Sugilanon sa Kinabuhi

Nagtagamtam sa Mahigugmaong-kalulot ug Pag-atiman ni Jehova

SUMALA SA GIASOY NI FAY KING

Buotang mga tawo ang akong mga ginikanan, apan sama sa daghan pang uban, sila walay gana sa relihiyon. Ang akong Mama moingon: “Duna gayoy Diyos, kay kon wala kinsay naghimo sa mga bulak, ug kinsay naghimo sa mga kahoy?” Apan kutob ra dinha ang iyang panghunahuna bahin sa relihiyon.

ANG akong Papa namatay sa 1939 sa 11 pa ang akong edad, ug nagpuyo ako uban sa akong inahan sa Stockport, sa habagatan lang sa Manchester, Inglaterra. Gusto gayod akong makabaton ug kahibalo bahin sa akong Maglalalang ug nagtahod sa Bibliya, bisag wala akoy hibangkaagan bahin niana. Busa midesidir ako sa pagdangop sa Church of England aron sa pagsusi kon unsay ikatanyag niini.

Ang mga seremonya sa simbahan walay epekto nako, apan sa dihang basahon ang mga Ebanghelyo, ang mga pulong ni Jesus nakapakombinsir nako nga tinuod gayod ang Bibliya. Sa mahinumdom ug balik bahin niini, morag katingalahan nga ako wala gayod mobasa ug Bibliya. Bisan sa ulahi, sa dihang gitagaan ako sa usa ka higala sa pamilya ug “Bag-ong Tugon” sa modernong hubad, wala gayod ako mogahin ug panahon sa pagbasa niini.

Ang pagsugod sa Gubat sa Korea sa 1950 nakapahunahuna kanako. Mokaylap kaha ang gubat, sama sa Gubat sa Kalibotan II? Kon mokaylap man ugaling kini, sa unsang paagi masunod nako ang sugo ni Jesus nga higugmaon nako ang akong mga kaaway? Apan, makaako kaha ako nga magtindog lang ug magtan-aw nga sulngon sa mga tawo ang akong nasod ug walay himoon sa pagsanta kanila? Kon himoon ko kana,  naglikay ako sa akong responsibilidad. Bisag naglibog, kombinsido ako nga ang tubag sa tanan nakong mga pangutana anaa sa Bibliya, bisag wala akoy ideya kon unsaon o asa kini pangitaon.

Nangita sa Kamatuoran Didto sa Australia

Sa 1954 ako ug ang akong inahan mihukom sa paglalin ngadto sa Australia, diin didto nagpuyo ang akong igsoong babaye nga si Jean. Paglabay sa pipila ka tuig, giingnan ako ni Jean nga iyang gihangyo ang mga Saksi ni Jehova sa pagduaw nako tungod kay siya nahibalo nga ako interesado sa Bibliya ug nga ako mosimba. Gusto niyang masayod kon unsay akong hunahuna bahin kanila. “Wala ako mahibalo kon ang ilang mga pagpatin-aw husto ba o dili,” siya miingon nako, “apan labing menos sila dunay mga katin-awan, nga mas daghan kay sa ubang mga relihiyon.”

Si Bill ug Linda Schneider, ang magtiayon nga miduaw nako, maoy buotan nga magtiayon. Sila hapit nang mag-70 ang edad ug dugay nang nahimong mga Saksi. Sila nakatrabaho sa estasyon sa radyo nga gidumala sa mga Saksi ni Jehova sa Adelaide, ug sa dihang gidili ang buluhatong pagsangyaw sa Australia panahon sa gubat sa Kalibotan II, sila misulod ingong bug-os-panahong mga magwawali. Apan, bisan pag matinabangon si Bill ug Linda nako, nagpadayon ako sa pagsusi sa nagkalainlaing mga relihiyon.

Gidala ako sa usa ka kauban sa trabaho sa tigom sa ebanghelisador nga si Billy Graham, diin human niana dihay pipila kanamo nga nakigkita sa usa ka klerigo nga nangaghat ug mga pangutana. Gisukna nako ang usa ka pangutana nga nakapatugaw nako: “Sa unsang paagi ang usa ka tawo mahimong Kristohanon ug sa samang paagi maghigugma sa iyang mga kaaway kon siya moapil ug mopatay kanila diha sa gubat?” Ang tibuok grupo dihadiha naukay—kanang pangutanaha dayag nga nakapabalaka kanilang tanan! Sa ulahi, ang klerigo miingon: “Wala ako mahibalo sa tubag niana. Ako pa kanang gihunahuna.”

Kasamtangan, ang akong pagtuon sa Bibliya uban kang Bill ug Linda nagpadayon, ug sa Septiyembre 1958, ako gibawtismohan. Determinado ako sa pagsunod sa panig-ingnan sa akong mga magtutudlo, busa sa Agosto sa pagkasunod tuig, nagpalista ako ingong regular payunir, nga usa ka bug-os-panahong magwawali. Paglabay sa walo ka bulan gidapit ako sa pagkaespesyal payunir. Malipayon kaayo ako sa dihang nahibalo nga ang akong igsoon, si Jean, miuswag usab sa iyang pagtuon ug bawtismado na!

Usa ka Pultahan sa Kahigayonan Nabuksan

Nag-alagad ako sa usa sa mga kongregasyon sa Sydney ug nagdumalag ubay-ubayng mga pagtuon sa Bibliya diha sa balay. Usa ka adlaw niana nakahibalag ako ug usa ka retiradong klerigo sa Church of England ug gipangutana siya kon unsay ikaingon sa simbahan bahin sa kataposan sa kalibotan. Bisag giingnan niya ako nga nagtudlo siya sa doktrina sa simbahan sulod sa 50 ka tuig, ang iyang tubag nakapakurat nako: “Kinahanglang manukiduki pa ako bahin niana tungod kay dili ako sama sa mga Saksi ni Jehova nga suheto kaayo sa Bibliya.”

Wala magdugay human niini, dihay gipanawag nga mga boluntaryo aron sa pag-alagad sa Pakistan. Miaplay ako nga wala mahibalo nga walay dalaga ang ipadala, mga ulitawo o mga magtiayon lang ang ipadala. Seguro ang akong aplikasyon gipadala ngadto sa among hedkuwarter sa Brooklyn tungod kay nakadawat ako sa ulahi ug sulat nga nagsulti kanako nga nagkinahanglan ug boluntaryo ang Bombay (gitawag na karon ug Mumbai), India, kon gusto ko nga modawat niini. Kana nahitabo sa 1962. Akong gidawat kini ug miestar sa Bombay sulod sa 18 ka bulan una pa mibalhin ngadto sa Allahabad.

Dayon nagsugod ako sa pagtuon ug Hindi. Kining maong pinulongan sa India dunay naandang  lagda sa espeling ug paglitok, busa dili kaayo lisod kining tun-an. Apan, makapaluya kaayo kon hangyoon ako sa mga tagbalay sa pagsultig Iningles imbes sa pagsulti sa ilang kaugalingong pinulongan! Apan kining bag-ong nasod dunay makaikag nga mga hagit, ug nalipay ako sa pagpakig-uban sa mga isigka-Saksi nga taga-Australia.

Sa bata pa, naghunahuna ako nga magminyo, apan sa panahon nga ako gibawtismohan, mas okupado ako sa pag-alagad kang Jehova kay sa paghunahuna bahin niana. Apan, karon, nagsugod ako sa pagbati nga nagkinahanglan ako ug usa ka kauban sa kinabuhi. Siyempre, dili ako gusto nga mobiya sa akong langyawng asaynment, busa giampo ko kining bahina ngadto kang Jehova ug dayon gikalimtan ko kini.

Usa ka Wala Damhang Panalangin

Si Edwin Skinner maoy nagdumala sa buluhaton sa sanga sa India niadtong panahona. Siya nakatungha sa ikawalong klase sa Watchtower Bible School of Gilead sa 1946 duyog sa ubang matinumanong mga igsoon, apil kang Harold King ug Stanley Jones, nga giasayn ngadto sa Tsina. a Sa 1958, si Harold ug si Stanley gibartolina tungod sa ilang buluhatong pagsangyaw sa Shanghai. Sa dihang gibuhian si Harold sa 1963, si Edwin misulat kaniya. Si Harold mitubag human nga mibalik sa Hong Kong gikan sa iyang mga biyahe sa Tinipong Bansa ug sa Britanya nga naghisgot nga siya gustong magminyo. Iyang gisultihan si Edwin nga iyang giampo kining bahina samtang diha sa prisohan, ug iyang gipangutana si Edwin kon may kaila ba siya nga usa ka Saksi nga mahimong maayong asawa.

Sa India ang kadaghanang kaminyoon gisabot nang daan, ug si Edwin kanunayng hangyoon nga maoy mohikay niini, apan dili gayod siya mosugot. Busa iyang gitunol ang sulat ni Harold ngadto kang Ruth McKay, kansang bana, si Homer, maoy usa ka nagapanawng magtatan-aw. Sa ngadtongadto, gisulatan ako ni Ruth nga nag-ingon nga usa ka misyonaryo nga dugay na sa kamatuoran nangitag asawa, ug iya akong gipangutana kon interesado ba ako sa pagsulat kaniya. Wala niya ako sultihi kon kinsa ang brader o bisan unsa bahin kaniya.

Siyempre, walay nakahibalo bahin sa akong pag-ampo nga nangitag ikauban sa kinabuhi, gawas kang Jehova, ug ang akong unang reaksiyon maoy pagsalikway sa ideya. Ugaling, sa sige nakog hunahuna niana, mas mituo na hinuon ako nga si Jehova panagsa rang motubag sa atong mga pag-ampo sumala sa paagi nga atong gusto. Busa gitubag nako si Ruth ug miingon nga basta dili ako obligahon nga magpakasal kaniya, mahimo niyang sultihan ang brader sa pagsulat pag-usab. Ang ikaduhang sulat nga gikan kang Harold King maoy para nako.

 Ang mga letrato ni Harold ug ang iyang sugilanon migula sa nagkalainlaing mantalaan ug mga magasin human nga gibuhian siya sa prisohan sa Tsina. Niining higayona, nainila siya sa tibuok kalibotan, apan ang iyang rekord sa matinumanong teokratikanhon nga pag-alagad ang nakapaikag kanako. Busa nagsinulatay kami sulod sa lima ka bulan, ug dayon miadto ako sa Hong Kong. Kami nagpakasal sa Oktubre 5, 1965.

Kaming duha gustong magminyo ug magpabilin sa bug-os panahong pag-alagad, ug kay nagkatigulang na man kami, midako ang among panginahanglan ug ikauban labaw sa tanan. Nakakat-on ako sa paghigugma kang Harold, ug sa nakita nako ang buotan ug mahunahunaong batasan sa iyang pagpakig-atubang sa mga tawo ug sa mga problema nga motungha labot sa among pag-alagad, naani niya ang akong lalom nga pagtahod. Sulod sa 27 ka tuig natagamtam namo ang malipayon kaayo nga kaminyoon ug nakadawat ug daghang panalangin gikan sa kamot ni Jehova.

Ang mga Insek kugihan, ug ako nakaangay gayod nila. Sa Hong Kong ang pinulongang gigamit maoy Cantonese, nga usa ka sinultihang Insek nga daghan kaayog tono kay sa Mandarin ug busa mas lisod tun-an. Ako ug si Harold nagsugod sa among minyong kinabuhi diha sa balay sa mga misyonaryo sa sangang buhatan sa mga Saksi ni Jehova, ug dayon kami nag-alagad sa  mga asaynment sa nagkalainlaing bahin sa Hong Kong. Oo, kami malipayon kaayo, apan sa 1976 ang akong panglawas naghatag ug dakong problema.

Pagsagubang sa mga Problema sa Panglawas

Gidugo ako sa daghang bulan, ug ang ihap sa mga selula sa akong dugo kalit nga mius-os. Kinahanglan akong operahan, apan gisultihan ako sa mga doktor sa ospital nga dili sila moopera nga walay dugo tungod kay kon operahan nila ako, posibleng mamatay ako sa komplikasyon tungod sa kakulang ug dugo. Usa ka adlaw niana sa dihang gihisgotan sa mga doktor ang akong kaso, ang mga nars naningkamot sa pagpabag-o sa akong hunahuna, nga nag-ingon nga ako walay katungod sa pag-usik sa akong kinabuhi. Dihay 12 ka operasyon nga gieskedyul nianang adlawa, 10 niini maoy aborsiyon, apan akong namatikdan nga walay misupak sa mga babayeng nagsabak bahin sa pagpatay sa ilang gisabak.

Sa kataposan, gisulatan ni Harold ang ospital nga wala silay tulubagon kon mamatay man ugaling ako, ug ang mga doktor misugot sa gikinahanglang operasyon. Gidala ako ngadto sa lawak operahanan ug giandam aron ineksiyonan ug anestesya. Apan, sa ineksiyonan na unta ako, ang tig-anestesya mibalibad sa pag-ineksiyon, ug ako gipagawas sa ospital.

Dayon mikonsulta kami ug lain nga gynecologist. Kay nakita niya nga grabe ang akong sakit, siya mitanyag nga moopera siya sa menos nga bayad—basta dili namo isulti kang bisan kinsa kon pilay iyang gisingil kanamo. Malamposon nga iyang gihimo ang operasyon—ug walay pag-abonog dugo. Natagamtam namo ni Harold ang mahigugmaong-kalulot ug pag-atiman ni Jehova niining panahona.

Sa 1992, si Harold nagsakit nga makamatay. Kami mibalhin ngadto sa sangang buhatan ug kami mahigugmaong giatiman didto. Gitapos sa akong minahal nga bana ang iyang yutan-ong kinabuhi sa 1993 sa edad nga 81.

Mipauli sa Inglaterra

Nalipay ako nga nahimong membro sa pamilyang Bethel sa Hong Kong, apan naglisod ako sa pag-antos sa init ug umogong klima. Dayon dihay sulat nga miabot nga wala damha gikan sa hedkuwarter sa Brooklyn, nga nangutana kon, tungod sa akong panglawas, gusto ba akong mobalhin ngadto sa usa ka sanga nga mas daghag pasilidad. Busa sa tuig 2000, gibalhin ako ngadto sa Inglaterra ug miduyog sa pamilyang Bethel sa London. Pagkamahigugmaong tagana kini! Mainiton akong giabiabi, ug malipayon kaayo ako sa akong lainlaing mga asaynment sa trabaho, nga nag-apil sa pag-atiman sa librarya sa Bethel ug sa 2,000 ka libro niini.

Nakig-uban usab ako sa Ininsek nga kongregasyon nga nagtigom sa London, bisan pa niana ang mga butang dinhi lahi na. Karong mga panahona, diyutay na lang ang mga tawo nga naggikan sa Hong Kong apan, hinunoa, naggikan sa Tsina. Sila Mandarin ug sinultihan, ug bag-ong problema kana sa buluhatong pagsangyaw. Sa tibuok nasod dunay mga report nga daghang makaikag nga mga pagtuon sa Bibliya ang gidumala uban sa mga estudyante gikan sa Tsina nga nakatapos na ug kolehiyo ug nagpadayon gihapon sa pagtuon. Sila mga kugihan ug maikagon sa kamatuoran sa Bibliya nga ilang nakat-onan. Makapalipay ang pagtabang kanila.

Sa kahilom sa akong bag-ong pinuy-anan, sagad mamalandong ako sa akong malipayong kinabuhi ug mahibulong gihapon sa mahigugmaong kalulot ni Jehova. Kini makita diha sa tanang butang maylabot sa iyang katuyoan, ug ang iyang pag-atiman sa iyang mga alagad ingong mga indibiduwal dayag kaayo. Ako may dakong katarongan nga magmapasalamaton sa tanan niyang mahigugmaong pag-atiman kanako.—1 Pedro 5:6, 7.

[Footnote]

[Hulagway sa panid 24]

Nag-alagad sa India

[Mga hulagway sa panid 25]

Si Harold King sa 1963 ug nag-alagad sa Tsina sa mga tuig sa 1950

[Mga hulagway sa panid 26]

Sa adlaw sa among kasal sa Hong Kong, Oktubre 5, 1965

[Hulagway sa panid 26]

Uban sa mga membro sa Bethel sa Hong Kong, ang mga Liang sa tunga, ang mga Gannaway sa tuo