gihapon dili lang sa Korea apan sa ubang nasod usab sa Asia, ingon man sa Aprika ug sa Latin Amerika. Nganong daghan man kaayo ang nag-angkon gihapon nga nagtuo sa Diyos sa dihang ang kawalay-interes ug kawalay-pagtagad sa relihiyon morag kaylap man kaayo sa tibuok yuta? Nganong mosimba pa man sila?

Gipadayag sa usa ka surbi sa Gallup nga kapin sa katunga sa mga tigsimba sa Korea nangitag kalinaw sa hunahuna; mga un-tersiya naglaom nga makabaton ug kinabuhing dayon human sa kamatayon; ug 1 sa 10 naglaom nga makabaton ug maayong panglawas, bahandi, ug kalamposan.

Ang daghang tawo sa Tsina magpanon sa pagsimba kay naglaom nga makakaplag ug butang nga makapatagbaw sa espirituwal nga kahaw-ang nga miresulta samtang ang mga tingusbawan nga gipasukad sa kapitalismo inanayng mipuli sa Komunistang ideolohiya. Kada tuig, gipatik ug gipanagtag sa Tsina ang milyonmilyong kopya sa Bibliya, ug ang katawhan maorag masibotong nagbasa niini sama sa ilang pagbasa sa gamay nga pulang basahon ni Mao Tse-tung.

Ang pipila ka Katoliko sa Brazil, ilabina ang mga batan-on pa, dili matagbaw sa gisaad nga kalipay sa umaabot nga kinabuhi—gusto nilag katagbawan karon dayon. Ang mantalaang Tudo nag-ingon: “Kon ang teolohiya nga ang simbahan angayng makigbisog aron mahigawas sa sosyal,  politikanhon, ug ekonomikanhong pagpanglupig maoy nagpalihok sa katawhan sa katuigang 1970, karong adlawa ang teolohiya bahin sa kadagaya maoy nagpalihok.” Ang usa ka surbi sa Britanya nangutana sa mga tigsimba didto kon unsa ang usa ka butang nga ilang nagustohan bahin sa ilang simbahan. Ang panag-uban mao ang unang gihisgotan.

Kining tanan nagpakita nga bisan pag ang ubay-ubayng tawo nagtuo gihapon sa Diyos, ang kadaghanan mas mabalak-on bahin sa kon unsay ilang makuha karon kay sa bahin sa umaabot—o bisan bahin sa Diyos mismo. Sa imong hunahuna unsa ang hustong katarongan nga motuo sa Diyos? Unsay giingon sa Bibliya bahin niana? Makaplagan nimo ang tubag sa sunod artikulo.