Si Jehova Nagtagana sa Atong Adlaw-Adlaw nga mga Panginahanglan
Si Jehova Nagtagana sa Atong Adlaw-Adlaw nga mga Panginahanglan
“Hunong na sa pagkamabalak-on; kay . . . ang inyong Amahan nahibalo nga nagkinahanglan kamo niining mga butanga.”—LUCAS 12:29, 30.
1. Sa unsang paagi si Jehova nagpakaon sa mga mananap?
NAKASUD-ONG ka na ba sukad sa usa ka goryon o laing langgam nga morag nanukatuka lamang sa yuta? Lagmit naghunahuna ka kon unsay makita niana nga makaon pinaagi sa pagtukatuka sa yuta. Sa iyang Wali sa Bukid, gipakita ni Jesus nga kita makakuhag leksiyon sa paagi nga si Jehova nagpakaon sa mga langgam. Siya miingon: “Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. Dili ba kamo labaw pa ug bili kay kanila?” (Mateo 6:26) Sa kahibulongang mga paagi, si Jehova nagtaganag pagkaon sa tanan niyang mga linalang.—Salmo 104:14, 21; 147:9.
2, 3. Unsang espirituwal nga mga leksiyon ang atong makuha gikan sa kamatuoran nga gitudloan kita ni Jesus sa pag-ampo alang sa atong tinapay niining adlawa?
2 Nan, nganong gilakip ni Jesus sa iyang modelong pag-ampo ang hangyo: “Ihatag kanamo karong adlawa ang among tinapay alang niining adlawa.” (Mateo 6:11) Makakuha kita ug makahuloganong espirituwal nga mga pagtulon-an gikan niining yanong hangyo. Una, kini nagpahinumdom kanato nga si Jehova mao ang Dakong Magtatagana. (Salmo 145:15, 16) Ang mga tawo makatanom ug makatikad, apan ang Diyos lamang ang makapatubo sa mga butang, sa espirituwal ug pisikal. (1 Corinto 3:7) Ang atong ginakaon ug ginainom maoy gasa gikan sa Diyos. (Buhat 14:17) Ang paghangyo kaniya sa pagtagana kanato sa atong adlaw-adlaw nga mga panginahanglan nagpakita kaniya nga wala nato ibalewala ang maong mga tagana. Siyempre, ang maong hangyo wala magpasabot nga dili na kita kinahanglang motrabaho kon makahimo kita niana.—Efeso 4:28; 2 Tesalonica 3:10.
3 Ikaduha, ang atong pagpangayo ug “tinapay alang niining adlawa” nagpaila nga kita dili angayng mabalaka pag-ayo bahin sa umaabot. Si Jesus mipadayon sa pag-ingon: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo. Busa, ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka.” (Mateo 6:31-34) Ang pag-ampo ug “tinapay alang niining adlawa” naghatag ug sumbanan sa pagkinabuhing yano nga adunay “diyosnong pagkamahinalaron inubanan sa pagkakontento.”—1 Timoteo 6:6-8.
Espirituwal nga Pagkaon sa Adlaw-Adlaw
4. Unsang mga hitabo sa kinabuhi ni Jesus ug sa mga Israelinhon ang nagpasiugda sa kahinungdanon sa pagkaon ug espirituwal nga pagkaon?
4 Ang atong pag-ampo alang sa tinapay niining adlawa angay usab nga magpahinumdom kanato sa atong panginahanglan sa adlaw-adlaw nga espirituwal nga pagkaon. Bisan tuod gigutom siya pag-ayo human sa dugayng pagpuasa, gipakigbisogan ni Jesus ang tentasyon ni Satanas nga ipahimong tinapay ang mga bato, nga nag-ingon: “Kini nahisulat, ‘Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.’” (Mateo 4:4) Dinhi gikutlo ni Jesus ang manalagnang si Moises, kinsa miingon sa mga Israelinhon: “Gipaubos ka [ni Jehova] ug gipasagdan ka nga gutomon ug gipakaon ka sa mana, nga wala mo hiilhi ni sa imong mga amahan; aron ipaila kanimo nga dili sa tinapay lamang mabuhi ang tawo kondili sa matag pulong gikan sa baba ni Jehova nga ang tawo mabuhi.” (Deuteronomio 8:3) Ang paagi nga si Jehova nagtagana ug mana naghatag sa mga Israelinhon dili lamang sa pisikal nga pagkaon kondili usab sa espirituwal nga mga leksiyon. Ang usa ka leksiyon mao, sila gisugo nga “ang tagsatagsa mamunit sa gidaghanon nga igo kaniya sa matag adlaw.” Kon sila manguhag sobra sa maong adlaw, ang salin mabaho ug udlon. (Exodo 16:4, 20) Apan, wala kini mahitabo sa ikaunom nga adlaw sa dihang sila kinahanglang mamunit ug doble sa inadlaw nga gidaghanon aron matagan-an ang ilang mga panginahanglan alang sa Igpapahulay. (Exodo 16:5, 23, 24) Busa ang mana nagpatisok diha sa ilang hunahuna nga sila kinahanglang motuman ug ang ilang kinabuhi nagdepende dili sa tinapay lamang kondili sa“matag pulong gikan sa baba ni Jehova.”
5. Sa unsang paagi si Jehova nagtagana kanato ug espirituwal nga pagkaon sa adlaw-adlaw?
5 Kita usab kinahanglang mokaon adlaw-adlaw sa espirituwal nga pagkaon nga gitagana ni Jehova pinaagi sa iyang Anak. Tungod niini, gitudlo ni Jesus ang “matinumanon ug maalamong ulipon” aron magtagana ug “pagkaon sa hustong panahon” alang sa panimalay sa pagtuo. (Mateo 24:45) Kanang maong matinumanong ulipon nga matang wala lamang magtagana ug dagayang espirituwal nga pagkaon sa dagway sa mga tabang sa pagtuon sa Bibliya kondili nagdasig usab kanato sa pagbasa sa Bibliya adlaw-adlaw. (Josue 1:8; Salmo 1:1-3) Sama kang Jesus, kita usab mapalig-on sa espirituwal pinaagi sa adlaw-adlaw nga pagpaningkamot sa pagkat-on ug pagtuman sa kabubut-on ni Jehova.—Juan 4:34.
Kapasayloan sa mga Sala
6. Sa unsang mga utang nga kita mangayog pasaylo, ug sa unsang mga kahimtang nga si Jehova andam nga mokanselar niana?
6 Ang sunod nga hangyo diha sa modelong pag-ampo mao kini: “Pasayloa kami sa among mga utang, ingon nga kami nagapasaylo usab sa mga nakautang kanamo.” (Mateo 6:12) Si Jesus wala maghisgot dinhi ug utang nga salapi. Diha sa iyang hunahuna ang pagpasaylo sa atong mga sala. Sa rekord ni Lucas sa modelong pag-ampo, ingon niini ang hangyo: “Pasayloa kami sa among mga sala, kay kami usab magapasaylo sa matag usa nga utangan kanamo.” (Lucas 11:4) Busa, sa dihang kita makasala, sama ra nga kita nakautang kang Jehova. Apan, ang atong mahigugmaong Diyos andam nga ‘mopapas,’ o mokanselar, sa maong utang kon kita sinserong maghinulsol, ‘mobalik,’ ug mangayog pasaylo kaniya pinasukad sa pagtuo sa halad lukat ni Kristo.—Buhat 3:19; 10:43; 1 Timoteo 2:5, 6.
7. Nganong angay kitang mag-ampo adlaw-adlaw alang sa kapasayloan?
7 Gikan sa laing punto-debista, kita makasala kon kita dili makaabot sa mga sukdanan ni Jehova sa pagkamatarong. Tungod sa napanunod nga sala, kitang tanan masayop sa pulong, buhat, ug hunahuna o mapakyas kita sa pagbuhat kon unsay angay natong buhaton. (Ecclesiastes 7:20; Roma 3:23; Santiago 3:2; 4:17) Busa, nahibalo man kita o wala nga kita nakasala sa usa ka adlaw, kinahanglang iapil nato sa atong adlaw-adlaw nga mga pag-ampo ang pagpangayog pasaylo sa atong mga sala.—Salmo 19:12; 40:12.
8. Ang pag-ampo alang sa kapasayloan magpahinabo kanato sa pagbuhat sa unsa, uban ang unsang mapuslanong resulta?
8 Ang pag-ampo alang sa kapasayloan angayng himoon human sa matinud-anong pagsusi-sa-kaugalingon, paghinulsol, ug pagsugid, pinasukad sa pagtuo sa makalukat nga gahom sa giula nga dugo ni Kristo. (1 Juan 1:7-9) Aron mapamatud-an ang pagkasinsero sa atong pag-ampo, kinahanglang paluyohan nato ang atong pagpangayog pasaylo sa “mga buhat nga nahiangay sa paghinulsol.” (Buhat 26:20) Unya makasalig kita sa pagkaandam mopasaylo ni Jehova sa atong mga sala. (Salmo 86:5; 103:8-14) Ang resulta mao ang way-ikatandi nga kalinaw sa hunahuna, “ang kalinaw sa Diyos nga labaw sa tanang panghunahuna,” nga sa baylo “magbantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.” (Filipos 4:7) Apan ang modelong pag-ampo ni Jesus nagtudlo kanato ug labaw pa kon unsay angay natong buhaton aron pasayloon sa atong mga sala.
Aron Pasayloon, Kita Kinahanglang Magpasaylo
9, 10. (a) Unsang katin-awan ang gidugang ni Jesus sa modelong pag-ampo, ug unsay gipasiugda niini? (b) Sa unsang paagi giilustrar pa ni Jesus ang atong panginahanglan nga magmapinasayloon?
9 Makaiikag, ang hangyo nga “pasayloa kami sa among mga utang, ingon nga kami nagapasaylo usab sa mga nakautang kanamo,” mao ang bugtong bahin sa modelong pag-ampo nga gipatin-aw ni Jesus. Human taposa ang pag-ampo, siya midugang: “Kay kon kamo magapasaylo sa mga tawo sa ilang kalapasan, pasayloon usab kamo sa inyong langitnong Amahan; apan kon kamo dili magapasaylo sa mga tawo sa ilang kalapasan, dili usab pasayloon sa inyong Amahan ang inyong kalapasan.” (Mateo 6:14, 15) Busa, giklaro ni Jesus nga ang pagpasaylo ni Jehova kanato nagdepende sa atong pagkaandam nga mopasaylo sa uban.—Marcos 11:25.
10 Sa laing okasyon, si Jesus naghatag ug ilustrasyon nga nagpakita nga kinahanglang magmapinasayloon kita kon buot natong pasayloon kita ni Jehova. Iyang giasoy ang sugilanon bahin sa usa ka hari nga madagayaong nagkanselar sa dako kaayong utang sa usa ka ulipon. Sa ulahi, gipahamtangan sa hari ug bug-at nga silot kining tawhana sa dihang wala niya kanselaha ang mas gamay nga utang sa usa ka isigkaulipon. Gitapos ni Jesus ang iyang ilustrasyon pinaagi sa pag-ingon: “Sa samang paagi makiglabot usab kaninyo ang akong langitnong Amahan kon ang matag usa kaninyo dili magpasaylo sa iyang igsoon gikan sa inyong mga kasingkasing.” (Mateo 18:23-35) Klaro ang leksiyon: Ang utang nga sala nga gipasaylo ni Jehova sa matag usa kanato mas dako gayod kay sa bisan unsang kalapasan nga nahimo ni bisan kinsa batok kanato. Gawas pa, si Jehova nagapasaylo kanato adlaw-adlaw. Nan, segurado nga kita makapasaylo sa panagsang kasal-anan sa uban batok kanato.
11. Unsang tambag nga gihatag ni apostol Pablo ang atong sundon kon buot natong pasayloon kita ni Jehova, uban sa unsang maayong mga resulta?
11 Si apostol Pablo misulat: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efeso 4:32) Ang pagpinasayloay sa usag usa magpalambo sa pakigdait taliwala sa mga Kristohanon. Si Pablo nag-awhag pa: “Ingon nga mga pinili sa Diyos, balaan ug hinigugma, isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.” (Colosas 3:12-14) Kining tanan masabtan diha sa pag-ampo nga gitudlo ni Jesus kanato: “Pasayloa kami sa among mga utang, ingon nga kami nagapasaylo usab sa mga nakautang kanamo.”
Proteksiyon sa Dihang Nailalom sa Tentasyon
12, 13. (a) Unsay dili kahulogan sa sunod-sa-kataposan nga hangyo diha sa modelong pag-ampo? (b) Kinsa ang dakong Manenental, ug unsay kahulogan sa atong pag-ampo nga dili dad-on sa tentasyon?
12 Ang sunod-sa-kataposan nga hangyo diha sa modelong pag-ampo ni Jesus mao kini: “Ayaw kami dad-a ngadto sa tentasyon.” (Mateo 6:13) Gipasabot ba ni Jesus nga kita angayng mohangyo kang Jehova nga dili kita tentalon? Dili kana maoy gipasabot, kay ang disipulong si Santiago giinspirar sa pagsulat: “Sa dihang pagasulayon, dili siya angay moingon: ‘Ako gisulayan sa Diyos.’ Kay ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Dugang pa, ang salmista misulat: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Salmo 130:3) Si Jehova dili maghinamhinam nga masayop kita, ug tinong dili siya mosulay sa pagtental kanato aron maligas kita. Busa, unsay kahulogan niining bahina sa modelong pag-ampo?
13 Ang usa nga naningkamot aron maligas kita, aron mahulog kita sa malipatlipatong mga kaugdahan, ug aron matukob pa gani kita mao si Satanas nga Yawa. (Efeso 6:11) Siya mao ang dakong Manenental. (1 Tesalonica 3:5) Pinaagi sa pag-ampo nga dili dad-on ngadto sa tentasyon, kita naghangyo kang Jehova nga kita dili tugotan nga mahulog sa dihang kita nailalom sa tentasyon. Gihangyo nato siya sa pagtabang kanato nga dili “malupigan ni Satanas,” nga dili madala sa mga tentasyon. (2 Corinto 2:11) Kita nag-ampo nga magpabilin sa “natago nga dapit sa Labing Hataas,” nga makadawat ug espirituwal nga proteksiyon nga gihatag niadtong miila sa pagkasoberano ni Jehova sa tanan nilang ginabuhat.—Salmo 91:1-3.
14. Sa unsang paagi gipasaligan kita ni apostol Pablo nga dili kita talikdan ni Jehova kon kita modangop Kaniya sa dihang kita nailalom sa tentasyon?
14 Makaseguro kita nga kon mao kana ang atong sinserong tinguha, nga gipahayag diha sa atong mga pag-ampo ug sa atong mga lihok, dili gayod kita talikdan ni Jehova. Gipasaligan kita ni apostol Pablo: “Walay tentasyon nga midangat kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.
“Luwasa Kami Gikan sa Usa nga Daotan”
15. Nganong mas hinungdanon kay sukad masukad nga moampo nga luwason gikan sa usa nga daotan?
15 Sumala sa labing kasaligan nga mga manuskrito sa Kristohanon Gregong Kasulatan, ang modelong pag-ampo ni Jesus natapos pinaagi sa mga pulong: “Luwasa kami gikan sa usa nga daotan.” a (Mateo 6:13) Ang proteksiyon batok sa Yawa mas kinahanglanon pa gani niining panahon sa kataposan. Si Satanas ug ang iyang mga demonyo nakiggubat sa dinihogang nahibilin, kinsa “nagabantay sa mga sugo sa Diyos ug may buluhaton sa pagpamatuod bahin kang Jesus,” ug sa ilang mga kauban nga “dakong panon.” (Pinadayag 7:9; 12:9, 17) Si apostol Pedro nagtambag sa mga Kristohanon: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob. Apan barog kamo batok kaniya, malig-on sa pagtuo.” (1 Pedro 5:8, 9) Gusto ni Satanas nga hunongon ang atong buluhatong pagsangyaw, ug pinaagi sa iyang mga ahente dinhi sa yuta—relihiyoso, komersiyal, o politikal man—siya naningkamot sa paghadlok kanato. Apan, kon kita mobarog nga malig-on, si Jehova magaluwas kanato. Ang disipulong si Santiago misulat: “Magpasakop kamo sa Diyos; apan sukli ang Yawa, ug siya mokalagiw gikan kaninyo.”—Santiago 4:7.
16. Unsay magamit ni Jehova sa pagtabang sa iyang mga alagad nga nailalom sa pagsulay?
16 Gitugotan ni Jehova nga tentalon ang iyang Anak. Apan human sukli ni Jesus ang Yawa, nga gigamit ang Pulong sa Diyos ingong proteksiyon, gipadala ni Jehova ang mga manulonda aron sa pagpalig-on kaniya. (Mateo 4:1-11) Sa susama, gamiton ni Jehova ang iyang mga manulonda sa pagtabang kanato kon kita moampo uban ang pagtuo ug maghimo kaniyang atong dalangpanan. (Salmo 34:7; 91:9-11) Si apostol Pedro misulat: “Si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom aron pagalaglagon.”—2 Pedro 2:9.
Ang Bug-os nga Kaluwasan Haduol Na
17. Pinaagi sa paghatag kanato sa modelong pag-ampo, sa unsang paagi gipahimutang ni Jesus ang mga butang sa hustong dapit niini?
17 Sa modelong pag-ampo, gipahimutang ni Jesus ang mga butang sa hustong dapit niini. Ang atong hatagag unang pagtagad mao ang pagbalaan sa dako ug balaan nga ngalan ni Jehova. Tungod kay ang galamiton sa pagpalampos niini mao man ang Mesiyanikong Gingharian, atong iampo nga ang Gingharian moabot aron sa paglaglag sa tanang dili-hingpit nga tawhanong mga gingharian, o mga gobyerno, ug sa pagseguro nga bug-os nga matuman ang kabubut-on sa Diyos didto sa langit maingon man usab sa yuta. Ang atong paglaom nga walay-kataposang kinabuhi sa usa ka paraisong yuta nagdepende sa pagbalaan sa ngalan ni Jehova ug sa pag-ila sa tibuok uniberso sa iyang matarong nga pagkasoberano. Human iampo kining mga butang nga hinungdanon kaayo, makaampo na kita alang sa atong adlaw-adlaw nga mga panginahanglan, kapasayloan sa atong mga sala, ug kaluwasan gikan sa mga tentasyon ug sa mga panglingla sa usa nga daotan, si Satanas nga Yawa.
18, 19. Sa unsang paagi ang modelong pag-ampo ni Jesus motabang kanato sa pagpabiling nagtukaw ug sa paghimo sa atong paglaom nga “malig-on hangtod sa kataposan”?
18 Ang atong bug-os nga kaluwasan gikan sa usa nga daotan ug sa iyang dunot nga sistema sa mga butang nagkaduol na. Nahibalo gayod si Satanas nga siya adunay ‘hamubo na lamang nga panahon’ diin ikapahungaw niya ang iyang “dakong kasuko” dinhi sa yuta, ilabina sa matinumanong mga alagad ni Jehova. (Pinadayag 12:12, 17) Sa daghag-bahin nga tagna “sa kataposan sa sistema sa mga butang,” gitagna ni Jesus ang kulbahinam nga mga hitabo, nga ang uban niana anaa pa sa unahan nato. (Mateo 24:3, 29-31) Sa dihang makita nato kini nga nagakahitabo, ang atong paglaom nga maluwas mas mosanag pa. Si Jesus miingon: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.”—Lucas 21:25-28.
19 Ang mubo nga modelong pag-ampo nga gihatag ni Jesus sa iyang mga tinun-an nagtagana kanato ug kasaligang giya kon unsay ilakip sa atong mga pag-ampo samtang nagkaduol ang kataposan. Hinaot nga magpabilin kitang masaligon nga hangtod sa kataposan, si Jehova magpadayon sa pagtagana kanato sa atong adlaw-adlaw nga mga panginahanglan, sa espirituwal ug materyal. Ang atong mainampoong pagtukaw makapaarang kanato sa ‘pagpangupot pag-ayo sa pagsalig nga atong nabatonan sa sinugdan nga malig-on hangtod sa kataposan.’—Hebreohanon 3:14; 1 Pedro 4:7.
[Footnote]
a Ang ubang karaang mga Bibliya, sama sa King James Version, nagtapos sa Pag-ampo sa Ginoo pinaagi sa gitawag nga pagdayeg sa Diyos: “Kay imo ang gingharian, ug ang gahom, ug ang himaya, hangtod sa kahangtoran. Amen.” Ang The Jerome Biblical Commentary nag-ingon: “Ang maong pagdayeg sa Diyos . . . dili makita diha sa labing kasaligan nga [mga manuskrito].”
Agig Pagsubli
• Unsay gipaila sa atong pagpangayo ug “tinapay alang niining adlawa”?
• Ipatin-aw ang pag-ampo nga “pasayloa kami sa among mga utang, ingon nga kami nagapasaylo usab sa mga nakautang kanamo.”
• Unsay kahulogan sa dihang mohangyo kita kang Jehova nga dili kita dad-on ngadto sa tentasyon?
• Nganong kinahanglan kitang mag-ampo nga ‘luwason kita gikan sa usa nga daotan’?
[Mga Pangutana sa Pagtuon]
[Mga hulagway sa panid 15]
Kinahanglang pasayloon nato ang uban aron kita pasayloon
[Picture Credit Line sa panid 13]
Lydekker