Mga Atabay nga Dili Kasudlan ug Tubig

SA KAPANAHONAN sa Bibliya, ang mga atabay maoy hinimo-sa-tawo nga mga lungag ilalom sa yuta nga gigamit sa panguna ingong pondohanan ug tubig. Dihay mga panahon nga mao lang kadtoy paagi aron mabatonan ang hinungdanong abiyo sa tubig diha sa Yutang Saad.

Sa pagsulat sa usa ka pahayag sa Diyos, ang manalagnang si Jeremias naghisgot sa mga atabay sa mahulagwayong diwa, nga nag-ingon: “Ang akong katawhan nakahimog duha ka daotang butang: Sila mibiya kanako, ang tuboran sa buhi nga tubig, aron magkalot ug mga atabay alang sa ilang kaugalingon, mga atabay nga may liki, nga dili kasudlan ug tubig.”—Jeremias 2:13.

Ang mga Israelinhon mibiya sa ilang Diyos, si Jehova—“ang tuboran sa buhi nga tubig”—ug midangop sa dili-kasaligan nga militaryong mga alyansa uban sa paganong mga nasod ug sa pagsimba sa walay gahom, bakak nga mga diyos. Ang maong gilaomang mga dalangpanan maoy mga atabay diay nga may liki, sumala sa pagtandi ni Jeremias, nga dili makapanalipod o makaluwas.—Deuteronomio 28:20.

Aduna bay pagtulon-an niining maong makasaysayanhong panig-ingnan alang kanato karon? Sama sa kahimtang sa adlaw ni Jeremias, si Jehova, ang walay-kataposang Diyos, nagpadayong mao ang bugtong Tinubdan sa tubig nga makahatag ug kinabuhi. (Salmo 36:9; Pinadayag 4:11) Gikan lamang kaniya, pinaagi sa iyang Anak, si Jesu-Kristo, nga ang mga tawo makadawat ug kinabuhing walay kataposan. (Juan 4:14; 17:3) Apan, sama sa mga katalirongan ni Jeremias, ang daghang katawhan karon nagsalikway ug nagpahuyang pa gani sa pulong sa Diyos ingon sa gipahayag diha sa Bibliya. Hinunoa, sila nagsalig sa mabentahaon nga politikanhong mga solusyon, walay-pulos nga mga pangatarongan sa tawo, ug sa kawang nga mga ideolohiya ug mga pilosopiya nga makapasipala sa Diyos. (1 Corinto 3:18-20; Colosas 2:8) Tin-aw ang kapilian. Asa man nimo ibutang ang imong pagsalig? Diha ba sa “tuboran sa buhi nga tubig,” si Jehova, o sa “mga atabay nga may liki, nga dili kasudlan ug tubig”?

[Hulagway sa panid 32]

Yutang-kulonon nga pigurin sa usa ka inahang diyosa nga nakaplagan sa usa ka Israelinhong lubnganan

[Credit Line]

Photograph taken by courtesy of the British Museum