Kon sa Unsang Paagi Ikapakita Nato ang Atong Gugma Alang sa Diyos

ANG pag-ugmad sa gugma alang sa Diyos wala lamang magpasabot nga magbaton ug kahibalo bahin kaniya. Sumala sa mapamatud-an sa mga alagad sa Diyos sa tibuok kalibotan, ang tinuod nga gugma alang sa Diyos motubo sa dihang ang usa mahibalo sa iyang personalidad, ug kini molig-on pa gayod sa dihang ang usa ka tawo masinati kon unsay gihigugma, gidumtan, mga gusto ug mga kinahanglanon sa Diyos.

Sa kamahigugmaon, gihatag ni Jehova kanato ang iyang Pulong, ang Bibliya, diin gibutyag niya ang iyang kaugalingon. Gikan niana, atong nakat-onan kon giunsa pagdumala ni Jehova ang nagkalainlaing mga kahimtang. Sama nga ang usa ka sulat gikan sa usa ka minahal makapalipay kaayo kanato, sa ingon ang Bibliya makapalipay kanato sa dihang atong masabtan ang bag-ong mga bahin sa personalidad ni Jehova.

Ugaling lang, sama sa atong mamatikdan usahay diha sa atong pagsangyaw, ang pagkakat-on bahin sa Diyos dili kanunayng magtukmod sa usa ka tawo sa paghigugma kaniya. Si Jesus miingon sa ubang ingratong mga Hudiyo sa iyang panahon: “Kamo nagasusi sa mga Kasulatan, tungod kay kamo nagahunahuna nga pinaagi niini kamo makabaton ug kinabuhing walay kataposan; . . . apan nahibalo ako pag-ayo nga wala kamo makabaton sa gugma sa Diyos diha kaninyo.” (Juan 5:39, 42) Ang uban migugol ug mga tuig sa pagkat-on bahin sa mahigugmaong mga buhat ni Jehova apan bisan pa niana gamay ra ug gugma alang kaniya. Ngano? Kay napakyas sila sa pagpalandong sa nalangkit nga mga kamatuoran sa ilang nakat-onan. Sa baylo, milyonmilyong sinserong mga tawo nga atong ginatun-an sa Bibliya nakasinati nga ang ilang gugma alang sa Diyos nagatubo. Ngano? Tungod kay, sama sa atong gihimo, ilang gisunod ang panig-ingnan ni Asap. Sa unsang paagi?

Pamalandong sa Mapasalamatong Paagi

Determinado si Asap sa pag-ugmad sa gugma alang kang Jehova diha sa iyang kasingkasing. Siya misulat: “Sa akong kasingkasing magapakita ako ug kabalaka . . . Pagahinumdoman ko ang mga  binuhatan ni Jah; kay hinumdoman ko ang imong kahibulongang buhat sa dugay na kanhi. Ug palandongon ko gayod ang tanan mong kalihokan, ug ang imong mga pakiglabot akong hatagag pagtagad.” (Salmo 77:6, 11, 12) Ang gugma alang sa Diyos motubo diha sa kasingkasing sa usa ka tawo nga magpalandong sa mga paagi ni Jehova sama sa gihimo sa salmista.

Dugang pa, ang pagrepaso sa mga kasinatian nga atong natagamtam samtang nagaalagad kang Jehova magpalig-on sa atong relasyon uban kaniya. Si apostol Pablo miingon nga kita maoy “mga isigkamagbubuhat” sa Diyos, ug ang panaghigalaay nga mahimong motubo tali sa mga isigkamagbubuhat maoy espesyal kaayo. (1 Corinto 3:9) Sa dihang atong ipahayag ang atong gugma alang kang Jehova, iyang pabilhan kana, ug kini makapalipay sa iyang kasingkasing. (Proverbio 27:11) Dayon, sa dihang kita mangaliya alang sa tabang ni Jehova ug Iyang giyahan kita nga masulbad ang usa ka kalisdanan, kita mahibalo nga siya nagauban kanato, ug ang atong gugma alang kaniya molalom.

Ang panaghigalaay tali sa duha ka tawo maugmad samtang ilang ipahayag ang ilang pagbati sa usag usa. Sa susama, sa dihang kita mosulti kang Jehova kon nganong kita debotado ngadto kaniya, atong mapalig-on ang atong gugma alang kaniya. Atong mapalandong ang mga pulong ni Jesus: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:30) Unsay atong mahimo sa pagtino nga kita magpadayon sa paghigugma kang Jehova sa tibuok natong kasingkasing, kalag, hunahuna, ug kusog?

Paghigugma Kang Jehova sa Tibuok Natong Kasingkasing

Ang Kasulatan naghisgot sa masambingayong kasingkasing, nga mao ang pagkatawo sa sulod—ang atong mga tinguha, tinamdan, ug mga pagbati. Busa ang paghigugma kang Jehova sa tibuok natong kasingkasing nagpasabot nga labaw sa tanang butang, atong gitinguha nga mapahimut-an ang Diyos. (Salmo 86:11) Atong ipakita nga ania kanato ang maong gugma pinaagi sa paghimo sa atong personalidad nga dalawaton kaniya. Kita maningkamot sa pagsundog sa Diyos pinaagi sa ‘pagkasilag sa daotan ug paghawid sa maayo.’—Roma 12:9.

Ang atong gugma alang sa Diyos moapektar sa atong pagbati sa tanang butang. Pananglitan, basin atong makita nga ang atong trabaho makaiikag o makakuha sa atong dakong pagtagad, apan anaa ba diha ang atong kasingkasing? Wala. Kay kita nahigugma kang Jehova sa tibuok natong kasingkasing, sa panguna kitang tanan maoy mga ministro sa Diyos. Sa susama, buot natong pahimut-an ang atong mga ginikanan, kapikas sa kaminyoon, ug ang atong amo, apan labaw sa tanan atong mapamatud-an ang atong tibuok-kasingkasing nga gugma kang Jehova pinaagi sa pagpahimuot kaniya. Kon buot sabton, siya takos sa unang bahin diha sa atong kasingkasing.—Mateo 6:24; 10:37.

Paghigugma Kang Jehova sa Tibuok Natong Kalag

Diha sa Kasulatan ang pulong “kalag” sa paninugdan nagtumong sa atong tibuok nga pagkatawo ug sa atong kinabuhi mismo. Busa ang paghigugma kang Jehova sa tibuok  natong kalag nagpasabot nga gamiton nato ang atong kinabuhi sa pagdayeg kaniya ug sa pagpamatuod sa atong gugma alang kaniya.

Siyempre, mahimong kita adunay laing gikaikagan sa kinabuhi, sama sa pagkat-on ug trabaho, pagpadagan ug negosyo, o pagmatutuo ug pamilya. Apan sa samang panahon, atong mapamatud-an ang atong tibuok-kalag nga gugma kang Jehova pinaagi sa pagbuhat sa mga butang sumala sa iyang paagi ug sa paghupot sa ubang butang diha sa hustong dapit niini sa atong kinabuhi, sa ingon ‘nagapangita pag-una sa gingharian ug sa iyang pagkamatarong.’ (Mateo 6:33) Ang tibuok-kalag nga pagsimba nagkahulogan usab nga kita magmasiboton. Atong ipakita kang Jehova nga kita nahigugma kaniya pinaagi sa madasigong pagsangyaw sa mensahe sa Gingharian, paghatag ug makapadasig nga mga komento diha sa mga tigom, o pagtabang sa atong Kristohanong mga igsoon. Sa tanang butang, kita magpadayon nga ‘tibuok-kalag nga nagabuhat sa kabubut-on sa Diyos.’—Efeso 6:6.

Gipakita ni Jesus ang tibuok-kalag nga gugma alang sa Diyos pinaagi sa pagdumili sa iyang kaugalingon. Iyang giuna ang kabubut-on sa Diyos ug ikaduha ang iyang personal nga mga panginahanglan. Gidapit kita ni Jesus sa pagsunod sa iyang panig-ingnan. Siya miingon: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24, 25) Ang pagdumili sa atong kaugalingon nagpasabot sa pagpahinungod. Kini nagpasabot nga gimahal nato pag-ayo ang Diyos nga nagtugyan sa atong kaugalingon aron iyang panag-iyahon, sama nga ang usa ka Israelinhon sa mga panahon sa Bibliya nga nahigugma pag-ayo sa iyang agalon nga permanenteng nag-obligar sa iyang kaugalingon ngadto sa iyang agalon ingong usa ka ulipon. (Deuteronomio 15:16, 17) Ang pagpahinungod sa atong kinabuhi kang Jehova maoy usa ka makapakombinsir nga pamatuod nga kita nahigugma kaniya.

Paghigugma Kang Jehova sa Tibuok Natong Hunahuna

Ang paghigugma kang Jehova sa tibuok natong hunahuna nagpasabot nga kita maningkamot pag-ayo sa pagsabot sa personalidad, mga katuyoan, ug mga kinahanglanon ni Jehova. (Juan 17:3; Buhat 17:11) Kita nagapahayag sa atong gugma kang Jehova pinaagi sa paggamit sa tibuok natong panghunahuna sa pagtabang sa uban sa paghigugma usab kang Jehova ug pinaagi sa pagpauswag sa atong arte sa pagpanudlo. “Andama ang inyong kaisipan alang sa buluhaton,” miawhag si apostol Pedro. (1 Pedro 1:13) Maningkamot usab kita sa pagpakitag interes sa uban, ilabina sa mga isigkaalagad sa Diyos. Nahibalo kita sa ilang mga kahimtang ug nagmatikod sa dihang ang komendasyon angayng ihatag o sa dihang ang paghupay kinahanglanon.

Ipakita nato kang Jehova nga kita nahigugma kaniya sa tibuok natong hunahuna kon atong ipasakop kaniya ang atong hunahuna. Maningkamot kita sa pagbaton sa iyang panghunahuna sa mga butang, nga tagdon siya sa dihang kita mohimog mga desisyon, ug sa pagsalig nga ang iyang paagi mao ang labing maayo. (Proverbio 3:5, 6; Isaias 55:9; Filipos 2:3-7) Apan samtang magpadayon kita sa pagpakita sa atong gugma alang sa Diyos, sa unsang paagi magamit nato ang atong kusog?

Paghigugma Kang Jehova sa Tibuok Natong Kusog

Daghang batan-on sa Kristohanong kongregasyon ang naggamit sa ilang kusog sa pagdayeg kang Jehova. (Proverbio 20:29; Ecclesiastes 12:1) Ang usa ka paagi nga niana ang daghang batan-ong mga Kristohanon nagpakita nga sila nahigugma kang Jehova sa tibuok nilang kusog maoy pinaagi sa pagpayunir, ang tibuok-panahong pag-alagad. Daghang inahan misulod niining maong ministeryo samtang ang ilang mga anak atua sa eskuylahan. Ang matinumanong mga ansiyano nga nagaduaw sa mga igsoon gawas pa sa ilang pag-atiman sa ilang pamilya nagpakita nga sila nahigugma kang Jehova sa tibuok nilang kusog. (2 Corinto 12:15) Si Jehova magpalig-on niadtong nagalaom kaniya, aron sila makapakita sa ilang gugma pinaagi sa pagdayeg kaniya, nga maggamit sa bisan unsang kusog nga anaa kanila.—Isaias 40:29; Hebreohanon 6:11, 12.

Ang gugma motubo kon ugmaron sa hustong paagi. Busa, magpadayon kita sa paggahin ug panahon sa pagpamalandong. Atong hinumdoman ang nahimo ni Jehova alang kanato ug kon nganong angay siya sa atong debosyon. Ingong dili-hingpit nga mga kaliwat ni Adan, dili gayod kita mahimong takos sa “mga butang nga giandam sa Diyos alang kanilang nahigugma kaniya,” apan ikapakita nato nga kita nahigugma kang Jehova uban sa tibuok natong pagkatawo. Magpadayon kita sa pagbuhat niana!—1 Corinto 2:9.

[Hulagway sa panid 20]

Atong ikapahayag ang atong gugma alang sa Diyos pinaagi sa atong mga lihok