Mga Pangutana Gikan sa mga Magbabasa

Unsay mga kahimtang ang nagtukmod kang Juda sa pagpakigsekso sa usa ka babaye nga gituohan niyang usa ka pampam, sumala sa giingon sa Genesis 38:15, 16?

Bisan tuod ug nakigsekso si Juda sa usa ka babaye nga gituohan niyang usa ka pampam, sa pagkatinuod siya dili usa ka pampam. Sumala sa Genesis kapitulo 38, mao kini ang nahitabo.

Sa wala pa makapatunghag mga anak nga lalaki ang panganay nga anak ni Juda pinaagi sa iyang asawa nga si Tamar, siya gipatay tungod kay siya “nahimong daotan sa mga mata ni Jehova.” (Genesis 38:7) Niadtong panahona, ang pagpakigminyo ug bayaw nga lalaki mao ang kostumbre nga gisubay. Kini nagkinahanglan nga kon mamatay ang usa ka lalaki nga walay usa ka manununod, obligasyon sa iyang igsoong lalaki ang pagminyo sa nabiyuda aron makapatunghag kaliwat nga mahimong manununod. Apan ang ikaduhang anak ni Juda nga si Onan midumili sa pagtuman sa maong obligasyon. Busa, siya namatay gumikan sa silot sa Diyos. Dayon gipapauli ni Juda ang iyang umagad nga si Tamar ngadto sa iyang amahan hangtod nga ang ikatulong anak nga lalaki ni Juda nga si Sela, modako na ug minyoan siya. Apan, sa paglabay sa mga tuig, wala ipakasal ni Juda si Sela ngadto kang Tamar. Busa sa dihang namatay ang asawa ni Juda, si Tamar nagplano sa pagbaton ug manununod pinaagi kang Juda, ang Israelinhon nga nahimo niyang ugangan. Gihimo niya kadto pinaagi sa pagpakaaron-ingnong pampam sa templo ug milingkod sa daplin sa dalan nga nahibaloan niyang agian ni Juda.

Kay wala masayod nga si Tamar diay kadto, si Juda nakigsekso kaniya. Agig balos, si Tamar maalamong nangayo ug garantiya gikan kaniya, ug pinaagi niini iyang gipamatud-an sa ulahi nga siya nagsabak gumikan kaniya. Sa dihang nabutyag ang kamatuoran, wala siya basola ni Juda kondili mapainubsanong miingon: “Matarong pa siya kay kanako, tungod kay wala ko siya ihatag kang Sela nga akong anak nga lalaki.” Ug nahiangay gayod nga “siya wala na makigdulog pa kaniya.”—Genesis 38:26.

Sayop ang gibuhat ni Juda tungod kay wala niya ihatag ang iyang anak nga si Sela ngadto kang Tamar sumala sa iyang gisaad. Siya usab nakigsekso sa usa ka babaye nga gituohan niyang usa ka pampam sa templo. Supak kini sa katuyoan sa Diyos, nga ang usa ka lalaki angay nga makigsekso diha lamang sa kahikayan sa kaminyoon. (Genesis 2:24) Apan, sa pagkatinuod, si Juda wala makighilawas sa usa ka pampam. Hinunoa, wala tuyoa nga siyay mipuli sa dapit sa iyang anak nga si Sela sa pagtuman sa kahikayan sa pagpakigminyo ug bayaw nga lalaki ug sa ingon nahimong amahan sa usa ka legal nga kaliwat.

Mahitungod kang Tamar, ang iyang pagpakigsekso kang Juda dili imoral. Ang iyang kaluha nga mga anak nga lalaki wala isipa nga mga anak sa pakighilawas. Sa dihang giminyoan ni Boaz nga taga-Betlehem ang Moabihanon nga si Ruth pinaagi sa kahikayan sa pagpakigminyo ug bayaw nga lalaki, ang mga ansiyano sa Betlehem nagdayeg sa anak ni Tamar nga si Perez, nga nag-ingon kang Boaz: “Hinaot nga ang imong banay mahisama sa banay ni Perez, nga gipanganak ni Tamar kang Juda, sa kaliwat nga ihatag ni Jehova kanimo gikan niining batan-ong babaye.” (Ruth 4:12) Si Perez nalista usab nga lakip sa mga kagikan ni Jesu-Kristo.—Mateo 1:1-3; Lucas 3:23-33.