Nganong ang mga Saksi ni Jehova Kanunayng Moduaw Kanimo?

SA TIBUOK KALIBOTAN, ang pagkamalahutayon sa mga Saksi ni Jehova sa ilang balay-balay nga ministeryo nahibaloan pag-ayo. Ang ubang mga tawo nahibulong kon nganong ang mga Saksi kanunayng moduaw kanila, ilabina kon sa miagi sila nagpakitag diyutayng interes sa mensahe sa mga Saksi. Duha ka sulat gikan sa Rusya makatabang sa pagpasabot kon ngano.

“Sa tinuod lang,” miadmitir si Masha, usa ka 19-anyos nga babaye sa Khabarovsk, “kaniadto, naningkamot gayod ako sa paglikay sa mga Saksi ni Jehova.” Apan, human mabasa ang pipila ka kopya sa mga magasin nga gipatik sa mga Saksi, iyang gibag-o ang iyang tinamdan. “Ang tanan nakong nabasa makaiikag ug matulon-anon,” misulat si Masha, “apan labing hinungdanon, kini makapahimo sa usa sa paglantaw sa kalibotan sa lahi nga paagi. Hinayhinay nakong nasabtan kon nganong ang mga tawo gihatagag katuyoan sa kinabuhi.”

Gikan sa siyudad sa Ussuriysk, mga 80 kilometros habagatan sa Vladivostok, si Svetlana misulat: “Bag-o pa lamang ako nga nagsugod sa pagbasa sa Ang Bantayanang Torre ug Pagmata! Kining mga magasina gikinahanglan pag-ayo sa atong panahon karon. Gusto ko ang tanang artikulo. Kini makaiikag, punog-impormasyon, ug matulon-anon. Salamat! Daghan kaayong salamat nga kamo ania niining kalibotana ug nagabuhat sa maong maluloton ug hinungdanon nga buluhaton.”

Ang mga Saksi ni Jehova sa tibuok kalibotan ugdang nga midawat sa makapahinuklog nga pangutana ni apostol Pablo: “Unsaon, sa baylo, . . . pagkadungog [sa mga tawo] kon walay magwali?” (Roma 10:14) Nganong dili nimo gahinan ug pipila ka minutos ang pagpaminaw sa sunod panahon nga ang mga Saksi moduaw kanimo? Ikaw usab mahimong makatagamtam sa mensahe sa kahupayan nga makaplagan diha sa Pulong sa Diyos, ang Bibliya.