Mga Pangutana Gikan sa mga Magbabasa

Human sa Lunop, gipalupad ni Noe gikan sa arka ang usa ka salampati nga mibalik dala ang “usa ka dahon sa olibo.” Diin man makaplagi sa salampati ang maong dahon?

Ang Bibliya nagsugilon kanato nga “ang mga tubig misanap sa yuta sa hilabihan gayod nga niana ang tanang hatag-as nga mga bukid ilalom sa tibuok kalangitan natabonan.” (Genesis 7:19) Sa mihubas na ang mga tubig sa lunop, sa tulo ka higayon gipalupad ni Noe ang usa ka salampati—nga tagsa ka semana ang kal-ang. Sa ikaduhang higayon, ang salampati mibalik nga “dihay bag-ong kinutlo nga dahon sa olibo sa sungo niini, ug busa nahibaloan ni Noe nga ang mga tubig mihubas na gikan sa yuta.”—Genesis 8:8-11.

Siyempre, sa pagkakaron wala kitay paagi sa pagtino kon unsa ka dugay ang usa ka partikular nga bahin sa yuta gilunopan, kay ang porma sa yuta sa walay duhaduha nausab tungod sa Lunop. Bisan pa niana, lagmit nga ang tubig mitabon sa kadaghanang mga rehiyon nga dugay kaayo mao nga daghang kahoy ang nangamatay. Apan, ang pipila ka kahoy dayag nga nagpabiling buhi, nga nakapaarang niini sa pagpanalingsing sa paghubas sa tubig.

Bahin sa kahoyng olibo, ang The New Bible Dictionary nag-ingon: “Kon kini putlon, ang bag-ong mga salingsing mogitib gikan sa gamot, mao nga ingon ka daghan sa lima ka bag-ong mga punoan ang manurok. Ang hapit nang mamatay nga mga olibo sagad manalingsing niining paagiha usab.” “Morag ang kalig-on niini dili madaot,” nag-ingon ang The New Schaff-Herzog Encyclopedia of Religious Knowledge. Walay tawo karon ang nahibalo sa mga detalye, sama sa kaparat ug temperatura, sa mga tubig sa lunop. Busa, dili kita makatino sa posibleng epekto sa tubig diha sa mga kahoyng olibo ug sa ubang mga tanom.

Bisan pa niana, ang ihalas nga olibo dili makasagubang sa bugnaw nga mga temperatura, sama nianang makaplagan sa tag-as nga kabukiran. Sa katibuk-an kini motubo sa mga dapit nga ubos sa gihabogong 1,000 ka metros, diin ang aberids nga temperatura maoy kapin sa 10 grado Celsius. “Busa,” nag-ingon ang librong The Flood Reconsidered, “si Noe nakahinapos pinasikad sa bag-ong kinutlo nga dahon nga ang mga walog sa ubos hapit nang mahubsan sa tubig.” Sa dihang gibuhian ni Noe ang salampati usa ka semana sa ulahi, wala na kini mobalik, nga nagpakitang duna nay daghang tanom ug lagmit mga kabatogan sa salampati.—Genesis 8:12.