Mga Saad nga Imong Masaligan

ANG manalagna sa Diyos nga si Miqueas nahibalo nga ang mga saad kasagarang dili masaligan. Sa iyang adlaw, bisan ang labing suod nga mga higala dili kanunayng masaligan nga motuman sa ilang mga panaad. Busa mipasidaan si Miqueas: “Ayaw ibutang ang inyong pagtuo sa inyong isigkatawo. Ayaw kamo pagsalig sa usa ka suod nga higala. Bantayi ang pultahan sa imong baba gikan kaniya nga nagpauraray sa imong sabakan.”—Miqueas 7:5.

Gitugotan ba ni Miqueas kining makapasubo nga kahimtang nga maghimo kaniyang maduhaduhaon sa tanang saad? Wala! Gipasundayag niya ang bug-os nga pagsalig sa mga saad sa iyang Diyos nga si Jehova. “Bahin kanako,” misulat si Miqueas, “magalantaw ako kang Jehova. Magpakita ako ug mahulatong tinamdan sa Diyos sa akong kaluwasan.”—Miqueas 7:7.

Nganong aduna may ingon nianang pagsalig si Miqueas? Tungod kay siya nahibalo nga kanunayng tumanon ni Jehova ang iyang saad. Ang tanang butang nga gipanumpa sa Diyos sa mga katigulangan ni Miqueas natuman gayod. (Miqueas 7:20) Ang pagkamatinud-anon ni Jehova kanhi naghatag kang Miqueas  ug tinuod nga rason sa pagtuo nga Iyang tumanon ang Iyang saad sa umaabot.

“Walay Usa ka Pulong . . . nga Napakyas”

Pananglitan, nahibalo si Miqueas nga giluwas ni Jehova ang mga Israelinhon gikan sa pagkaulipon sa Ehipto. (Miqueas 7:15) Si Josue, kinsa nakasinati sa maong kaluwasan, nagdasig sa iyang mga isigka-Israelinhon sa pagtuo sa tanang saad sa Diyos. Pinasukad sa unsa? “Kamo nahibalo pag-ayo sa bug-os ninyong kasingkasing ug sa bug-os ninyong kalag,” gipahinumdoman sila ni Josue, “nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.”—Josue 23:14.

Ang mga Israelinhon nahibalo nga si Jehova nakahimo ug katingalahang mga butang alang kanila. Gituman niya ang iyang saad sa ilang mahinadlokon-sa-Diyos nga katigulangan nga si Abraham nga ang iyang kaliwat mahimong sama ka daghan sa mga bituon ug manag-iya sa yuta sa Canaan. Giingnan usab ni Jehova si Abraham nga ang iyang mga kaliwat mag-antos sulod sa 400 ka tuig apan mobalik sa Canaan “sa ikaupat nga kaliwatan.” Kining tanan nahitabo.—Genesis 15:5-16; Exodo 3:6-8.

Giabiabi pag-ayo ang mga Israelinhon didto sa Ehipto sa mga adlaw ni Jose nga anak ni Jacob. Sa ulahi, sila linuog nga giulipon sa mga Ehiptohanon, apan sama sa gisaad sa Diyos, sulod sa yugto sa upat ka sunodsunod nga kaliwatan gikan sa panahon nga sila misulod sa Ehipto, kining maong mga kaliwat ni Abraham gipagawas gikan sa pagkaulipon sa Ehipto. a

Latas sa misunod nga 40 ka tuig, ang mga Israelinhon dunay dugang pamatuod nga si Jehova kanunayng nagtuman sa iyang mga saad. Sa dihang ang mga Amalekanhon milansad ug dili-makataronganong pag-atake batok sa mga Israelinhon, ang Diyos nakig-away alang sa iyang katawhan ug gipanalipdan sila. Iyang gitagbaw ang tanan nilang materyal nga mga panginahanglan panahon sa ilang 40-ka-tuig nga panaw sa kamingawan ug sa ngadtongadto nanimuyo sa Yutang Saad. Samtang gisubli ni Josue ang kasaysayan sa mga pakiglabot ni Jehova niining mga kaliwat ni Abraham, siya masaligong nakaingon: “Walay saad nga napakyas sa tanang maayong saad nga gisaad ni Jehova ngadto sa balay sa Israel; kining tanan natuman.”—Josue 21:45.

Palig-ona ang Imong Pagsalig sa mga Saad sa Diyos

Sa unsang paagi imong mapalig-on ang imong pagtuo sa mga saad ni Jehova, sama kang Miqueas ug Josue? Buweno, sa unsang paagi maugmad nimo ang imong pagsalig sa uban? Imo silang sination kutob sa imong mahimo. Pananglitan, mahibaloan nimo kon unsa sila ka kasaligan pinaagi sa pag-obserbar nga sila maningkamot nga motuman gayod sa ilang mga saad. Samtang modaghan ang imong nahibaloan bahin sa maong mga tawo, anam-anam nimong maugmad ang imong pagsalig kanila. Mahimo usab nimo kana maylabot sa pagpalig-on sa imong pagtuo sa mga saad sa Diyos.

Ang usa ka paagi nga imong mahimo kini mao ang pagpamalandong sa kalalangan ug sa mga balaod nga nagmando niini. Ang mga siyentipiko nagsalig niining mga balaora, sama nianang nagmando sa paagi nga ang usa ka selula sa tawo mabahin ug modaghan aron makapatunghag trilyontrilyong selula nga naglangkob sa imong lawas. Sa pagkatinuod, ang mga balaod nga naggahom sa kinaiya sa materyal nga substansiya ug  enerhiya sa tibuok uniberso gimugna gayod sa usa ka kasaligan kaayong Magbabalaod. Makasalig ka gayod sa iyang mga saad, maingon nga makasalig ka sa mga balaod nga nagmando sa iyang mga linalang.—Salmo 139:14-16; Isaias 40:26; Hebreohanon 3:4.

Pinaagi sa manalagnang si Isaias, nga katalirongan ni Miqueas, gigamit ni Jehova ang pagkaregular sa mga panahon ug ang kahibulongang siklo sa tubig sa pag-ilustrar sa pagkakasaligan sa iyang pulong. Moulan kada tuig. Matumog niini ang yuta ug tungod niini ang mga tawo makapugas ug binhi ug makaani sa abot. Maylabot niini, si Jehova nag-ingon: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga niini ug magpasalingsing, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:10, 11.

Seguradong mga Saad Bahin sa Paraiso

Ang pagsusi sa kalalangan makapalig-on sa imong pagsalig sa Maglalalang, apan aduna pay gikinahanglan kon buot nimong makakat-on bahin sa mga saad nga nalakip sa “pulong nga mogula gikan sa [iyang] baba.” Aron mahibaloan kining mga saara ug sa ingon makasalig ka niana, kinahanglang susihon nimo ang inspirado-sa-Diyos nga Kasulatanhong rekord sa katuyoan sa Diyos alang sa yuta ug sa iyang mga pakiglabot sa mga tawo.—2 Timoteo 3:14-17.

Si manalagnang Miqueas may pagsalig sa mga saad ni Jehova. Mas daghan pa gani ang inspiradong rekord sa Diyos nga imong mabatonan kay sa iya ni Miqueas. Samtang imong basahon ang Bibliya ug palandongon kana, ikaw usab makaugmad ug pagtuo sa katumanan sa mga saad sa Diyos. Kining mga saara naglangkit dili lang sa kinaiyanhong mga kaliwat ni Abraham kondili sa tanang katawhan. Si Jehova nagsaad sa maong mahinadlokon-sa-Diyos nga patriarka: “Pinaagi sa imong binhi ang tanang nasod sa yuta tinong magapanalangin sa ilang kaugalingon tungod kay ikaw namati sa akong tingog.” (Genesis 22:18) Ang pangunang bahin sa “binhi,” o kaliwat, ni Abraham mao ang Mesiyas, si Jesu-Kristo.—Galacia 3:16.

Pinaagi kang Jesu-Kristo, paneguroon ni Jehova nga modangat ang mga panalangin ngadto sa masinugtanong katawhan. Ug unsa may gisaad sa Diyos nga iyang himoon sa atong panahon? Ang Miqueas 4:1, 2 nagtubag pinaagi niining matagnaong mga pulong: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang mga katawhan magaganayan. Ug daghang kanasoran ang moadto gayod ug moingon: ‘Umari kamo, ug manungas kita ngadto sa bukid ni Jehova ug ngadto sa balay sa Diyos ni Jacob; ug siya magatudlo kanato bahin sa iyang mga dalan, ug kita magalakaw sa iyang mga alagianan.’”

Kadtong makakat-on bahin sa mga dalan ni Jehova ‘magasalsal sa ilang mga espada nga mga punta sa daro, ug sa ilang mga bangkaw nga mga galab.’ Ang bisan unsang mga kiling sa pagpakiggubat mahanaw na. Sa dili madugay ang yuta mapuno sa matarong nga mga tawo, ug walay usa nga makapakurog kanila sa kalisang. (Miqueas 4:3, 4) Oo, ang Pulong sa Diyos nagsaad nga ilalom sa pagmando sa Gingharian pinaagi ni Jesu-Kristo, paphaon ni Jehova gikan sa yuta ang tanang malupigon.—Isaias 11:6-9; Daniel 2:44; Pinadayag 11:18.

Bisan kadtong nag-antos ug namatay tungod sa pagrebelde sa tawo batok sa Diyos pagabanhawon nga may kalaoman nga mabuhing walay kataposan  sa yuta. (Juan 5:28, 29) Si Satanas ug ang iyang mga demonyo, ang mga tigpasiugda sa pagkadaotan, mahanaw na unya, ug ang mga epekto sa sala ni Adan mawala na pinaagi sa halad lukat ni Jesus. (Mateo 20:28; Roma 3:23, 24; 5:12; 6:23; Pinadayag 20:1-3) Ug unsa unyay kahimtang sa masinugtanong katawhan? Aw, sila pagapanalanginan ug kinabuhing walay kataposan diha sa hingpit nga panglawas sa usa ka paraisong yuta!—Salmo 37:10, 11; Lucas 23:43; Pinadayag 21:3-5.

Pagkaanindot nga mga saad! Apan makatuo ka ba niana? Siyempre makatuo ka niana. Kini dili mga saad sa mga tawo nga tingali may maayong mga katuyoan apan walay gahom sa pagtuman niana. Kini maoy mga saad sa Diyos nga Labing Gamhanan, kinsa dili makabakak ug kinsa “dili langaylangayan mahitungod sa iyang saad.” (2 Pedro 3:9; Hebreohanon 6:13-18) Ikaw bug-os nga makasalig sa tanang saad nga anaa sa Bibliya, tungod kay ang Tuboran niini mao si “Jehova nga Diyos sa kamatuoran.”—Salmo 31:5.

[Footnote]

[Blurb sa panid 6]

“Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas.”—JOSUE 23:14

[Mga hulagway sa panid 4, 5]

Gituman ni Jehova ang iyang mga saad sa Israel didto sa Pulang Dagat ug sa kamingawan

[Mga hulagway sa panid 7]

Gituman ni Jehova ang iyang saad kang Abraham. Ang iyang Binhi, si Jesu-Kristo, magdala ug mga panalangin sa katawhan