Kang Kinsang mga Saad ang Imong Masaligan?

“ANG iyang mga saad gamhanan, maingon nga siya kaniadto gamhanan, apan ang iyang binuhatan walay pulos, maingon nga siya karon walay pulos.”—King Henry the Eighth, ni William Shakespeare.

Ang gamhanang mga saad nga gitumong ni Shakespeare mao ang mga saad sa usa ka Ingles nga kardinal nga si Thomas Wolsey, kinsa naghupot ug dakong politikal nga gahom sa Inglaterra sulod sa ika-16 nga siglo. Ang uban moingon nga ang giingon ni Shakespeare tukma usab maylabot sa kadaghanang mga saad nga ilang mabatian karon. Ang mga tawo sublisubling gipasaligan sa makadaghan apan diyutay lang ang natuman. Busa, dili lisod ang pagsabot kon nganong sila maduhaduhaon sa bisan unsang mga saad.

Daghan ang Nahigawad

Pananglitan, panahon sa grabeng panag-away sa kayutaan sa Balkan sa katuigan sa 1990, gideklarar sa United Nations Security Council nga ang lungsod sa Srebrenica sa Bosnia maoy “usa ka luwas nga dapit.” Kana morag usa ka kasaligang garantiya para sa mga nasod nga membro sa Hiniusang Kanasoran. Libolibong kagiw nga Muslim sa Srebrenica ang mituo niana. Apan, sa kapulihay, ang saad bahin sa usa ka luwas nga dapit wala gayod mahitabo. (Salmo 146:3) Sa Hulyo 1995, gipapahawa sa miatake nga mga puwersa ang mga puwersa sa HK ug giilog ang lungsod. Kapin sa 6,000 ka Muslim ang nangahanaw, ug labing menos 1,200 ka Muslim nga mga sibilyan ang gipamatay.

Ang tanang bahin sa kinabuhi puno sa mga saad nga wala matuman. Gibati sa mga tawo nga sila gitikasan sa “daghan kaayong bakak ug malinglahon nga panganunsiyo” nga nagpusotpusot karon. Nahigawad sila sa “mga saad sa daghang politiko panahon sa kampanya nga wala tumana.” (The New Encyclopædia Britannica, Tomo 15, panid 37) Ang gisaligang mga lider sa relihiyon kinsa nagsaad sa pag-atiman sa ilang mga panon nag-abuso kanila sa labing makauulaw nga paagi. Bisan sa mga propesyong sama sa edukasyon ug medisina—nga giisip nga gigamhan sa kaluoy ug kahingawa alang sa uban—ang pipila nagbudhi ug nagpahimulos o nagpatay pa gani niadtong ilang giatiman. Mao diay nga ang Bibliya nagpasidaan kanato nga dili motuo sa tagsatagsa ka pulong!—Proverbio 14:15.

 Mga Saad nga Natuman

Siyempre, daghang tawo ang nagtuman sa ilang gisaad, nga usahay nagkahulogag dakong pagsakripisyo sa ilang bahin. (Salmo 15:4) Ang ilang pulong maoy ilang garantiya, ug ilang gituman kana. Ang uban gusto gayong motuman sa ilang mga saad sa labing maayong paagi. Andam silang motuman sa ilang gisaad apan dili lang nila mahimo kana. Bisan ang kinamaayohang mga plano mapakyas tungod sa di-kalikayang mga kahimtang.—Ecclesiastes 9:11.

Bisag unsa pay katarongan, ang tinuod mao nga daghang tawo ang nalisdan sa pagtuo sa mga saad ni bisan kinsa. Busa ang pangutana motungha: Aduna bay saad nga atong masaligan? Oo aduna. Kita makasalig sa mga saad nga makaplagan diha sa Pulong sa Diyos, ang Bibliya. Nganong dili susihon kon unsay giingon sa sunod nga artikulo bahin niining ulohana? Ikaw makahinapos, sama sa nahinapos sa minilyong tawo, nga kita makasalig gayod sa mga saad sa Diyos.

[Picture Credit Line sa panid 3]

AP Photo/Amel Emric