Gikinahanglan nga Kita Mas Magmabinantayon Karon

“Busa, magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.”—MATEO 24:42.

1, 2. Unsay nagpakita nga kita nagkinabuhi na sa kataposang bahin sa presenteng sistema sa mga butang?

 “ANG ikakawhaang siglo ilabina ang naapektohan kaayo sa gubat,” matod sa awtor nga si Bill Emmott. Bisan pag iyang giila nga ang mga tawo sa tibuok kasaysayan nakasinati sa mga kalisdanan sa gubat ug sa kapintasan, siya midugang: “Kon bahin sa gubat ug sa kapintasan, dili lahi ang kinaiya sa ikakawhaang siglo, ang nakapalahi mao ang gidak-on ug kagrabe niini. Kini nga siglo maoy unang nakasinati sa tibuok-yuta nga gubat . . . Ug, nga morag nagpasiugda pa sa punto, nakasinati kinig dili lang usa ka tibuok-yuta nga gubat, kondili duha ka gubat.”

² Ang mga gubat nga naglangkit sa ‘nasod batok sa nasod ug gingharian batok sa gingharian’ gitagna ni Jesu-Kristo. Bisan pa niana, kana usa lang ka bahin sa ‘ilhanan sa presensiya ni Kristo ug sa kataposan sa sistema sa mga butang.’ Nianang dakong tagna, gihisgotan usab ni Jesus ang mga gutom, kamatay, ug linog. (Mateo 24:3, 7, 8; Lucas 21:6, 7, 10, 11) Sa daghang paagi, mas dagko ug grabe ang maong mga katalagman. Kaylap ang pagkadaotan sa tawo, ingon sa makita diha sa iyang tinamdan bahin sa Diyos ug sa isigkatawo. Dayag ang pagkadaot sa moralidad ug pagdagsang sa krimen ug kapintasan. Ang mga tawo nahimong mga mahigugmaon sa salapi inay sa Diyos, nga kanunayng naghunahuna sa mga kalingawan. Kining tanan nagpamatuod nga kita nagkinabuhi na sa “makuyaw nga mga panahon.”—2 Timoteo 3:1-5.

3. Sa unsang paagi kita angayng maapektohan sa “mga ilhanan sa kapanahonan”?

³ Unsay imong hunahuna bahin sa nagakagrabeng kahimtang sa katawhan? Ang daghan wala nay pagtagad, nga gikubalan na kon bahin sa makapaguol nga mga panghitabo karon. Ang impluwensiyado ug utokan nga mga tawo sa kalibotan wala makasabot sa kahulogan sa “mga ilhanan sa kapanahonan”; ang relihiyosong mga pangulo wala usab maghatag ug hustong giya bahin niini. (Mateo 16:1-3) Apan si Jesus nagtambag sa iyang mga sumusunod: “Busa, magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.” (Mateo 24:42) Si Jesus dinhi nagdasig kanato nga dili lang magmabinantayon kondili “magpadayon sa pagbantay.” Aron magpadayon sa pagbantay, kinahanglang kita magpabiling igmat ug nagtukaw. Kinahanglang kita dili lang makaila nga kita nagkinabuhi na sa kataposang mga adlaw, nga kita dili lang makaila nga ang panahon maoy lisod. Kinahanglang kita adunay hugot nga pagtuo nga “ang kataposan sa tanang butang haduol na.” (1 Pedro 4:7) Uban lang nianang hugot nga pagtuo nga kita magmabinantayon uban ang pagkaamgo sa pagkadinalian sa panahon. Busa, ang pangutana nga atong palandongon mao: ‘Unsay makatabang kanato sa pagpalig-on sa atong pagtuo nga ang kataposan haduol na?’

4, 5. (a) Unsay makapalig-on sa atong pagtuo nga ang kataposan niining daotang sistema haduol na, ug ngano? (b) Unsay usa ka panagsama sa adlaw ni Noe ug sa presensiya sa Anak sa tawo?

⁴ Tagda ang mga kahimtang nga naglungtad sa wala pa ang talagsaong panghitabo sa kasaysayan sa tawo—ang dakong Lunop sa adlaw ni Noe. Daotan kaayo ang mga tawo nga si Jehova “nasakitan diha sa iyang kasingkasing.” Miingon siya: “Akong paphaon gikan sa nawong sa yuta ang mga tawo nga akong gilalang.” (Genesis 6:6, 7) Ug gibuhat gayod niya kana. Sa pagkomento bahin sa panagsama niadtong panahona ug karong adlawa, si Jesus miingon: “Maingon kaniadto sa mga adlaw ni Noe, mao man usab unya ang presensiya sa Anak sa tawo.”—Mateo 24:37.

⁵ Makataronganon ang pagtuo nga ang pagbati  ni Jehova bahin sa kalibotan karong adlawa maoy sama sa iyang pagbati bahin sa kalibotan sa wala pa ang Baha. Sanglit iyang gilaglag ang dili-diyosnong kalibotan sa adlaw ni Noe, seguradong laglagon niya ang daotang kalibotan karon. Ang pagbaton ug matin-awng pagsabot bahin sa panagsama niadtong panahona ug sa atong adlaw angayng makapalig-on sa atong pagtuo nga ang kataposan sa presenteng kalibotan haduol na. Nan, unsa ba ang mga panagsama? Labing menos adunay lima ka panagsama. Ang una mao nga ang pasidaan bahin sa umaabot nga kalaglagan tin-awng gihan-ay.

Gipasidan-an Bahin sa “mga Butang nga Wala pa Makita”

6. Unsay gihukom ni Jehova nga himoon sa mga adlaw ni Noe?

⁶ Sa adlaw ni Noe, si Jehova miingon: “Ang akong espiritu dili molihok nganha sa tawo hangtod sa panahong walay tino sa pagkaagi nga siya usab unod. Busa ang iyang mga adlaw mokabat ug usa ka gatos ug kawhaan ka tuig.” (Genesis 6:3) Ang pagluwat niining desisyona sa Diyos sa 2490 W.K.P. nagtimaan sa sinugdanan sa kataposan alang niadtong dili-diyosnong kalibotan. Hunahunaa lang kon unsay gipasabot niadto alang sa mga buhi niadtong panahona! Adunay 120 ka tuig na lang ug, sumala sa iyang lagmit gisulti kang Noe sa ulahi, si Jehova magpadala “ug lunop sa mga tubig diha sa yuta aron laglagon ang tanang unod nga niana ang puwersa sa kinabuhi aktibo gikan sa silong sa langit.”—Genesis 6:17.

7. (a) Unsay reaksiyon ni Noe sa pasidaan bahin sa Baha? (b) Unsay angay natong reaksiyon sa mga pasidaan bahin sa kataposan niining sistemaha?

⁷ Abante ug daghang katuigan ang pagkadawat ni Noe sa pasidaan bahin sa umaabot nga katalagman, ug maalamon niyang gigamit ang maong panahon aron makapangandam alang sa kaluwasan. “Human hatagi sa Diyos ug pasidaan mahitungod sa mga butang nga wala pa makita,” nag-ingon si apostol Pablo, “[si Noe] nagpakitag diyosnong kahadlok ug nagtukod ug arka aron sa pagluwas sa iyang panimalay.” (Hebreohanon 11:7) Komosta man kita? Mga 90 ka tuig ang milabay sukad sa pagsugod sa kataposang mga adlaw niining sistema sa mga butang niadtong 1914. Kita nagkinabuhi na gayod sa “panahon sa kataposan.” (Daniel 12:4) Unsay angay natong reaksiyon bahin sa mga pasidaan nga gipahayag kanato? “Siya nga nagabuhat sa kabubut-on sa Diyos magpabilin hangtod sa kahangtoran,” nag-ingon ang Bibliya. (1 Juan 2:17) Busa karon mao na ang panahon sa pagbuhat sa kabubut-on ni Jehova uban ang dakong kaamgohan sa pagkadinalian niini.

8, 9. Unsang mga pasidaan ang gihatag ni Jehova karong panahona, ug sa unsang paagi kini gipahayag?

⁸ Sa modernong panahon, ang sinserong mga estudyante sa Bibliya nakakat-on gikan sa dinasig nga Kasulatan nga kining sistema gihukman nga malaglag. Nagtuo ba kita niini? Matikdi ang tin-aw nga gisulti ni Jesu-Kristo: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mateo 24:21) Si Jesus miingon usab nga siya moabot ingong Maghuhukom nga tinudlo sa Diyos ug iyang pagalainon ang katawhan ingon sa usa ka magbalantay nga magalain sa mga karnero gikan sa mga kanding. Kadtong makaplagan nga dili angayan “mamahawa ngadto sa walay kataposang kalaglagan, apan ang mga matarong ngadto sa kinabuhing walay kataposan.”—Mateo 25:31-33, 46.

 ⁹ Gipunting ni Jehova ang pagtagad sa iyang katawhan sa maong mga pasidaan pinaagi sa tukma-sa-panahong mga pahinumdom pinaagi sa espirituwal nga pagkaon nga gitagana sa “matinumanon ug maalamong ulipon.” (Mateo 24:45-47) Dugang pa, ang matag nasod, tribo, pinulongan, ug katawhan giawhag nga “kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.” (Pinadayag 14:6, 7) Ang usa ka hinungdanong bahin sa mensahe sa Gingharian nga gisangyaw sa mga Saksi ni Jehova sa tibuok yuta mao ang pasidaan nga ang Gingharian sa Diyos duol nang maglaglag sa tawhanong pagmando. (Daniel 2:44) Kining pasidaana angayng dili pakasayonon lamang. Tumanon kanunay sa Labing Gamhanang Diyos ang iyang mga saad. (Isaias 55:10, 11) Gituman niya kana sa adlaw ni Noe, ug tumanon niya kana sa atong adlaw.—2 Pedro 3:3-7.

Nahimong Kaylap ang Seksuwal nga Kangil-aran

10. Unsa ang gidak-on sa seksuwal nga kangil-aran sa adlaw ni Noe?

¹⁰ Ang atong panahon maoy susama sa adlaw ni Noe sa ikaduhang paagi. Gisugo ni Jehova ang unang lalaki ug babaye nga “pun-on ang yuta” sa mga tawo, pinaagi sa madungganong paggamit sa hinatag-sa-Diyos nga mga katakos sa pagsanay sulod lamang sa kahikayan sa kaminyoon. (Genesis 1:28) Sa adlaw ni Noe, ang masukihong mga manulonda naghugaw sa katawhan pinaagi sa dili-kinaiyanhong pagpakigsekso. Sila nanaog sa yuta, nagsul-ob ug unodnong mga lawas, ug nakigsekso sa maanyag nga mga babaye, nga nagpatunghag mga liwat nga katunga-tawo, katunga-demonyo—ang mga Nepilim. (Genesis 6:2, 4) Ang sala niadtong punog-kaulag nga mga manulonda nahisama sa mga kahilayan sa Sodoma ug Gomora. (Judas 6, 7) Ingong resulta, ang seksuwal nga kangil-aran kaylap niadtong mga adlawa.

11. Tungod sa unsang moral nga kahimtang nga ang atong panahon nahisama sa mga adlaw ni Noe?

¹¹ Komosta ang kahimtang sa moralidad karong adlawa? Niining kataposang mga adlaw, ang kinabuhi sa kadaghanan gisentro sa sekso. Matin-awng gibatbat ni Pablo ang maong mga tawo ingong “nawad-an na sa tanang moral nga pagbati”; ang daghan nagtugyan sa ilang kaugalingon “sa malaw-ay nga panggawi sa pagbuhat sa tanang matang sa kahugawan uban ang kadalo.” (Efeso 4:19) Ang pornograpiya, una-kaminyoon nga sekso, seksuwal nga pag-abuso sa mga bata, ug ang homoseksuwalidad ordinaryo na lamang. Ang pipila ‘nakadawat na diha sa ilang kaugalingon sa bug-os nga bayad’ nga mao ang mga sakit nga gipasa sa pagpakigsekso, pagkabungkag sa pamilya, ug ubang mga suliran sa katilingban.—Roma 1:26, 27.

12. Nganong angay natong ugmaron ang pagdumot sa daotan?

¹² Sa adlaw ni Noe, si Jehova nagpadala sa dakong Lunop ug gilaglag kadtong nabuang-sa-sekso nga kalibotan. Dili gayod nato kalimtan ang kamatuoran nga ang mga adlaw karon maoy susama gayod sa mga adlaw ni Noe. Ang umaabot nga “dakong kasakitan” maoy maghanaw gikan sa yuta sa ‘mga makihilawason, mga mananapaw, mga lalaki nga gihuptan alang sa dili-kinaiyanhong mga katuyoan, ug mga lalaking makigdulog sa mga lalaki.’ (Mateo 24:21; 1 Corinto 6:9, 10; Pinadayag 21:8) Gikinahanglan gayod kaayo nga atong ugmaron ang pagdumot sa daotan ug magpalayo kita sa mga kahimtang nga mahimong mosangpot sa imoralidad!—Salmo 97:10; 1 Corinto 6:18.

“Ang Yuta Napuno sa Kapintasan”

13. Sa adlaw ni Noe, nganong ang yuta “napuno sa kapintasan”?

¹³ Sa pagpunting sa ikatulong kinaiya sa adlaw  ni Noe, ang Bibliya nag-ingon: “Ang yuta nadaot sa panan-aw sa matuod nga Diyos ug ang yuta napuno sa kapintasan.” (Genesis 6:11) Ang kapintasan dili gayod bag-o niadto. Ang anak lalaki ni Adan nga si Cain nagpatay sa iyang matarong nga igsoong lalaki. (Genesis 4:8) Sa paghunahuna sa kapintasan sa iyang adlaw, si Lamek mitagik ug usa ka balak nga nagpasigarbo kon giunsa niya pagpatay ang usa ka batan-ong lalaki, sa pagdepensa kono sa iyang kaugalingon. (Genesis 4:23, 24) Ang nakapalahi sa adlaw ni Noe mao ang kagrabe sa kapintasan. Sanglit ang masukihong mga manulondang anak sa Diyos nakigminyo man sa mga babaye sa yuta ug nagpatunghag mga liwat—ang mga Nepilim—ang kapintasan migrabe sa sukod nga wala hisayri sa nangagi. Ang New World Translation nagpakita nga ang orihinal nga Hebreohanong pulong nga nagtumong niadtong mapintasong mga higante nagkahulogan nga “mga Tigpukan”—“silang magpahinabo nga ang uban mapukan.” (Genesis 6:4) Ingong resulta, ang yuta “napuno sa kapintasan.” (Genesis 6:13) Dili gayod tiaw ang mga suliran nga giatubang ni Noe sa pagmatuto sa iyang pamilya diha sa maong palibot! Bisan pa niadto, si Noe napamatud-ang ‘matarong sa atubangan ni Jehova taliwala niadto nga kaliwatan.’—Genesis 7:1.

14. Sa unsang gidak-on nga ang kalibotan karon “napuno sa kapintasan”?

¹⁴ Ang kapintasan naglungtad na sa tibuok kasaysayan sa tawo. Apan ingon sa nahitabo sa mga adlaw ni Noe, ang atong panahon nakasinati usab ug walay-ingong kapintasan. Matag karon ug unya kita makadungog bahin sa kapintasan sulod sa pamilya, mga terorismo, nagsunodsunod nga paglaglag sa tibuok nga mga rasa, ug pakyawng mga pagpatay pinaagi sa mga mamumusil nga wala gayoy dayag nga hinungdan. Anaa pa ang pag-ulag dugo pinaagi sa mga gubat. Napuno na usab ug kapintasan ang yuta. Ngano? Unsay hinungdan sa pag-uswag? Ang tubag magpadayag ug laing panagsama sa adlaw ni Noe.

15. (a) Unsay hinungdan sa pagsamot sa kapintasan sa kataposang mga adlaw? (b) Makasalig kita sa unsang resulta?

¹⁵ Sa dihang ang Mesiyanikong Gingharian sa Diyos natukod sa langit niadtong 1914, ang gientronong Hari, si Jesu-Kristo, may gibuhat nga makahuloganon sa kasaysayan. Si Satanas nga Yawa ug ang iyang mga demonyo gipalagpot gikan sa langit ug gitambog sa silinganan sa yuta. (Pinadayag 12:9-12) Sa wala pa ang Baha, ang masukihong mga manulonda kinabubut-ong mibiya sa ilang posisyon sa langit; sa modernong panahon, hinunoa, sila gipugos sa pagpapahawa. Dugang pa, sila karon wala nay katakos sa pagsul-ob ug mga lawas sa tawo sa yuta aron magpahimulos sa supak-sa-balaod nga unodnong mga kalipayan. Busa tungod sa kapakyasan, kasuko, ug kahadlok sa umaabot nga paghukom, ilang impluwensiyahan ang mga tawo ug mga organisasyon sa pagbuhat ug mananapong mga krimen ug kapintasan nga labaw pa kaayo kay sa iya sa adlaw ni Noe. Gipapha ni Jehova ang una-sa-Baha nga  kalibotan human kana pun-ag kadaotan sa masukihong mga manulonda ug sa ilang mga liwat. Ikaw makapaneguro gayod nga iyang buhaton usab kana sa atong adlaw! (Salmo 37:10) Hinuon, kadtong nagpabilin nga mabinantayon karong adlawa nahibalo nga ang ilang kaluwasan haduol na.

Ang Mensahe Giwali Na

16, 17. Unsa ang ikaupat nga panagsama tali sa mga adlaw ni Noe ug sa atong adlaw?

¹⁶ Ang ikaupat nga panagsama tali karong adlawa ug sa una-sa-Baha nga kalibotan masabtan diha sa buluhaton nga gisugo kang Noe. Gitukod ni Noe ang labihan ka dakong arka. Siya usab maoy “usa ka magwawali.” (2 Pedro 2:5) Unsa ang mensahe nga iyang giwali? Ang giwali ni Noe lagmit naglakip sa pag-awhag sa paghinulsol ug sa pasidaan bahin sa umaabot nga kalaglagan. Si Jesus miingon nga ang katawhan sa adlaw ni Noe “wala magtagad hangtod nga miabot ang baha ug gibanlas silang tanan.”—Mateo 24:38, 39.

¹⁷ Sa susama, samtang makugihong ginatuman sa mga Saksi ni Jehova ang buluhatong gisugo kanila nga mao ang pagwali, ginapahayag sa tibuok kalibotan ang mensahe sa Gingharian sa Diyos. Sa halos tanang bahin sa yuta, ang mga tawo makadungog ug makabasa sa mensahe sa Gingharian diha sa ilang pinulongan mismo. Ang magasing Bantayanang Torre, nga nagapahayag sa Gingharian ni Jehova, adunay sirkulasyon nga kapig 25,000,000 ug gipatik sa kapig 140 ka pinulongan. Sa pagkamatuod, ang maayong balita sa Gingharian sa Diyos ginawali “sa tibuok gipuy-ang yuta ingon nga pagpamatuod ngadto sa tanang kanasoran.” Sa dihang matapos na ang maong buluhaton sa katagbawan sa Diyos, ang kataposan seguradong moabot na.—Mateo 24:14.

18. Managsama ba ang sanong sa daghang tawo sa atong buluhatong pagwali ug ang sanong sa kadaghanang tawo sa adlaw ni Noe?

¹⁸ Tungod sa pagkawalay-interes sa espirituwal nga mga butang ug pagkawalay-moralidad sa mga adlaw una pa sa Baha, makasabot kita kon nganong ang pamilya ni Noe gihimong kataw-anan sa dili-matinuohong mga silingan ug kon nganong sila mao ang tumong sa pagpasipala ug pagbiaybiay. Apan miabot gayod ang kataposan. Sa susama, “ang mga mabiaybiayon uban sa ilang mga pagbiaybiay” maoy daghan sa kataposang mga adlaw. “Bisan pa niana ang adlaw ni Jehova moabot ingon sa usa ka kawatan,” nag-ingon ang Bibliya. (2 Pedro 3:3, 4, 10) Seguradong moabot kini sa tinudlong panahon. Kini dili malangan. (Habakuk 2:3) Pagkamaalamon nga kita magpadayon sa pagbantay!

Diyutay ra ang Naluwas

19, 20. Unsang panagsama ang atong masabtan tali sa Baha ug sa paglaglag sa presenteng sistema sa mga butang?

¹⁹ Ang adlaw ni Noe ug ang atong adlaw dili lang managsama tungod sa pagkadaotan sa katawhan ug ilang pagkalaglag. Maingon nga may mga naluwas sa Baha, adunay maluwas usab sa kataposan sa presenteng sistema sa mga butang. Ang mga naluwas sa Baha mao ang mga maaghop nga wala magkinabuhing sama sa kadaghanang tawo. Sila namati sa pasidaan sa Diyos ug nagpabiling bulag sa daotang kalibotan niadtong panahona. “Si Noe nakakaplag ug pabor sa mga mata ni Jehova,” nag-ingon ang Bibliya. “[Si Noe] maoy walay-ikasaway taliwala sa iyang mga katalirongan.” (Genesis 6:8, 9) Sa tanang tawo, usa lang ka pamilya, “pipila ka tawo, nga mao, walo ka kalag, ang giluwas latas sa tubig.” (1 Pedro 3:20) Ug gihatagan sila ni Jehova nga Diyos ug sugo nga nag-ingon: “Magmabungahon ug magdaghan kamo ug pun-a ang yuta.”—Genesis 9:1.

²⁰ Ang Pulong sa Diyos nagpasalig kanato nga ang ‘usa ka dakong panon makalabang sa dakong kasakitan.’ (Pinadayag 7:9, 14) Pila ba ka tawo ang maglangkob unya sa dakong panon? Si Jesus mismo miingon: “Sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.” (Mateo 7:13, 14) Kon itandi sa bilyonbilyong tawo nga buhi karon sa yuta, ang mga makalabang sa umaabot nga dakong kasakitan maoy diyutay ra. Apan mahimong makabaton silag pribilehiyo nga sama sa gihatag ngadto sa mga naluwas sa Baha. Ang mga makalabang  mahimong makapanganak sulod sa usa ka yugto sa panahon ingong bahin sa bag-ong katilingban sa yuta.—Isaias 65:23.

“Magpadayon sa Pagbantay”

21, 22. (a) Sa unsang paagi ikaw nakabenepisyo sa paghisgot sa asoy bahin sa Baha? (b) Unsa ang tinuig nga teksto alang sa 2004, ug nganong angay natong pamatian ang tambag niini?

²¹ Bisan pag ang Baha morag wala nay kalabotan sa atong adlaw tungod kay dugay na kaayong nahitabo, kini tin-awng naghatag ug pasidaan nga angay natong hatagag pagtagad. (Roma 15:4) Ang mga panagsama sa adlaw ni Noe ug sa atong adlaw angay nga dugang makapaamgo kanato bahin sa kahulogan sa nagakahitabo ug makapaigmat kanato bahin sa samag-kawatan nga pag-abot ni Jesus aron ipahamtang ang paghukom nganha sa mga daotan.

²² Karong adlawa, si Jesu-Kristo nagadumala sa usa ka dako kaayong espirituwal nga buluhaton sa pagpanukod. Alang sa kasegurohan ug kaluwasan sa matuod nga mga magsisimba, ang samag-arka nga espirituwal nga paraiso naglungtad na. (2 Corinto 12:3, 4) Aron maluwas sa dakong kasakitan, kinahanglang magpabilin kita nianang maong paraiso. Anaa sa gawas sa espirituwal nga paraiso ang kalibotan ni Satanas, nga andam sa pagtukob ni bisan kinsa nga nagduka sa espirituwal. Kinahanglan gayod nga kita “magpadayon sa pagbantay” ug magpamatuod nga kita andam alang sa adlaw ni Jehova.—Mateo 24:42, 44.

Nahinumdom Ka Ba?

• Unsang tambag ang gihatag ni Jesus bahin sa iyang pag-abot?

• Sa unsa gitandi ni Jesus ang panahon sa iyang presensiya?

• Sa unsang mga paagi ang atong panahon susama sa mga adlaw ni Noe?

• Sa unsang paagi ang pagpamalandong sa mga panagsama sa adlaw ni Noe ug sa atong adlaw makaapektar sa atong pagkaamgo bahin sa pagkadinalian sa atong panahon?

[Mga Pangutana sa Pagtuon]

[Blurb sa panid 18]

Ang tinuig nga teksto alang sa 2004 mao: ‘Magpadayon sa pagbantay . . . Pamatud-i ninyo nga kamo andam.’—Mateo 24:42, 44.

[Hulagway sa panid 15]

Si Noe namati sa pasidaan sa Diyos. Kana ba usab ang atong sanong?

[Mga hulagway sa panid 16, 17]

“Maingon kaniadto sa mga adlaw ni Noe, mao man usab unya ang presensiya sa Anak sa tawo”