‘Ang Matinumanong Ulipon’ Nakapasar sa Pagsusi!
‘Ang Matinumanong Ulipon’ Nakapasar sa Pagsusi!
“Kini ang tinudlong panahon nga magsugod ang paghukom diha sa balay sa Diyos.”—1 Pedro 4:17.
1. Unsay naabtan ni Jesus sa dihang iyang gisusi ang “ulipon”?
SA Pentekostes 33 K.P., gitudlo ni Jesus ang usa ka “ulipon” sa pagtagana ug pagkaon sa hustong panahon alang sa iyang “mga sulugoon sa panimalay.” Sa 1914, si Jesus naentrono ingong Hari, ug sa wala madugay panahon na sa pagsusi sa maong “ulipon.” Iyang nakaplagan nga ang kadaghanan sa mga membro sa maong “ulipon” napamatud-ang ‘matinumanon ug maalamon.’ Busa, iya kining gitudlo “ibabaw sa tanan niyang mga kabtangan.” (Mateo 24:45-47) Apan, diha usay daotang ulipon, nga dili matinumanon ni maalamon.
“Kanang Daotang Ulipon”
2, 3. Diin maggikan “kanang daotang ulipon,” ug sa unsang paagi kini naugmad?
2 Naghisgot si Jesus bahin sa daotang ulipon human dayon sa paghisgot niya bahin sa “matinumanon ug maalamong ulipon.” Siya miingon: “Kon ugaling kanang daotang ulipon magaingon diha sa iyang kasingkasing, ‘Nalangan ang akong agalon,’ ug magabun-og sa iyang mga isigkaulipon ug magakaon ug magainom kauban sa mga nailhang palahubog, ang agalon nianang ulipona moabot sa adlaw nga wala niya dahoma ug sa takna nga wala niya mahibaloi, ug silotan siya sa hilabihan gayod ug ibutang siya ipon sa mga salingkapaw. Didto unya ang iyang pagdanguyngoy ug ang pagkagot sa iyang mga ngipon.” (Mateo 24:48-51) Ang ekspresyon nga “kanang daotang ulipon” nagdani sa atong pagtagad sa nag-unang mga pulong ni Jesus mahitungod sa matinumanon ug maalamong ulipon. Oo, ang “daotang ulipon” maoy kanhing mga membro sa matinumanong ulipon. a Sa unsang paagi?
3 Sa wala pa ang 1914, daghang membro sa matinumanong ulipon nga matang ang nagdahom gayod nga mosugat sa Pamanhonon didto sa langit nianang tuiga, apan wala matuman ang ilang gidahom. Tungod niini ug sa ubang mga kaugmaran, daghan ang nahigawad ug pipila ang nayugot. Ang uban niini ‘nagbun-og’ sa ilang kanhing mga igsoon sa binaba nga paagi ug nakig-uban sa “mga nailhang palahubog,” ang relihiyosong mga grupo sa Kakristiyanohan.—Isaias 28:1-3; 32:6.
4. Sa unsang paagi si Jesus nakiglabot sa “daotang ulipon” ug sa tanang nagpakita sa maong espiritu?
4 Kining kanhing mga Kristohanon sa ngadtongadto nailhan ingong “daotan nga ulipon,” ug si Jesus nagsilot kanila sa “hilabihan gayod.” Sa unsang paagi? Iyang gisalikway sila, ug sila wala makapahimulos sa langitnong paglaom. Apan, wala dayon sila laglaga. Kinahanglang moantos una sila sa usa ka yugto sa paghilak ug pagkagot sa ngipon diha sa “kangitngitan sa gawas” sa Kristohanong kongregasyon. (Mateo 8:12) Sukad niadtong unang mga panahon, pipila sa ubang mga dinihogan ang nagpakita ug susamang daotang espiritu, nga nagpaila sa ilang kaugalingon nga kauban sa “daotang ulipon.” Ang pipila sa “ubang mga karnero” nagsundog sa ilang pagkadili-matinumanon. (Juan 10:16) Kanang tanang kaaway ni Kristo nakasinati sa mao gihapong espirituwal nga “kangitngitan sa gawas.”
5. Unsay reaksiyon sa matinumanon ug maalamong ulipon, nga kasukwahi sa “daotang ulipon”?
5 Bisan pa niana, ang matinumanon ug maalamong ulipon nakaagom sa mao gihapong mga pagsulay nga naagoman sa “daotang ulipon.” Apan, imbes mayugot, sila napasibo pag-usab. (2 Corinto 13:11) Ang ilang gugma alang kang Jehova ug sa ilang mga igsoon napalig-on. Tungod niini, sila nahimong “haligi ug tukod sa kamatuoran” panahon niining magubot nga “kataposang mga adlaw.”—1 Timoteo 3:15; 2 Timoteo 3:1.
Ang Maalamon ug ang Buangbuang nga mga Ulay
6. (a) Sa unsang paagi giilustrar ni Jesus ang pagkamaalamon sa iyang matinumanong ulipon nga matang? (b) Sa wala pa ang 1914, unsang mensahe ang gimantala sa dinihogang mga Kristohanon?
6 Human maghisgot bahin sa “daotang ulipon,” si Jesus naghatag ug duha ka sambingay sa pagpakita kon nganong ang pipila ka dinihogang mga Kristohanon mapamatud-ang matinumanon ug maalamon samtang ang uban dili. b Sa pag-ilustrar sa pagkamaalamon, siya miingon: “Ang gingharian sa mga langit mahisama sa napulo ka ulay nga nagkuha sa ilang mga lampara ug nanggula aron sa pagsugat sa pamanhonon.Ang lima kanila mga buangbuang, ug ang lima mga maalamon. Kay ang mga buangbuang nagdala sa ilang mga lampara apan wala sila magdalag lana, samtang ang mga maalamon nagdalag lana diha sa ilang mga sudlanan uban sa ilang mga lampara.” (Mateo 25:1-4) Ang napulo ka ulay nagpahinumdom kanato sa dinihogang mga Kristohanon sa wala pa ang 1914. Ilang gibanabana nga ang pamanhonon, si Jesu-Kristo, hapit nang moabot. Busa, sila “nanggula” aron sa pagsugat kaniya, nga maisogong nagwali nga “ang tinudlong mga panahon sa mga nasod” matapos sa 1914.—Lucas 21:24.
7. Kanus-a ug ngano nga ang dinihogang mga Kristohanon “nahikatulog,” sa mahulagwayong pagkasulti?
7 Husto sila. Ang tinudlong mga panahon sa mga nasod natapos gayod sa 1914, ug ang Gingharian sa Diyos ilalom ni Kristo nagmando na. Apan didto kana sa dili-makitang kalangitan. Dinhi sa yuta, ang katawhan nagsugod sa pag-antos sa gitagnang ‘kaalaotan.’ (Pinadayag 12:10, 12) Misunod ang panahon sa pagsulay. Kay wala kaayo makasabot sa mga panghitabo, ang dinihogang mga Kristohanon naghunahuna nga “nalangan ang pamanhonon.” Naglibog ug nag-atubang sa pagsupak gikan sa kalibotan, sa katibuk-an sila naluya ug sa ngadtongadto mihunong sa organisadong publiko nga buluhatong pagwali. Sama sa mga ulay sa sambingay, sa espirituwal nga pagkasulti sila “nagduka ug nahikatulog,” sama sa gibuhat sa dili-matinumanong nag-angkon nga mga Kristohanon human mangamatay ang mga apostoles ni Jesus.—Mateo 25:5; Pinadayag 11:7, 8; 12:17.
8. Unsay mitultol ngadto sa singgit nga: “Ania na ang pamanhonon!” ug panahon na kadto alang sa dinihogang mga Kristohanon sa pagbuhat sa unsa?
8 Unya sa 1919 dunay wala-damhang panghitabo. Atong mabasa: “Sa pagkatungang gabii dihay milanog nga singgit, ‘Ania na ang pamanhonon! Panggula kamo sa pagsugat kaniya.’ Unya ang tanan niadtong mga ulay namangon ug naghikay sa ilang mga lampara.” (Mateo 25:6, 7) Sa dihang ang kahimtang morag wala nay paglaom, dihay awhag nga magmaaktibo! Sa 1918, si Jesus, “ang mensahero sa pakigsaad,” miabot sa espirituwal nga templo ni Jehova aron sa pagsusi ug paghinlo sa kongregasyon sa Diyos. (Malaquias 3:1) Karon, ang dinihogang mga Kristohanon kinahanglang mogula ug mosugat kaniya diha sa yutan-ong mga sawang sa maong templo. Panahon na nga sila ‘mosidlak.’—Isaias 60:1; Filipos 2:14, 15.
9, 10. Sa 1919, nganong ang pipila ka Kristohanon “maalamon” ug ang uban “buangbuang”?
9 Apan, yuna pa! Sa sambingay, ang pipila sa mga dalaga may problema. Si Jesus nagpadayon: “Ang mga buangbuang miingon ngadto sa mga maalamon, ‘Hatagi kamig diyutay sa inyong lana, tungod kay hapit nang mapalong ang among mga lampara.’” (Mateo 25:8) Kon walay lana, ang mga lampara mapalong. Busa ang lana sa lampara magpahinumdom kanato sa kamatuoran sa Pulong sa Diyos ug sa iyang balaang espiritu, nga nakapaarang sa matuod nga mga magsisimba nga mahimong mga tigdala sa kahayag. (Salmo 119:130; Daniel 5:14) Sa wala pa ang 1919, ang maalamong dinihogan nga mga Kristohanon makugihong naningkamot sa pagsabot sa kabubut-on sa Diyos alang kanila, bisan pa sa ilang temporaryong huyang nga kahimtang. Busa, sa dihang giawhag sila sa pagsidlak, sila andam na.—2 Timoteo 4:2; Hebreohanon 10:24, 25.
10 Apan, ang pipila ka dinihogan dili andam sa paghimog mga sakripisyo o sa pagpanglimbasog pag-ayo—bisan tuod sila kinasingkasing nga nagtinguha nga makauban ang Pamanhonon. Busa sa dihang panahon na nga magmaaktibo sa pagwali sa maayong balita, sila dili andam. (Mateo 24:14) Misulay pa gani sila sa pagpaluya sa ilang masibotong mga kauban, nga sa diwa, nangayo sa ilang lana. Sa sambingay ni Jesus, unsay reaksiyon sa maalamong mga ulay? Sila miingon: “Tingalig dili na kini paigo alang kanamo ug kaninyo. Lakaw kamo, hinunoa, ngadto sa mga nagbaligya niini ug pagpalit alang sa inyong kaugalingon.” (Mateo 25:9) Sa susama, ang maunongong dinihogan nga mga Kristohanon sa 1919 wala mobuhat ug bisan unsa nga makapamenos sa ilang kaugalingong kapasidad sa pagdala ug kahayag. Busa, sila nakapasar sa pagsusi.
11. Unsay nahitabo sa buangbuang nga mga ulay?
11 Agig panapos si Jesus miingon: “Samtang [ang buangbuang nga mga ulay] nanglakaw aron sa pagpalit, ang pamanhonon miabot, ug ang mga ulay nga andam misulod kauban niya ngadto sa kombira sa kasal; ug gisirhan ang pultahan. Human niana ang ubang mga ulay miabot usab, nga nag-ingon, ‘Senyor, senyor, ablihi kami!’ Sa pagtubag siya miingon, ‘Sultihan ko kamo sa tinuod, wala ako makaila kaninyo.’” (Mateo 25:10-12) Oo, ang uban dili andam sa pag-abot sa Pamanhonon. Busa, sila wala makapasar sa pagsusi ug nawad-an sa kahigayonan sa pagtambong sa kombira sa kasal didto sa langit. Pagkamakapasubo!
Ang Sambingay sa mga Talanton
12. (a) Unsay gigamit ni Jesus sa pag-ilustrar sa pagkamatinumanon? (b) Kinsa ang lalaki nga “milangyaw”?
12 Human iilustrar ang pagkamaalamon, si Jesus nagpadayon sa pag-ilustrar sa pagkamatinumanon. Siya miingon: “Sama kini sa usa ka tawo nga hapit nang molangyaw, nagpatawag sa iyang mga ulipon ug gipiyal kanila ang iyang mga kabtangan. Ug sa usa gihatag niya ang lima ka talanton, sa lain duha, sa lain pa usa, sa matag usa sumala sa iyang katakos, ug siya milangyaw.” (Mateo 25:14, 15) Ang tawo diha sa sambingay mao si Jesus mismo, kinsa “milangyaw” sa dihang siya misaka sa langit sa tuig 33 K.P. Apan sa wala pa siya mosaka, gipiyal ni Jesus ang “iyang mga kabtangan” sa iyang matinumanong mga tinun-an. Sa unsang paagi?
13. Sa unsang paagi giandam ni Jesus ang dakong natad sa kalihokan ug giawtorisahan ang iyang “mga ulipon” sa pagpatigayon?
13 Panahon sa iyang ministeryo dinhi sa yuta, si Jesus misugod sa pag-andam ug dakong natad sa kalihokan pinaagi sa pagwali sa maayong balita sa Gingharian sa tibuok nasod sa Israel. (Mateo 9:35-38) Sa wala pa siya ‘molangyaw,’ iyang gipiyal ang maong natad ngadto sa iyang matinumanong mga tinun-an, nga nag-ingon: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mateo 28:18-20) Niining mga pulonga, giawtorisahan ni Jesus ang iyang “mga ulipon” sa pagpatigayon hangtod sa iyang pagbalik, “ang matag usa sumala sa iyang katakos.”
14. Nganong dili tanan gidahom nga susamag mahimo sa pagpatigayon?
14 Ang maong ekspresyon nagpaila nga dili tanang unang-siglo nga mga Kristohanon ang adunay susamang mga kahimtang o mga kahigayonan. Ang uban, sama kang Pablo ug Timoteo, bug-os nga nakapakigbahin sumala sa maarangan diha sa buluhatong pagwali ug pagpanudlo. Ang mga sirkumstansiya sa uban lagmit naglimite pag-ayo sa ilang kagawasan sa paglihok. Pananglitan, ang ubang mga Kristohanon maoy mga ulipon, ug ang uban masakiton, tigulang na, o may mga responsibilidad sa pamilya. Siyempre, ang pipila ka pribilehiyo sa kongregasyon dili bukas sa tanang tinun-an. Ang dinihogang mga babaye ug ang ubang dinihogan nga mga lalaki wala manudlo diha sa kongregasyon. (1 Corinto 14:34; 1 Timoteo 3:1; Santiago 3:1) Apan, bisan unsa man ang ilang personal nga kahimtang, ang tanang dinihogan nga mga tinun-an ni Kristo—mga lalaki ug babaye—gitudlo sa pagpatigayon, nga magpahimulos sa ilang mga kahigayonan ug mga sirkumstansiya diha sa Kristohanong ministeryo. Ang ilang modernong-adlaw nga mga katumbas naghimo sa susama niana.
Nagsugod na ang Panahon sa Pagsusi!
15, 16. (a) Kanus-a ang panahon sa paghusay? (b) Unsang bag-ong mga kahigayonan sa ‘pagpatigayon’ ang gihatag ngadto sa mga matinumanon?
15 Ang sambingay nagpadayon: “Human sa hataas nga panahon ang agalon niadtong mga ulipona miabot ug nakighusay kanila.” (Mateo 25:19) Sa 1914—tinong dugay nga panahon human sa 33 K.P.—si Kristo Jesus nagsugod sa iyang harianong presensiya. Tulo ka tuig ug tunga sa ulahi, sa 1918, miadto siya sa espirituwal nga templo sa Diyos ug gituman ang giingon ni Pedro: “Kini ang tinudlong panahon nga magsugod ang paghukom diha sa balay sa Diyos.” (1 Pedro 4:17; Malaquias 3:1) Panahon na sa paghusay.
16 Unsay gihimo sa mga ulipon, ang dinihogang mga igsoon ni Jesus, sa “mga talanton” sa Hari? Sukad sa 33 K.P., lakip na sa mga tuig nga mitultol ngadto sa 1914, daghan ang naghago diha sa ‘patigayon’ ni Jesus. (Mateo 25:16) Bisan panahon sa unang gubat sa kalibotan, ilang gipakita ang hugot nga tinguha nga moalagad sa Agalon. Karon panahon na nga hatagan ang mga matinumanon ug bag-ong mga kahigayonan sa ‘pagpatigayon.’ Miabot na ang panahon sa kataposan niining sistema sa mga butang. Ang maayong balita kinahanglang iwali sa tibuok kalibotan. “Ang alanihon sa yuta” kinahanglang galabon na. (Pinadayag 14:6, 7, 14-16) Ang kataposang mga membro sa trigo nga matang kinahanglang pangitaon ug ang “usa ka dakong panon” sa ubang mga karnero tigomon.—Pinadayag 7:9; Mateo 13:24-30.
17. Sa unsang paagi ang matinumanong dinihogan nga mga Kristohanon ‘misulod sa kalipay sa ilang agalon’?
17 Ang panahon sa pag-ani maoy malipayong panahon. (Salmo 126:6) Nan, haom nga sa dihang sa 1919, gipiyalan ni Jesus ang iyang matinumanong dinihogan nga mga igsoon ug mas dakong responsibilidad, siya miingon: “Kasaligan ka sa pipila ka butang. Igatudlo ko ikaw ibabaw sa daghang butang. Sulod sa kalipay sa imong agalon.” (Mateo 25:21, 23) Dugang pa, ang kalipay sa Agalon ingong bag-ong naentrono nga Hari sa Gingharian sa Diyos dili nato mahanduraw. (Salmo 45:1, 2, 6, 7) Ang matinumanong ulipon nga matang nakasinati sa maong kalipay pinaagi sa paghawas sa Hari ug pagpauswag sa iyang mga intereses dinhi sa yuta. (2 Corinto 5:20) Ang ilang kalipay makita diha sa matagnaong mga pulong sa Isaias 61:10: “Sa walay pakyas ako magsadya diha kang Jehova. Ang akong kalag magakalipay diha sa akong Diyos. Kay siya nagsul-ob kanako sa mga besti sa kaluwasan.”
18. Nganong ang uban wala makapasar sa pagsusi, ug uban sa unsang mga resulta?
18 Ikasubo, ang uban wala makapasar sa pagsusi. Atong mabasa: “Ang usa nga nakadawat ug usa ka talanton miduol ug miingon, ‘Agalon, ako nakaila nga ikaw tawong estrikto, nga nagaani diin wala ka magpugas ug nagatigom diin wala ka magpalid. Busa ako nahadlok ug milakaw ug nagtago sa imong talanton sa yuta. Ania, dawata kon unsay imoha.’” (Mateo 25:24, 25) Sa susama, ang ubang dinihogang mga Kristohanon wala ‘magpatigayon.’ Sa wala pa ang 1914 sila dili madasigong nagpaambit sa ilang paglaom ngadto sa uban, ug dili nila gustong mosugod sa 1919. Unsay reaksiyon ni Jesus sa ilang pagkamapahitas-on? Gikuha niya ang tanan nilang mga pribilehiyo. Sila ‘gilabay ngadto sa kangitngitan sa gawas, diin didto sila nagdanguyngoy ug nagkagot sa ilang mga ngipon.’—Mateo 25:28, 30.
Ang Pagsusi Nagpadayon
19. Sa unsang paagi nagpadayon ang pagsusi, ug unsay determinadong buhaton sa tanang dinihogan nga mga Kristohanon?
19 Siyempre, ang kadaghanan niadtong mahimong dinihogan nga mga ulipon ni Kristo panahon sa kataposan wala pa mag-alagad kang Jehova sa dihang si Jesus nagsugod sa iyang pagsusi niadtong 1918. Aduna pa ba silay kahigayonan nga susihon? Aduna. Ang pagsusi nagsugod lamang sa 1918/19 sa dihang ang matinumanon ug maalamong ulipon ingong matang nakapasar sa pagsusi. Ang tagsatagsa ka dinihogang Kristohanon padayong gisusi hangtod nga ang ilang timbre permanente na. (Pinadayag 7:1-3) Kay nakaamgo niini, ang dinihogang mga igsoon ni Kristo determinado nga magmatinumanon sa ‘pagpatigayon.’ Sila determinado nga magmaalamon, nga maghupot ug dagayang suplay sa lana aron nga ang kahayag modan-ag pag-ayo. Sila nahibalo nga sa dihang ang matag usa makaabot na sa kataposan sa iyang dalan sa kinabuhi nga matinumanon, dawaton siya ni Jesus ngadto sa langitnong puloy-anan.—Mateo 24:13; Juan 14:2-4; 1 Corinto 15:50, 51.
20. (a) Unsay determinadong buhaton karon sa ubang mga karnero? (b) Unsay naamgohan sa dinihogang mga Kristohanon?
20 Ang dakong panon sa ubang mga karnero nagsundog sa ilang dinihogang mga igsoon. Sila nahibalo nga ang ilang kahibalo sa mga katuyoan sa Diyos naglangkit ug dakong responsibilidad. (Ezequiel 3:17-21) Busa, uban sa tabang sa Pulong ug balaang espiritu ni Jehova, magmadagayaon usab ang ilang suplay sa lana pinaagi sa pagtuon ug pagpakig-uban diha sa mga tigom. Ug ilang gipasidlak ang ilang kahayag, nga nakigbahin sa buluhatong pagwali ug pagpanudlo ug busa ‘namatigayon’ uban sa ilang dinihogang mga igsoon. Apan, ang dinihogang mga Kristohanon nakaamgo gayod nga ang mga talanton gipiyal kanila. Sila kinahanglang manubag sa paagi nga gidumala nila ang mga kabtangan sa Ginoo dinhi sa yuta. Bisan tuod diyutay lang sila, dili nila mahimong talikdan ang ilang responsibilidad sa dakong panon. Nga naghunahuna niini, ang matinumanon ug maalamong ulipon nagpadayon sa pagpanguna sa pag-atiman sa pamatigayon sa Hari, nga mapasalamaton sa pagpaluyo sa debotadong mga membro sa dakong panon. Giila sa dakong panon ang responsibilidad sa ilang dinihogan nga mga igsoon ug giisip nga usa ka pribilehiyo ang pagtrabaho ilalom sa ilang pagdumala.
21. Unsang tambag ang mapadapat sa tanang Kristohanon sukad sa wala pa ang 1919 hangtod sa atong adlaw?
21 Busa, bisan tuod kining duha ka sambingay nagpatin-aw kanato sa mga panghitabo sa 1919 o duol niana, ang mga prinsipyo niini mapadapat ngadto sa tanang matuod nga mga Kristohanon latas sa kataposang mga adlaw. Niining paagiha, bisan tuod ang tambag nga gihatag ni Jesus diha sa kataposan sa sambingay bahin sa napulo ka ulay mapadapat una sa tanan sa dinihogang mga Kristohanon una pa ang 1919, ang mga prinsipyo niini mapadapat gihapon ngadto sa matag Kristohanon. Nan, hinaot nga ang matag usa kanato magpatalinghog sa giingon ni Jesus: “Busa, magpadayon sa pagbantay tungod kay wala kamo mahibalo sa adlaw ni sa takna.”—Mateo 25:13.
[Mga footnote]
a Sa susamang paagi, human sa kamatayon sa mga apostoles, ang “malupigong mga lobo” maoy kanhing mga membro sa dinihogang Kristohanon nga mga ansiyano.—Buhat 20:29, 30.
b Alang sa laing panaghisgot bahin sa sambingay ni Jesus, tan-awa ang Worldwide Security Under the “Prince of Peace,” nga gipatik sa mga Saksi ni Jehova, mga kapitulo 5 ug 6.
Ikapatin-aw Mo Ba?
• Kanus-a gisusi ni Jesus ang iyang mga sumusunod, ug unsay iyang nakaplagan?
• Nganong ang pipila ka dinihogan nakaugmad sa tinamdan nga sama nianang sa “daotang ulipon”?
• Sa unsang paagi ikapakita nato nga kita maalamon sa espirituwal?
• Agig pagsundog sa matinumanong dinihogan nga mga igsoon ni Jesus, sa unsang paagi kita makapadayon sa ‘pagpatigayon’?
[Mga Pangutana sa Pagtuon]
[Kahon sa panid 16]
KANUS-A MOABOT SI JESUS?
Sa Mateo mga kapitulo 24 ug 25, si Jesus giingon nga “moabot” sa lainlaing mga konteksto. Siya dili kinahanglang mobalhin ug lugar aron “moabot.” Hinunoa, siya “moabot” sa diwa nga iliso niya ang iyang pagtagad ngadto sa katawhan o sa iyang mga sumusunod, kasagaran aron sa paghukom. Busa, sa 1914 siya “miabot” aron sa pagsugod sa iyang presensiya ingong naentronong Hari. (Mateo 16:28; 17:1; Buhat 1:11) Sa 1918 siya “miabot” ingong mensahero sa pakigsaad ug nagsugod sa pagpanghukom niadtong nag-angkon nga nag-alagad kang Jehova. (Malaquias 3:1-3; 1 Pedro 4:17) Sa Armagedon, siya “moabot” aron sa pagpahamtang ug paghukom nganha sa mga kaaway ni Jehova.—Pinadayag 19:11-16.
Ang pag-anhi (o, pag-abot) nga gitumong sa makadaghan diha sa Mateo 24:29-44 ug 25:31-46 maoy sa “dakong kasakitan.” (Pinadayag 7:14) Sa laing bahin, ang pag-abot nga gitumong sa makadaghan diha sa Mateo 24:45 hangtod sa 25:30 adunay kalabotan sa iyang paghukom sa nag-angkong mga tinun-an sukad sa 1918 padayon. Pananglitan, dili makataronganon ang pag-ingon nga ang pagganti sa matinumanong ulipon, ang paghukom sa buangbuang nga mga ulay, ug ang paghukom sa tapolan nga ulipon, kinsa nagtago sa talanton sa Agalon, mahitabo sa dihang si Jesus “moabot” sa dakong kasakitan. Kana magpasabot nga daghan sa mga dinihogan ang makaplagang dili matinumanon nianang panahona ug busa kinahanglang pulihan. Apan, ang Pinadayag 7:3 nagpaila nga ang tanang dinihogan nga mga ulipon ni Kristo permanente nang ‘natimbrehan’ nianang panahona.
[Hulagway sa panid 14]
Ang “daotang ulipon” wala makadawat ug mga panalangin niadtong 1919
[Hulagway sa panid 15]
Ang maalamong mga ulay andam sa dihang miabot ang pamanhonon
[Hulagway sa panid 17]
Ang matinumanong mga ulipon ‘namatigayon’
Ang tapolang ulipon wala
[Mga hulagway sa panid 18]
Ang mga dinihogan ug ang “dakong panon” nagpadayon sa pagpasidlak sa ilang kahayag