“Magmapasalamaton Kamo”

“Paharia ang kalinaw ni Kristo diha sa inyong mga kasingkasing . . . Ug magmapasalamaton kamo.”—COLOSAS 3:15.

1. Unsang kalainan ang atong makita tali sa Kristohanong kongregasyon ug sa kalibotan nga nailalom sa pagkontrolar ni Satanas?

DIHA sa 94,600 ka kongregasyon sa mga Saksi ni Jehova sa tibuok kalibotan, atong makaplagan ang mapasalamatong espiritu. Ang matag tigom magsugod ug matapos sa pag-ampo nga naglakip ug mga pulong sa pagpasalamat kang Jehova. Kanunay kitang makadungog ug “salamat,” “walay sapayan,” o susamang mga pulong nga gilitok sa bata ug tigulang maingon man sa bag-o ug dugay nang mga Saksi samtang sila nagkatigom sa pagsimba ug sa malipayong panag-ubanay. (Salmo 133:1) Pagkalahi niini sa kahakog nga naglungtad taliwala sa daghan ‘nga wala makaila kang Jehova ug wala magsunod sa maayong balita’! (2 Tesalonica 1:8) Nagkinabuhi kita sa dili-mapasalamatong kalibotan. Ug dili kini ikatingala kon atong hunahunaon kon kinsa ang diyos niining kalibotana—si Satanas nga Yawa, ang kinadak-ang tigpasiugda sa kahakog, kansang rebelyosong espiritu mikaylap sa tawhanong katilingban!—Juan 8:44; 2 Corinto 4:4; 1 Juan 5:19.

2. Unsang pasidaan ang kinahanglan natong patalinghogan, ug unsang mga pangutana ang atong tagdon?

² Tungod kay kita gilibotan sa kalibotan ni Satanas, kita kinahanglang mag-amping nga dili matakdan sa mga tinamdan niini. Sa unang siglo, gipahinumdoman ni apostol Pablo ang mga Kristohanon sa Efeso: “Kamo kaniadto milakaw uyon sa sistema sa mga butang niining kalibotana, uyon sa magmamando sa awtoridad sa hangin, ang espiritu nga nagalihok karon diha sa mga anak sa pagkadili-masinugtanon. Oo, taliwala kanila kitang tanan kaniadto nanaggawi nga nahiuyon sa mga tinguha sa atong unod, nga nagbuhat sa mga butang nga gipangandoy sa unod ug sa hunahuna, ug kita sa kinaiyanhon mga anak sa kapungot ingon gayod sa uban.” (Efeso 2:2, 3) Mao usab kana ang kahimtang sa daghang tawo karon. Nan, sa unsang paagi mahuptan nato ang mapasalamatong espiritu? Unsang tabang ang gitagana ni Jehova? Sa unsang praktikal nga mga paagi nga kita makapasundayag nga kita tinuod nga mapasalamaton?

 Mga Katarongan sa Pagkahimong Mapasalamaton

3. Sa unsa nga kita mapasalamaton kang Jehova?

³ Angay kitang magpasalamat kang Jehova nga Diyos, ang atong Maglalalang ug Maghahatag-Kinabuhi, ilabina kon atong hunahunaon ang pipila sa dagayang mga gasa nga iyang gihatag kanato. (Santiago 1:17) Sa adlaw-adlaw, kita nagpasalamat kang Jehova nga kita buhi. (Salmo 36:9) Sa palibot nato, atong makita ang daghang pamatuod sa mga buhat ni Jehova, sama sa adlaw, bulan, ug mga bituon. Ang dagayang tipiganan sa atong planeta sa nagasuportar-sa-kinabuhi nga mga minerales, ang maayo kaayong pagkabalanse nga panagsagol sa hinungdanong mga gas diha sa atmospera, ug ang komplikadong mga siklo sa kinaiyahan nagpamatuod sa atong utang sa atong mahigugmaong langitnong Amahan. “Daghang butang ang imong nabuhat, Oh Jehova nga Diyos ko,” miawit si Haring David, “bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo. Sa dihang buot ko nga isaysay ug hisgotan sila, daghan pa sila kay sa akong ikabatbat.”—Salmo 40:5.

4. Nganong angay natong pasalamatan si Jehova sa malipayong panag-ubanay nga atong natagamtam diha sa atong mga kongregasyon?

⁴ Bisan tuod wala magpuyo sa usa ka pisikal nga paraiso, ang mga alagad ni Jehova karon nagpuyo sa usa ka espirituwal nga paraiso. Diha sa atong mga Kingdom Hall ug sa atong mga kombensiyon ug mga asembliya, atong naeksperyensiyahan ang bunga sa espiritu sa Diyos nga nagalihok diha sa atong mga isigkamagtutuo. Sa pagkatinuod, sa dihang nagsangyaw ngadto sa mga tawo nga diyutay ra o walay alamag sa relihiyon, ang ubang mga Saksi naghisgot sa gihubit ni Pablo diha sa iyang sulat sa mga taga-Galacia. Una ilang gihisgotan ang “mga buhat sa unod” ug gipangutana ang ilang mga mamiminaw kon unsay ilang namatikdan. (Galacia 5:19-23) Kadaghanan mouyon dayon nga mao kiniy kahimtang sa tawhanong katilingban karon. Sa dihang gipakitaan sa kahubitan sa bunga sa espiritu sa Diyos ug sa dihang gidapit ngadto sa lokal nga Kingdom Hall aron makita ang pamatuod niini, daghan ang miila dayon: “Ang Diyos anaa gayod sa inyong taliwala.” (1 Corinto 14:25) Ug dili lamang kini makaplagan diha sa lokal nga Kingdom Hall. Bisan asa ka mobiyahe, sa dihang mahimamat nimo si bisan kinsa sa kapin sa unom ka milyong Saksi ni Jehova, imong makaplagan ang mao gihapong malipayon, masadyaon nga espiritu. Sa pagkatinuod, kining makapalig-ong panag-ubanay maoy katarongan nga magpasalamat kang Jehova, ang usa nga maoy nagtagana sa iyang espiritu aron kini maposible.—Sofonias 3:9; Efeso 3:20, 21.

5, 6. Sa unsang paagi ikapakita nato nga kita mapasalamaton sa kinadak-ang gasa sa Diyos, ang lukat?

 ⁵ Ang kinadak-ang gasa, ang labing hingpit nga regalo nga gihatag ni Jehova, mao ang iyang Anak, si Jesus, nga pinaagi kaniya gitagana ang halad lukat. “Kon kita gihigugma sa Diyos niining paagiha,” misulat si apostol Juan, “nan kita sa atong kaugalingon nailalom sa obligasyon nga maghigugmaay sa usag usa.” (1 Juan 4:11) Oo, ipakita nato nga kita mapasalamaton sa lukat dili lamang sa pagpahayag ug gugma ug pasalamat kang Jehova kondili usab pinaagi sa pagkinabuhi sa paagi nga nagpasundayag ug gugma sa uban.—Mateo 22:37-39.

⁶ Makakat-on kitag dugang bahin sa pagpakitag pagkamapasalamaton pinaagi sa pagkonsiderar sa paagi nga si Jehova nakiglabot sa karaang Israel. Pinaagi sa Balaod, nga iyang gihatag ngadto sa nasod pinaagi kang Moises, gitudloan ni Jehova ang mga tawo ug daghang leksiyon. Pinaagi “sa gambalay sa kahibalo ug sa kamatuoran diha sa Balaod,” daghan kitag makat-onan nga motabang kanato sa pagsunod sa tambag ni Pablo: “Magmapasalamaton kamo.”—Roma 2:20; Colosas 3:15.

Tulo ka Leksiyon Gikan sa Moisesnong Balaod

7. Sa unsang paagi ang kahikayan sa ikapulo naghatag sa mga Israelinhon ug kahigayonan sa pagpakita sa ilang pagkamapasalamaton kang Jehova?

⁷ Sa Moisesnong Balaod, si Jehova nagtagana ug tulo ka paagi diin ang mga Israelinhon makapakita sa ilang tinuod nga apresasyon sa iyang kaayo. Una, anaa ang ikapulo. Ang ikapulong bahin sa abot sa yuta, apil na ang “ikapulong bahin sa panon sa mga baka ug sa panon sa mga karnero,” mahimong “balaan alang kang Jehova.” (Levitico 27:30-32) Kon motuman ang mga Israelinhon, si Jehova dagayang magapanalangin kanila. “‘Dad-a ang tanan nga ikapulo ngadto sa balay-tipiganan, aron adunay pagkaon sa akong balay; ug sulayi ako, palihog, niining bahina,’ miingon si Jehova sa mga panon, ‘kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’”—Malaquias 3:10.

8. Unsay kalainan sa boluntaryong mga halad ug sa ikapulo?

⁸ Ikaduha, gawas pa sa kahikayan sa paghatag sa ikapulo, gihikay ni Jehova nga ang mga Israelinhon mohatag ug boluntaryong mga amot. Iyang gisugo si Moises nga sultihan ang mga Israelinhon: “Sa pag-abot ninyo sa yuta nga pagadad-an ko kaninyo, mahitabo usab gayod nga inigkaon ninyo sa tinapay sa yuta, kinahanglang mag-amot kamo alang kang Jehova.” Ang uban sa mga unang bunga sa ilang “dili-pino nga harina ingon nga siningsing nga mga tinapay” itanyag ingong “amot alang kang Jehova” sa tanan nilang mga kaliwatan. Matikdi nga walay tinong gidaghanon niining maong mga bunga ang gikinahanglan. (Numeros 15:18-21) Apan sa dihang ang mga Israelinhon nagtanyag ug amot agig pasalamat, sila gipasaligan ug panalangin gikan kang Jehova. Ang susamang kahikayan makita may kalabotan sa templo sa panan-awon ni Ezequiel. Atong mabasa: “Ang una sa tanang unang hinog nga mga bunga sa bisan unsa ug ang tanang amot sa bisan unsa gikan sa tanan ninyong amot—maila kini sa mga saserdote;  ug ang mga unang bunga sa inyong dili-pino nga harina inyong ihatag sa mga saserdote, aron ang panalangin mahianha sa inyong balay.”—Ezequiel 44:30.

9. Unsay gitudlo ni Jehova pinaagi sa kahikayan sa pagpanghagdaw?

⁹ Ikatulo, gihikay ni Jehova ang batasan sa pagpanghagdaw. “Sa dihang anihon ninyo ang alanihon sa inyong yuta,” ang Diyos nagsugo, “dili mo hutdon pag-ani ang daplin sa imong uma, ug dili mo hagdawan ang imong gianihan. Usab, dili mo pupoon ang mga nahibilin sa imong parasan, ug dili mo panguhaon ang nangatagak nga mga ubas sa imong parasan. Ibilin mo kini alang sa sinakit ug sa langyaw nga pumoluyo. Ako mao si Jehova nga inyong Diyos.” (Levitico 19:9, 10) Sa makausa pa, walay tinong gidaghanon nga gikinahanglan. Ang matag Israelinhon ray mohukom kon unsa ka daghan ang ibilin alang sa mga kabos. Ang maalamon nga Haring Solomon haom nga nagsaysay: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Proverbio 19:17) Busa si Jehova nagtudlo ug kaluoy ug konsiderasyon alang sa mga hinikawan.

10. Unsay mga sangpotanan alang sa katawhan sa Israel sa dihang napakyas sila sa pagpakita ug pagkamapasalamaton?

¹⁰ Gipanalanginan ni Jehova ang mga Israelinhon sa dihang sila masinugtanong nagdala sa mga ikapulo, naghatag ug boluntaryong mga amot, ug naghatag sa mga kabos. Apan sa dihang ang katawhan sa Israel napakyas sa pagpakita ug pagkamapasalamaton, nawad-an sila sa pabor ni Jehova. Misangpot kini sa katalagman ug sa ngadtongadto sa pagkadestiyero. (2 Cronicas 36:17-21) Nan, unsay mga leksiyon niini alang kanato?

Ang Atong mga Pahayag sa Pagkamapasalamaton

11. Unsa ang pangunang paagi nga kita makapakita sa atong pagkamapasalamaton kang Jehova?

¹¹ Ang pangunang paagi nga kita makahatag ug pagdayeg kang Jehova ug makapahayag sa atong pagkamapasalamaton naglangkit usab ug ‘paghalad.’ Tinuod, ingong mga Kristohanon, kita wala mailalom sa Moisesnong Balaod, nga obligadong motanyag ug mga halad nga mga hayop o mga tanom. (Colosas 2:14) Bisan pa niana, giawhag ni apostol Pablo ang Hebreohanong mga Kristohanon: “Itanyag nato kanunay sa Diyos ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan.” (Hebreohanon 13:15) Pinaagi sa paggamit sa atong mga katakos ug mga kahinguhaan sa pagtanyag ug halad sa pagdayeg kang Jehova, diha man sa publikong ministeryo o sa “mga nagkatigom nga panon” sa mga isigka-Kristohanon, kita makapahayag ug kinasingkasing nga pagpasalamat sa atong mahigugmaong langitnong Amahan, si Jehova nga Diyos. (Salmo 26:12) Sa pagbuhat niana, unsay atong makat-onan gikan sa mga paagi diin ang mga Israelinhon gisugo sa pagpahayag sa ilang pagkamapasalamaton kang Jehova?

12. Maylabot sa atong Kristohanong responsibilidad, unsay atong makat-onan gikan sa kahikayan sa paghatag sa ikapulo?

¹² Una sa tanan, sa ato nang nahisgotan, ang kahikayan sa paghatag sa ikapulo dili opsiyonal; ang matag Israelinhon obligadong mohatag niining bahina. Ingong mga Kristohanon, kita adunay responsibilidad sa pagpakigbahin sa ministeryo ug sa pagtambong sa Kristohanong mga tigom. Kining maong mga kalihokan dili opsiyonal. Sa iyang dakong tagna bahin sa panahon sa kataposan, si Jesus klarong miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14; 28:19, 20) Mahitungod sa Kristohanong mga tigom, si apostol Pablo giinspirar sa pagsulat: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.” (Hebreohanon 10:24, 25) Ikapakita nato ang atong pagkamapasalamaton kang Jehova kon kita malipayong modawat sa atong responsibilidad sa pagwali ug pagtudlo maingon man sa pagpakig-uban sa atong mga igsoon nga regular diha sa mga tigom sa kongregasyon, nga mag-isip niana ingong pribilehiyo ug kadungganan.

13. Unsang leksiyon ang naggikan sa mga kahikayan alang sa boluntaryong mga amot ug sa pagpanghagdaw?

¹³ Dugang pa, makabenepisyo kita gikan sa pagkonsiderar sa laing duha ka kahikayan nga niana ang mga Israelinhon makapakita sa ilang apresasyon—ang boluntaryong mga amot ug pagpanghagdaw. Lahi sa paghatag sa ikapulo, nga maoy usa ka  kinahanglanon nga dunay klaro kaayong mga obligasyon, ang kahikayan sa boluntaryong mga amot ug ang pagpanghagdaw wala magkinahanglan ug tinong gidaghanon. Hinunoa, kini nagtugot sa kalalom sa apresasyon nga nahuptan sa usa ka alagad ni Jehova diha sa iyang kasingkasing sa pagtukmod kaniya nga molihok. Sa susamang paagi, bisan tuod nasabtan nato nga ang pagpakigbahin sa ministeryo ug pagtambong sa Kristohanong mga tigom maoy sukaranang mga responsibilidad sa matag alagad ni Jehova, kita ba nakigbahin niana sa tibuok kasingkasing ug uban ang andam nga espiritu? Giisip ba nato kini ingong kahigayonan sa pagpahayag sa atong kinasingkasing nga apresasyon alang sa tanan nga nahimo ni Jehova alang kanato? Kita ba dagayang nakigbahin niining maong mga kalihokan, sa gilapdon nga gitugot sa atong tagsatagsa ka mga sirkumstansiya? O giisip ba nato kining tanan ingong usa lamang ka obligasyon nga atong tumanon? Siyempre, kini maoy mga pangutana nga angayng tubagon sa matag usa kanato. Gipahayag kana ni apostol Pablo niining paagiha: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”—Galacia 6:4.

14. Unsay gidahom ni Jehova kanato sa atong pag-alagad kaniya?

¹⁴ Si Jehova nga Diyos nahibalo gayod sa atong mga sirkumstansiya. Siya nahibalo sa atong mga limitasyon. Siya nagpabili sa mga halad, dagko o gagmay, nga gitanyag nga kinabubut-on sa iyang mga alagad. Wala siya magdahom nga kitang tanan mohatag sa susamang gidaghanon, ni mahimo nato kana. Sa dihang naghisgot bahin sa materyal nga pagpanghatag, giingnan ni apostol Pablo ang mga Kristohanon sa Corinto: “Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.” (2 Corinto 8:12) Kining prinsipyoha mapadapat usab sa atong pag-alagad sa Diyos. Ang makapahimo sa atong pag-alagad nga dalawaton kang Jehova dili ang gidaghanon sa atong nahimo, kondili ang paagi sa paghimo nato niana—malipayon ug kinasingkasing.—Salmo 100:1-5; Colosas 3:23.

Ugmara ug Hupti ang Espiritu sa Pagpayunir

15, 16. (a) Unsay kalabotan tali sa payunir nga ministeryo ug sa pagkamapasalamaton? (b) Sa unsang paagi kadtong dili makapayunir makapasundayag ug espiritu sa pagpayunir?

¹⁵ Ang usa ka magantihong paagi sa pagpakita sa atong pagkamapasalamaton kang Jehova mao ang pagsulod sa bug-os-panahong ministeryo.  Kay gitukmod sa gugma kang Jehova ug pagkamasalamaton alang sa iyang dili-takos nga kalulot, daghang dedikado nga mga alagad ang nakahimog dagkong mga kausaban sa ilang kinabuhi aron makagahin ug dugang panahon sa pag-alagad kang Jehova. Ang uban nakaalagad ingong mga regular payunir, nga mogugol sa aberids nga 70 ka oras kada bulan nga nagwali sa maayong balita ug nagtudlo sa katawhan sa kamatuoran. Ang uban, kinsa gilimitehan tingali sa lainlaing mga sirkumstansiya, matag karon ug unya nakahikay sa paggugol ug 50 ka oras kada bulan sa pagsangyaw ingong mga oksilyare payunir.

¹⁶ Apan komosta ang daghang alagad ni Jehova nga dili makaalagad ingong mga regular o oksilyare payunir? Sila makapakita ug pagkamapasalamaton pinaagi sa pag-ugmad ug paghupot sa espiritu sa pagpayunir. Sa unsang paagi? Pinaagi sa pagdasig niadtong makapayunir, pinaagi sa pagtisok diha sa ilang mga anak sa tinguha nga himoong karera ang bug-os-panahong pag-alagad, ug pinaagi sa pagpakig-ambit nga makugihon sa pagsangyaw sumala sa ilang mga sirkumstansiya. Ang atong ihatag diha sa atong ministeryo nagdepende ug dako sa giladmon sa apresasyon diha sa atong kasingkasing sa nahimo, ginahimo, ug himoon pa ni Jehova alang kanato.

Pagpasundayag ug Pagkamapasalamaton Pinaagi sa Atong “Bililhong mga Butang”

17, 18. (a) Sa unsang paagi makapasundayag kita ug pagkamapasalamaton pinaagi sa atong “bililhong mga butang”? (b) Unsay hunahuna ni Jesus sa amot sa babayeng balo, ug ngano?

¹⁷ “Pasidunggi si Jehova pinaagi sa imong bililhong mga butang,” nag-ingon ang Proverbio 3:9, “ug pinaagi sa mga unang bunga sa tanan mong abot.” Ang mga alagad ni Jehova dili na kinahanglang mohatag sa ikapulo. Hinunoa, si Pablo misulat ngadto sa Kristohanong kongregasyon: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Ang paghatag ug boluntaryong mga amot sa pagsuportar sa tibuok-kalibotang buluhaton nga pagwali sa Gingharian nagpasundayag usab sa atong pagkamapasalamaton. Ang kinasingkasing nga pagpabili magpalihok kanato sa pagbuhat niini nga regular, tingali maggahin ug amot kada semana, sama sa gibuhat sa unang mga Kristohanon.—1 Corinto 16:1, 2.

¹⁸ Ang kantidad nga atong giamot dili mao ang magbanaag sa atong pagkamapasalamaton kang Jehova. Kondili, ang espiritu nga niana kita nagahatag. Mao kiniy naobserbahan ni Jesus sa dihang nagtan-aw sa mga tawo nga naghulog sa ilang mga gasa ngadto sa mga panudlanag bahandi sa templo. Sa dihang nakita ni Jesus ang kabos nga babayeng balo nga naghulog ug “duha ka gagmayng sensilyo nga kubos kaayog bili,” siya miingon: “Sa pagkatinuod sultihan ko kamo, Kining babayeng balo, bisan kabos, naghulog ug labaw pa kay kanilang tanan. Kay silang tanan naghulog ug mga gasa gikan sa ilang mga sobra, apan kining bayhana gikan sa iyang kawalad-on naghulog sa tanan niyang panginabuhian.”—Lucas 21:1-4.

19. Nganong maayong susihon pag-usab ang mga paagi diin kita makapakita sa atong pagkamapasalamaton?

¹⁹ Hinaot nga kining pagtuon kon sa unsang paagi ikapakita ang pagkamapasalamaton magtukmod kanato sa pagsusi pag-usab sa mga paagi diin kita makapakita sa atong pagkamapasalamaton. Mapauswag kaha nato ang atong halad sa pagdayeg ngadto kang Jehova maingon man ang atong pagsuportar sa tibuok-kalibotang buluhaton sa materyal nga paagi? Sa sukod nga mahimo nato kana, makaseguro kita nga ang atong mahinatagon, mahigugmaon nga Amahan, si Jehova, mahimuot gayod nga kita nagpakita ug pagkamapasalamaton.

Nahinumdom Ka Ba?

• Nganong kita angayng magmapasalamaton kang Jehova?

• Unsang mga leksiyon ang atong makat-onan gikan sa paghatag sa ikapulo, boluntaryong mga amot, ug pagpanghagdaw?

• Sa unsang paagi maugmad nato ang espiritu sa pagpayunir?

• Sa unsang paagi magamit nato ang atong “bililhong mga butang” sa pagpasalamat kang Jehova?

[Mga Pangutana sa Pagtuon]

[Mga hulagway sa panid 15]

“Ang matag maayong gasa ug matag hingpit nga regalo naggikan sa itaas”

[Mga hulagway sa panid 16]

Unsang tulo ka leksiyon gikan sa Balaod ang gipakita dinhi?

[Mga hulagway sa panid 18]

Unsang mga halad ang atong mahimo?