Pagkat-on Gikan sa Tawhanong Pamilya ni Jesus

UNSAY imong nahibaloan bahin sa pamilya ni Jesus, kadtong iyang kauban sa pagpuyo hangtod sa iyang bawtismo, sulod sa unang 30 ka tuig sa iyang kinabuhi dinhi sa yuta? Unsay gitug-an kanato sa mga asoy sa Ebanghelyo? Unsay atong makat-onan gikan sa pagsusi ug dugang pa bahin sa iyang pamilya? Makabenepisyo ka gikan sa mga tubag.

Natawo ba si Jesus sa adunahan nga pamilya? Si Jose, ang iyang amaama, maoy usa ka panday. Nagkinahanglan kana ug hagong pisikal nga trabaho, nga kasagarang naglakip sa pagpamutol ug mga kahoy nga magamit sa pagpamanday. Sa dihang ang tawhanong mga ginikanan ni Jesus miadto sa Jerusalem mga 40 ka adlaw human sa iyang pagkatawo, sila nagtanyag ug usa ka halad nga gilagda sa Balaod. Naghalad ba sila ug laking karnero uban sa usa ka tukmo o salampati, segun sa gipangayo sa Balaod? Wala. Morag dili sila makaarang sa maong mga halad. Bisan pa niana, ang Balaod naghimog kahikayan alang sa mga kabos. Sa pagtuman sa maong kinahanglanon, si Jose ug Maria naghalad ug “usa ka paris nga tukmo o duha ka piso nga salampati.” Ang pagpili sa dili kaayo mahal nga mga mananap nagpakita nga kabos sila nga pamilya.—Lucas 2:22-24; Levitico 12:6, 8.

Masabtan nimo nga si Jesu-Kristo, ang umaabot nga Magmamando sa tanang katawhan, natawo taliwala sa mga timawa, taliwala niadtong  kinahanglang maghago aron makabaton sa sukaranang mga kinahanglanon. Nahimo siyang panday, sama sa iyang amaama. (Mateo 13:55; Marcos 6:3) “Bisan tuod [si Jesus] dato” ingong gamhanan nga espiritung linalang sa langit, ang Bibliya nag-ingon nga siya “nahimong kabos” tungod kanato. Gihuptan niya ang ubos nga posisyon ingong tawo ug nagdako diha sa usa ka pamilya sa ordinaryong mga tawo. (2 Corinto 8:9; Filipos 2:5-9; Hebreohanon 2:9) Si Jesus wala matawo sa arangan nga pamilya, ug kini lagmit nakatabang sa ubang mga tawo nga dili magpanuko sa pagduol kaniya. Wala sila malinga sa iyang kahimtang. Ilang naapresyar siya tungod sa iyang mga pagtulon-an, sa iyang makapadaning mga hiyas, ug sa iyang kahibulongang mga buhat. (Mateo 7:28, 29; 9:19-33; 11:28, 29) Makita nato ang kaalam ni Jehova nga Diyos sa pagpahinabo nga si Jesus matawo nganha sa usa ka ordinaryong pamilya.

Karon hisgotan nato ang mga membro sa pamilya ni Jesus ug tan-awon kon unsay atong makat-onan gikan kanila.

Si Jose—Usa ka Matarong nga Tawo

Sa dihang nahibaloan ni Jose nga nagsabak ang iyang pangasaw-onon “sa wala pa sila mahiusa,” lagmit naglisod siya sa pagpili tali sa iyang gugma kang Maria ug sa iyang pag-ayad sa mahimong hunahunaon ingong imoralidad. Ang tibuok nga situwasyon morag maoy paglapas sa iyang katungod ingong umaabot nga bana ni Maria. Sa iyang adlaw, ang babaye nga kaslonon sama rag asawa na sa lalaki. Human sa dugayng pagpamalandong, si Jose nakahukom sa pagdiborsiyo kang Maria sa tago aron siya dili batoon ingong mananapaw.—Mateo 1:18; Deuteronomio 22:23, 24.

Dayon usa ka manulonda ang nagpakita kang Jose diha sa damgo ug miingon: “Ayaw kahadlok sa pagdala kang Maria nga imong asawa sa imong balay, tungod kay ang iyang gisamkon maoy pinaagi sa balaang espiritu. Siya manganak ug usa ka anak nga lalaki, ug imong pagatawgon ang iyang ngalan nga Jesus, kay siya magluwas sa iyang katawhan gikan sa ilang mga sala.” Sa pagkadawat nianang sugoa gikan sa Diyos, si Jose milihok uyon niana ug gidala niya si Maria sa iyang balay.—Mateo 1:20-24.

Pinaagi niining maong desisyon, ang maong matarong ug matinumanon nga lalaki nalangkit sa katumanan sa giingon ni Jehova pinaagi ni manalagnang Isaias: “Tan-awa! Ang usa ka dalaga magmabdos, ug siya manganak ug usa ka anak nga lalaki, ug iyang pagatawgon ang iyang ngalan nga Emmanuel.” (Isaias 7:14) Segurado nga si Jose maoy usa ka espirituwal nga tawo nga nagpabili sa pribilehiyo nga mahimong amaama sa Mesiyas, bisan pa sa kamatuoran nga ang unang anak ni Maria dili iyaha.

Si Jose wala makigdulog kang Maria hangtod nga siya nanganak sa usa ka anak nga lalaki. (Mateo 1:25) Alang nianang bag-ong minyo nga magtiayon, ang dili pagdulog lagmit malisod, apan dayag nga dili nila buot nga masaypan kon kinsa ang Amahan sa bata. Pagkamaayong panig-ingnan sa pagpugong sa kaugalingon! Giuna ni Jose ang espirituwal nga mga prinsipyo kay sa iyang kinaiyanhong mga tinguha.

Sa upat ka higayon, si Jose nakadawat ug sugo gikan sa manulonda maylabot sa pagmatuto sa iyang sinagop nga anak. Tulo niini may kalabotan kon asa magdako ang bata. Ang dihadihang pagsugot hinungdanon sa kaluwasan sa bata. Sa tanang kahimtang, si Jose milihok dayon, nga nagdala sa bata una ngadto sa Ehipto ug dayon balik sa Israel. Kini nanalipod sa batang si Jesus gikan sa pagpamatay ni Herodes sa mga bata. Dugang pa, ang pagkamasinugtanon ni Jose misangpot sa katumanan sa mga tagna maylabot sa Mesiyas.—Mateo 2:13-23.

Gitudloan ni Jose si Jesus ug trabaho aron masustentohan niya ang iyang kaugalingon. Busa, si Jesus wala lamang mailhi ingong “anak sa panday” kondili usab ingong “ang panday.” (Mateo 13:55; Marcos 6:3) Si apostol Pablo misulat nga si Jesus “nasulayan sa tanang paagi sama kanato.” Natural nga naglakip kinig paghago sa pagtabang sa pagsuportar sa pamilya.—Hebreohanon 4:15.

Sa kataposan, makita nato ang pamatuod sa debosyon ni Jose alang sa matuod nga pagsimba diha sa kataposang asoy diin gihisgotan siya  sa Kristohanon Gregong Kasulatan. Gidala ni Jose ang iyang pamilya sa Jerusalem alang sa Paskuwa. Ang mga lalaki lamang ang gikinahanglang motambong, apan gibatasan ni Jose ang pagdala sa iyang pamilya ngadto sa Jerusalem “kada tuig.” Dakong sakripisyo ang iyang gihimo, kay sila kinahanglang magbaktas ug mga 100 kilometros gikan sa Nasaret paingon sa Jerusalem. Apan, sa okasyon nga gitaho diha sa Kasulatan, si Jesus nahimulag sa grupo. Nakit-an siya diha sa templo, nga namati ug nangutana sa mga magtutudlo sa Balaod. Bisan tuod 12 anyos pa lamang, si Jesus nagpakita na ug dakong kaalam ug kahibalo sa Pulong sa Diyos. Gikan niining hitaboa, atong masabtan nga si Jesus maayo gayong pagkatudlo sa iyang mga ginikanan, nga siya namatuto aron mahimong mahunahunaon-sa-espirituwal nga bata. (Lucas 2:41-50) Si Jose dayag nga namatay paglabay sa pipila ka panahon human niini, tungod kay wala na siya hisgoti sa ulahing mga asoy sa Kasulatan.

Oo, si Jose maoy usa ka matarong nga tawo nga nag-atiman pag-ayo sa iyang pamilya, sa espirituwal ug sa pisikal. Ikaw ba, sama kang Jose, nag-una sa espirituwal nga mga intereses diha sa imong kinabuhi sa dihang nasabtan nimo kon unsay kabubut-on sa Diyos alang kanato karon? (1 Timoteo 2:4, 5) Ikaw ba kinabubut-ong nagsugot sa giingon sa Diyos sumala sa gipahayag diha sa Pulong sa Diyos, sa ingon nagpakita ug sama sa iya ni Jose nga pagpasakop? Gitudloan mo ba ang imong mga anak aron sila makahisgot bahin sa espirituwal nga mga butang ngadto sa uban?

Si Maria—Usa ka Dili-Hakog nga Alagad sa Diyos

Si Maria, ang inahan ni Jesus, maoy maayo kaayong alagad sa Diyos. Sa dihang ang manulondang si Gabriel nagpahibalo nga siya manganak, siya natingala. Tungod kay ulay, siya wala pa “makigdulog sa usa ka lalaki.” Sa pagkahibalo nga ang pagsamkon maoy pinaagi sa balaang espiritu, siya mapaubsanong midawat sa mensahe, nga nag-ingon: “Tan-awa! Ang ulipong babaye ni Jehova! Matuman unta kana kanako sumala sa imong gipahayag.” (Lucas 1:30-38) Gipabilhan niya pag-ayo ang maong espirituwal nga pribilehiyo nga siya andam nga moantos sa bisan unsang kalisdanan nga mahimong malangkit sa iyang desisyon.

Sa pagkatinuod, ang pagdawat sa maong sugo nagbag-o sa iyang tibuok kinabuhi ingong babaye. Sa dihang miadto siya sa Jerusalem aron mahimong putli, ang usa ka masimbahong tigulang nga si Simeon miingon kaniya: “Ang imo mismong kalag pagalapsan sa usa ka taas nga espada.” (Lucas 2:25-35) Dayag nga iyang gitumong kon unsay bation ni Maria sa dihang makita si Jesus nga isalikway sa daghan ug sa kataposan ilansang sa sakitanang estaka.

Samtang nagdako si Jesus, gitiman-an ni Maria  ang nahitabo sa iyang kinabuhi, “nga naghimog mga panghinapos diha sa iyang kasingkasing.” (Lucas 2:19, 51) Sama kang Jose, siya maoy usa ka espirituwal nga tawo ug nagpabili sa mga hitabo ug mga panultihon nga nagtuman sa mga tagna. Ang giingon sa manulondang si Gabriel kaniya lagmit nga natisok sa iyang hunahuna: “Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Oo, giisip niyang hinungdanon ang pribilehiyo nga mahimong tawhanong inahan sa Mesiyas.

Nadayag na usab ang espirituwalidad ni Maria sa dihang nakigkita siya kang Elisabet, ang iyang paryente nga nanamkon usab sa milagrosong paagi. Sa pagkakita kaniya, gihimaya ni Maria si Jehova ug gipadayag ang iyang gugma alang sa Pulong sa Diyos. Iyang gihisgotan ang pag-ampo ni Ana nga nasulat sa 1 Samuel kapitulo 2 ug gilakip ang mga hunahuna gikan sa ubang mga basahon sa Hebreohanong Kasulatan. Ang maong kahibalo sa Kasulatan nagpakita nga siya kuwalipikado nga mahimong debotado ug mahinadlokon-sa-Diyos nga inahan. Siya makigkooperar kang Jose sa pag-atiman sa iyang anak sa espirituwal.—Genesis 30:13; 1 Samuel 2:1-10; Malaquias 3:12; Lucas 1:46-55.

Lig-on ang pagtuo ni Maria sa iyang anak ingong ang Mesiyas, ug wala kana maluya bisan human sa kamatayon ni Jesus. Wala madugay human sa pagkabanhaw ni Jesus, si Maria nalakip sa matinumanong mga tinun-an nga nagtigom aron mag-ampo kauban sa mga apostoles. (Buhat 1:13, 14) Siya nagmatinumanon, bisan pag kinahanglan niyang antoson ang kasakit nga makita ang iyang minahal nga anak nga mamatay sa sakitanang estaka.

Sa unsang paagi makabenepisyo ka sa pagkakat-on bahin sa kinabuhi ni Maria? Modawat ka ba sa pribilehiyo nga mag-alagad sa Diyos bisan pa sa mga sakripisyo nga nalangkit? Gihunahuna mo ba ang pagkaseryoso nianang pribilehiyoa karon? Gihinumdoman mo ba ang gitagna ni Jesus ug gitandi kana sa nagakahitabo karon, ‘nga nanghinapos diha sa imong kasingkasing’? (Mateo, mga kapitulo 24 ug 25; Marcos, kapitulo 13; Lucas, kapitulo 21) Gisundog ba nimo si Maria sa pagkahimong hanas sa Pulong sa Diyos, nga naggamit kanunay niana diha sa imong pakig-estorya? Magpabilin ba ang imong pagtuo kang Jesus bisan pa sa kagul-anan nga imong antoson tungod sa pagkahimong iyang sumusunod?

Mga Igsoong Lalaki ni Jesus—Posible ang Pagbag-o

Morag ang mga igsoong lalaki ni Jesus wala magpasundayag ug pagtuo kang Jesus sa wala  pa siya mamatay. Lagmit mao kini ang hinungdan nga wala sila sa dihang siya namatay sa sakitanang estaka ug kinahanglang ipiyal ni Jesus ang iyang inahan kang apostol Juan. Ang mga membro sa pamilya ni Jesus nagpakita nga sila walay pagpabili kaniya, nga miingon pa gani sa usa ka okasyon nga si Jesus ‘nalisoan sa iyang pangisip.’ (Marcos 3:21) Tungod kay si Jesus may mga membro sa pamilya nga dili-magtutuo, kadtong kinsa karon adunay mga dili-magtutuo sa ilang panimalay makasalig nga si Jesus makasabot kon unsay ilang gibati sa dihang ang ilang mga paryente magbugalbugal kanila tungod sa ilang pagtuo.

Apan, human sa pagkabanhaw ni Jesus ang iyang mga igsoong lalaki dayag nga nagpasundayag ug pagtuo kaniya. Kauban sila sa grupo nga nagtigom sa Jerusalem sa wala pa ang Pentekostes sa 33 K.P. ug kinasingkasing nga nag-ampo uban sa mga apostoles. (Buhat 1:14) Dayag nga ang pagkabanhaw sa ilang igsoon sa inahan nagpalihok kanila sa pagbag-o, mao nga sila nahimong iyang mga tinun-an. Dili gayod kita angayng mawad-ag paglaom labot sa mga paryente nga dili sama natog pagtuo.

Si Santiago, ang igsoon ni Jesus sa inahan kang kinsa Siya nagpakita, gipresentar diha sa Kasulatan nga adunay talagsaong papel diha sa Kristohanong kongregasyon. Siya nagsulat ug inspirado-sa-Diyos nga sulat ngadto sa iyang mga isigka-Kristohanon, nga nagtambag kanila sa paghupot sa ilang pagtuo. (Buhat 15:6-29; 1 Corinto 15:7; Galacia 1:18, 19; 2:9; Santiago 1:1) Ang laing igsoon sa inahan, si Judas, nagsulat ug inspiradong sulat sa pagdasig sa mga isigkamagtutuo nga makigbugno pag-ayo alang sa pagtuo. (Judas 1) Takos tagdon nga si Santiago ug si Judas wala maggamit sa ilang unodnong relasyon kang Jesus ingong awtoridad aron makombinsir ang mga isigka-Kristohanon. Pagkamaayong leksiyon sa pagkamakasaranganon ang atong makat-onan gikan kanila!

Busa, unsa ang pipila ka butang nga atong makat-onan gikan sa pamilya ni Jesus? Tino, ang mga leksiyon labot sa debosyon nga mapasundayag sa mga paagi sama niini: (1) Matinumanong magpasakop sa gipahayag nga kabubut-on sa Diyos ug pag-atubang sa tanang pagsulay nga moresulta sa pagbuhat niana. (2) Unaha ang espirituwal nga mga prinsipyo, bisan pag nagpasabot kana ug pagsakripisyo. (3) Bansaya ang inyong mga anak kaharmonya sa Kasulatan. (4) Ayaw paghunahuna nga wala nay paglaom ang mga membro sa pamilya nga dili nimo parehas ug pagtuo. (5) Ayaw pagpanghambog labot sa bisan unsang relasyon nga imong nabatonan uban niadtong prominente diha sa Kristohanong kongregasyon. Oo, ang pagkat-on gikan sa tawhanong pamilya ni Jesus makapasuod nato kaniya ug makapadako sa atong apresasyon sa pagpili ni Jehova ug ordinaryong pamilya sa pag-atiman kang Jesus sa bata pa siya.

[Mga hulagway sa panid 4, 5]

Gikuha ni Jose si Maria ingong iyang asawa ug nalangkit siya sa katumanan sa mga tagna labot sa Mesiyas

[Mga hulagway sa panid 6]

Gitudloan ni Jose ug Maria ang ilang mga anak ug espirituwal nga mga prinsipyo ug sa papel sa trabaho

[Mga hulagway sa panid 7]

Bisag gimatuto diha sa usa ka espirituwal nga panimalay, ang mga igsoong lalaki ni Jesus mituo lamang kaniya human sa iyang kamatayon

[Mga hulagway sa panid 8]

Ang mga igsoon ni Jesus sa inahan nga si Santiago ug Judas nagdasig sa mga isigka-Kristohanon