‘Ang Diyos Wala Magpuyo sa Hinimog-Kamot nga mga Templo’

SA WALAY duhaduha sinati si apostol Pablo sa mga templo ni Atena, tungod kay kini makita diha sa daghang siyudad nga iyang giduaw panahon sa iyang misyonaryong mga panaw. Sumala pa sa The Encyclopædia Britannica, si Atena gibantog ingong diyosa dili lang sa gubat ug kaalam kondili “sa kinamot nga mga trabaho [usab] ug mga buluhaton nga nanginahanglag kahanas sa linaw nga panahon.”

Ang labing ilado nga templo ni Atena mao ang Parthenon, nga gitukod sa Atenas, ang siyudad nga gipahinungod sa maong diyosa. Giisip nga usa sa kinadak-ang templo sa karaang kalibotan, ang Parthenon dunay 12-metros ka taas nga estatwa ni Atena nga hinimo sa bulawan ug garing. Sa dihang miduaw si Pablo sa Atenas, kining maong templo nga puting marmol mao ang labing ilado nga timaan sa siyudad sulod na sa mga 500 ka tuig.

Nga nagtan-aw sa Parthenon diha sa duol, si Pablo nagwali ngadto sa usa ka grupo sa mga taga-Atenas bahin sa ‘Diyos nga wala magpuyo sa hinimog-kamot nga mga templo.’ (Buhat 17:23, 24) Lagmit ang kanindot sa mga templo ni Atena o ang gidak-on sa iyang mga estatwa morag mas madanihon alang sa pipila ka mamiminaw ni Pablo kay sa dili-makitang Diyos nga wala nila mailhi. Apan, sumala sa gipunting ni Pablo, dili angayng hunahunaon nga ang Maglalalang sa katawhan “maoy sama ug bulawan o plata o bato, samag butang nga kinulit sa . . . tawo.”—Buhat 17:29.

Ang mga diyos ug diyosa sama kang Atena—kansang himaya nagdepende sa mga templo ug mga estatwa—nangahanaw na. Ang estatwa ni Atena nahanaw gikan sa Parthenon sa ikalimang siglo K.P., ug pipila na lang sa iyang mga templo ang nagpabilin. Kinsa karon ang modangop kang Atena alang sa kaalam ug giya?

Pagkalahi gayod ni Jehova, ang “walay kataposang Diyos” kinsa walay tawong nakakita sukad. (Roma 16:26; 1 Juan 4:12) Ang mga anak ni Kore misulat: “Kini nga Diyos mao ang atong Diyos hangtod sa panahong walay tino, bisan hangtod sa kahangtoran. Siya magagiya kanato.” (Salmo 48:14) Ang usa ka paagi aron mapahimuslan ang giya ni Jehova nga Diyos mao ang pagtuon sa iyang Pulong, ang Bibliya, ug ang pagpadapat sa tambag niini sa atong kinabuhi.