Ang Matuod nga Kristiyanidad Nagmalamboon

ANG ministeryo ni Jesu-Kristo dunay puwersadong epekto sa kalibotan niadtong unang siglo. Ang iyang mensahe makapalagsik, makapalamdag, ug makapadasig sa paagi nga nakapahingangha sa mga tawo. Daghang nakadungog kaniya ang natandog pag-ayo sa iyang mga pulong.—Mateo 7:28, 29.

Si Jesus maisogon nga midumili sa pagpakigbahin sa malupigong mga sistema sa relihiyon ug politika sa iyang adlaw apan naghimo sa iyang kaugalingon nga daling duolon sa ordinaryong tawo. (Mateo 11:25-30) Dayag niyang giila ang kaylap nga impluwensiya sa daotang mga espiritu dinhi sa yuta ug gipasundayag ang hinatag-sa-Diyos nga gahom batok kanila. (Mateo 4:2-11, 24; Juan 14:30) Si Jesus binatid nga naghatag ug kalamdagan maylabot sa dakong koneksiyon tali sa pag-antos ug sala, ug siya mahigugmaong nagpunting sa pagtagad ngadto sa Gingharian sa Diyos alang sa dumalayong kahupayan. (Marcos 2:1-12; Lucas 11:2, 17-23) Bug-os niyang gikuha ang tabil sa kangitngit nga dugay na kaayong nagtabon sa tinuod nga personalidad sa iyang Amahan, nga nagpadayag sa ngalan sa Diyos ngadto sa tanang interesado nga makabaton ug personal nga relasyon uban Kaniya.—Juan 17:6, 26.

Busa, dili ikatingala nga bisan pa sa grabeng paglutos tungod sa relihiyon ug politika, ang mga tinun-an ni Jesus kusog kaayong nagpakaylap sa iyang puwersadong mensahe. Sulod lamang sa mga 30 ka tuig, dihay aktibo nga Kristohanong mga kongregasyon nga natukod sa Aprika, Asia, ug Uropa. (Colosas 1:23) Ang sayon sabton nga mga kamatuoran nga gitudlo ni Jesus naglamdag sa kasingkasing sa mapainubsanon ug matarong nga mga tawo sa tibuok nga Romanhong Imperyo.—Efeso 1:17, 18.

Apan, sa unsang paagi nga kining tanan nga bag-ong mga tinun-an gikan sa nagkadaiyang kagikan sa panalapi, kultura, pinulongan, ug relihiyon nagkahiusa gayod diha sa “usa ka pagtuo,” nga maoy pagtawag niini ni apostol Pablo? (Efeso 4:5) Unsay nakatabang kanila sa ‘pagsulti nga may panagkauyon’ aron dili sila magkabahinbahin? (1 Corinto 1:10) Tungod sa grabeng pagkabahinbahin sa nag-angkong mga Kristohanon karon, kinahanglang atong susihon kon unsay gitudlo mismo ni Jesus.

Ang Pasikaranan sa Kristohanong Panaghiusa

Sa dihang gihusay atubangan ni Poncio Pilato, gisulti ni Jesus ang pasikaranan sa Kristohanong panaghiusa. Siya miingon: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran. Ang matag usa nga dapig sa kamatuoran mamati sa akong tingog.” (Juan 18:37) Busa, ang pagdawat sa mga pagtulon-an ni Jesus lakip na sa tanang bahin sa inspiradong Pulong sa Diyos, ang Bibliya,  dunay gamhanan nga makapahiusang impluwensiya diha sa matuod nga mga tinun-an ni Kristo.—1 Corinto 4:6; 2 Timoteo 3:16, 17.

Siyempre, dihay mitungha nga matinuorong mga pangutana o dili-pagsinabtanay taliwala sa mga tinun-an ni Jesus usahay. Unsay nakatabang kanila? Si Jesus nagpatin-aw: “Sa dihang moabot siya, ang espiritu sa kamatuoran, siya magatultol kaninyo ngadto sa tibuok nga kamatuoran, kay dili man siya mosulti sa iyang kaugalingong pagbuot, apan ang mga butang nga iyang madungog iyang isulti, ug ang mga butang nga umaabot iyang ipahayag kaninyo.” (Juan 16:12, 13) Busa, ang balaang espiritu sa Diyos nakatabang sa matuod nga mga tinun-an ni Jesus nga masabtan ang kamatuoran samtang kini anam-anam nga gipadayag sa Diyos. Dugang pa, ang maong espiritu nagpatungha ug bunga, sama sa gugma, kalipay, ug pakigdait, nga sa baylo nagpalambo sa panaghiusa sa ilang taliwala.—Buhat 15:28; Galacia 5:22, 23.

Wala tugoti ni Jesus nga maglungtad ang panagsumpaki o panagbahinbahin taliwala sa iyang mga tinun-an; ni maghatag siya ug awtorisasyon kanila sa pag-usab sa interpretasyon sa mga kamatuoran gikan sa Diyos aron sa pagpailin-ilin sa kultural o relihiyosong mga tradisyon sa mga tawong ilang mahimamat. Hinunoa, sa iyang kataposang gabii kauban nila, siya kinasingkasing nga nag-ampo: “Naghangyo ako, dili mahitungod kanila lamang, kondili mahitungod usab kanilang nagbutang ug pagtuo kanako pinaagi sa ilang pulong; aron nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato, aron nga ang kalibotan motuo nga ikaw nagpadala kanako.” (Juan 17:20, 21) Busa, ang tinuod nga panaghiusa diha sa espiritu ug kamatuoran mao ang nahimong dayag nga ilhanan sa mga tinun-an ni Kristo gikan sa sinugdanan hangtod sa atong panahon. (Juan 4:23, 24) Ugaling lang, ang Kakristiyanohan sa pagkakaron walay panaghiusa, kondili nabahinbahin. Ngano man?

Kon Nganong Nabahinbahin ang Kakristiyanohan

Ang prangkang rason kon nganong daghan kaayong nagkalainlaing tinuohan ug tulumanon taliwala sa nag-angkong mga Kristohanon karon mao nga wala nila sunda ang mga pagtulon-an ni Jesus. Ang usa ka magsusulat miingon: “Sama kaniadto, ang dawaton lang sa bag-ong mga Kristiyano karon gikan sa Bibliya mao kadtong mohaom sa ilang mga panginahanglan—ug dili panumbalingon ang bisan unsang kasulatan nga dili mahiuyon sa ilang lumad nga relihiyosong mga tradisyon.” Mao gayod kini ang gitagna ni Jesus ug sa iyang mga apostoles nga mahitabo.

Pananglitan, si apostol Pablo giinspirar sa pagsulat ngadto sa iyang kaubang magtatan-aw nga si Timoteo: “Aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran, samtang sila moliso ngadto sa bakak nga mga sugilanon.” Mapahisalaag kaha ang tanang Kristohanon? Dili. Si Pablo nagpadayon: “Apan, ikaw, maghupot ug maayong panghunahuna sa tanang butang, antosa ang daotan, himoa ang buluhaton sa usa ka tig-ebanghelyo, tumana sa bug-os ang imong ministeryo.” (2 Timoteo 4:3-5; Lucas 21:8; Buhat 20:29, 30; 2 Pedro 2:1-3) Si Timoteo ug ang ubang matinumanong mga Kristohanon nagkinabuhi subay nianang inspiradong tambag.

Nahiusa Gihapon ang Matuod nga mga Kristohanon

Sama ni Timoteo, ang matuod nga mga Kristohanon karon naghupot sa ilang maayong panghunahuna pinaagi sa pagsalikway sa tawhanong pangatarongan ug pinaagi lamang sa pagdawat sa Kasulatanhong awtoridad alang sa ilang doktrinal nga mga pagtulon-an. (Colosas 2:8; 1 Juan 4:1) Agig pagsundog sa mga Kristohanon sa unang siglo, ang mga Saksi ni Jehova nagatuman sa ilang ministeryo diha sa kapin sa 230 ka kayutaan, nga naghatod sa orihinal nga mensahe ni Jesus, ang maayong balita sa Gingharian, ngadto sa mga tawo sa tanang dapit. Tagda ang upat nga hinungdanong mga paagi nga sila nagkahiusa sa pagsundog kang Jesus ug sa pagsubay sa matuod nga Kristiyanidad bisag asa pa sila nagpuyo.

Ang ilang mga tinuohan gibase sa Pulong sa Diyos. (Juan 17:17) Usa ka kura paroko sa Belgium misulat bahin kanila: “Ang usa ka butang nga atong makat-onan kanila [mga Saksi ni Jehova] mao ang ilang pagkaandam sa pagpaminaw sa Pulong sa Diyos ug ang ilang kaisog sa pagsangyaw bahin niini.”

 Sila nagsalig sa Gingharian sa Diyos nga makasulbad sa mga suliran sa kalibotan. (Lucas 8:1) Sa Barranquilla, Colombia, dihay usa ka Saksi nga nakig-estorya kang Antonio, nga aktibong tigpaluyo sa usa ka politikanhong kalihokan. Ang Saksi wala modapig kaniya, ni magpasiugda ug laing politikanhong ideolohiya. Hinunoa, siya mitanyag sa pagtuon sa Bibliya uban kang Antonio ug sa iyang mga igsoong babaye nga walay bayad. Wala madugay naamgohan ni Antonio nga ang Gingharian sa Diyos mao lang gayod ang bugtong paglaom sa kabos nga mga tawo sa Colombia ug sa ubang bahin sa kalibotan.

Sila nagpasidungog sa ngalan sa Diyos. (Mateo 6:9) Sa dihang unang nahimamat sa mga Saksi ni Jehova si Maria, nga usa ka debotadong Katoliko nga nagpuyo sa Australia, misugot siya nga ipakita kaniya sa mga Saksi ang ngalan sa Diyos diha sa Bibliya. Unsay iyang reaksiyon? “Sa dihang una nakong nakita ang ngalan sa Diyos diha sa Bibliya, mihilak ako. Natandog kaayo ko sa pagkahibalo nga puwede diay nako nga mailhan ug magamit ang personal nga ngalan sa Diyos.” Si Maria nagpadayon sa pagtuon sa Bibliya, ug sa unang higayon sa iyang kinabuhi, iyang nailhan kon unsang matanga sa persona si Jehova ug nakatukod ug dumalayon nga relasyon uban kaniya.

Sila nahiusa sa gugma. (Juan 13:34, 35) Ang usa ka editoryal diha sa The Ladysmith-Chemainus Chronicle, sa Canada, mikomento: “Bisag unsa pay imong relihiyosong tinuohan, o ikaw ba kaha walay relihiyon, imo gayod nga madayeg ang 4,500 ka Saksi ni Jehova nga nagtrabahog 24-oras sa milabayng usa ka semana ug tunga sa pagtukod ug 2,300-metro-kuwadrado nga Assembly Hall sa Cassidy . . . Ang paghimo niini sa malipayong paagi nga walay panaglalis, panagsumpaki o pagtinguha ug personal nga himaya maoy usa ka timaan sa matuod nga Kristiyanidad.”

Busa hatagig pagtagad ang ebidensiya. Samtang ang mga teologo, misyonaryo, ug mga tigsimba sa Kakristiyanohan nagpadayon sa pagpakigbisog batok sa nagsingabot nga krisis diha sa ilang mga simbahan, ang matuod nga Kristiyanidad nagmalamboon sa tibuok kalibotan. Sa pagkatinuod, ang matuod nga mga Kristohanon nagatuman sa gitahas kanila nga ministeryo sa pagsangyaw ug pagtudlo sa Pulong sa Diyos. (Mateo 24:14; 28:19, 20) Kon ikaw apil niadtong “nagapanghupaw ug nagaagulo” tungod sa dulumtanang mga butang nga nagakahitabo karon ug natugaw tungod sa pagkabahinbahin sa mga relihiyon sa Kakristiyanohan, kami nagadapit kanimo sa pagduyog uban sa mga Saksi ni Jehova diha sa nahiusa nga Kristohanong pagsimba sa bugtong matuod nga Diyos, si Jehova. —Ezequiel 9:4; Isaias 2:2-4.