Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Pila ka kapitulo ang basahon sa Miqueas, kanus-a kini nahisulat, ug unsa ang kahimtang niadtong tungora?

Ang basahon sa Miqueas adunay pito ka kapitulo. Gisulat sa manalagnang si Miqueas ang basahon niadtong ikawalong siglo W.K.P., nga niadtong tungora ang katawhang may pakigsaad sa Diyos nabahin sa duha ka nasod—ang Israel ug Juda.—8/15, panid 9.

• Sumala sa Miqueas 6:8, unsay gikinahanglan sa Diyos kanato?

Kita kinahanglang ‘magbuhat ug hustisya.’ Ang paagi sa Diyos sa pagbuhat sa mga butang mao ang sukdanan sa hustisya, busa kinahanglang ibayaw nato ang iyang mga prinsipyo sa pagkamatinud-anon ug integridad. Siya nagsugo kanato sa “paghigugma sa kalulot.” Ang mga Kristohanon nagpakitag mahigugmaong-kalulot agig pagsanong sa mga panginahanglan sa uban, sama sa pagkahuman sa mga katalagman. Aron kita ‘makalakaw nga makasaranganon uban’ kang Jehova, kinahanglang ilhon nato ang atong mga limitasyon ug magdepende kaniya.—8/15, mga panid 20-2.

• Kon mataktak sa trabaho, unsay mahimong buhaton sa usa ka Kristohanon?

Maalamon nga susihon pag-usab sa usa ang iyang estilo sa kinabuhi. Posible tingali nga mapayano ang kinabuhi sa usa pinaagi sa pagbalhin ngadto sa mas gamay nga balay o idespatsar ang wala-kinahanglanang materyal nga mga kabtangan. Pagkahinungdanon nga dili mabalaka mahitungod sa inadlawng mga panginahanglan, nga mosalig nga itagana sa Diyos ang atong gikinahanglan. (Mateo 6:33, 34)—9/1, mga panid 14-15.

• Unsay angay natong hinumdoman sa dihang mohatag o modawat ug mga regalo sa kasal?

Dili kinahanglan ang mahalong mga regalo, ni angay kining dahomon. Ang labing bililhon mao ang tinamdan sa kasingkasing sa naghatag. (Lucas 21:1-4) Dili maluloton ang pag-anunsiyo kon kinsay naghatag sa regalo. Ang paghimo niana makapaulaw. (Mateo 6:3)—9/1, panid 29.

• Nganong angay kitang moampo nga walay-hunong?

Ang regular nga pag-ampo makatabang sa pagpalig-on sa atong relasyon uban sa Diyos ug magsangkap kanato sa pag-atubang sa grabeng mga pagsulay. Ang atong mga pag-ampo mahimong mubo o taas, depende sa panginahanglan ug sa mga sirkumstansiya. Ang pag-ampo makapalig-on sa pagtuo ug makatabang kanato sa pagsulbad sa mga problema.—9/15, mga panid 15-18.

• Sa unsang paagi nato sabton ang 1 Corinto 15:29, nga sa ubang bersiyon gihubad nga “pagpabawtismo alang sa mga patay”?

Gipasabot ni apostol Pablo nga ang dinihogang mga Kristohanon bawtismohan, o ituslob sa tubig, ngadto sa usa ka dalan sa kinabuhi nga motultol sa usa ka kamatayon tungod sa integridad sama nianang kang Kristo. Human niana, sila banhawon ngadto sa usa ka espirituhanong kinabuhi sama kang Kristo.—10/1, panid 29.

• Sa unsang paagi nato nahibaloan nga ang pagkahimong usa ka Kristohanon naglangkit dili lamang sa paglikay sa daotang mga buhat nga gihisgotan sa 1 Corinto 6:9-11?

Si apostol Pablo wala maghisgot nga ang usa ka Kristohanon angayng maglikay lamang sa daotang mga buhat sama sa pakighilawas, pagsimbag idolo, ug paghuboghubog. Sa pagpakita nga kinahanglanon usab ang dugang mga kausaban, siya nagpadayon sa sunod bersikulo: “Alang kanako ang tanang butang subay sa balaod; apan dili ang tanang butang may kaayohan.”—10/15, mga panid 18-19.

• Kinsa ang pipila sa mga babaye sa karaang panahon nga nakapalipay sa kasingkasing sa Diyos?

Kini naglakip sa mga mananabang nga si Sipra ug Pua, kinsa wala motuman kang Paraon mao nga wala magpatay sa bag-ong natawo nga Israelinhong mga batang lalaki. (Exodo 1:15-20) Ang Canaanhong bigaon nga si Rahab nanalipod sa duha ka Israelinhong mga espiya. (Josue 2:1-13; 6:22, 23) Tungod sa pagpasundayag ug pagkamay-salabotan, si Abigail nakatabang sa pagluwas ug daghang kinabuhi ug sa pagpanalipod kang David batok sa pagkasad-an sa dugo. (1 Samuel 25:2-35) Sila maoy mga panig-ingnan alang sa mga babaye karon.—11/1, mga panid 8-11.

• Sa unsang paagi nga “gikan sa langit ang mga bituon nakig-away” batok kang Sisera, ingon sa gihisgotan sa Maghuhukom 5:20?

Ang pipila nagtuo nga kini naghisgot ug tabang gikan sa Diyos. Ang uban nag-ingon nga kini naghisgot ug tabang sa manulonda, nangahulog nga mga meteorite, o pagsalig ni Sisera sa mga panagna sa astrolohiya. Tungod kay ang Bibliya wala man maghatag ug mga detalye, atong masabot kining mga pulonga ingong usa ka matang sa pagpangilabot sa Diyos alang sa kasundalohan sa Israel.—11/15, panid 30.

• Nganong daghan man kaayo ang nag-angkon gihapon nga nagtuo sa Diyos sa dihang ang kawalay-pagtagad sa relihiyon ug kawalay-interes kaylap kaayo sa tibuok yuta?

Ang pipila mosimba kay nangitag kalinaw sa hunahuna. Ang uban naglaom nga makabaton ug kinabuhing dayon human sa kamatayon, o naglaom nga makabaton ug maayong panglawas, bahandi, ug kalamposan. Diha sa pipila ka dapit, ang mga tawo naningkamot nga makakaplag ug butang nga makapatagbaw sa espirituwal nga kahaw-ang nga miresulta samtang ang mga tingusbawan nga gipasukad sa kapitalismo mipuli sa Komunistang ideolohiya. Ang pagkasayod sa maong mga hinungdan makatabang sa usa ka Kristohanon sa pagsugod ug makahuloganong mga kabildohay.—12/1, panid 3.