Pagbantay Batok sa Panglimbong

“Pagbantay kamo: basin adunay modagit kaninyo pinaagi sa . . . walay-pulos nga panglimbong.”—COLOSAS 2:8.

1-3. (a) Unsang mga pananglitan ang nagpakita nga ang panglimbong nakayuhot na nganha sa halos tanang bahin sa adlaw-adlaw nga pagkinabuhi? (b) Nganong dili kita angayng matingala sa panglimbong sa kalibotan?

 “PILA kaninyo ang wala pa mabakaki sukad sa usa ka kliyente?” Pipila ka tuig kanhi, usa ka propesor sa abogasiya ang naghimog surbi pinaagi sa pagpatungha nianang pangutanaha. Ang tubag? Siya miingon: “Sa libolibo ka abogado, usa lang ang wala pa mabakaki sukad sa usa ka kliyente.” Ang rason? “Ang abogado bag-o pang nagsugod pagtrabaho uban sa usa ka dakong bupiti ug wala pa makapakig-estorya sa usa ka kliyente.” Kining maong eksperyensiya nag-ilustrar sa makapasubong kamatuoran—ang pagpamakak ug panglimbong naandan na sa kalibotan karon.

² Ang panglimbong adunay daghang matang ug nakayuhot na nganha sa halos tanang bahin sa modernong-adlaw nga kinabuhi. Ang mga balita daghan kaayog pananglitan niana—mga politiko nga namakak bahin sa ilang mga lihok, mga accountant ug mga abogado nga nagpasobra sa ganansiya sa korporasyon, mga tig-anunsiyo nga nagpahisalaag sa mga konsumedor, mga kihante nga nanglimbong sa mga kompaniya sa insyurans, sa pagngalan lang ug pipila. Unya anaa ang pagpanglimbong sa relihiyon. Ang klero nagpahisalaag sa mga tawo pinaagi sa pagtudlo ug bakak nga mga doktrina, sama sa pagkadili-mamatay sa kalag, kalayonhong impiyerno, ug Trinidad.—2 Timoteo 4:3, 4.

³ Angay ba kitang matingala niining tanang panglimbong? Dili gayod. Mahitungod sa “kataposang mga adlaw,” ang Bibliya nagpasidaan: “Ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Timoteo 3:1, 13) Ingong mga Kristohanon, kita kinahanglang magmaalisto sa makapahisalaag nga mga ideya nga makapatipas  kanato gikan sa kamatuoran. Duha ka pangutana ang kinaiyanhong motungha: Nganong ang panglimbong kaylap kaayo karon, ug sa unsang paagi kita makabantay aron dili malimbongan?

Nganong Kaylap Kaayo ang Panglimbong Karon?

4. Sa unsang paagi gipatin-aw sa Bibliya kon nganong kaylap ang pagpanglimbong sa kalibotan?

⁴ Ang Bibliya klarong nagpatin-aw sa rason kon nganong kaylap kaayo ang pagpanglimbong niining kalibotana. Si apostol Juan misulat nga “ang tibuok kalibotan nailalom sa gahom sa usa nga daotan.” (1 Juan 5:19) Kanang “usa nga daotan” mao si Satanas nga Yawa. Mahitungod kaniya, si Jesus miingon: “Siya wala mobarog nga lig-on diha sa kamatuoran, tungod kay ang kamatuoran wala kaniya. Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.” Nan, ikatingala ba nga kining kalibotana nagbanaag sa espiritu, mga prinsipyo, ug pagkalimbongan sa magmamando niini?—Juan 8:44; 14:30; Efeso 2:1-3.

5. Sa unsang paagi misamot ang malimbongong mga paningkamot ni Satanas niining panahon sa kataposan, ug kinsa ilabina ang iyang gipuntarya?

⁵ Niining panahon sa kataposan, misamot ang pagpaningkamot ni Satanas. Gitambog na siya sa yuta. Siya nahibalo nga mubo na lang ang iyang panahon, ug siya adunay “dakong kasuko.” Kay determinadong laglagon ang daghang tawo kutob sa maarangan, siya “nagpahisalaag sa tibuok gipuy-ang yuta.” (Pinadayag 12:9, 12) Si Satanas dili kay popanagsa lang manglimbong. Hinunoa, walay hunong ang iyang mga paningkamot sa pagpahisalaag sa katawhan. a Iyang gigamit ang tanang malimbongong mga paagi—lakip na sa panglingla ug pagluib—aron butaan ang mga hunahuna sa mga dili-magtutuo ug ipahilayo sila gikan sa Diyos. (2 Corinto 4:4) Kining batid sa panglimbong ilabinang determinado sa pagtukob niadtong nagasimba sa Diyos “uban sa espiritu ug sa kamatuoran.” (Juan 4:24; 1 Pedro 5:8) Ayaw gayod kalimti nga si Satanas, sa pagkatinuod, nangangkon: ‘Mapatalikod ko si bisan kinsa gikan sa Diyos.’ (Job 1:9-12) Tagdon nato ang pipila sa “malimbongong mga taktika” ni Satanas ug kon unsaon pagbantay batok niana.—Efeso 6:11, Jewish New Testament.

Pagbantay Batok sa Pagpanglimbong sa mga Apostata

6, 7. (a) Unsay pangangkon sa mga apostata? (b) Sa unsang paagi klarong gipakita sa Kasulatan kon unsay tuyo sa mga apostata?

⁶ Dugay nang gigamit ni Satanas ang mga apostata sa iyang mga paningkamot nga hayloon ang mga alagad sa Diyos. (Mateo 13:36-39) Ang mga apostata mangangkon tingali nga nagsimba kang Jehova ug nagtuo sa Bibliya, apan ilang gisalikway ang makitang bahin sa iyang organisasyon. Ang uban mibalik pa gani ngadto sa nagpasipala-sa-Diyos nga mga doktrina sa “Dakong Babilonya,” ang tibuok-kalibotang imperyo sa bakak nga relihiyon. (Pinadayag 17:5; 2 Pedro 2:19-22) Ilalom sa pag-inspirar sa Diyos, ang mga magsusulat sa Bibliya naggamit ug puwersadong mga pulong aron sa pagyagyag sa mga motibo ug mga pamaagi sa mga apostata.

⁷ Unsay tuyo sa mga apostata? Ang uban wala matagbaw sa pagbiya lamang sa relihiyon nga ila tingaling giisip kanhi ingong matuod. Kasagaran, gusto nilang manghaylo sa uban nga moduyog kanila. Imbes mangita ug maghimog ilang kaugalingong mga tinun-an, daghang apostata ang naningkamot sa ‘pagpahilayo sa mga tinun-an [sa ato pa, ang mga tinun-an ni Kristo] aron mosunod kanila.’ (Buhat 20:29, 30) Mahitungod sa bakak nga mga magtutudlo, gipalanog ni apostol Pablo kining dinaliang pasidaan: “Pagbantay kamo: basin adunay modagit kaninyo.” (Colosas 2:8) Wala ba kana maghubit sa gipaningkamotang buhaton sa daghang apostata? Sama sa usa ka kidnaper nga modagit sa wala-makabantay nga biktima gikan sa iyang pamilya, ang mga apostata mamiktima sa masaligong mga membro sa kongregasyon, nga nagtinguha sa pagdagit kanila gikan sa panon.

8. Unsang mga pamaagi ang gigamit sa mga apostata aron makab-ot ang ilang tumong?

⁸ Unsang mga pamaagi ang gigamit sa mga apostata aron makab-ot ang ilang tumong? Kasagarang mogamit silag mga pagtuis, mga pahayag nga katunga ray tinuod, ug bug-os nga kabakakan. Si Jesus nahibalo nga ang iyang mga sumusunod mabiktima niadtong “mosulti sa tanang matang sa  kabakakan batok” kanila. (Mateo 5:11, Today’s English Version) Ang maong madinaotong mga magsusupak mosultig bakak sa tuyo nga limbongan ang uban. Si apostol Pedro nagpasidaan bahin sa mga apostata nga mogamit ug “mini nga mga pulong,” magpakaylap ug “malimbongong mga pagtulon-an,” ug ‘magtuis sa Kasulatan’ aron makab-ot ang ilang mga tumong. (2 Pedro 2:3, 13; 3:16) Ikasubo nga ang maong mga apostata milampos sa ‘pagdaot sa pagtuo sa pipila.’—2 Timoteo 2:18.

9, 10. (a) Sa unsang paagi kita makabantay aron dili malimbongan sa mga apostata? (b) Nganong dili kita matugaw kon ang atong pagsabot sa katuyoan sa Diyos kinahanglang pasiboon?

⁹ Sa unsang paagi makabantay kita aron dili malimbongan sa mga apostata? Pinaagi sa pagpatalinghog sa tambag gikan sa Pulong sa Diyos, nga nag-ingon: “Ipunting ang inyong mata kanila nga nagapahinabog pagkabahinbahin ug mga higayon sa pagkapandol sukwahi sa pagtulon-an nga inyong nakat-onan, ug likayan sila.” (Roma 16:17) Atong “likayan sila” pinaagi sa pagsalikway sa ilang mga pangatarongan—gipresentar man nila ang ilang mga argumento nga linawas, pinatik, o kaha pinaagi sa Internet. Nganong ingon niana ang atong baroganan? Una, tungod kay ang Pulong sa Diyos nagsugo kanato sa pagbuhat niana, ug kita nagasalig nga si Jehova naghunahuna gayod kon unsay labing makaayo kanato.—Isaias 48:17, 18.

¹⁰ Ikaduha, atong gihigugma ang organisasyon nga nagtudlo kanato ug bililhong mga kamatuoran nga klarong nagpahimulag kanato gikan sa Dakong Babilonya. Sa samang higayon, atong giila nga ang atong kahibalo bahin sa katuyoan sa Diyos dili hingpit; ang atong pagsabot ginapasibo latas sa katuigan. Ang maunongong mga Kristohanon kontento nga maghulat kang Jehova alang nianang tanang pagpasibo. (Proverbio 4:18) Sa kasamtangan, dili nato talikdan ang organisasyon nga gikahimut-ang gigamit sa Diyos, kay atong nakita ang klarong pamatuod sa iyang pagpanalangin niana.—Buhat 6:7; 1 Corinto 3:6.

Pagbantay Batok sa Paglimbong-sa-Kaugalingon

11. Nganong ang dili-hingpit nga mga tawo adunay hilig nga maglimbong sa ilang kaugalingon?

¹¹ Ang dili-hingpit nga mga tawo adunay hilig nga dali rang pahimuslan ni Satanas—paglimbong-sa-kaugalingon. “Ang kasingkasing labaw nga malimbongon kay sa bisan unsa pa ug desperado,” nag-ingon ang Jeremias 17:9. Ug si Santiago misulat: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha.” (Santiago 1:14) Kon ang atong kasingkasing mahaylo, kini, sa pagkatinuod maghaylo kanato pinaagig makasasalang tinguha, nga maghimo nianang morag makapadani ug dili-makadaot. Ang maong panglantaw malimbongon, kay ang pagpadaog sa kasal-anan sa ngadtongadto motultol sa kalaglagan.—Roma 8:6.

12. Sa unsang mga paagi nga kita mahimong malit-agan sa paglimbong-sa-kaugalingon?

 ¹² Ang paglimbong-sa-kaugalingon dali rang makalit-ag kanato. Ang malimbongong kasingkasing magpakamatarong tingali sa usa ka grabeng apan sa personalidad o mohimog mga pasangil alang sa grabeng sala. (1 Samuel 15:13-15, 20, 21) Ang atong desperado nga kasingkasing mangita usab tingali ug mga paagi sa pagpakamatarong sa kuwestiyonableng panggawi. Tagda, pananglitan, ang mahitungod sa kalingawan. Ang ubang kalingawan maayo ug makalingaw. Apan, ang kadaghanan sa gitanyag niining kalibotana—diha sa mga salida sa sine ug mga programa sa telebisyon ug sa mga site sa Internet—maoy law-ay ug imoral. Dali rang kombinsihon ang atong kaugalingon nga makatan-aw kita ug mahugaw nga kalingawan nga dili madaot. Ang uban mangatarongan gani, “Dili man mahasol ang akong tanlag, busa unsa may problema ana?” Apan ang maong mga tawo ‘naglimbong sa ilang kaugalingon pinaagi sa bakak nga pangatarongan.’—Santiago 1:22.

13, 14. (a) Unsang Kasulatanhong pananglitan ang nagpakita nga ang atong tanlag dili kanunayng luwas nga giya? (b) Sa unsang paagi makabantay kita batok sa paglimbong-sa-kaugalingon?

¹³ Sa unsang paagi kita makabantay batok sa paglimbong-sa-kaugalingon?  Una sa tanan, kinahanglang hinumdoman nato nga ang tanlag sa tawo dili kanunayng kasaligan. Tagda ang kahimtang ni apostol Pablo. Sa wala pa mahimong Kristohanon, iyang gilutos ang mga sumusunod ni Kristo. (Buhat 9:1, 2) Ang iyang tanlag wala tingali maghasol kaniya nianang panahona. Apan, dayag nga kini sayop. “Ako walay alamag ug milihok uban ang kawalay-pagtuo,” miingon si Pablo. (1 Timoteo 1:13) Busa ang kamatuoran lamang nga ang usa ka kalingawan wala maghasol sa atong tanlag dili gayod garantiya nga husto ang atong dalan. Ang maayo lamang nga tanlag nga nabansay sa hustong paagi sa Pulong sa Diyos ang mahimong luwas nga giya.

¹⁴ Aron malikayan ang paglimbong-sa-kaugalingon, adunay pipila ka makatabang nga mga sugyot nga kinahanglang hinumdoman nato. Susiha ang imong kaugalingon uban sa pag-ampo. (Salmo 26:2; 2 Corinto 13:5) Ang matinud-anong pagsusi-sa-kaugalingon mahimong magbuka sa imong mga mata sa panginahanglan sa paghimog pipila ka kausaban diha sa imong panglantaw o mga paagi. Pamati sa uban. (Santiago 1:19) Tungod kay ang pagsusi-sa-kaugalingon posibleng maimpluwensiyahan sa atong hunahuna, maayo nga mamati sa dili-mapihigong mga pulong sa hamtong nga mga isigka-Kristohanon. Kon ikaw naghimog mga desisyon o nagagawi sa mga paagi nga kuwestiyonable sa mga mata sa timbang, eksperyensiyado nga mga isigkamagtutuo, mahimong pangutan-on nimo ang imong kaugalingon, ‘Dili kaha nga ang akong tanlag wala mabansay sa hustong paagi o nga ang akong kasingkasing naglimbong kanako?’ Regular nga magbasa sa Bibliya ug sa pinasukad-sa-Bibliya nga mga publikasyon. (Salmo 1:2) Ang pagbuhat niana motabang kanimo sa paghimo sa imong mga hunahuna, tinamdan, ug pagbati nga kaharmonya sa diyosnong mga prinsipyo.

Pagbantay Batok sa mga Bakak ni Satanas

15, 16. (a) Sa iyang mga paningkamot sa paglimbong kanato, unsang mga bakak ang gigamit ni Satanas? (b) Sa unsang paagi kita makalikay nga malimbongan sa maong mga bakak?

¹⁵ Si Satanas naggamit ug lainlaing mga bakak sa iyang paningkamot nga malimbongan kita. Naningkamot siya sa pagkombinsir kanato nga ang materyal nga mga kabtangan makahatag ug kalipay ug katagbawan, bisan pag ang kaatbang niana kasagarang maoy mahitabo. (Ecclesiastes 5:10-12) Gusto niyang patuohon kita nga kining daotang kalibotan magpadayon hangtod sa hangtod, bisan tuod adunay klarong ebidensiya nga kita nagkinabuhi na sa “kataposang mga adlaw.” (2 Timoteo 3:1-5) Gipasiugda ni Satanas ang ideya nga dili makadaot ang pagsubay sa imoral nga estilo sa kinabuhi, bisan tuod ang mga matinguhaon-ug-kalingawan kasagarang nag-ani sa mapait nga mga sangpotanan. (Galacia 6:7) Sa unsang paagi malikayan nato nga malimbongan sa maong mga bakak?

¹⁶ Pahimusli ang mga panig-ingnan diha sa Bibliya. Ang Bibliya naundan ug mga pasidaang pananglitan sa mga tawo nga nalimbongan sa mga bakak ni Satanas. Sila nahigugma sa materyal nga mga butang, wala maghatag ug pagtagad sa panahon nga ilang gikinabuhian, o nagpadaog sa imoralidad—ang tanan uban ang daotang mga resulta. (Mateo 19:16-22; 24:36-42; Lucas 16:14; 1 Corinto 10:8-11) Pagkat-on gikan sa modernong-adlaw nga mga panig-ingnan. Ikasubo, usahay ang ubang mga Kristohanon nawad-an sa ilang pagbati sa pagkadinalian ug nagtuo nga pinaagi sa pag-alagad sa Diyos nawad-an sila sa kahigayonan sa pagbaton ug maayong butang. Sila tingali mobiya sa kamatuoran aron sa pagpangagpas sa kinabuhi nga malipayon kono. Apan, ang maong mga tawo anaa sa “madanglog nga dapit,” kay sa madugay o sa madali mapugos sila sa pagsagubang sa dili maayong mga sangpotanan sa ilang dili diyosnon nga panggawi. (Salmo 37:18, 19) Maalamon nga makakat-on kita gikan sa mga sayop sa uban.—Proverbio 22:3.

17. Nganong si Satanas nagpasiugda sa bakak nga si Jehova wala mahigugma ni magpabili kanato?

¹⁷ Aduna pay laing bakak nga epektibong gigamit ni Satanas—ang bakak nga si Jehova wala mahigugma ni magpabili kanato. Si Satanas nagtuon sa dili-hingpit nga mga tawo sulod na sa libolibong katuigan. Nahibalo gayod siya nga ang kahigawad makapaluya kanato. (Proverbio 24:10) Busa, iyang gipasiugda ang bakak nga kita walay-bili sa mga mata sa Diyos. Kon kita “nangatumba” ug nakombinsir nga si Jehova wala magtagad kanato, mahimong matental kita sa paghunong. (2 Corinto 4:9) Mao gayod kanay gusto sa dakong Manlilimbong! Nan, sa unsang paagi kita makabantay aron dili malimbongan niining bakak ni Satanas?

18. Sa unsang paagi kita gipasaligan sa Bibliya sa gugma ni Jehova?

¹⁸ Palandonga mismo ang giingon sa Bibliya bahin sa gugma sa Diyos alang kanato. Ang Pulong  sa Diyos naggamit ug pipila ka tataw nga mga ilustrasyon sa pagpasalig kanato nga si Jehova nakamatikod kanato ug nahigugma kanato ingong mga indibiduwal. Isulod niya ang imong mga luha sa iyang “botelya nga panit,” nga nagpasabot nga iyang nakita ug nahinumdoman ang mga luha nga imong gipatulo diha sa imong panglimbasog nga magpabiling matinumanon. (Salmo 56:8) Siya nahibalo sa dihang ikaw “dugmok ug kasingkasing” ug anaa sa imong duol nianang mga panahona. (Salmo 34:18) Siya nahibalo sa tanang detalye bahin kanimo, lakip na ang gidaghanon sa “mismong mga buhok sa imong ulo.” (Mateo 10:29-31) Labaw sa tanan, “gihatag [sa Diyos] ang iyang bugtong nga Anak” alang kanimo. (Juan 3:16; Galacia 2:20) Usahay, malisdan ka tingali sa pagtuo nga ang maong mga teksto mapadapat kanimo sa personal. Apan, kinahanglang motuo kita sa gisulti ni Jehova. Buot niyang patuohon kita nga siya nahigugma kanato dili lamang ingong grupo kondili ingong indibiduwal.

19, 20. (a) Nganong hinungdanon ang pag-ila ug pagsalikway sa bakak ni Satanas nga si Jehova wala mahigugma kanimo? (b) Sa unsang paagi ang usa ka nagapanawng magtatan-aw nakatabang sa mga nagmasulub-on?

¹⁹ Ilha ug isalikway ang bakak. Kon ikaw nahibalo nga ang usa ka tawo namakak, mapanalipdan nimo ang imong kaugalingon aron dili malimbongan. Mao man usab, ang pagkahibalo lamang nga gusto kang patuohon ni Satanas sa bakak nga si Jehova wala mahigugma kanimo maoy usa ka puwersadong tabang. Ingong reaksiyon sa usa ka artikulo sa Bantayanang Torre nga nagpasidaan bahin sa mga taktika ni Satanas, ang usa ka Kristohanon nag-ingon: “Wala gayod nako maamgohi nga si Satanas naningkamot diay sa paggamit sa akong mga pagbati aron sa pagpaluya kanako. Ang pagkahibalo niini naghatag kanakog panukmod sa pagbuntog niining maong mga pagbati.”

²⁰ Tagda ang eksperyensiya sa usa ka nagapanawng magtatan-aw diha sa usa ka nasod sa Amerika del Sur. Sa dihang nagaduaw isip magbalantay sa mga isigkamagtutuo nga nagmasulub-on, subsob siyang mangutana kanila, ‘Nagtuo ka ba sa Trinidad?’ Ang naluya kasagarang motubag, ‘Siyempre wala,’ nga nakaamgo nga kini maoy usa sa mga bakak ni Satanas. Ang nagapanawng ansiyano mangutana dayon, ‘Nagtuo ka ba sa impiyernong kalayo?’ Sa makausa pa motubag na sab siya, ‘Siyempre wala!’ Dayon sultian sila sa nagapanawng magtatan-aw nga adunay laing bakak ni Satanas nga kasagarang wala mailhi nga ingon niana. Iyang ipunting ang ilang pagtagad sa panid 249, parapo 21, sa librong Pakigsuod Kang Jehova, b nga nagyagyag sa bakak nga si Jehova wala mahigugma kanato ingong indibiduwal. Ang nagapanawng magtatan-aw nagtaho ug positibong mga resulta gumikan sa pagdasig sa mga nangaluya sa pag-ila ug pagsalikway niining bakak ni Satanas.

Bantayi ang Imong Kaugalingon Batok sa Panglimbong

21, 22. Nganong kita nahibalo sa malimbongong mga taktika ni Satanas, ug unsay angay natong himoong determinasyon?

²¹ Niining hinapos nga bahin sa kataposang mga adlaw, pagadahomon nga si Satanas magpadayon sa pagpatungha ug nagpusotpusot nga mga bakak ug mga panglimbong. Maayo na lang nga gipahibalo kita ni Jehova bahin sa malimbongong mga taktika ni Satanas. Ang Bibliya ug ang gipasukad-sa-Bibliya nga mga publikasyon sa “matinumanon ug maalamong ulipon” klarong nagyagyag sa daotang mga pamaagi sa Yawa. (Mateo 24:45) Kay napasidan-an, kita andam sa pag-atubang niana.—2 Corinto 2:11.

²² Nan, magpadayon kita sa pagbantay batok sa mga pangatarongan sa mga apostata. Hinaot nga magmadeterminado kita sa paglikay sa dili-daling mailhan nga lit-ag sa paglimbong-sa-kaugalingon. Ug atong ilhon ug isalikway ang mga bakak ni Satanas. Pinaagi sa pagbuhat niana, atong mabantayan ang atong relasyon uban sa “Diyos sa kamatuoran,” kinsa nagdumot sa panglimbong.—Salmo 31:5; Proverbio 3:32.

[Mga footnote]

Nahinumdom Ka Ba?

• Nganong daghan kaayong panglimbong sa kalibotan karon?

• Sa unsang paagi kita makabantay aron dili malimbongan sa mga apostata?

• Sa unsang paagi kita makabantay batok sa bisan unsang kiling ngadto sa paglimbong-sa-kaugalingon?

• Sa unsang paagi kita makalikay nga dili malimbongan sa mga bakak ni Satanas?

[Mga Pangutana sa Pagtuon]

[Hulagway sa panid 17]

Ayawg limbongi ang imong kaugalingon mahitungod sa kalingawan

[Mga hulagway sa panid 18]

Sa pagbantay batok sa paglimbong-sa-kaugalingon, susiha ang imong kaugalingon uban ang pag-ampo, pamati sa uban, ug magbasa kanunay sa Pulong sa Diyos