Kon Unsaon Nimo Pagtagbaw ang Imong Espirituwal nga mga Panginahanglan

“SA MIAGING siglo, kapin sa 300 ka basahon ang nasulat bahin sa papel sa espirituwalidad diha sa trabahoan—gikan sa Jesus CEO ngadto sa The Tao of Leadership—nga gipamaligya diha sa mga tindahag basahon,” nag-ingon ang U.S.News & World Report. Kining maong kiling nagpakita lamang sa kamatuoran nga diha sa daghang datong kayutaan, daghan ang gigutom sa espirituwal nga giya sa kinabuhi. Nagkomento bahin niini, ang magasin bahin sa negosyo nga Training & Development nag-ingon: “Sa panahon nga ang teknolohiya mag-impluwensiya sa tanang bahin sa atong kinabuhi, kita mangita sa dulot nga kahulogan ug katuyoan sa kinabuhi, ug sa mas dakong katagbawan sa kaugalingon.”

 Apan, asa ka makakaplag ug makapatagbaw nga espirituwal nga giya? Sa nangaging panahon, ang mga tawo misalig sa establisadong relihiyon sa pagtabang kanila sa pagkaplag sa “dulot nga kahulogan” ug “katuyoan” sa kinabuhi. Karon, daghang tawo mitalikod na sa organisadong relihiyon. Nakaplagan sa usa ka surbi sa 90 ka de-ranggong mga manedyer ug mga ehekutibo nga “ang mga tawo naghimog tinong kalainan tali sa relihiyon ug espirituwalidad,” nag-ingon ang Training & Development. Ang mga gisurbi nag-isip sa relihiyon ingong “di-matinugoton ug makapabahinbahin,” samtang ang espirituwalidad gisabot ingong “malukpanon ug malangkobon.”

Daghang batan-on diha sa dili-relihiyosong mga katilingban, sama sa Australia, New Zealand, United Kingdom, ug Uropa, nakakita usab sa kalainan tali sa relihiyon ug espirituwalidad. Si Propesor Ruth Webber, nga nagsulat diha sa Youth Studies Australia, miingon: “Kadaghanan sa mga batan-on nagtuog Diyos, o ubang matang sa labaw-tawhanong puwersa apan sila wala mag-isip sa simbahan ingong hinungdanon o mapuslanon sa pagpahayag sa ilang espirituwalidad.”

Ang Matuod nga Relihiyon Magpalambo sa Espirituwalidad

Masabtan kining maduhaduhaong panglantaw bahin sa relihiyon. Daghang relihiyosong mga organisasyon ang nalangkit pag-ayo sa politika ug moral nga pagkasalingkapaw ug nabulit sa inosenteng dugo nga giula diha sa di-maihap nga relihiyosong mga gubat. Apan, bisan tuod nagsalikway sa relihiyosong mga organisasyon nga nahugawan sa pagkasalingkapaw ug panglimbong, ang pipila ka tawo nasayop sa ilang pagsalikway usab sa Bibliya, nga abi nilag nagkonsentir sa maong mga buhat.

Sa pagkatinuod, ang Bibliya nagsaway sa pagkasalingkapaw ug pagkamalapason. Giingnan ni Jesus ang relihiyosong mga lider sa iyang adlaw: “Alaot kamo, mga eskriba ug mga Pariseo, mga salingkapaw! tungod kay kamo samag pinaputi nga mga lubnganan, nga sa panggawas sa pagkatinuod matahom tan-awon apan sa sulod puno sa mga bukog sa patayng mga tawo ug sa tanang matang sa kahugawan. Nianang paagiha kamo usab, sa panggawas, matarong tan-awon sa mga tawo, apan sa sulod kamo puno sa pagkasalingkapaw ug kalapasan.”—Mateo 23:27, 28.

Dugang pa, ang Bibliya nagdasig sa mga Kristohanon nga mahimong neyutral sa tanang politikanhong kalihokan. Inay agdahon ang mga magtutuo nga magpinatyanay, kini nagsugo kanila nga mahimong andam nga mamatay alang sa usag usa. (Juan 15:12, 13; 18:36; 1 Juan 3:10-12) Inay mahimong “di-matinugoton ug makapabahinbahin,” ang matuod nga relihiyon, nga gipasukad diha sa Bibliya, maoy “malangkobon.” Si apostol Pedro miingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Ang Bibliya—Usa ka Kasaligang Giya Alang sa Espirituwal nga Kahimsog

Ang Bibliya nagsugilon kanato nga ang mga tawo gilalang sumala sa larawan sa Diyos. (Genesis 1:26, 27) Bisan tuod wala kini magpasabot nga ang mga tawo nahisama sa Diyos sa pisikal nga paagi, kini nagpasabot nga ang mga tawo may katakos sa pagbanaag sa mga hiyas sa Diyos, lakip na ang kapasidad alang sa espirituwal nga mga butang, o espirituwalidad.

Kay ingon man niana, makataronganon usab ang pagtuo nga ang Diyos maghatag kanato sa mga paagi sa pagtagbaw sa atong espirituwal nga mga panginahanglan, maingon man sa hustong pagtultol aron atong mailhan kon unsay makaayo o makadaot kanato sa espirituwal. Sama nga gilalang sa Diyos ang atong lawas nga may talagsaong pagkadisenyo nga sistema sa imyunidad, nga makapukgo sa sakit ug makatabang kanato nga magpabiling himsog, siya naghatag usab kanato ug tanlag, o tingog diha sa galamhan, nga makatabang kanato sa paghimog maayong mga desisyon ug sa paglikay sa mga buhat nga makadaot sa pisikal ug espirituwal nga paagi. (Roma 2:14, 15) Sa ato nang nasayran, aron moobra ang atong sistema sa imyunidad, kini angayng mapakaon ug maayo. Sa samang paagi, aron molihok ang atong tanlag, kinahanglang pakaonon nato kini sa makapahimsog nga espirituwal nga pagkaon.

Sa pag-ila sa matang sa pagkaon nga magpahimsog nato sa espirituwal, si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Ang mga pulong ni Jehova narekord diha sa Bibliya, ug kini “mapuslanon sa pagpanudlo, sa pagpamadlong, sa pagpanul-id sa mga butang.” (2 Timoteo 3:16) Busa, atong  responsabilidad nga maningkamot sa pagpahimulos nianang espirituwal nga pagkaon. Ang gidak-on sa atong pagkahibalo bahin sa Bibliya ug pagpaningkamot sa pagpadapat sa mga prinsipyo niini sa atong kinabuhi, sa maong gidak-on usab nga kita makabatog kaayohan sa espirituwal ug pisikal nga paagi.—Isaias 48:17, 18.

Takos ba Kini sa Paningkamot?

Tinuod, nagkinahanglag panahon ang pagpauswag sa atong espirituwal nga kahimsog pinaagi sa pagtuon sa Bibliya; ug morag ang mga tawo walay ekstrang panahon sa pagbuhat niana. Apan ang mga ganti takos sa paningkamot! Matikdi ang pipila ka puliking propesyonal nga mga tawo nga mosaysay kon nganong ang paggahin ug panahon sa pag-atiman sa ilang espirituwal nga kahimsog hinungdanon alang kanila.

Si Marina, usa ka medikal nga doktor, miingon: “Wala gayod ako maghunahuna bahin sa akong espirituwalidad hangtod nga ako nagtrabaho sa ospital ug natandog pag-ayo sa pag-antos sa uban. Dayon akong naamgohan nga kinahanglan nakong ilhon ug tagbawon ang akong espirituwal nga panginahanglan aron mabatonan ko ang katagbawan ug kalinaw, kay ang dagan sa kinabuhi ug ang panginahanglan sa pag-atiman sa mga kabalaka sa mga tawo mahimong bug-at kaayo alang sa usa nga sama nakog trabaho.

“Karon ako nagtuon sa Bibliya uban sa mga Saksi ni Jehova. Kini nga pagtuon nakatabang kanako sa pagsusi sa akong mga lihok ug motibo diha sa makapalig-ong paagi ug pagbansay sa akong hunahuna nga mahimong mas positibo, aron mahuptan nakong timbang ang akong kinabuhi. Ako nakakaplag ug dakong katagbawan sa akong sekular nga karera. Apan ang akong pagtuon sa Bibliya maoy nakapalambo sa akong emosyonal nga kahimsog, nga nakatabang kanako sa pagkontrolar sa negatibong mga pagbati, pagpamenos sa tensiyon, ug pagkahimong mas mapailobon ug mabination ngadto sa mga tawo. Ang pagpadapat sa mga prinsipyo sa Bibliya nagmapuslanon usab sa akong kaminyoon. Mas hinungdanon pa, nailhan nako si Jehova ug nakasinati, sa gamayng sukod, sa libreng paglihok sa iyang espiritu, nga nakapahimo sa akong kinabuhi nga mas makahuloganon.”

Si Nicholas, usa ka arkitektural nga tigdisenyo, miingon: “Sa wala pa ako magtuon sa Bibliya uban sa mga Saksi ni Jehova, ako walay interes sa espirituwal nga mga butang. Ang akong tumong sa kinabuhi mao lamang ang pagpalampos sa akong gipiling propesyon. Ang akong pagtuon sa Bibliya nagtudlo kanako nga ang kinabuhi naglakip ug labaw pa kay sa propesyon ug ang pagbuhat sa kabubut-on ni Jehova magdalag tinuod ug dumalayon nga kalipay.

“Tinuod nga ang akong sekular nga karera nakapatagbaw kanako, apan ang Bibliya mao ang nagtudlo kanako sa kahinungdanon sa pagpayano kanunay sa kinabuhi pinaagi sa pag-una sa espirituwal nga mga butang. Sa pagbuhat niana, ang akong asawa ug ako nakalikay sa daghang kapit-os gumikan sa materyalistikanhong estilo sa kinabuhi. Nakabaton usab kamig daghang tinuod nga mga higala pinaagi sa among pakigsandurot niadtong adunay samang espirituwal nga panglantaw sa kinabuhi.”

Si Vincent, usa ka abogado, miingon: “Ang maayong sekular nga karera makahatag ug usa ka sukod sa katagbawan. Apan, akong nakaplagan nga labaw pa ang gikinahanglan aron mabatonan ang kalipay ug katagbawan. Sa wala pa ako makahibalo sa pagtulon-an sa Bibliya bahin niini, akong mahinumdoman nga sa kalit ako makaamgo sa pagkaway-pulos sa kinabuhi —ang pagkatawo, pagtubo, pagminyo, pagpanarbaho aron makatagana sa materyal nga panginahanglan sa pagmatuto sa mga anak, sa pagbansay kanila sa pagsunod sa samang siklo sa kinabuhi, ug sa kataposan sa pagkatigulang ug kamatayon.

“Human na lamang sa akong pagtuon sa Bibliya uban sa mga Saksi ni Jehova nga ako nakadawat sa makapatagbawng mga tubag sa akong mga pangutana bahin sa katuyoan sa kinabuhi. Ang akong pagtuon sa Bibliya nakapaarang kanako sa pagkaila kang Jehova ingong usa ka persona ug nakaugmad ug dulot nga gugma kaniya. Nahimo kining sukaranan aron akong mahuptan ang usa ka himsog nga espirituwal nga panglantaw samtang ako naningkamot sa pagpahiuyon sa akong kinabuhi sa kon unsay akong nahibaloan nga maoy iyang katuyoan. Karon, ako ug ang akong asawa mibatig katagbawan sa pagkahibalo nga among gigamit ang among kinabuhi diha sa labing makahuloganong paagi nga posible.”

Ikaw usab mobati nga adunay katuyoan ug kahulogan ang imong kinabuhi pinaagi sa pagtuon sa Bibliya. Ang mga Saksi ni Jehova malipay sa pagtabang kanimo. Sama kang Marina, Nicholas, ug Vincent, ikaw magmatagbawon usab pinaagi sa pagkat-on bahin kang Jehova ug sa iyang mga katuyoan alang sa katawhan sa katibuk-an ug alang kanimo ingong indibiduwal. Mabatonan mo dili lamang ang kalipay sa pagtagbaw sa imong espirituwal nga mga panginahanglan karon kondili mabatonan mo usab ang palaaboton sa pagpahimulos sa walay-kataposang kinabuhi diha sa hingpit nga pisikal nga kahimsog—usa ka palaaboton nga bukas lamang alang niadtong “mahunahunaon sa ilang espirituwal nga panginahanglan.”—Mateo 5:3.

Ang usa ka paagi sa pag-ugmad sa atong espirituwalidad maoy pinaagi sa pag-ampo. Gigahinan ug panahon ni Jesus ang pagtudlo sa iyang mga tinun-an kon unsaon pag-ampo, nga naghatag kanila sa naandang pag-ampo nga gitawag ug Amahan Namo. Unsay kahulogan sa maong pag-ampo alang kanimo karon? Sa unsang paagi ikaw makabatog kaayohan gikan niana? Imong makaplagan ang mga tubag diha sa mosunod nga duha ka artikulo.

[Mga hulagway sa panid 6]

Marina

[Mga hulagway sa panid 7]

Nicholas

[Mga hulagway sa panid 7]

Vincent