Ang mga Migraduwar sa Gilead Gidasig sa Pagsulti sa “Halangdong mga Butang”

ANG dakong panon sa 6,635 ka tumatambong gikan sa 52 ka nasod maoy presente sa programa sa ika-115 nga klase sa Watchtower Bible School of Gilead niadtong Septiyembre 13, 2003.

Ilang nadungog ang pinasukad-sa-Bibliya nga pagdasig nga gihatag ngadto sa 48 ka estudyante sa maong klase aron ilang dad-on ang “halangdong mga butang sa Diyos” ngadto sa mga tawo sa 17 ka nasod. (Buhat 2:11) Diha sa maong mga nasod nga ang mga migraduwar magpadayon sa ilang misyonaryong buluhaton.

Sa iyang pasiunang mga pulong, si Stephen Lett, kinsa usa ka membro sa Nagamandong Lawas sa mga Saksi ni Jehova ug mao ang tsirman sa graduwasyon, nagpahinumdom sa mga estudyante: “Inigbiya ninyo paingon sa inyong mga asaynment, bisan asa kamo moadto o bisan unsang mga kahimtang ang inyong masinatian, mas daghan ang dapig kaninyo kay sa batok kaninyo.” Naggamit sa kapitulo 6 sa Ikaduhang Hari, gipahinumdoman ni Brader Lett ang mga estudyante nga makasalig sila sa pagpaluyo ni Jehova nga Diyos ug sa tinagpulo-ka-libong manulonda samtang ilang imantala ang “halangdong mga butang sa Diyos.” (2 Hari 6:15, 16) Ang unang-siglong mga Kristohanon nakaatubang ug pagsupak ug kawalay-pagtagad diha sa ilang buluhatong pagsangyaw ug pagpanudlo, ug ang Kristohanong mga misyonaryo karon makaatubang usab ug susamang mga kahimtang. Apan, sila makasalig sa pagpaluyo sa kahitas-an maingon man sa yutan-ong organisasyon ni Jehova.—Salmo 34:7; Mateo 24:45.

Isulti ang “Halangdong mga Butang sa Diyos”

Human sa pasiunang mga pulong sa tsirman, si Harold Corkern sa Komite sa Sanga sa Tinipong Bansa naghisgot sa temang “Realistikanhong mga Pagdahom—Yawi sa Malipayon ug Malamposon nga Pag-alagad.” Gipasiugda ni Brader Corkern nga makapahigawad ang mga paglaom nga wala matuman, sama sa gipakita sa Proverbio 13:12. Apan, ang kahigawad sagad naggikan sa dili-realistikanhong mga pagdahom nga wala matuman. Ang mga migraduwar kinahanglang magbaton ug timbang, realistikanhon nga panglantaw sa ilang kaugalingon ug sa uban. Angay nilang dahomon nga sila makahimog kasaypanan, apan kini dili angayng makapasubo pag-ayo kanila samtang ilang tabangan ang uban sa pagpabili sa “halangdong mga butang sa Diyos.” Gidasig ni Brader Corkern ang bag-ong mga misyonaryo sa pagsalig kang Jehova, ang “tigganti sa mga matinuorong nagapangita kaniya.”—Hebreohanon 11:6.

Ang sunod nga may bahin sa programa mao si Daniel Sydlik, usa ka membro sa Nagamandong Lawas, kinsa mipakigpulong bahin sa temang “Ang Kristohanong Paglaom—Unsa Kini?” Siya miingon: “Ang paglaom maoy usa ka Kristohanong hiyas. Kini mao ang hustong sukdanan nga magdala sa usa ngadto sa hustong relasyon uban sa Diyos. Imposibleng mabatonan sa usa ka dili-Kristohanon ang sama sa atong paglaom.” Dayon gihubit ni Brader Sydlik ang nagkalainlaing bahin sa Kristohanong paglaom nga makatabang sa usa sa pagpabiling positibo bisan pa sa mga kalisdanan sa kinabuhi. “Tungod sa maong paglaom atong masagubang ang adlaw-adlawng pagkinabuhi uban ang nabag-ong kakugi ug usa ka madaogong espiritu.” Ang paglaom sa usa ka Kristohanon motabang kaniya sa paglantaw kang Jehova ingong usa ka Diyos sa katuyoan ug sa pagmaya diha sa pag-alagad kaniya.—Roma 12:12.

Si Wallace Liverance, ang tigrehistro sa Tunghaang Gilead, nagdasig sa mga estudyante nga “Magpadayon sa Paglakaw Pinaagi sa Espiritu.” (Galacia 5:16) Gipakita niya kon sa unsang paagi si Baruk, ang sekretaryo ni Jeremias, hapit na gayong moundang sa paglakaw pinaagi sa espiritu. Dihay higayon nga si Baruk mibatig kaluya ug nagsugod sa pagpangagpas ug dagkong  mga butang alang sa iyang kaugalingon. (Jeremias 45:3, 5) Dayon gipunting ni Brader Liverance nga ang uban mibiya sa pagsunod kang Jesus ug gisalikway ang espirituwal nga kamatuoran, nga maoy hinungdanon alang sa kaluwasan. Tungod kana kay wala nila masabti kon unsay iyang gitudlo, ug sila nahigawad tungod kay wala matuman ang ilang tawhanong mga pagdahom niadtong tungora. (Juan 6:26, 27, 51, 66) Unsay makat-onan sa mga misyonaryo, kansang buluhaton mao ang pagsentro sa pagtagad ngadto sa Maglalalang ug sa iyang katuyoan, gikan sa maong mga asoy? Ang mga estudyante gidasig nga dili mabalaka bahin sa paghupot ug posisyon, nga mainila sa mga tawo, o maggamit sa teokratikanhong asaynment alang sa personal nga bentaha.

“Ikaw ba Mahimong Usa ka Tighatag o Tigkuha?” mao ang pangutana nga gipatungha sa instruktor sa Gilead nga si Mark Noumair. Iyang gipasukad ang iyang mga komento sa Maghuhukom 5:2, diin gidayeg ang tagsatagsa ka Israelinhon tungod sa ilang dili-mahakogong pagboluntaryo sa pag-alagad diha sa kasundalohan ni Barak. Ang mga estudyante sa Gilead gidayeg tungod sa ilang espiritu sa pagdawat sa pagdapit sa Dakong Barak, si Jesu-Kristo, aron makaapil gayod sa espirituwal nga pakiggubat. Kinahanglang interesado ang mga sundalo ni Kristo nga maangkon ang pag-uyon sa usa nga nagpalista kanila. Si Brader Noumair nagpahinumdom sa mga estudyante: “Sa dihang mosugod kita sa pagsentro sa atong pagtagad sa pagpahimuot sa atong kaugalingon, kita mohunong sa pagpakigbugno sa kaaway. . . . Ang misyonaryong pag-alagad dili maoy labot kanimo. Kini maoy labot kang Jehova, sa iyang soberanya, ug sa katumanan sa iyang kabubut-on. Wala kita mag-alagad ingong mga misyonaryo tungod  kay gusto natong lipayon kita ni Jehova, kita nag-alagad kaniya tungod kay gihigugma nato siya.”—2 Timoteo 2:4.

Ang instruktor sa Gilead nga si Lawrence Bowen mao ang sunod nga nanguna sa panaghisgot sa bahin nga “Balaana Sila Pinaagi sa Kamatuoran.” (Juan 17:17) Siya miingon nga ang mga estudyante sa ika-115 nga klase maoy balaang mga ministro sa Diyos. Samtang diha sa tunghaan, sila usab nakigbahin sa pag-alagad sa kanataran, nga nagapangita sa matinud-anog-kasingkasing nga mga mahigugmaon sa kamatuoran. Sama kang Jesus ug sa iyang unang mga tinun-an, ang mga estudyante wala magsulti pinasukad sa ilang “kaugalingong pagbuot.” (Juan 12:49, 50) Sila masibotong nagwali sa inspirado, nagahatag-kinabuhi nga pulong sa kamatuoran. Ang mga pasundayag nga nag-akto sa aktuwal nga nahitabo ug ang mga eksperyensiya sa mga estudyante nagpakita sa gamhanang epekto sa Bibliya ngadto sa mga tawo nga ilang nasangyawan.

Makapadasig nga mga Tambag ug mga Eksperyensiya

Si Anthony Pérez ug Anthony Griffin, mga membro sa Service Department sa sanga sa Tinipong Bansa, nagdumala ug mga interbiyo uban sa mga membro sa Komite sa Sanga gikan sa tibuok kalibotan. Gihisgotan niining maong mga lalaki ang mga suliran nga atubangon sa bag-ong mga misyonaryo ug naghatag ug praktikal nga tambag pinasukad sa personal nga kasinatian. Ang ubang mga suliran naglakip sa mga kalainan sa kultura, tropikal nga klima sa tibuok tuig, o sa relihiyoso ug politikal nga kahimtang nga lahi sa naandan sa mga estudyante. Unsay makatabang sa bag-ong mga misyonaryo sa pagsagubang sa bag-o nilang palibot? Ang gugma alang kang Jehova, gugma alang sa katawhan, dili pagsigeg handom sa ilang gigikanan, ug dili mahinaykon sa paglihok. Usa ka membro sa komite sa sanga nag-ingon: “Ang mga tawo sa among asaynment nagpuyo na didto sa daghang siglo una kanamo. Dayag nga makapuyo ug makapahiuyon kami didto. Sa matag higayon nga makasugamak kamig kalisdanan, amo kining lantawon ingong kahigayonan sa pag-ugmad sa among pagkatawo. Dangop sa pag-ampo ug salig sa espiritu ni Jehova, ug masinati ninyo ang kamatuoran sa mga pulong ni Jesus, ‘ako magauban kaninyo.’”—Mateo 28:20.

Si Samuel Herd, usa ka membro sa Nagamandong Lawas, nagdala sa programa ngadto sa kinapungkayan niini uban sa iyang pakigpulong, “Magpadayon sa Pagsulti Bahin sa Halangdong mga Butang sa Diyos.” Ang pagbubo sa balaang espiritu sa adlaw sa Pentekostes 33 K.P. nagdasig sa mga tinun-an ni Jesus sa pagsulti bahin sa “halangdong mga butang sa Diyos.” Unsay makatabang sa bag-ong mga misyonaryo karon sa pagsulti bahin sa Gingharian sa Diyos uban ang mao gihapong kasibot? Ang mao gihapong balaang espiritu. Gidasig ni Brader Herd ang migraduwar nga mga estudyante nga “magmainiton sa espiritu,” nga mahinangop sa ilang mga asaynment, nga dili gayod kalimtan ang pagbansay nga gihatag kanila. (Roma 12:11) “Ang Bibliya maoy usa ka halangdong butang sa Diyos,” matod pa ni Brader Herd. “Ayaw gayod pakamenosa ang bili niini. Buhi ang mensahe niini. Kini molagbas bisan ngadto sa kinasuloran sa kasingkasing. Gamita kana aron sa pagtul-id sa inyong kinabuhi. Tugoti kining mobag-o sa inyong paagi sa panghunahuna. Bantayi ang inyong katakos sa panghunahuna pinaagi sa pagtuon, pagbasa, ug pagpamalandong sa Kasulatan . . . Himoang tumong ug determinasyon nga gamiton ang inyong pagbansay sa Gilead sa pagpadayon sa pagsulti sa ‘halangdong mga butang sa Diyos.’”

Human mabasa ang mga pangomosta gikan sa tibuok kalibotan ug mahatag ang mga diploma, usa sa migraduwar ang mibasa sa sulat sa klase nga nagpasalamat sa pagbansay nga ilang nadawat. Dayon gitapos ni Brader Lett ang malipayong okasyon pinaagi sa paghisgot sa 2 Cronicas 32:7 ug Deuteronomio 20:1, 4. Naglangkit sa iyang pangataposang mga komento uban sa iyang pasiunang mga pulong, siya mihinapos: “Busa minahal nga mga graduwado, sa inyong paglakaw, samtang kamo magmartsa paingon sa espirituwal nga panggubatan didto sa inyong bag-ong mga asaynment, hinumdomi nga si Jehova nagamartsa uban kaninyo. Ayaw gayod kalimti ang kamatuoran nga mas daghan ang dapig kaninyo kay sa batok kaninyo.”

[Kahon sa panid 25]

ESTADISTIKA SA KLASE

Gidaghanon sa mga nasod nga gihawasan: 7

Gidaghanon sa mga nasod nga gipadalhan: 17

Gidaghanon sa mga estudyante: 48

Aberids nga edad: 33.7

Aberids nga katuigan sa kamatuoran: 17.8

Aberids nga katuigan sa bug-os-panahong ministeryo: 13.5

[Hulagway sa panid 26]

Ika-115 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.