Ang Pamilya ni Jesus—Kinsa Sila?

DIHA sa daghang dapit sa kalibotan, panahon sa Disyembre ikaw subsob nga makakita ug belen diin ang masuso nga si Jesus malumong giatiman sa iyang inahan nga si Maria ug sa iyang amaama nga si Jose. Ang maong mga belen makadani bisan niadtong wala mag-angkong mga Kristohanon. Tungod kay ang sentro sa pagtagad mao man si Jesus, unsa may gisulti sa Kasulatan bahin sa tawhanong pamilya ni Jesus?

Makaiikag kaayo ang kaagi sa pamilya ni Jesus. Natawo siya sa usa ka ulay nga ginganlag Maria, sa ingon nahimong membro sa tawhanong pamilya. Sumala sa Bibliya, ang iyang kinabuhi gibalhin gikan sa langit ngadto sa tagoangkan ni Maria pinaagi sa balaang espiritu. (Lucas 1:30-35) Sa wala pa ipahibalo ang milagrosong pagsamkon kang Jesus, si Maria kaslonon sa usa ka lalaki nga ginganlag Jose, kinsa nahimong amaama ni Jesus.

Human sa pagkatawo ni Jesus, si Jose ug Maria may lain pang mga anak, ang mga igsoong lalaki ug babaye ni Jesus sa inahan. Dayag kana sa pangutana sa mga molupyo sa Nasaret nga sa ulahi nangutana bahin kang Jesus: “Dili ba kini ang anak sa panday? Dili ba ang iyang inahan ginganlag Maria, ug ang iyang mga igsoong lalaki si Santiago ug si Jose ug si Simon ug si Judas? Ug ang iyang mga igsoong babaye, dili ba silang tanan kauban nato?” (Mateo 1:25; 13:55, 56; Marcos 6:3) Tungod niini makahinapos kita nga ang pamilya ni Jesus gilangkoban sa iyang mga ginikanan, upat ka manghod nga mga lalaki, ug labing menos duha ka manghod nga mga babaye.

Apan, ang uban karon dili motuo nga ang mga igsoong lalaki ug babaye ni Jesus maoy mga anak ni Jose ug Maria. Ngano man? “Ang Iglesya,” matod pa sa New Catholic Encyclopedia, “sukad sa unang mga adlaw niini nagtudlo nga si Maria kanunayng ulay. Nan, tungod niini, walay duhaduha nga si Maria walay laing mga anak.” Ang mao gihapong reperensiya nag-angkon nga ang mga pulong nga “igsoong lalaki” ug “igsoong babaye” mahimong magtumong sa “usa o pipila ka tawo nga nahiusa sa relihiyoso o laing komon nga bugkos” o sa mga paryente, tingali sa mga ig-agaw.

Mao ba kana ang kahimtang? Bisan ang pipila ka Katolikong mga teologo, nga dili mouyon sa naandang doktrina, nagpaluyo sa panglantaw nga si Jesus may mga igsoong lalaki ug babaye sa unod. Si John P. Meier, kanhing presidente sa Catholic Bible Association of America, misulat: “Diha sa B[ag-ong] T[ugon], ang adelphos [igsoong lalaki], sa dihang dili gamiton sa mahulagwayon o masambingayon nga paagi kondili aron sa pagpaila sa usa ka matang sa pisikal o legal nga relasyon, nagpasabot lamang ug bug-os nga pagkamanagsoon o pagkamanagsoon lamang sa amahan o sa inahan, ug wala nay lain pang kahulogan.” a Oo, gipakita sa Kasulatan nga si Jesus may mga igsoong lalaki ug babaye nga mga anak nila ni Jose ug Maria.

Ang mga Ebanghelyo naghisgot sa ubang mga paryente ni Jesus, apan isentro nato karon ang atong pagtagad sa pamilya ni Jesus ug tan-awon nato kon unsay atong makat-onan gikan kanila.

[Footnote]