Ang Pagtuo Makaayo ba sa Masakiton?

SA DIHANG masakit, gusto natong mahupayan ug maayo. Lagmit, nahibalo ka gikan sa Bibliya nga subsob nga giayo ni Jesu-Kristo ang tanang matang sa balatian, nga nakahatag ug kahupayan sa daghang nag-antos. Sa unsang paagi nahitabo ang maong mga pagpang-ayo? Pinaagi sa “gahom sa Diyos,” nag-ingon ang Bibliya. (Lucas 9:42, 43; Buhat 19:11, 12) Busa, ang balaang espiritu nga gikan sa Diyos mao ang nakaayo, dili lamang ang pagtuo sa usa ka tawo. (Buhat 28:7-9) Mao kanay hinungdan kon nganong si Jesus wala magkinahanglan nga ang mga masakiton magpahayag ug pagtuo kaniya aron maayo.

Maghunahuna ka tingali: ‘Ang milagroso bang pagpang-ayo nahanaw na, o mahitabo ba pag-usab ang mga pagpang-ayo nga sama niadtong gihimo ni Jesus? Unsay paglaom niadtong nag-antos sa masakit o walay-kaayohan nga balatian?’

Ang Bibliya nag-ingon nga sa matarong nga bag-ong kalibotan sa Diyos, ang gahom sa Diyos magpahinabo pag-usab sa milagrosong pagpang-ayo nga gihimo ni Jesus samtang dinhi siya sa yuta. Ang mga Saksi ni Jehova sa inyong dapit malipay sa pagpakita kanimo kon sa unsang paagi ug kanus-a himoon sa Diyos ang dili gayod mahimo sa mga mananambal pinasukad sa pagtuo—ang pagwagtang sa tanang balatian, maingon man sa kamatayon. Oo, “lamyon gayod [sa Diyos] ang kamatayon hangtod sa kahangtoran.”—Isaias 25:8.