Ang Diyos ba May Pagtagad Kanato?

IKAW ba nakigbisog batok sa emosyonal nga palas-anon tungod sa mga problema sa imong pamilya, panglawas, trabaho, o uban pang bug-at nga mga responsabilidad? Daghang tawo ang nakigbisog niana. Ug kinsa karon ang wala maapektohi sa inhustisya, krimen, ug kapintasan? Sa pagkatinuod, mao gayod kana ang giingon sa Bibliya: “Ang tibuok kalalangan duyog nga nagpadayon sa pag-agulo ug anaa sa kasakitan hangtod karon.” (Roma 8:22) Dili ikatingala nga daghang tawo ang mangutana: ‘May pagtagad ba ang Diyos? Motabang ba siya kanato?’

Ang maalamon nga Haring Solomon nag-ingon sa Diyos diha sa pag-ampo: “Ikaw lamang ang nahibalo sa kasingkasing sa mga anak sa katawhan.” Masaligon si Solomon nga ang Diyos wala lamang makaila kanato kondili may pagtagad usab sa matag usa kanato. Iyang gihangyo ang Diyos sa ‘pagpaminaw gikan sa mga langit’ ug sa pagtubag sa mga pag-ampo sa matag mahinadlokon-sa-Diyos nga indibiduwal nga mosulti ngadto sa Diyos sa “iyang hampak ug sa iyang kasakit.”—2 Cronicas 6:29, 30.

Karong adlawa, si Jehova nga Diyos may pagtagad gihapon kanato ug nagadapit kanato sa pagpangamuyo kaniya diha sa pag-ampo. (Salmo 50:15) Siya nagsaad nga mosanong sa kinasingkasing nga mga pag-ampo nga uyon sa iyang kabubut-on. (Salmo 55:16, 22; Lucas 11:5-13; 2 Corinto 4:7) Oo, si Jehova maminaw sa ‘bisan unsa nga pag-ampo, bisan unsa nga hangyo sa pabor nga himoon ni bisan kinsa nga tawo o sa tanan niyang katawhan.’ Busa, kon kita mosalig sa Diyos, moampo alang sa iyang tabang, ug moduol kaniya, atong matagamtam ang iyang mahigugmaong pagtagad ug giya. (Proverbio 3:5, 6) Ang magsusulat sa Bibliya nga si Santiago nagpasalig kanato: “Duol sa Diyos ug siya moduol kaninyo.”—Santiago 4:8.