Himayaa ang Diyos Dili ang Tawo

SA MGA bulan nga dili pa dugay, ang mga mahigugmaon sa pagkamatarong sa tibuok kalibotan nakakat-on kon unsaon sa paghimaya sa Diyos samtang nagtigom sila sa “Himayaa ang Diyos” nga Distritong mga Kombensiyon sa mga Saksi ni Jehova. Atong sublion ang edukasyonal nga programa nga gipresentar didto.

Ang pinasukad-sa-Bibliya nga programa miabot ug tulo ka adlaw alang sa kadaghanang kombensiyonista ug upat ka adlaw alang niadtong nakatambong sa linain nga internasyonal nga mga panagtigom. Tanantanan, ang mga tumatambong nakadungog ug kapin sa 30 ka presentasyon gikan sa Kasulatan, apil sa mga pakigpulong nga nagpalalom sa espirituwal nga pagsabot, mga eksperyensiya nga makapalig-on sa pagtuo, mga demonstrasyon nga nagpasiugda sa praktikal nga pagpadapat sa mga prinsipyo sa Bibliya, ug sa drama nga nagsul-ob ug costume nga naglarawan sa mga problema nga giatubang sa unang-siglong mga Kristohanon. Kon nakatambong ka sa usa niining mga kombensiyona, nganong dili nimo repasohon ang imong mga nota samtang magbasa niining artikuloha? Kami makaseguro nga kini makapahinumdom nimog balik sa dagayang espirituwal nga kombira ug sa samang paagi matulon-anon usab.

Tema sa Unang Adlaw: “Takos Ikaw, Jehova, . . . nga Modawat sa Himaya”

Human sa pangbukas nga awit ug pag-ampo, mainitong giabiabi sa unang mamumulong ang tanang tumatambong pinaagi sa pakigpulong nga naghatag ug pagtagad sa pangunang katarongan alang sa kombensiyon: “Natigom Aron sa Paghimaya sa Diyos.” Nagkutlo gikan sa Pinadayag 4:11, gipasiugda sa mamumulong ang tibuok tema sa kombensiyon. Gisaysay niya kon unsay kahulogan sa paghimaya sa Diyos. Nagkutlo sa basahon sa Mga Salmo, iyang gipasiugda nga ang paghimaya sa Diyos naglakip sa “pagsimba,” “pagpasalamat,” ug “pagdayeg.”—Salmo 95:6; 100:4, 5; 111:1, 2.

Ang sunod nga bahin may ulohan nga “Bulahan Kadtong Nagahimaya sa Diyos.” Ang mamumulong naghisgot ug makaikag nga obserbasyon. Sanglit kapin man sa sayis milyones ang mga Saksi ni Jehova diha sa 234 ka kayutaan sa tibuok kalibotan, mahimong ikaingon nga sa adlaw ug gabii aduna gayoy naghimaya kang Jehova. (Pinadayag 7:15) Ang interbiyo sa pipila ka Kristohanong mga igsoong lalaki ug babaye nga anaa sa usa ka matang sa linain nga bug-os-panahong pag-alagad maoy gipabilhan nga bahin niining pakigpulonga nga giapresyar pag-ayo sa mga tumatambong.

“Ang Kalalangan Nagpahayag sa Himaya sa Diyos” mao ang sunod nga pakigpulong. Bisag sila walay timik, ang pisikal nga kalangitan naghimaya sa pagkadako sa Diyos nga makapalalom sa  atong pagkamapasalamaton sa iyang mahigugmaong pagtagad. Kini gipatin-aw nga detalyado kaayo.—Isaias 40:26.

Ang paglutos, pagsupak, mga kalibotanong impluwensiya, ug daotang mga hilig nahimong pagsulay sa pagkamaunongon sa matuod nga mga Kristohanon. Busa, ang pakigpulong nga “Lakaw Diha sa Dalan sa Integridad” angay gayod nga pamation sa mga tumatambong. Ang mamumulong naghatag ug bersikulo-por-bersikulo nga panaghisgot sa ika-26 nga Salmo, ug giinterbiyo ang nagtungha nga batan-ong mga Saksi nga nakabarog nga malig-on sa moralidad ug dihay laing batan-on nga giinterbiyo nga naggugol ug sobrang panahon sa kuwestiyonableng kalingawan apan naghimog mga lakang sa pagbuntog sa problema.

Ang keynote address nga “Ang Mahimayaong Matagnaong mga Panan-awon Nagpadasig Kanato!” nagtapos sa programa sa buntag. Gihisgotan sa mamumulong ang mga panig-ingnan sa manalagnang si Daniel ug sa mga apostoles nga si Juan ug Pedro ingong mga tawo kansang pagtuo nadasig sa mahimayaong matagnaong mga panan-awon maylabot sa pagkatukod ug paglihok sa Mesiyanikong Gingharian sa Diyos. Mahitungod niadtong kinsa nakalimot na sa klarong ebidensiya nga nagpamatuod nga kita ania na sa panahon sa kataposan, ang mamumulong miingon: “Kami nanghinaot nga ilang isentro pag-usab sa hunahuna ang pagkatinuod sa presensiya ni Kristo diha sa Gingharianong himaya ug sa ingon sila maulian sa espirituwal nga kalig-on.”

Ang programa sa hapon gisugdan sa usa ka pakigpulong nga nag-ulohang “Ang Himaya ni Jehova Gipadayag Diha sa mga Mapainubsanon.” Gipatin-aw sa mamumulong kon sa unsang paagi si Jehova nahimong panig-ingnan sa pagkamapainubsanon, bisan pag siya ang kinatas-ang Persona sa uniberso. (Salmo 18:35) Kahimut-an ni Jehova ang mga tawong tinuod nga mapainubsanon, apan dili siya moangay niadtong nagpakita nga mapainubsanon lamang kon makig-atubang sa ilang mga higala o sa ilang mga labaw apan mabangis niadtong ubos nila.—Salmo 138:6.

Sunod, gihisgotan sa simposyum ang tagna sa Bibliya nga nagpasiugda sa nagkalainlaing bahin sa pangunang tema: “Ang Tagna ni Amos—Ang Mensahe Niini Alang sa Atong Adlaw.” Nagpunting sa panig-ingnan ni Amos, ang unang mamumulong nagsaysay sa atong responsibilidad sa pagpasidaan sa mga tawo sa umaabot nga paghukom ni Jehova. Ang tema sa iyang pakigpulong maoy “Isulti ang Pulong sa Diyos nga Maisogon.” Ang ikaduhang mamumulong nangutana: “Taposon ba ni Jehova ang pagkadaotan ug pag-antos niining yutaa?” Ang iyang bahin, “Ang Paghukom sa Diyos Batok sa Daotan,” nagpakita nga ang paghukom sa Diyos makataronganon gayod, nga dili kalikayan, ug mapilion. Gipasiugda sa kataposang mamumulong sa simposyum ang tema nga “Si Jehova Nagasusi sa Kasingkasing.” Kadtong buot nga magpahimuot kang Jehova mamati sa mga pulong sa Amos 5:15: “Dumti ang daotan, ug higugmaa ang maayo.”

Ang alkoholikong ilimnon, sama sa bino nga makapalipay sa kasingkasing, mahimong abusohan. Sa iyang pakigpulong nga “Likayi ang Lit-ag sa Pag-abuso sa Alkoholikong mga Ilimnon,” gilista sa mamumulong ang pisikal ug espirituwal nga mga kadaot tungod sa sobrang pag-inom ug alkoholikong ilimnon, bisan pag dili mahubog ang usa ka tawo. Siya mihatag ug giya nga prinsipyo: Kay lainlain man ang kagrabehon sa epekto sa alkoholikong ilimnon sa matag tawo, ang bisan unsang gidaghanon nga makadaot sa imong ‘praktikal nga kaalam ug sa katakos sa panghunahuna’ maoy sobra na alang kanimo.—Proverbio 3:21, 22.

Kay nagpuyo na man kita sa malisod nga mga panahon, ang sunod nga topiko, “Si Jehova, Atong ‘Kuta sa Panahon sa Kasakitan,’” makapahupay gayod. Ang pag-ampo, balaang espiritu, ug isigka-Kristohanon makatabang kanato sa pagsagubang.

Ang kataposang pakigpulong nianang adlawa, “‘Ang Maayong Yuta’—Pasiunang Pagtan-aw sa Paraiso,” gitapos sa usa ka malipayong sorpresa ngadto sa tanan—usa ka bag-ong publikasyon nga nasudlan ug daghang mapa sa Bibliya! Kini nag-ulohang Tan-awa ang Maayong Yuta.

Tema sa Ikaduhang Adlaw: “Ipahayag sa Taliwala sa Kanasoran ang Iyang Himaya”

Human sa paghisgot sa inadlaw nga teksto, ang ikaduhang simposyum sa kombensiyon gipresentar, nga may tema nga “Ipasumbalik-Silaw Samag mga Salamin ang Himaya ni Jehova.” Ang unang bahin nagsaysay labot sa “Pagpakaylap sa Maayong Balita sa Tanang Dapit” ug gilakip ang tinuod nga mga eksperyensiya sa pag-alagad sa kanataran. Ang ikaduhang pakigpulong nagpasundayag sa usa ka  pagbalikduaw sa dihang gipresentar sa mamumulong ang tema nga “Pagkuha sa Taptap Niadtong Nabutaan.” Ang kataposang pakigpulong sa simposyum, nga nag-ulohang “Paghimo Niini nga Mas Bug-os pa Diha sa Atong Ministeryo,” napatin-aw ug maayo pinaagi sa makaikag nga mga interbiyo sa mga eksperyensiya sa kanataran.

Ang sunod nga bahin sa programa may ulohan nga “Gidumtan nga Walay Pasikaranan.” Kini dunay makapadasig nga mga interbiyo sa matinumanong mga tawo nga tungod sa kusog sa Diyos nakahupot sa integridad ilalom sa pagsupak.

Ang gikahinangpan pag-ayo nga bahin sa mga kombensiyon mao ang pakigpulong sa bawtismo nga gisundan ug bug-os nga pagtuslob diha sa tubig sa tanang takos nga kandidato. Ang bawtismo sa tubig nagsimbolo sa bug-os nga pagpahinungod sa tawo ngadto kang Jehova. Busa, ang tema haom kaayo: “Ang Pagtuman sa Atong Pagpahinungod Nagahimaya sa Diyos.”

 Ang programa sa hapon gisugdan sa usa ka pakigpulong nga nagdasig sa pagsusi-sa-kaugalingon, “Pag-ugmad sa Samag-Kristong Panghunahuna sa Pagkahalangdon.” Gihisgotan sa mamumulong kining makaikag nga punto: Ang pagkahalangdon naggikan sa pagsundog sa pagkamapainubsanon ni Kristo. Busa, ang usa ka Kristohanon dili magtinguha ug kaakohan aron lang sa pagtagbaw sa kaugalingong ambisyon. Angay niyang pangutan-on ang iyang kaugalingon, ‘Ako ba andam mohimo ug mapuslanong mga buluhaton nga dili daling mamatikdan?’

Mobati ka ba usahay ug kakapoy? Dayag kaayo ang tubag. Ang pakigpulong nga “Gikapoy Apan Wala Maluya” gikaikagan sa tanan. Ang mga interbiyo sa dugay nang mga Saksi nagpakita nga si Jehova maghimo kanato nga “kusganon . . . pinaagi sa iyang espiritu.”—Efeso 3:16.

Ang pagkamahinatagon maoy usa ka hiyas nga dili dala-sa-pagkatawo apan kinahanglang makat-onan. Kining hinungdanong punto gipasiugda sa bahin nga “Magmahinatagon, Andam sa Pagpaambit.” Ug kini nga makapatukbil-sa-hunahuna nga pangutana gisukna: “Kita ba andam sa paggugol ug pipila ka panahon uban sa atong mga igsoong lalaki ug babaye nga tigulang, masakiton, magul-anon, o mamingawon?”

Ang “Pagbantay sa ‘Tingog sa mga Estranyo’” nakadani sa pagtagad sa mamiminaw. Kining maong pakigpulong nagtandi sa mga sumusunod ni Jesus sa karnero nga mamati lamang sa iyang tingog ingong “ang maayong magbalantay” ug nga dili mamati sa “tingog sa mga estranyo” ingon sa ginapamulong sa daghang tawhanong mga tinubdan nga naimpluwensiyahan sa Yawa.—Juan 10:5, 14, 27.

Ang usa ka koro kinahanglang magdungan sa pagkanta aron masabtan. Aron mahimaya ang Diyos, ang matuod nga mga magsisimba sa tibuok kalibotan kinahanglang magkahiusa. Busa, ang “Himayaa ang Diyos sa ‘Usa ka Baba’” naghatag ug mapuslanong instruksiyon kon sa unsang paagi kitang tanan makasulti sa usa ka “putli nga pinulongan” ug makaalagad kang Jehova “abaga sa abaga.”—Sofonias 3:9.

Ang mga ginikanan, ilabina niadtong dunay gagmayng kabataan, nalipay gayod sa kataposang pakigpulong sa adlaw, “Ang Atong mga Anak—Usa ka Hamiling Panulondon.” Usa ka bag-ong 256-panid nga publikasyon ang giluwatan, nga nakapalipay sa tumatambong. Ang Pagkat-on Gikan sa Dakong Magtutudlo maoy usa ka libro nga motabang sa mga ginikanan sa paggugol ug panahon nga mapuslanon sa espirituwal sa ilang mga anak, nga gasa sa Diyos kanila.

Tema sa Ikatulong Adlaw: “Himoa ang Tanang Butang Alang sa Kahimayaan sa Diyos”

Ang kataposang adlaw sa kombensiyon gisugdan ug mga pahinumdom sa inadlaw nga teksto. Ang unang bahin sa programa sa adlaw naghatag ug dugang pagtagad sa kahikayan sa pamilya. Ang unang pakigpulong, “Mga Ginikanan, Lig-ona ang Inyong Pamilya,” nag-andam sa mga hunahuna sa mga tumatambong. Human sa pagsubli sa mga  responsibilidad sa mga ginikanan sa pagtagana ug materyal alang sa ilang pamilya, gipadayag sa mamumulong nga ang pangunang responsibilidad sa mga ginikanan mao ang pagtagana sa ilang mga anak ug espirituwal nga pagkaon.

Ang misunod nga mamumulong nagpakigpulong alang sa kabataan ug nagpatin-aw sa ulohang “Kon sa Unsang Paagi ang mga Batan-on Nagadayeg Kang Jehova.” Siya miingon nga ang mga bata nahisamag “mga yamog” tungod kay sila daghan ug ang ilang kadasig sa pagkabatan-on makapapresko. Ang mga hamtong malipay nga makig-uban kanila sa pag-alagad kang Jehova. (Salmo 110:3) Kining maong bahina gitapos sa makapalipay nga mga interbiyo sa sulondang mga batan-on.

Ang mga drama sa Bibliya nga nagsul-ob ug costume maoy makapahinam gayod nga bahin sa distritong mga kombensiyon, ug usa na niini kining kombensiyona. Ang drama nga “Maisogong Nagsangyaw Bisan pa sa Pagsupak” naglarawan sa unang-siglong mga sumusunod ni Jesus. Kini dili lamang makalingaw kondili matulon-anon pa gayod. Ang diskurso human sa drama nga “Ipahayag ang Maayong Balita nga ‘Walay Hunong,’” nagpasiugda sa pangunang punto sa drama.

Ang tanang tumatambong mahinamong nagpaabot sa pangunang bahin sa programa sa Dominggo, ang pakigpulong nga “Kinsay Nagahimaya sa Diyos Karon?” Giasoy sa mamumulong kon sa unsang paagi ang mga natad sa siyensiya ug relihiyon sa katibuk-an wala maghimaya sa Diyos. Ang mga tawo lamang nga nagdala sa iyang ngalan, kadtong nagsangyaw ug nagtudlo sa kamatuoran bahin kang Jehova, mao ang tinuod nga naghimaya sa iyang ngalan karon.

Ang pakigpulong publiko gisundan ug sumaryo sa leksiyon sa magasing Bantayanang Torre niana nga semana. Dayon misunod ang kataposang pakigpulong, “‘Magpadayon sa Pagpamungag Daghan’ sa Kahimayaan ni Jehova.” Gipresentar sa mamumulong ang napulo-ka-punto nga resolusyon nga dawaton sa tanan nga mitambong. Kini naghisgot bahin sa nagkalainlaing paagi sa paghimaya kang Jehova, ang Maglalalang. Ang nagkahiusang “Oo” milanog diha sa tanang kombensiyon sa tibuok kalibotan.

Busa gitapos ang kombensiyon pinaagi sa tema nga “Himayaa ang Diyos” nga gipamatian pag-ayo sa matag tumatambong. Ug uban sa tabang sa espiritu ni Jehova ug sa makitang bahin sa iyang organisasyon, hinaot nga kita maningkamot gayod sa paghimaya sa Diyos ug dili sa mga tawo.

[Kahon/Mga hulagway sa panid 23]

Internasyonal nga mga Kombensiyon

Dihay internasyonal nga mga kombensiyon nga miabot ug upat ka adlaw nga gihimo sa Amerika del Norte, Amerika del Sur, Aprika, Asia, Australia, ug sa Uropa. Ang mga Saksi sa tibuok kalibotan gidapit niini nga mga panagtigom. Niining paagiha dihay “pagdinasigay” tali sa mga bisita ug sa ilang mga tig-abiabi. (Roma 1:12) Ang daang mga kaila nagkita pag-usab, ug nakahimamat usab ug bag-ong mga higala. Usa ka linaing bahin sa internasyonal nga mga kombensiyon mao ang bahin sa programa nga nag-ulohang “Mga Taho nga Gikan sa Ubang Kayutaan.”

[Kahon/Mga hulagway sa panid 25]

Bag-ong mga Publikasyon nga Naghimaya sa Diyos

Duha ka bag-ong publikasyon ang giluwatan sa “Himayaa ang Diyos” nga Distritong mga Kombensiyon. Ang atlas sa Bibliya nga Tan-awa ang Maayong Yuta lig-on ug hapin ug dunay 36 ka panid nga mga mapa ug mga hulagway sa mga lugar sa Bibliya. Ang matag panid bug-os nga dekolor ug dunay mga mapa sa mga imperyo sa Asirya, Babilonya, Medo-Persia, Gresya, ug Roma. Adunay lahi nga mga mapa nga naglatid sa ministeryo ni Jesus ug sa pagkaylap sa Kristiyanidad.

Ang Pagkat-on Gikan sa Dakong Magtutudlo maoy usa ka 256-panid nga libro nga dunay duolan sa 230 ka hulagway. Daghang makalingaw nga mga panaghisgot ang magugol uban sa kabataan pinaagi sa pagtan-aw lamang sa mga hulagway ug sa mga pangutana nga makatukbil sa hunahuna nga makita diha sa libro. Kining bag-ong publikasyon gidisenyo agig pangontra sa pag-atake ni Satanas sa atong mga kabataan, nga ang tuyo mao ang pagdaot sa ilang maayong mga pamatasan.

[Hulagway sa panid 23]

Ang mga misyonaryo nag-asoy ug mga eksperyensiya nga makapalig-on sa pagtuo

[Mga hulagway sa panid 24]

Ang bawtismo maoy usa ka hinungdanong bahin sa “Himayaa ang Diyos” nga mga kombensiyon

[Mga hulagway sa panid 24]

Naikag gayod ang mga batan-on ug tigulang sa mga drama nga gipasukad sa Bibliya