“Ang Ilang Tingog Miabot sa Tibuok nga Yuta”

“Paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.”—MATEO 28:19.

1, 2. (a) Unsang sugo ang gihatag ni Jesus sa iyang mga tinun-an? (b) Nganong ang unang-siglo nga mga Kristohanon dakog nahimo?

 SA DAYON nang saka ni Jesus sa langit, naghatag siyag sugo sa iyang mga tinun-an. Giingnan niya sila: “Paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.” (Mateo 28:19) Pagkadakong buluhaton kadto!

² Hunahunaa lang! Sa Pentekostes 33 K.P., mga 120 ka tinun-an ang gibuboan ug balaang espiritu ug nagsugod sa pagtuman sa maong sugo pinaagi sa pagsulti sa uban nga si Jesus mao ang dugay-nang-gipaabot nga Mesiyas, nga pinaagi kaniya mabatonan ang kaluwasan. (Buhat 2:1-36) Sa unsang paagi ang maong gamay nga grupo makasangyaw sa “katawhan sa tanang kanasoran”? Kon sa mga tawo imposible kana, apan “sa Diyos ang tanang butang posible.” (Mateo 19:26) Ang unang mga Kristohanon gipaluyohan sa balaang espiritu ni Jehova, ug gibati nila ang pagkadinalian. (Zacarias 4:6; 2 Timoteo 4:2) Busa, sulod sa pipila lamang ka dekada, si apostol Pablo makaingon nga ang maayong balita gipahayag na “sa tibuok kalalangan ilalom sa langit.”—Colosas 1:23.

3. Unsay nakasalipod sa putli nga Kristohanong “mga trigo”?

³ Sa dakong bahin sa unang siglo, ang matuod nga pagsimba nagpadayon sa pagkaylap. Apan, gitagna ni Jesus nga ang panahon moabot sa dihang si Satanas magpugas ug “mga bunglayon” ug ang matuod nga Kristohanong “mga trigo” masapawan sulod sa daghang siglo hangtod sa ting-ani. Human sa kamatayon sa mga apostoles, nahitabo kana.—Mateo 13:24-39.

Kusog nga Pag-uswag Karon

4, 5. Sugod sa 1919, unsang buluhaton ang gisugdan sa dinihogang mga Kristohanon, ug nganong dako kana nga buluhaton?

⁴ Sa 1919, panahon na nga ang putli nga Kristohanong mga trigo ilain gikan sa mga bunglayon. Ang dinihogang mga Kristohanon nahibalo nga ang dakong sugo ni Jesus mapadapat gihapon. Sila hugot nga nagtuo nga sila nagkinabuhi na sa “kataposang mga adlaw” ug nahibalo sa tagna ni Jesus: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (2 Timoteo 3:1; Mateo 24:14) Oo, sila nahibalo nga dako pa ang buluhaton.

⁵ Apan, sama sa mga tinun-an sa 33 K.P., kadtong dinihogang mga Kristohanon nag-atubang ug dakong buluhaton. Dihay pipila ra ka libo kanila nga nahimutang diha sa pipila lamang ka nasod. Sa unsang paagi mawali nila ang maayong balita “sa tibuok gipuy-ang yuta”? Hinumdomi, ang populasyon sa yuta miuswag gikan sa hayan 300 ka milyon sa panahon sa mga Cesar ngadto sa duolag 2 ka bilyon human sa unang gubat sa kalibotan. Ug latas sa ika-20ng siglo, kini magpadayon sa pag-uswag nga tulin kaayo.

6. Sa unsang gilapdon nga miuswag ang pagsangyaw sa maayong balita sa katuigan sa 1930?

 ⁶ Bisan pa niana, ang dinihogang mga alagad ni Jehova, sama sa ilang unang-siglo nga mga igsoon, nagsugod sa buluhaton nga gisugo kanila uban ang bug-os nga pagtuo kang Jehova, ug ang iyang espiritu nagauban kanila. Sa tungatunga sa katuigan sa 1930, mga 56,000 ka ebanghelisador ang nagmantala sa kamatuoran sa Bibliya sa 115 ka nasod. Dako na ang nahimo, apan daghan gihapon ang wala pa mahimo.

7. (a) Unsang bag-ong buluhaton ang giatubang sa dinihogang mga Kristohanon? (b) Uban sa pagpaluyo sa “ubang mga karnero,” sa unsang paagi ang buluhatong pagpanigom miuswag hangtod sa atong adlaw?

⁷ Unya, tungod kay mas nasabtan na kon kinsa ang “dakong panon” nga gihisgotan sa Pinadayag 7:9, kadtong kugihan nga mga Kristohanon nakabaton ug bag-ong buluhaton ug may katarongan nga makadahom ug tabang. Ang dili-maihap nga panon sa “ubang mga karnero,” mga magtutuo nga adunay yutan-ong paglaom, kinahanglang tigomon “gikan sa tanang kanasoran ug mga tribo ug katawhan ug mga pinulongan.” (Juan 10:16) Sila ‘magahatag kang Jehova ug sagradong pag-alagad adlaw ug gabii.’ (Pinadayag 7:15) Nagpasabot kana nga sila motabang sa buluhatong pagsangyaw ug pagpanudlo. (Isaias 61:5) Busa, ang dinihogang mga Kristohanon nahinam sa pagkakita nga ang gidaghanon sa mga ebanghelisador miuswag ug tinagpulo ka libo ug unya sa minilyon. Sa tuig 2003, ang usa ka bag-ong kinatas-ang ihap nga 6,429,351 nakigbahin sa buluhatong pagsangyaw—ang kinabag-an kanila maoy sa dakong panon. a Ang dinihogang mga Kristohanon mapasalamaton niining maong tabang, ug ang ubang mga karnero mapasalamaton sa pribilehiyo sa pagpaluyo sa ilang dinihogang mga igsoon.—Mateo 25:34-40.

8. Unsay reaksiyon sa mga Saksi ni Jehova sa grabeng pagpit-os nga nahitabo panahon sa ikaduhang gubat sa kalibotan?

⁸ Sa dihang ang trigong matang sa makausa pa nadayag, si Satanas kusganong nakiggubat niana. (Pinadayag 12:17) Unsay iyang reaksiyon sa dihang misugod sa pagtungha ang dakong panon? Hilabihang kapintas! Makaduhaduha ba kita nga siya mao ang nagpaluyo sa tibuok-kalibotang pag-atake sa matuod nga pagsimba nga nahitabo panahon sa ikaduhang gubat sa kalibotan? Sa duha ka kiliran sa maong gubat, ang mga Kristohanon nailalom sa dakong kapit-os. Daghang minahal nga mga igsoong lalaki ug babaye ang nag-antos ug grabeng mga pagsulay, ang uban nangamatay tungod sa ilang pagtuo. Bisan pa niana, pinaagi sa ilang mga buhat ilang gipakita nga sila mibati sama sa salmista: “Nga nahiusa sa Diyos pagadayegon ko ang iyang pulong. Sa Diyos nagasalig ako; dili ako mahadlok. Unsay arang mahimo sa unod batok kanako?” (Salmo 56:4; Mateo 10:28) Ang dinihogang mga Kristohanon ug ang ubang mga karnero, kay napalig-on sa espiritu ni Jehova, duyog nga mibarog nga malig-on. (2 Corinto 4:7) Tungod niini, “ang pulong sa Diyos padayong mikaylap.” (Buhat 6:7) Sa 1939, sa dihang mibuto ang gubat, 72,475 ka matinumanong mga Kristohanon ang gitaho nga nakigbahin sa buluhatong pagsangyaw. Apan, ang dili-kompletong taho sa 1945, ang tuig nga nahuman ang gubat, nagpadayag nga 156,299 ka aktibong mga Saksi ang nagsangyaw sa maayong balita. Pagkadakong kapildihan alang kang Satanas!

9. Unsang bag-ong mga tunghaan ang gipahibalo panahon sa Gubat sa Kalibotan II?

⁹ Klaro nga ang kagubot sa ikaduhang gubat sa kalibotan wala makapaduhaduha sa mga alagad ni Jehova nga ang buluhatong pagsangyaw molampos. Gani, sa 1943, sa kinapungkayan sa gubat, duha ka bag-ong mga tunghaan ang gipahibalo. Ang usa, nga karon gitawag ug Teokratikanhong Tunghaan sa Ministeryo, gidisenyo nga himoon diha sa tanang kongregasyon aron sa pagbansay sa tagsatagsa ka Saksi sa pagsangyaw ug paghimog  mga tinun-an. Ang lain, ang Watchtower Bible School of Gilead, maoy alang sa pagbansay sa mga misyonaryo nga maoy mougmad sa buluhatong pagwali sa langyawng mga nasod. Oo, sa dihang natapos ang gubat, ang matuod nga mga Kristohanon andam na alang sa mas daghang kalihokan.

10. Sa unsang paagi ang kasibot sa katawhan ni Jehova nakita panahon sa 2003?

¹⁰ Ug pagkanindot sa ilang nahimo! Kay gibansay diha sa Teokratikanhong Tunghaan sa Ministeryo, ang tanan—bata ug tigulang, mga ginikanan ug mga anak, bisan ang mga baldado—nakapakig-ambit ug nagpadayon sa pagpakig-ambit sa pagtuman sa dakong sugo ni Jesus. (Salmo 148:12, 13; Joel 2:28, 29) Sa tuig 2003, sa aberids kada bulan, 825,185 ang nagpasundayag sa ilang pagbati sa pagkadinalian pinaagi sa pagpakigbahin, sa temporaryo o sa mapinadayonon nga paagi, sa payunir nga pag-alagad. Sa mao gihapong tuig, ang mga Saksi ni Jehova migugol ug 1,234,796,477 ka oras sa pagpakigsulti sa uban bahin sa maayong balita sa Gingharian. Segurado nga si Jehova nalipay sa kasibot sa iyang katawhan!

Sa Langyawng mga Teritoryo

11, 12. Unsang mga pananglitan ang nagpasundayag sa maayong rekord sa mga misyonaryo?

¹¹ Sulod sa daghang tuig, ang mga graduwado sa Gilead ug, ning bag-o pa, ang mga graduwado sa Tunghaan sa Ministeryal nga Pagbansay nakahimo ug maayo kaayong rekord. Pananglitan, sa Brazil ang mga magmamantala wala makaabot ug 400 sa dihang ang unang mga misyonaryo nangabot sa 1945. Sila ug ang mga misyonaryo nga misunod kanila naghago duyog sa ilang masiboton nga mga igsoong Braziliano, ug si Jehova nagpanalangin gayod sa ilang mga paningkamot. Pagkamakapalipay alang ni bisan kinsa nga nahinumdom niadtong unang mga adlaw nga makita nga ang Brazil nagtaho ug bag-ong kinatas-ang ihap nga 607,362 ka magmamantala sa 2003!

¹² Tagda ang Japan. Sa wala pa ang ikaduhang gubat sa kalibotan, dihay mga usa ka gatos ka magwawali sa Gingharian sa maong nasod. Panahon sa gubat, ang linuog nga paglutos nakapakunhod sa ilang gidaghanon, ug sa pagkatapos sa gubat, pipila lamang ka Saksi ang buhi gihapon sa espirituwal ug sa pisikal. (Proverbio 14:32) Kadtong pipila ka talagsaong mga maghuhupot sa integridad seguradong nalipay niadtong 1949 sa pag-abiabi sa unang 13 ka gibansay-sa-Gilead nga mga misyonaryo, ug ang mga misyonaryo nasuod dayon sa ilang madasigon, maabiabihon nga mga igsoong Hapones. Kapin sa 50 ka tuig sa ulahi, sa tuig 2003, ang Japan nagtaho ug kinatas-ang ihap sa magmamantala nga 217,508! Sa pagkatinuod si Jehova dagayang nagpanalangin sa iyang katawhan nianang yutaa. Adunay susamang mga taho gikan sa daghang ubang mga nasod. Kadtong makahimo sa pagsangyaw sa langyawng mga teritoryo adunay dakong bahin sa pagsangyaw sa maayong balita, mao nga sa 2003 nadungog kini sa 235 ka nasod, mga isla, ug mga teritoryo sa tibuok kalibotan. Oo, ang dakong panon naggikan sa “tanang kanasoran.”

“Gikan sa Tanang . . . Tribo ug Katawhan ug mga Pinulongan”

13, 14. Sa unsang paagi gipakita ni Jehova ang bili sa pagwali sa maayong balita sa “tanang . . . pinulongan”?

¹³ Ang unang gitaho nga milagro human ang mga tinun-an mabuboi ug balaang espiritu sa Pentekostes 33 K.P. mao ang ilang pagsultig lainlaing mga pinulongan ngadto sa nagtigom nga panon. Kadtong tanang nakadungog kanila lagmit nagsultig internasyonal nga pinulongan, tingali Grego. Tungod kay “masimbahong mga tawo,” lagmit nga sila nakasabot usab sa Hebreohanong mga serbisyo diha sa templo. Apan nadani gayod ang ilang pagtagad sa dihang ilang nadungog ang maayong balita sa pinulongan nga ilang nakat-onan sukad pa sa pagkamasuso.—Buhat 2:5, 7-12.

¹⁴ Karon, usab, daghang pinulongan ang gigamit diha sa buluhatong pagwali. Ang dakong  panon gitagna nga maggikan dili lamang sa mga kanasoran kondili usab sa “mga tribo ug katawhan ug mga pinulongan.” Uyon niini, si Jehova nagtagna pinaagi kang Zacarias: “Napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23) Bisan tuod ang mga Saksi ni Jehova wala na makabaton ug gasa sa mga pinulongan, sila nahibalo sa bili sa pagpanudlo diha sa mga pinulongan sa mga tawo.

15, 16. Sa unsang paagi ang mga misyonaryo ug ang uban pa midawat sa tahas sa pagsangyaw ginamit ang lokal nga mga pinulongan?

¹⁵ Tinuod, sa pagkakaron dunay pipila ka kaylap kaayong gigamit nga mga pinulongan, sama sa Iningles, Kinatsila, ug Pranses. Apan, kadtong mibiya sa ilang yutang natawhan aron sa pag-alagad sa ubang mga nasod naningkamot sa pagtuon sa lokal nga mga pinulongan aron mas masabtan ang maayong balita niadtong “hustong nakiling alang sa kinabuhing walay kataposan.” (Buhat 13:48) Malisod kana. Sa dihang ang mga igsoon sa Habagatang Pasipiko sa nasod sa Tuvalu nagkinahanglag mga publikasyon sa ilang kaugalingong pinulongan, usa sa mga misyonaryo ang midawat sa tahas aron mapalampos ang maong tumong. Tungod kay walay mabatonang diksiyonaryo, nagsugod siya sa paghimog listahan sa Tuvaluan nga mga pulong uban sa mga kahulogan niini. Sa ngadtongadto, ang librong Ikaw Mabuhing Walay Kataposan sa Paraiso sa Yuta b gipatik sa Tuvaluan nga pinulongan. Sa dihang ang mga misyonaryo nangabot sa Curaçao, walay literatura sa Bibliya ug walay diksiyonaryo sa lokal nga pinulongan, ang Papiamento. Daghan usab ang panagsumpaki kon sa unsang paagi angayng isulat ang maong pinulongan. Bisan pa niana, sulod sa duha ka tuig sukad sa pag-abot sa unang mga misyonaryo, ang unang Kristohanong tract sa Bibliya gipatik sa maong pinulongan. Karon, ang Papiamento maoy usa sa 133 ka pinulongan diin Ang Bantayanang Torre gipatik nga dungan sa Iningles.

¹⁶ Sa Namibia ang unang mga misyonaryo walay makitang lokal nga mga Saksi nga motabang kanila sa paghubad. Gawas pa, ang usa ka lokal nga pinulongan, ang Nama, kulang ug mga pulong alang sa mga ideya nga komong gigamit diha sa atong mga publikasyon, sama sa “hingpit.” Usa ka misyonaryo nagtaho: “Sa panguna ang akong gipahubad mao ang mga magtutudlo sa eskuylahan nga nagtuon sa Bibliya. Tungod kay diyutay ra man ang ilang kahibalo sa kamatuoran, kinahanglan nakong tuparan sila aron sa pagtino nga husto ang matag tudling-pulong.” Bisan pa niana, ang tract nga Kinabuhi sa Bag-ong Kalibotan sa ngadtongadto gihubad sa upat ka pinulongan sa Namibia. Karon, Ang Bantayanang Torre regular nga gipatik sa Kwanyama ug Ndonga.

17, 18. Unsang mga tahas ang gihimo sa Mexico ug sa ubang mga nasod?

¹⁷ Sa Mexico, ang pangunang pinulongan mao ang Kinatsila. Apan, sa wala pa mangabot ang mga Katsila, daghang pinulongan ang gisulti didto, ug  ubay-ubay gihapon ang padayong gigamit. Busa, ang literatura sa mga Saksi ni Jehova gipatik na karon diha sa pito ka pinulongan sa Mexico ug usab sa Mexican Sign Language. Ang Ministeryo sa Gingharian sa Maya mao ang unang penetsahan nga publikasyon sa Amerikanhong Indian nga pinulongan. Sa pagkatinuod, pipila ka libong Maya, Aztec, ug uban pa ang nalakip sa 572,530 ka magmamantala sa Gingharian sa Mexico.

¹⁸ Sa di pa dugayng kapanahonan, milyonmilyon ang nangalagiw ngadto sa langyawng mga nasod ingong mga kagiw, o sila milalin tungod sa kalisod sa ekonomiya. Tungod niini, daghang nasod karon ang nakabaton sa unang higayon ug igoigong langyawg-pinulongan nga teritoryo. Gidawat sa mga Saksi ni Jehova ang maong buluhaton. Pananglitan, sa Italya, adunay mga kongregasyon ug mga grupo diha sa 22 ka pinulongan gawas sa Italyano. Aron matabangan ang mga igsoon sa pagsangyaw ngadto sa mga tawo nga nagsulti ug langyawng mga pinulongan, ang mga klase di pa dugayng giorganisar aron sa pagtudlo ug 16 ka pinulongan, apil na ang Italian Sign Language. Diha sa daghang ubang mga nasod, ang mga Saksi ni Jehova naghimog susamang mga paningkamot aron sa pagsangyaw ngadto sa daghang lalin. Oo, uban sa tabang ni Jehova, ang dakong panon nagagikan gayod sa daghan kaayong grupo sa pinulongan.

“Sa Tibuok nga Yuta”

19, 20. Unsang mga pulong ni Pablo ang natuman karon sa talagsaong paagi? Ipatin-aw.

¹⁹ Sa unang siglo, si apostol Pablo misulat: “Wala ba sila makadungog? Tan-awa, sa pagkatinuod, ‘ang ilang tingog miabot sa tibuok nga yuta, ug ang ilang mga pulong ngadto sa kinatumyan sa gipuy-ang yuta.’” (Roma 10:18) Kon tinuod kana sa unang siglo, labi pang tinuod kana karon! Milyonmilyon—tingali mas daghan pa kay sa bisan unsang nangaging panahon sa kasaysayan—ang nag-ingon: “Pagadayegon ko si Jehova sa tanang panahon; ang pagdayeg kaniya maanaa kanunay sa akong baba.”—Salmo 34:1.

²⁰ Dugang pa, ang buluhaton wala mohinay. Ang gidaghanon sa mga magmamantala sa Gingharian nagpadayon sa pag-uswag. Nagkadaghan ang panahon nga gigugol sa buluhatong pagwali. Milyonmilyong balikduaw ug gatosan ka libong panagtuon sa Bibliya ang ginadumala. Ug daghan ang padayong nagpakita ug interes. Sa miaging tuig, usa ka bag-ong kinatas-ang ihap nga 16,097,622 ang mitambong sa pagsaulog sa Memoryal sa kamatayon ni Jesus. Klaro nga dako pa ang buluhaton. Hinaot nga magpadayon kita sa pagsundog sa lig-ong integridad sa atong mga igsoon nga nakalahutay sa grabeng paglutos. Ug hinaot nga ipakita nato ang kasibot sa tanan natong mga igsoon kinsa sukad sa 1919 naggamit sa ilang kaugalingon diha sa pag-alagad kang Jehova. Hinaot ang tanan magpadayon sa pagsanong sa koro sa salmista: “Ang tanang may gininhawa—ipadayeg si Jah. Dayega ninyo si Jah!”—Salmo 150:6.

[Mga footnote]

Ikapatin-aw Mo Ba?

• Unsang buluhaton ang gisugdan sa mga igsoon sa 1919, ug nganong dako kadtong buluhatona?

• Kinsa ang gitigom aron sa pagpaluyo sa buluhatong pagwali?

• Unsang rekord ang natigom sa mga misyonaryo ug sa uban nga nag-alagad sa langyawng mga nasod?

• Unsang pamatuod ang imong makutlo sa pagpakita nga si Jehova nagapanalangin sa iyang katawhan karon?

[Mga Pangutana sa Pagtuon]

 [Chart sa panid 18-21]

2003 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

 (Tan-awa ang bound volume)

[Mga hulagway sa panid 14, 15]

Ang kagubot sa ikaduhang gubat sa kalibotan wala makapaduhaduha sa mga Kristohanon nga ang maayong balita igawali

[Credit Line]

Explosion: U.S. Navy photo; others: U.S. Coast Guard photo

[Mga hulagway sa panid 16, 17]

Ang dakong panon maggikan sa tanang tribo ug mga pinulongan