Maminatud-ong Tanlag

SAMTANG mipauli sa iyang balay gikan sa trabaho usa ka adlaw niana, si Charles, nga empleyado sa usa ka unibersidad sa Kenya, nawad-an sa iyang cell phone. Sa Kenya, usa gihapon kini ka mahal ug luho nga butang.

“Wala ko magdahom nga duna pay mouli niini,” matod ni Charles. Apan, pipila ka adlaw sa ulahi, nakurat siya sa pagkadawat ug tawag sa telepono gikan sa sangang buhatan sa mga Saksi ni Jehova sa Kenya. Dili siya makatuo sa iyang nadungog sa dihang giingnan siya sa pag-adto ug pagkuha sa iyang cell phone! Usa diay ka bug-os-panahong ministro sa mga Saksi ni Jehova ang nakasakay ni Charles ug maoy nakakita sa maong cell phone. Sa paningkamot nga makaplagan ang tag-iya, gidala sa ministro ang maong cell phone ngadto sa sangang buhatan, ug ang boluntaryong mga trabahante didto sa kataposan nakakontak kang Charles pinaagi sa pagsusi sa mga numero nga gipakita diha sa cell phone.

“Mapasalamaton ako sa mga paningkamot sa pagkontak kanako bisan pa sa mga kalisod nga nalangkit,” matod pa ni Charles diha sa iyang sulat ngadto sa sangang buhatan. “Tim-os akong nagpasalamat sa mga membro sa inyong organisasyon nga maoy nakakita sa cell phone, nangita kanako nga tag-iya, ug nag-uli niana. Lisod ang pagpangitag matinud-anong tawo karon, apan makapadasig nga aduna kitay pipila nga mibarog ingong matuod nga mga Saksi ni Jehova nga Diyos.”

Ang mga Saksi ni Jehova sa bisan diin nailhan sa ilang kamatinud-anon. Ilang gisundog si apostol Pablo, nga miingon: “Kami masaligon nga kami may maminatud-ong tanlag, sanglit buot namong magmaminatud-on sa tanang butang.” (Hebreohanon 13:18; 1 Corinto 11:1) Ilang nasabtan nga ang maong panggawi maghimaya kang Jehova nga Diyos, sama sa giingon ni Jesus: “Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.”—Mateo 5:16.