‘Magbaton Ka ug Tumang Kalipay Diha Kang Jehova’

‘Magbaton ka ug tumang kalipay diha kang Jehova, ug ihatag niya kanimo ang mga hangyo sa imong kasingkasing.’—SALMO 37:4.

1, 2. Kinsa ang Tuboran sa tinuod nga kalipay, ug sa unsang paagi gidani ni Haring David ang pagtagad niining kamatuorana?

“MALIPAYON kadtong mahunahunaon sa ilang espirituwal nga panginahanglan, . . . malipayon ang mga maluluy-on, . . . malipayon ang mga makigdaiton.” Apil sa laing unom ka kahubitan niadtong mga malipayon, kining mga pulonga mao ang talagsaong introduksiyon sa nabantog nga Wali sa Bukid ni Jesus, sumala sa girekord sa magsusulat sa Ebanghelyo nga si Mateo. (Mateo 5:3-11) Ang mga pulong ni Jesus nagpasalig nga ang kalipay posibleng makab-ot.

² Ang usa ka salmo nga gisulat ni Haring David sa karaang Israel nagdani sa pagtagad ngadto sa Tuboran sa tinuod nga kalipay, si Jehova. ‘Magbaton ka ug tumang kalipay diha kang Jehova,’ miingon si David, “ug ihatag niya kanimo ang mga hangyo sa imong kasingkasing.” (Salmo 37:4) Apan unsay makapahimo sa pagkahibalo bahin kang Jehova ug sa daghang bahin sa iyang personalidad nga usa ka “tumang kalipay”? Sa unsang paagi ang pagkonsiderar sa kon unsay iyang nabuhat ug pagabuhaton pa sa pagtuman sa iyang katuyoan maghatag kanimo ug paglaom nga makadawat sa “mga hangyo sa imong kasingkasing”? Ang pagsusi pag-ayo sa Salmo 37, mga bersikulo 1 hangtod sa 11, maghatag sa mga tubag.

“Ayaw Pagkasina”

3, 4. Sumala sa nasulat sa Salmo 37:1, unsang tambag ang gihatag ni David, ug nganong ang pagsunod niini haom karon?

³ Kita nagkinabuhi sa “makuyaw nga mga panahong lisod sagubangon,” ug kaylap ang pagkadaotan. Nakita nato ang katumanan sa giingon ni apostol Pablo: “Ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Timoteo 3:1, 13) Dali ra kaayong maapektahan sa dayag nga kalamposan ug kauswagan sa mga daotan! Kanang tanan makapalinga kanato, ug tungod niana ang atong pagtagad dili na masentro sa espirituwal nga mga butang. Matikdi kon sa unsang paagi ang pangbukas nga mga pulong sa Salmo 37 nagpasidaan kanato niining lagmit nga kapeligrohan: “Ayaw pagpanginit tungod sa mga mamumuhat ug daotan. Ayaw pagkasina sa mga nagabuhat ug dili-matarong.”

⁴ Ang mga tigbalita sa kalibotan nagtaho adlaw-adlaw bahin sa daghang buhat sa inhustisya. Ang limbongang mga negosyante nanikas apan wala masiloti. Ang mga kriminal nagpahimulos sa mga walay-panalipod. Ang mga mamumuno wala masakpi o wala masiloti. Kanang tanang pananglitan sa pagtuis sa hustisya makapukaw sa kasuko ug makatugaw sa atong hunahuna. Ang morag kalamposan sa mga mamumuhat ug daotan makapukaw pa gani ug kasina. Apan ang pagkayugot ba nato makapaarang-arang sa situwasyon? Ang pagkasina ba sa morag mga bentaha nga gitagamtam sa mga daotan makapausab sa ilang sangpotan? Dili gayod! Ug dili gayod kita angayng “manginit.” Ngano man?

5. Nganong ang mga mamumuhat ug daotan gipakasama sa balili?

 ⁵ Ang salmista nagtubag: “Kay sa madali mangalaya sila sama sa balili, ug sama sa lunhaw nga balili mangahanaw sila.” (Salmo 37:2) Ang lunhaw nga balili nindot tingaling tan-awon, apan sa dili madugay ang mga dahon mangalawos ug kini mamatay. Mao man usab ang mga mamumuhat ug daotan. Ang ilang dayag nga kauswagan dili permanente. Inigkamatay nila, ang ilang mga bahandi nga nakuha sa ilegal nga paagi dili na makatabang kanila. Sa kataposan ang tanan makadawat kon unsay gibaod sa hustisya. “Ang suhol nga ginabayad sa sala mao ang kamatayon,” misulat si Pablo. (Roma 6:23) Ang mga mamumuhat ug daotan ug ang tanan nga dili-matarong sa kataposan makadawat sa ilang “suhol” ug mahanaw. Pagkawalay-kapuslanan nga paagi sa pagkinabuhi!—Salmo 37:35, 36; 49:16, 17.

6. Unsang leksiyon ang atong makuha gikan sa Salmo 37:1, 2?

⁶ Nan, tugotan ba nato nga matugaw kita sa lumalabay nga kauswagan sa mga mamumuhat ug daotan? Ang leksiyon gikan sa unang duha ka bersikulo sa Salmo 37 mao kini: Ayaw tugoti ang ilang kalamposan nga magpatipas kanimo gikan sa imong napiling dalan sa pag-alagad kang Jehova. Hinunoa, isentro kanunay ang imong pagtagad sa espirituwal nga mga panalangin ug mga tumong.—Proverbio 23:17.

“Salig Kang Jehova ug Buhata ang Maayo”

7. Nganong angay kitang mosalig kang Jehova?

⁷ “Salig kang Jehova ug buhata ang maayo,” nag-awhag ang salmista kanato. (Salmo 37:3a) Sa dihang hasolon kita sa mga kahingawa o bisan sa mga pagduhaduha, kinahanglang hugot kitang mosalig kang Jehova. Siya mao ang Usa nga naghatag ug bug-os nga espirituwal nga kasegurohan. “Si bisan kinsa nga nagapuyo sa natago nga dapit sa Labing Hataas,” misulat si Moises, “makabaton ug kapahulayan ilalom sa landong sa Usa nga Labing Gamhanan.” (Salmo 91:1) Sa dihang natugaw tungod sa nag-uswag nga pagkamalinapason niining sistemaha sa mga butang, kita ilabinang nagkinahanglan nga mosalig kang Jehova. Kon malisa ang atong buolbuol, kita malipay kon ang usa ka higala moagak kanato. Sa susama, sa dihang maningkamot kita sa paglakaw diha sa pagkamatinumanon, kita nagkinahanglan sa pagpaluyo ni Jehova.—Isaias 50:10.

8. Sa unsang paagi ang pagpakigbahin sa Kristohanong ministeryo motabang kanato sa paglikay nga dili sobrang matugaw sa kauswagan sa mga daotan?

⁸ Ang usa ka sulbad kon kita natugaw sa kauswagan sa mga daotan mao ang pagkahimong puliki sa pagpangita ug pagtabang sa mga karnerohon nga makadangat sa tukmang kahibalo sa katuyoan ni Jehova. Tungod sa nag-uswag nga pagkadaotan, kita kinahanglang puliki kaayo sa pagtabang sa uban. “Ayaw kalimti ang pagbuhat ug maayo ug ang pagpakig-ambit sa mga butang sa uban,” miingon si apostol Pablo, “kay ang maong mga halad gikahimut-an sa Diyos.” Ang labing “maayo” nga atong mahimo mao ang pagpaambit sa uban sa mahimayaong maayong balita sa Gingharian sa Diyos. Ang atong pagsangyaw sa publiko maoy tinuod gayod nga “halad sa pagdayeg.”—Hebreohanon 13:15, 16; Galacia 6:10.

9. Ipatin-aw ang tambag ni David nga “magpuyo ka sa yuta.”

⁹ “Magpuyo ka sa yuta,” nagpadayon si David, “ug makiglabot ka uban ang pagkamatinumanon.” (Salmo 37:3b) Ang “yuta” sa adlaw ni David mao ang teritoryo nga gihatag ni Jehova sa Israel, ang Yutang Saad. Panahon sa paghari ni Solomon ang mga utlanan niini nakaabot gikan sa Dan sa amihanan ngadto sa Beer-sheba sa habagatan. Mao kini ang pinuy-anan sa Israel. (1 Hari 4:25) Karon, bisan asa kita nagpuyo sa yuta, nagpaabot kita sa panahon sa dihang ang tibuok planeta  mahimong paraiso sa bag-ong kalibotan sa pagkamatarong. Sa kasamtangan, kita nagpuyo sa espirituwal nga kasegurohan.—Isaias 65:13, 14.

10. Unsa ang resulta sa dihang kita ‘makiglabot uban ang pagkamatinumanon’?

¹⁰ Unsa unyay resulta sa dihang kita ‘makiglabot uban ang pagkamatinumanon’? Ang inspiradong proverbio nagpahinumdom kanato: “Ang usa ka tawong may matinumanong mga buhat makabaton ug daghang panalangin.” (Proverbio 28:20) Ang atong matinumanon nga pagpadayon sa pagwali sa maayong balita bisan asa kita nagpuyo ug kang bisan kinsa kutob sa atong mahimo seguradong gantihan ni Jehova. Pananglitan, si Frank ug ang iyang asawa nga si Rose, nagsugod pagpayunir 40 ka tuig kanhi diha sa usa ka lungsod sa amihanang Scotland. Ang pipila nga nagpakitag interes sa kamatuoran didto dili na aktibo. Wala magpaluya niini, kining maong payunir nga magtiayon nagsugod sa buluhatong pagsangyaw ug paghimog mga tinun-an. Karon aduna nay mauswagong kongregasyon sa maong lungsod. Ang pagkamatinumanon niining maong magtiayon gipanalanginan gayod ni Jehova. “Ang kinadak-ang panalangin,” mapaubsanong nagpatin-aw si Frank, “mao gayod nga kami anaa gihapon sa kamatuoran ug mapuslanon kang Jehova.” Oo, sa dihang kita ‘makiglabot uban ang pagkamatinumanon,’ atong madawat ug mapabilhan ang daghang panalangin.

‘Magbaton Ka ug Tumang Kalipay Diha Kang Jehova’

11, 12. (a) Sa unsang paagi kita ‘makabaton ug tumang kalipay diha kang Jehova’? (b) Unsang tumong ang imong mahimo maylabot sa personal nga pagtuon, ug uban sa unsang posibleng resulta?

¹¹ Aron mapalig-on ang atong relasyon uban kang Jehova ug mahuptan ang atong pagsalig kaniya, kita kinahanglang ‘magbaton ug tumang kalipay diha kang Jehova.’ (Salmo 37:4a) Sa unsang paagi mahimo nato kana? Imbes mapuliki sa atong kahimtang, bisan tuod malisod kini, atong isentro ang atong pagtagad kang Jehova. Ang usa ka paagi sa pagbuhat niana mao ang paggahin ug panahon sa pagbasa sa iyang Pulong. (Salmo 1:1, 2) Nakahatag ba nimog kalipay ang imong pagbasa sa Bibliya? Mao kanay imong bation kon ikaw magabasa uban sa tumong nga makakat-on ug dugang bahin kang Jehova. Nganong dili mohunong human mabasa ang usa ka bahin ug pangutan-on ang imong kaugalingon, ‘Unsay gitudlo niining maong teksto kanako bahin kang Jehova?’ Tingali makatabang kanimo ang pagbutang ug notbok o papel diha sa duol sa dihang magbasa ka sa Bibliya. Matag higayon nga mohunong ka aron sa pagpalandong sa kahulogan sa imong nabasa, isulat ang mga pulong nga magpahinumdom kanimo sa usa sa makapadaning mga hiyas sa Diyos. Sa laing salmo, si David miawit: “Hinaot nga ang mga pulong sa akong baba ug ang pagpamalandong sa akong kasingkasing mahimong kahimut-anan sa imong atubangan, Oh Jehova nga Bato ko ug Manunubos ko.” (Salmo 19:14) Ang pagsentro nato sa atong pagtagad diha sa Pulong sa Diyos “kahimut-anan” kang Jehova ug kanato.

¹² Sa unsang paagi kita makabaton ug kalipay gikan sa atong pagtuon ug pagpamalandong? Puwede natong himoong tumong ang pagkat-on kutob sa atong mahimo bahin kang Jehova ug sa iyang mga hiyas. Ang mga publikasyong sama sa Ang Labing Bantogang Tawo nga Nabuhi Sukad ug ang Pakigsuod Kang Jehova * magtagana kanato ug daghang impormasyon nga atong mapamalandong uban ang apresasyon. Sa baylo, si David nagpasalig sa mga matarong, si Jehova ‘magahatag kanimo sa mga hangyo sa imong kasingkasing.’ (Salmo 37:4b) Lagmit mao kining matanga sa pagsalig ang nagtukmod kang apostol Juan sa pagsulat niining mga pulonga: “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato. Dugang pa, kon kita nahibalo  nga siya magpatalinghog kanato labot sa bisan unsay atong pangayoon, kita nahibalo nga atong mabatonan ang mga butang nga atong gipangayo sanglit gipangayo man nato kini kaniya.”—1 Juan 5:14, 15.

13. Sa di pa dugayng katuigan, unsang pag-uswag sa buluhatong pagsangyaw sa Gingharian ang namatikdan sa daghang nasod?

¹³ Ingong mga maghuhupot sa integridad, ang atong kinadak-ang tinguha mao ang pagkakita sa bindikasyon sa pagkasoberano ni Jehova. (Proverbio 27:11) Wala ba magsugwak ang atong kasingkasing sa kalipay sa dihang atong nahibaloan ang dakong buluhaton nga pagwali nga ginahimo sa atong mga igsoon sa mga nasod nga kanhi nailalom sa totalitaryan o diktatoryal nga pagmando? Kita naghinamhinam sa paglantaw sa unahan kon unsa pang dugang kagawasan ang ihatag sa dili pa matapos kining sistemaha. Daghan sa mga alagad ni Jehova nga nagpuyo sa mga nasod sa kasadpan ang adunay dakong bahin sa pagsangyaw ngadto sa mga estudyante, lalin, ug uban pa nga temporaryong nagpuyo sa kasadpan ug nakatagamtam ug kagawasan sa pagsimba. Tim-os kitang manghinaot nga sa dihang mamauli na kining mga tawhana, sila magpadayon sa pagpasidlak sa kahayag sa kamatuoran bisan diha sa bagang kangitngitan.—Mateo 5:14-16.

“Itugyan Kang Jehova ang Imong Dalan”

14. Unsay pamatuod nga kita makasalig kang Jehova?

¹⁴ Makapahupay gayod ang pagkahibalo nga mahimong mahanaw ang atong mga kabalaka ug ang gihunahuna nato nga hilabihang kabug-at! Sa unsang paagi? “Itugyan kang Jehova ang imong dalan, ug salig kaniya,” nag-ingon si David, nga midugang, “ug siya molihok.” (Salmo 37:5) Diha sa atong mga kongregasyon, kita adunay daghang ebidensiya nga kita makasalig nga suportahan ni Jehova. (Salmo 55:22) Kadtong anaa sa bug-os-panahong ministeryo, mga payunir man, nagapanawng mga magtatan-aw, misyonaryo, o mga boluntaryo nga nag-alagad sa Bethel, makapamatuod sa pagkakasaligan sa pag-atiman ni Jehova. Nganong dili makigsulti sa bug-os-panahong mga alagad nga kaila nimo ug mangutana kon sa unsang paagi sila gitabangan ni Jehova? Sa walay duhaduha makadungog kag daghang eksperyensiya nga nagpakita nga bisan sa malisod nga mga panahon, ang kamot ni Jehova dili gayod mubo. Siya kanunayng nagtagana sa mga kinahanglanon sa kinabuhi.—Salmo 37:25; Mateo 6:25-34.

15. Sa unsang paagi ang pagkamatarong sa katawhan sa Diyos nagasidlak?

¹⁵ Sa dihang bug-os kitang mosalig kang Jehova, maeksperyensiyahan nato ang padayong giingon sa salmista: “Ipadan-ag gayod niya ang imong pagkamatarong ingon sa kahayag, ug ang imong hustisya ingon sa kaudtohon.” (Salmo 37:6) Ingong mga Saksi ni Jehova, kita subsob nga gidaot. Apan  gibuksan ni Jehova ang mga mata sa mga matinud-anog kasingkasing sa pagtabang kanila sa pagkaamgo nga ang atong publikong ministeryo gipalihok sa gugma alang kang Jehova ug sa silingan. Sa samang panahon, ang atong matarong nga panggawi, bisan tuod gidaot sa daghan, dayag nga makita. Si Jehova nagpalig-on kanato latas sa tanang matang sa pagsupak ug paglutos. Tungod niini, ang pagkamatarong sa katawhan sa Diyos nagasidlak sama sa adlaw sa udtong-tutok.—1 Pedro 2:12.

“Magpakahilom Ka . . . Maghulat Ka nga Mapangandoyon”

16, 17. Kaharmonya sa Salmo 37:7, panahon na karon sa unsa, ug ngano?

¹⁶ Ang sunod nga gisulti sa salmista mao kini: “Magpakahilom ka sa atubangan ni Jehova ug maghulat ka nga mapangandoyon kaniya. Ug ayaw pagpanginit kang bisan kinsa nga nagmalamposon sa iyang dalan, sa tawo nga nagapahinabo sa iyang mga gihunahuna.” (Salmo 37:7) Dinhi gipasiugda ni David nga kita kinahanglang maghulat nga mapailobon sa paglihok ni Jehova. Bisan tuod wala pa moabot ang kataposan niining sistemaha, dili kini katarongan nga magreklamo. Wala ba nato makita nga ang kaluoy ug pailob ni Jehova mas dako kay sa atong gihunahuna sa una? Ikapakita ba nato karon nga kita usab nagpaabot nga mapailobon samtang kita nagmapuliki sa pagwali sa maayong balita sa dili pa moabot ang kataposan? (Marcos 13:10) Karon na ang panahon sa paglikay sa wala-hunahunaang mga buhat nga makahikaw kanato sa atong kalipay ug espirituwal nga kasegurohan. Karon na ang panahon nga mas makigbisog pa sa makadaot nga impluwensiya sa kalibotan ni Satanas. Ug karon na ang panahon sa pagpabiling putli sa moral ug dili gayod ipameligro ang atong matarong nga baroganan uban kang Jehova. Magpadayon kita sa pagwagtang sa imoral nga mga hunahuna ug sa paglikay sa dili-angayng mga buhat ngadto sa kaatbang nga sekso o bisan niadtong pareho ug sekso.—Colosas 3:5.

¹⁷ “Likayi ang kasuko ug biyai ang kaaligutgot,” gitambagan kita ni David. “Ayaw pagpanginit nga mosangko lamang sa pagbuhat ug daotan. Kay ang mga mamumuhat ug daotan pagaputlon, apan ang mga nagalaom kang Jehova mao ang magapanag-iya sa yuta.” (Salmo 37:8, 9) Oo, masaligon kitang makapaabot sa panahon—nga karon duol na kaayo—sa dihang paphaon ni Jehova gikan sa yuta ang tanang kadunotan ug kadtong responsable niana.

“Sa Dili na Madugay”

18, 19. Unsang pagdasig ang imong makuha sa Salmo 37:10?

¹⁸ “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha.” (Salmo 37:10) Makapadasig gayod kanato kanang mga pulonga samtang kita nagkaduol sa kataposan niining sistemaha ug sa kinapungkayan sa malaglagong pagkaindependente gikan kang Jehova! Ang bisan unsang matang sa kagamhanan o awtoridad nga gilaraw sa tawo napakyas gayod. Ug karon nagkaduol kita sa panahon nga mahibalik sa pagmando sa Diyos, ang tinuod nga teokrasya, ang Gingharian ni Jehova diha sa mga kamot ni Jesu-Kristo. Kini bug-os nga magkontrolar sa mga kalihokan sa kalibotan ug magwagtang sa tanang magsusupak sa Gingharian sa Diyos.—Daniel 2:44.

¹⁹ Sa bag-ong kalibotan ilalom sa Gingharian sa Diyos, bisan pag mangita ka, dili na nimo makaplagan ang “daotan.” Sa pagkatinuod, si bisan kinsa nga morebelde kang Jehova nianang panahona pagawagtangon dayon. Walay usa nga moatake sa iyang pagkasoberano o modumili sa pagpasakop sa awtoridad sa Diyos ang maatua didto. Ang tanan nimong mga silingan mahimong susama nimo ug hunahuna sa ilang tinguha sa pagpahimuot kang Jehova. Maghatag gayod kana ug kasegurohan—wala nay mga kandado o trangka, walay bisan unsa nga makadaot sa bug-os nga pagsalig ug kalipay!—Isaias 65:20; Miqueas 4:4; 2 Pedro 3:13.

20, 21. (a) Kinsa ang “mga maaghop” sa Salmo 37:11, ug asa nila makaplagi ang “kadagaya sa pakigdait”? (b) Unsang mga panalangin ang maangkon nato kon atong sundogon ang Mas Dakong David?

²⁰ Unya, “ang mga maaghop magapanag-iya sa  yuta.” (Salmo 37:11a) Apan kinsa kining maong “mga maaghop”? Ang pulong nga gihubit ug “maaghop” naggikan sa lintunganayng pulong nga nagkahulogan ug “pagsakit, pagpaubos, pagpakaulaw.” Oo, “ang mga maaghop” mao kadtong mapaubsanong nagahulat nga tul-iron ni Jehova ang tanang inhustisya nga gipahamtang kanila. “Sila makakaplag gayod sa ilang tumang kalipay sa kadagaya sa pakigdait.” (Salmo 37:11b) Bisan karon makakaplag kita ug kadagaya sa pakigdait diha sa espirituwal nga paraiso nga nalangkit sa matuod nga Kristohanong kongregasyon.

²¹ Bisan tuod wala pa mahupayi sa mga kasakit, kita nagtinabangay sa usag usa ug naghupay niadtong nagmagul-anon. Tungod niini, ang tinuod nga katagbawan gipalambo taliwala sa katawhan ni Jehova. Ang mga igsoong lalaki nga gitudlo ingong mga magbalantay mahigugmaong nagtagana sa atong espirituwal—ug usahay bisan sa pisikal—nga mga panginahanglan, nga tungod niini kita makalahutay sa pagsakit tungod sa pagkamatarong. (1 Tesalonica 2:7, 11; 1 Pedro 5:2, 3) Pagkabililhon kining pakigdait nga atong nabatonan! Kita may paglaom usab nga mabuhi sa walay kataposan sa malinawong Paraiso nga haduol na. Nan, hinaot nga kita magasundog sa Mas Dakong David, si Kristo Jesus, kansang kasibot alang kang Jehova nagpalihok kaniya sa pag-alagad nga matinumanon hangtod sa kataposan. (1 Pedro 2:21) Pinaagi sa pagbuhat niana, kita magmalipayon, nga nagadayeg sa usa kang kinsa kita magabaton ug tumang kalipay, ang atong Diyos, si Jehova.

[Footnote]

Makatubag Ka Ba?

• Unsang mga leksiyon ang imong nakat-onan gikan sa Salmo 37:1, 2?

• Sa unsang paagi ikaw ‘makabaton ug tumang kalipay diha kang Jehova’?

• Unsay pamatuod nga kita makasalig kang Jehova?

[Mga Pangutana sa Pagtuon]

[Hulagway sa panid 9]

Ang mga Kristohanon ‘dili masina sa mga nagabuhat ug dili-matarong’

[Hulagway sa panid 10]

“Salig kang Jehova ug buhata ang maayo”

[Hulagway sa panid 11]

Pagbaton ug tumang kalipay diha kang Jehova pinaagi sa pagkat-on kutob sa imong mahimo bahin kaniya

[Hulagway sa panid 12]

“Ang mga maaghop magapanag-iya sa yuta”